‘Iehova ese Aonega Ia Henia Noho’

EDENA tahua gaudia ese oiemu nega bona goada ia haorea noho? Sibona emu ladana oi habadaia karana be gau badana oi dekenai, a? Emu goada oi henia emu taga oi habadaia totona, a? Bisinesi ta dekenai moni gaukara oi karaia goadagoada noho eiava kosi ta dekenai emu diba oi habadaia noho, a? Emu hetura karana ma haida ida oi hagoadaia noho be gau badana oi dekenai, a? Oi laloa bada gauna be oiemu tauanina ia namo noho, a?

Toana be unai gaudia ibounai be mai edia namo danu. To mai anina bada gauna be dahaka? Baibel ese haere ia henia, ia gwau: “Gau badana momokani be aonega. . . . Do oi abia.” (Aonega Herevadia 4:⁠7) Unai dainai, aonega be edena bamona ita abia diba, bona ena namo idauidau be dahaka? Baibel bukana ta, Aonega Herevadia, ena karoa iharuana ese edia haere ia henia.

“Aonega Herevadia Do Oi Kamonai”

Tamana ta mai ena lalokau ia hereva bamona, idaunegai Israela ena King Solomona ia gwau: “Egu natuna e, lau, aonega, egu hadibaia hereva do oi tahua, bona egu oda do oi laloaboio lasi. Aonega herevadia do oi kamonai, bona oiemu kudouna ese laloa kehoa do ia ura henia. Bema oi ese [lalo-parara] totona oi noinoi, bona bema laloa kehoa totona oi boiboi goada, bema oi tahua, siliva do oi tahua bamona, bema oi tahua goada, kohu momo, idia hunia gaudia, do oi tahua bamona, unai neganai Lohiabada gari henia kara do oi diba, bona Dirava do oi diba.”​—⁠Aonega Herevadia 2:​1-5.

Oi itaia diba aonega abia ena maduna be daika ena, a? Unai siri lalodiai, inai hereva “bema oi” be nega toi ia hedinarai. Ia hahedinaraia goevagoeva, aonega bona ia idia durua gaudia​—⁠laloa kehoa bona lalo-parara​—⁠be ita ta ta sibona eda ura hegeregerena do ita tahua. Gau ginigunana be unai aonega herevadia Baibel lalonai do ita “tahua” bona abia, bena do ita “laloaboio lasi.” Unai dainai Baibel do ita stadilaia be gau badana.

Aonega be dala maorona ai Dirava amo ia mai dibana gaukaralaia karana. Bona Baibel be dala namo herea ai ita dekenai aonega ia henia! Oibe, ia lalonai aonega herevadia idia noho, hegeregere Aonega Herevadia bona Hadibaia Tauna bukadia dekenai idia torea gaudia, bona unai hereva ita lalodia namonamo be gau badana. Baibel lalonai sivarai momo ita davaria danu, bona unai ese Dirava ena hakaua herevadia ita badinaia ena namo bona ita laloa lasi ena dika idia hahedinaraia. (Roma 15:4; 1 Korinto 10:11) Hegeregere, peroveta tauna Elisaia ena mataganigani hesiai tauna, Gehasi, ena sivarai mani ita laloa. (2 King Taudia 5:​20-​27) Ita ia hadibaia mataganigani dadaraia be aonega karana, ani? Bona Iakobo ena natuna Daina ese Kanana “tano dekenai noho hahine haida” ia vadivadi henia karana, toana be dika do ia havaraia lasi gauna, dainai ia vara dika badana be edena bamona? (Genese 34:​1-31) Ita diba momokani, hebamo dikana karaia be aonega lasi karana, ani?​—⁠Aonega Herevadia 13:20; 1 Korinto 15:⁠33.

Aonega ita tahua ena anina be laloa kehoa bona lalo-parara do ita abia. Webster’s Revised Unabridged Dictionary ia gwau laloa kehoa (discernment) be “lalona ena goada eiava gaukara ta, unai ese gau ta ena idau ma gau ta amo ia hahedinaraia.” Dirava ia henia laloa kehoa karana be kerere bona maoro edia idau dibaia bena unai amo dala maorona abia hidi karana. Bema iseda “kudouna ese laloa kehoa do ia ura henia” lasi eiava ita abia totona eda ura ia goada lasi, “mauri gabuna ia lao dalana” ai edena bamona ita raka noho diba? (Mataio 7:14; mani Deuteronomi 30:​19, 20 itaia.) Dirava ena Hereva stadilaia bona badinaia karana ese laloa kehoa ia havaraia.

Edena dala ai gau ta ena kahana ena anina ma kahana ta dekenai bona ena anina unai gauna ibounai dekenai ita dibaia karana eiava ‘lalo-parara totona ita noinoi’ diba? Momokani, mauri lagani momo bona diba momo be ita idia durua diba eda lalo-parara ita habadaia totona​—⁠to unai be nega ibounai ia vara lasi. (Iobu 12:12; 32:​6-​12) Salamo torea tauna ia gwau: “Egu aonega ese tau buruka edia aonega ia hereaia noho, badina be oi Dirava, oiemu oda hereva lau badinaia noho.” Inai ane ia abia danu: “Oiemu hereva hadibaia kara ese diari ia havaraia noho, bona oiemu hereva dekena amo, diba lasi taudia ese [lalo-parara] idia davaria.” (Salamo 119:​100, 130) Iehova be “Mauri Noho Hanaihanai Tauna,” bona ia ena lalo-parara ese taunimanima iboudiai edia lalo-parara ia hereaia momokani. (Daniela 7:​13) Dirava ese diba lasi tauna dekenai lalo-parara ia henia diba, unai amo ena lalo-parara ese mauri lagani momo taudia edia lalo-parara ia hanaia danu. Unai dainai, namona be Dirava ena Hereva, Baibel, ita stadilaia goadagoada bona badinaia.

Aonega Herevadia ena karoa iharuana ena hamatamaia herevadia lalonai inai hereva “bema oi” ia hedinarai loulou lalonai, hereva haida, hegeregere “tahua,” “laloaboio lasi,” “noinoi,” bona “tahua goada” idia gwauraia danu. Dahaka dainai torea tauna ese unai bamona hereva goadadia ia gaukaralaia? Buka ta ia gwau: “Unai aonega tauna be [iniseniai] mai ura bada ida aonega tahua karana ia herevalaia.” Oibe, mai eda ura bada ida aonega bona ia bamona karadia​—⁠laloa kehoa bona lalo-parara ita tahua be gau badana.

Abia Totona Do Oi Gaukara Goada, A?

Aonega tahua karana lalonai mai anina bada karana ta be Baibel stadilaia goadagoada karana. To, unai stadi be diba abia totona duahiduahi karana sibona lasi. Anina tahua totona ita duahia gauna ita laloa dobu be Baibel stadilaia karana ena kahana badana ta. Aonega bona laloa kehoa habadaia totona, namona be hekwakwanai hamaoromaoroa bona dala abia hidi negadiai, ita dibaia noho gauna do ita gaukaralaia dalana ita laloa namonamo. Lalo-parara habadaia ena anina be ita diba vadaeni gauna dekenai gau matamatana ita hakapua dalana ita laloa. Unai bamona laloa namonamo stadi lalonai nega bona goada bada do ita haorea be ta ese ia gorea diba lasi, ani? Unai nega bona goada haorea dalana be “siliva” bona “kohu momo, idia hunia gaudia, do oi tahua” neganai oi karaia bamona. Unai bamona oi hekwarahi bada diba, a? “Nega namona” do oi atoa unai oi karaia totona, a?​—⁠Efeso 5:​15, 16.

Bema mai eda momokani ida Baibel ena anina ita geia, mani unai kohu namodia momo herea do ita davaria oi laloa. Oibe, ‘Dirava do ita diba’​—⁠ita ia Havaraia Tauna do ita diba namonamo bona maoromaoro, mauri havaraia dibana unai! (Ioane 17:⁠3) “Lohiabada gari henia kara” be kohu namona ta danu. Mai hemataurai danu ia ita gari henia be dava bada gauna bamona! Ia ita habadua garina ita gari karana namona be iseda mauri dalana ibounai do ia biagua be gau badana, unai amo lauma gaudia be mai anina bada ita karaia gaudia ibounai dekenai.​—⁠Hadibaia Tauna 12:⁠13.

Namona be eda lalona dekenai ita ura dikadika lauma kohudia ita tahua bona geia. Iseda tahua gaukarana durua totona, Iehova ese tulu namodia lauma gaudia geia totona ia henia​—⁠nega korikori ai idia halasia Gima Kohorona bona Awake! magasin, bona Baibel herevalaia bukadia ma haida danu. (Mataio 24:​45-​47) Iehova ena Hereva bona ena dala ita diba totona, ia ese Keristani heboudia ia henia danu. Namona be unai hebou ibounai dekenai ita lao hanaihanai, idia gwauraia herevadia ita kamonai namonamo, namona be ita hekwarahi lalohadai badadia ita tahua bona laloatao totona, bona iseda hetura karana Iehova ida ita laloa namonamo.​—⁠Heberu 10:​24, 25.

Anina Do Oi Davaria Momokani

Nega momo, dava bada nadidia, golo, eiava siliva idia tahua neganai anina idia davaria lasi. To, dava bada lauma kohudia tahua karana be unai bamona do ita gwauraia lasi. Dahaka dainai? Solomona ese ita ia hamaoroa, ia gwau: “Lohiabada ese aonega, be oi dekenai ia henia noho, bona iena uduna dekena amo, diba bona laloa kehoa idia mai noho.”​—⁠Aonega Herevadia 2:⁠6.

King Solomona ena aonega dainai taunimanima momo be ia idia diba. (1 King Taudia 4:​30-​32) Baibel ese ia hahedinaraia gau idauidau, hegeregere tubutubu gaudia, animal, taunimanima edia mauri, bona Dirava ena Hereva dekenai ena diba be bada. Ia be king matamata negana ai hahine rua, ta ta ia gwau ia be unai natuna tamona ena sinana, edia hepapahuahu ia hamaoromaoroa neganai ia hahedinaraia laloa kehoa karana ese ena ladana gabu ibounai dekenai ia habadaia. (1 King Taudia 3:​16-​28) Ia dibaia gaudia ibounai be daika amo idia mai? Solomona be “aonega bona diba” abia totona bona “namo bona dika edia idau do [ia] diba totona” Iehova dekenai ia guriguri. Iehova ese ia dekenai unai gaudia ia henia.​—⁠2 Sivarai 1:​10-​12; 1 King Taudia 3:⁠9.

Ita danu be Iehova ena Hereva ita stadilaia goadagoada lalonai, iena heduru ita noia be namo. Salamo torea tauna ia guriguri, ia gwau: “Lohiabada e, oiemu dala lau dekenai do oi hadibaia, bona lau be oiemu momokani lalonai do lau raka. Lauegu lalona do oi hatamonaia momokani, vadaeni lau ese oiemu ladana do lau matauraia bona gari henia.” (Salamo 86:11) Iehova ese unai guriguri ia abia dae, badina Baibel dekenai idia torea. Ita diba momokani, Baibel lalonai davana bada lauma kohudia ita abia totona mai eda ura bada ida bona hanaihanai Iehova ena heduru ita noia neganai, iseda guriguri do ia haerelaia.​—⁠Luka 18:​1-8.

Solomona ia gwau: “Dirava ese kara maoromaoro mai laloa momokani taudia, ia durua bona ia gimaia noho. Dirava ese, mai maoromaoro danu taunimanima idia durua taudia, be ia gimaia noho, bona iena helaga momokani taudia edia dala, be ia naria namonamo noho. Bema oi ese lau, aonega, dekenai oi kamonai henia neganai, oi be kara maoromaoro, kota maorona, bona davana korikori henia dalana do oi diba. Dala namodia ibounai karaia dalana danu do oi diba.” (Aonega Herevadia 2:​7-9) Unai be iseda lalona ia hagoadaia momokani herevana! Iehova ese aonega idia tahua momokani taudia dekenai aonega ia henia sibona lasi, to Ia be kesi bamona unai kara maoromaoro taudia ia gimaia, badina idia ese aonega bona ia gwauraia kara maoromaoro taravatudia idia badinaia namonamo. Namona be ita danu be Iehova ese ia durudia “dala namodia ibounai karaia dalana” idia lalo-pararalaia taudia huanai ita noho.

‘Diba ese Oi Do Ia Hamoalea’ Negana

Sibona eda Baibel stadi karana​—⁠aonega tahua karana badana ta​—⁠be taunimanima momo ese idia moalelaia haraga karana ta lasi. Hegeregere, mauri lagani 58 tauna Lawrence ia gwau: “Lau be hanaihanai imana gaukara lau karaia. Lau dekenai stadi karana be auka.” Bona mauri lagani 24 tauna Michael, sikuli dekenai stadi karana ia moalelaia lasi tauna, ia gwau: “Lau sibona lau doria, do lau helai bona stadi totona.” To, stadi urana be do ita habadaia diba.

Michael ia karaia gauna mani oi laloa. Ia gwau: “Lau sibona lau biagua namonamo, dina ta ta ai hora ena kahana ta lalonai do lau stadi totona. Gabeai unai kara ena namo be egu lalohadai, egu haere Keristani heboudia dekenai, bona ma haida ida lau herevahereva karana lalonai lau itaia. Hari lau be egu stadi negadia lau ura henia, bona lau ura lasi gau ta ese unai nega ia hadikaia.” Oibe, sibona eda stadi ena namo ita itaia neganai, ia be ita goadalaia bona moalelaia karana ta ai ia lao. Lawrence danu be Baibel stadi ia karaia bona, gabeai, Iehova ena Witness taudia edia kongregesen ta ena elda tauna ta ai ia lao.

Sibona eda stadi ita moalelaia totona, ita hekwarahi noho be namo. To, ena namo be bada herea momokani. Solomona ia gwau: “Oi ese aonega do oi davaria, bona inai diba ese oiemu laumana do ia hamoalea. Oiemu laloa kehoa bona oiemu diba maoro ese, oiemu mauri do idia naria namonamo.”​—⁠Aonega Herevadia 2:​10, 11.

“Kara Dikadia Dekena amo, Oi Do Idia Hamauria”

Edena dala ai aonega, diba, laloa namonamo karana, bona laloa kehoa ese ta idia gimaia diba? Solomona ia gwau: “[Idia ese] kara dikadia dekena amo, oi do idia hamauria, ma edia hereva dekena amo kerere idia havaraia taudia, dekena amo danu oi do idia hamauria. Inai dika taudia ese, kara maoromaoro daladia idia rakatania, bona dibura daladia lalonai idia raka noho. Idia be kara dika karadia dekenai idia moale noho, bona kara dika ena dala gagevagageva, be idia ura henia bada noho. Edia kara ibounai be gagevagageva bona kerere.”​—⁠Aonega Herevadia 2:​12-15.

Oibe, aonega momokani idia abia taudia ese “hereva dekena amo kerere idia havaraia taudia,” edia hereva be maoro bona momokani gaudia amo idia idau taudia, edia hebamo idia dadaraia. Laloa namonamo bona laloa kehoa ese hereva momokani idia negea bena dibura dalana ai idia raka taudia amo bona kara koikoi bona kara dika idia moalelaia taudia amo idia ia gimaia.​—⁠Aonega Herevadia 3:​32.

Ita moale badina aonega momokanina bona ia bamona karadia ese lebulebu tatau bona hahine amo ita idia gimaia! Solomona be ma ia gwau unai kara ese “heudahanai hahine dekena amo oi do ia hamauria, bona ariara hahine ena koikoi hereva dekena amo danu. Unai hahine ese iena adavana ia rakatania, bona Dirava ena vairana dekenai, ia gwauraia gwauhamata ia laloaboio. Bema iena ruma dekenai oi lao neganai, oi be mase dalana dekenai oi raka noho. Unai dala be mase taudia edia gabu, dekenai ia lao noho. Unai hahine dekenai idia lao taudia, be ta ese do ia giroa mai lasi mauri dalana dekenai.”​—⁠Aonega Herevadia 2:​16-19.

Unai “heudahanai hahine [“idau hahine,” NW ]” ariara hahinena, ese “iena adavana ia rakatania”​—⁠reana ia be hahine matamata negana ai ia adavaia tauna.a (Malaki 2:​14 itaia.) Ia ese gwauhamata Taravatuna lalonai ia noho heudahanai taravatuna ia laloaboio. (Esodo 20:14) Iena raka dalana be mase dekenai ia lao noho. Ia idia bamoa taudia be reana “do [idia] giroa mai lasi mauri dalana dekenai,” badina daudau lasi ia be mase do ia davaria, bona unai gauna amo do ia giroa lou diba lasi. Laloa kehoa bona laloa namonamo tauna be heudahanai ena tarapu ia diba bona mai aonega ida ia raka siri, unai ese do ia guia garina.

‘Kara Maoromaoro Taudia be Tano Dekenai Do Idia Mauri Noho’

Solomona ese dokonai aonega ia sisibalaia ena badina ia gwauraia neganai, ia gwau: “Unai dainai taunimanima namodia, edia dala dekenai do oi raka, bona kara maoromaoro taudia edia dala do oi badinaia.” (Aonega Herevadia 2:20) Aonega ita abia ena badina be namo herea! Ita ia durua Dirava ia abia dae maurina hegeregerena mauri do ita moalelaia.

‘Taunimanima namodia edia dala dekenai idia raka’ taudia edia hahenamo badadia mani oi laloa. Solomona be ma ia gwau: “Badina be kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.” (Aonega Herevadia 2:​21, 22) Namona be oi be unai laloa maoromaoro taudia ta, Dirava ena kara maoromaoro tanobadana ai do idia noho hanaihanai taudia ta.​—⁠2 Petero 3:​13.

[Footnote]

[Picture on page 26]

Solomona be aonega totona ia guriguri. Namona be ita danu be unai bamona ita karaia