“Sivarai Namona” Apokalips Amo
“Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia.”—APOKALUPO 14:6.
1. Ena be Iehova ena Witness taudia idia abia dae Apokalupo bukana be Dirava ena lauma helaga amo ia vara, to dahaka dainai idia be “apokalips oreana” lasi?
ENA be haida ese idia gwauraidia dika, to Iehova ena Witness taudia be “apokalips oreana” eiava “do ia vara dika dinana idia laloa bada tomadiho oreana” ta lasi. To, idia abia dae Apokalips, eiava Apokalupo bukana, be Dirava ena Hereva ena kahana ta. Momokani, Apokalupo be kara dika taudia dekenai hahemaoro herevadia ia gwauraia. To, taunimanima dekenai idia haroro neganai, Dirava ena hesiai taudia ese Baibel lalonai ia noho helaro namona idia herevalaia momo, Apokalips, eiava Apokalupo, lalonai ia noho sivaraina danu. Unai amo, idia ese Baibel lalonai idia noho peroveta herevadia dekenai hereva ma haida idia atoa kau eiava idia kokia lasi.—Apokalupo 22:18, 19.
Sivarai Namona Harorolaia Taudia
2. Iehova ena Witness taudia edia haroro gaukarana lalonai edena siri haida idia gaukaralaia momo?
2 Baibel amo edia haroro gaukarana ena badina idia hamomokania totona, Iehova ena Witness taudia be nega momo Iesu ena hereva idia gwauraia: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Bona unai “Basileia ena Sivarai Namona” be dahaka? Witness taudia momo idia haere neganai, idia ese Apokalupo karoa 20 bona 21 edia hereva do idia gwauraia, unai siri ese Keriso ena Lagani 1000 Lohia Negana bona ena Basileia gavamanina bona taunimanima edia orea idia herevalaia, bona unai neganai mase, taitai, bona hisihisi be do “idia ore.”—Apokalupo 20:6; 21:1, 4.
3 Iehova ena Witness taudia be unai sivarai namona idia harorolaia taudia, unai dainai idia be guba aneruna ena hereva idia halasia taudia, Apokalupo ese unai aneru ena gaukara ia herevalaia, ia gwau: “Aneru ma ta lau itaia, guba ena ataiai ia roho lao. Iena gaukara be, noho hanaihanai Sivarai Namona do ia gwauraia hedinarai. Taunimanima ibounai dekenai ia gwauraia, bese ibounai, iduhu ibounai, gado ibounai bona kopina idauidau ibounai taudia.” (Apokalupo 14:6) “Noho hanaihanai Sivarai Namona” lalonai “tanobada biagua siahuna [o, basileia] be iseda Lohiabada bona iena Keriso idia abia vadaeni” bona Iehova ena “nega ia ginidae vadaeni” ‘tanobada idia hadikaia vadaeni taudia do ia alaia ore’ totona. (Apokalupo 11:15, 17, 18) Unai be sivarai namo hereana, ani?
Apokalupo Ena Hereva Ita Dekenai
4 Apokalupo ia hamatamaia karoana ese Iehova be “Alepa bona Omega,” “harihari ia noho, gunaguna ia noho, bona gabeai do ia mai tauna, Siahu Ibounai Diravana” ia gwauraia. Bona ena Natuna, Iesu Keriso, be “Dirava ena hereva ia gwauraia maoromaoro tauna namona,” “mase dekena amo ia toreisi lou vara guna tauna,” bona “tanobada ena king ibounai edia biaguna” bamona ia gwauraia. Danu ia gwau Iesu ese “ita ia lalokau henia, bona iena rarana dekena amo iseda kara dika ia huria ore vadaeni.” (Apokalupo 1:5, 8) Ena matamana ai, Apokalupo bukana ese hahemauri hereva momokanidia ia gwauraia hedinarai. Bema “taunimanima” be Iehova ena lohia siahuna idia abia dae lasi, Iesu ese ia bubua rarana idia abidadama henia lasi, bona Iehova ese ia hatorea isi lou bona hari tanobada Lohiaia tauna ai ia halaoa vadaeni idia abia dae lasi, sivarai namona amo namo do idia davaria lasi.—Salamo 2:6-8.
5. Apokalupo karoa 2 bona 3 lalonai Iesu ena gaukara be edena bamona idia herevalaia?
5 Karoa 2 bona 3 idia hahedinaraia Iesu Keriso be guba amo tanobada dekenai idia noho hahediba taudia edia kongregesen ia naridia lalokau tauna. Aposetolo edia negai, Asia Minor dekenai idia noho Keristani kongregesen 7 dekenai ia torea lokua bukadia be mai edia hahegoada herevadia bona sisiba aukadia, bona hari inai negai danu idia be mai edia anina. Kongregesen ta ta dekenai ia siaia herevadia be inai bamona hereva amo idia matamaia, “Oiemu kara lau diba” eiava “Oiemu hisihisi bona metau lau diba.” (Apokalupo 2:2, 9) Oibe, Keriso be ena hahediba taudia edia kongregesen lalodiai idia vara gaudia ia diba goevagoeva. Haida ia hanamodia edia lalokau, abidadama, hesiai gaukara, haheauka, bona ena ladana bona ena hereva idia badinaia dainai. Haida ia gwau henidia badina edia lalokau Iehova bona ena Natuna dekenai ia keru, eiava matabodaga karadia, kaivakuku tomadiho henia karadia, eiava hereva momokani negea karana idia karaia dainai.
6 Karoa 4 ese Iehova Dirava ena guba terona ena hairai bada ena matahanai ia herevalaia. Ia ese Iehova ena noho ena hairai bona do ia gaukaralaia guba gavamani ena lohia dalana ia hahedinaraia. Lohia taudia mai edia korona edia terona ese tanobada bona guba ena terona badana idia gegea, idia ese Iehova idia tomadiho henia bona idia gwau: “Aiemai Lohiabada, aiemai Dirava e, oi be hegeregere momokani vadaeni, taunimanima ibounai ese hairai bona mataurai, be oi dekenai do idia henia, bona oiemu siahu henunai do idia noho. Badina gau ibounai be oi ese oi havaraia. Oiemu ura dainai oi karadia, bona oiemu ura dainai idia noho.”—Apokalupo 4:11.
7. (a) Aneru ese tanobada taudia ia hamaoroa dahaka idia karaia totona? (b) Iseda hadibaia gaukarana ena badina badana be dahaka?
7 Unai be mai anina inai negai idia noho taudia dekenai, a? Oibe. Bema idia ura Lagani 1000 ia lohia Basileiana henunai idia mauri noho, namona be “guba ena ataiai ia roho lao” aneruna ena hereva do idia badinaia: “Dirava do umui gari henia, ia do umui hanamoa bada, badina be Dirava ese taunimanima ibounai do ia kota henia ena nega ia ginidae vadaeni.” (Apokalupo 14:6, 7) Iehova ena Witness taudia edia Baibel hadibaia gaukarana ena badina badana be “taunimanima ibounai” idia durua Iehova do idia dibaia bona idia tomadiho henia, do idia abia dae ia be gau ibounai ia Havaraia Tauna, bona mai moale ida ena lohia siahu maorona henunai do idia noho.
Mamoe Natuna Ia Hegeregere Hemataurai Abia Totona
8. (a) Karoa 5 bona 6 ese Keriso be edena bamona idia hahedinaraia? (b) Unai matahanai amo sivarai namona idia kamonai taudia ibounai ese dahaka idia dibaia diba?
8 Karoa 5 bona 6 ese Iesu Keriso be Mamoe Natuna ena toana bamona idia hahedinaraia, bona ia hegeregere mai ena koua toana 7 lokua bukana do ia kehoa, bona laulau dalanai iseda nega lalonai idia vara gaudia do idia hedinarai. (Ioane 1:29 itaia.) Unai Mamoe Natuna dekenai, guba taudia idia gwau: “Oi be hegeregere momokani buka do oi abia, bona koua toana do oi hamakohia. Badina be oi idia alaia mase, bona oiemu rarana dekena amo taunimanima oi hoidia, Dirava ena taudia do idia lao totona. Bese ibounai, gado ibounai, hanua ibounai, bona kopina idauidau taudia ibounai oi ese oi hoidia. Oi ese idia oi haboua, vadaeni idia be Basileia ta. Bona Dirava ena hahelagaia taudia, be oi ese idia oi halaoa vadaeni, bona idia ese tanobada do idia gunalaia.” (Apokalupo 5:9, 10) Unai matahanai ese ita ia hadibaia Keriso ese ia bubua rarana dainai, Dirava ese tano idauidau taudia haida ia boiria Iesu ida guba dekenai do idia noho bona “tanobada do idia gunalaia.” (Apokalupo 1:5, 6 itaia.) Edia namba maragina be Apokalupo ese gabeai ia hahedinaraia.
9. Karoa 6 ese Iesu be edena bamona ia gwauraia?
9 Matahanai ma ta lalonai, Keriso be korona ia atoa bona hosi kurokurona latanai ia guia tauna bamona ia hedinarai, bona ia be “mai goada danu ia lao, do ia kwalimu totona.” Ita moale diba, badina Apokalupo ena hosi guia taudia ma toi ese idia laulaulaia dika do ia haoredia, edia heau ese unai lagani badana 1914 amo taunimanima dekenai tuari, hitolo, bona mase idia mailaia. (Apokalupo 6:1-8) Keriso, Dirava ena Mamoe Natuna, ena dagi badana unai, taunimanima hamauridia bona Iehova ena ura namodia hagugurua totona be Iehova ena Witness taudia edia Baibel hadibaia gaukarana lalonai idia hadibaia sinado badana ta.
10 Karoa 7 be sivarai namo hereana ia herevalaia. Apokalupo bukana sibona lalonai Iesu ese ia gwauraia “orea maragi” ena namba ita davaria diba, Mamoe Natuna ena Tamana ese idia dekenai Basileia ia henia. (Luka 12:32; 22:28-30) Iehova Dirava ese ena lauma amo idia dekenai ia maka karaia vadaeni. (2 Korinto 1:21, 22) Aposetolo Ioane, Apokalupo bukana ena matahanai ia abia tauna, ia gwau: “Lau kamonai, Dirava ena maka idia abia taudia edia momo be 144,000.” (Apokalupo 7:4) Gabeai karoa ta ese unai namba ia hamomokania, ia gwau idia be “tanobada dekena amo ia hamauria,” Mamoe Natuna ida guba ena Siona Ororona ai idia lohia totona. (Apokalupo 14:1-4) Ena be Kerisendom ena dubu idauidau ese unai namba ena anina idia gwauraia hedinarai maoromaoro lasi bona taunimanima ese idia lalo-pararalaia dalanai idia hahedinaraia lasi, to hoa gauna be Baibel ia tahua diba bada tauna E. W. Bullinger ese ia herevalaia, ia gwau: “Ia be auka lasi herevana ta: unai karoa lalonai namba korikorina ta be namba korikorina lasi ida ia hedinarai.”
11 Bullinger be edena namba korikorina lasi ia herevalaia? Siri 9 lalonai aposetolo Ioane ia gwau: “Unai gaudia murinai lau roha lao, bona, itaia! hutuma bada herea, tau ta ese ia duahidia diba lasi, bese idauidau bona iduhu idauidau bona kopina idauidau bona gado idauidau amo.” (Apokalupo 7:9, NW ) Unai hutuma bada herea taudia be daidia, Dirava ese edena bamona idia ia laloa, bona vaira negana ai idia dekenai dahaka do ia vara? Tanobada taudia dekenai Apokalupo ese ia henia haerena be sivarai namona. Ia gwau: “Inai be hisihisi badana lalona amo idia mai taudia, edia dabua be Mamoe Natuna ena rara ai idia huria bona idia hakurokuroa vadaeni.” (NW ) Keriso ese ia bubua rarana idia abidadama henia dainai, “hisihisi badana” lalonai dika do idia davaria lasi. Keriso ese “mauri ranuna, ia lohilohi gauna, dekenai do ia hakaudia lao. Bona Dirava ese edia taitai ena ranu ibounai edia matana dekena amo do ia dahua ore.” (Apokalupo 7:14-17) Oibe, hari idia noho taudia milioni momo be duahia diba lasi hutuma bada taudia ai idia lao diba bona inai tanobada ena oromana dikana ena dokona amo idia roho mauri diba. King Iesu Keriso ena Lagani 1000 Lohia Negana ai, ia henunai idia noho dainai, ia ese idia do ia hakaua lao tanobada dekenai mauri hanaihanai idia abia totona. Unai be sivarai namona, ani?
“Iena Kota Henia Kara be Momokani Bona Maoromaoro”
12, 13. (a) Karoa 8 ia lao 19 be dahaka idia herevalaia? (b) Dahaka dainai kudou-maoro taudia be unai peroveta herevadia do idia gari henia lasi be namo?
12 Karoa 8 ia lao 19 edia hereva dainai taunimanima idia gwau Apokalips, eiava Apokalupo be dika badadia mai garina ia perovetalaia bukana. Idia ese hahemaoro herevadia aukadia (kibi regena, hisihisi, bona Dirava ena badu amo idia honu disi ese idia laulaulaidia gaudia) be Satani ena tanobada ena kahana idauidau dekenai idia gwauraia. Tomadiho koikoi oreadia (“Babulonia Badana”) ese hahemaoro ena hisihisi do idia abia guna, bena gabeai Dirava idia dadaraia politikol oreadia, dagedage gaudia ese idia laulaulaia gaudia, ese hisihisi do idia abia.—Apokalupo 13:1, 2; 17:5-7, 15, 16.a
13 Unai karoa ese Satani bona ena demoni be tanobada dekenai idia negea diho bona guba ia goeva negana ia herevalaia. Unai kara ese lagani 1914 amo ia matamaia tanobada ena hisihisi ena badina ia hahedinaraia, unai bamona hisihisi be guna ia vara lasi. (Apokalupo 12:7-12) Danu, idia ese laulau herevadia amo, Satani ena tanobada dikana ena kahana idauidau hadikaia ore karana idia herevalaia. (Apokalupo 19:19-21) Kudou-maoro taudia be unai kara dainai do idia gari be namo, a? Lasi, badina Dirava ena hahemaoro karadia idia vara neganai, guba taudia idia boiboi, idia gwau: “Aleluia! Dirava ita hanamoa! Hamauria, bona hairai, bona siahu, be iseda Dirava dekenai idia noho. Badina be iena kota henia kara be momokani bona maoromaoro.”—Apokalupo 19:1, 2.
14, 15. (a) Edena dala ai inai tanobada ena oromana dikana be mai kara maoromaoro ida do idia haorea? (b) Dahaka dainai kudou-maoro taudia be unai kahana Apokalupo bukana lalonai idia moalelaia diba?
14 Iehova ese kara maoromaoro tanobadana ia havaraia totona, tanobada idia hadikaia taudia do ia haoredia guna. (Apokalupo 11:17, 18; 19:11-16; 20:1, 2) To, taunimanima edia orea ta eiava politikol tanona ta be ia siahu lasi unai ia karaia totona. Iehova bona ia abia hidi King bona Diadi, Keriso Iesu, sibodia ese mai kara maoromaoro ida unai idia karaia diba.—2 Tesalonika 1:6-9.
15 Apokalupo bukana ia hahedinaraia goevagoeva hegeregerena, Iehova ena ura be inai tanobada dikana do ia haorea. Unai hereva ese “kara dika rohoroho ibounai . . . dainai idia taitai noho, bona idia lalohisihisi noho” tatau bona hahine dekenai moale ia mailaia be namo. (Esekiela 9:4) Unai ese idia ia doria be namo sivarai namona ia harorolaia aneruna ese ia gwauraia herevana idia badinaia haraga totona, ia gwau: “Dirava do umui gari henia, . . . badina be Dirava ese taunimanima ibounai do ia kota henia ena nega ia ginidae vadaeni. Guba bona tanobada . . . ia karaia Diravana do umui tomadiho henia.” (Apokalupo 14:7) Namona be unai taudia ese ‘Dirava ena taravatu idia badinaia momokani, bona Iesu ena hereva momokani idia gwauraia hedinarai’ Iehova ena Witness taudia ida, Iehova do idia tomadiho bona idia hesiai henia.—Apokalupo 12:17.
Lagani 1000 Lohia Negana Hereadaena
16. (a) Dahaka dainai Kerisendom ena dubu ese Lagani 1000 Lohia Negana ena helaro idia dadaraia? (b) Dahaka dainai Iehova ena Witness taudia idia abia dae Lohiabada ena guriguri lalonai ia noia gauna do ia guguru momokani?
16 Karoa 20 ia lao 22 lalonai Apokalupo bukana ese Lagani 1000 Lohia Negana ena helaro ia gwauraia. Baibel lalonai unai kahana sibona ese ia hahedinaraia guba bona tanobada dekenai mauri hanaihanai negana ia do hamatamaia lasi neganai, lagani 1000 negana do ia mai guna. Kerisendom ena dubu be Lagani 1000 Lohia Negana ena helaro idia dadaraia vaitani. Dubu edia hahediba herevadia idia gwau kara maoromaoro taudia be guba dekenai idia lao bona kara dika taudia be hel dekenai idia lao herevana, bona tanobada be paradaiso ai do ia lao idia hadibaia lasi. Kerisendom edia dubu taudia dekenai, Lohiabada ena guriguri lalonai Dirava ia noia “oiemu ura be tanobada dekenai do ia vara guba dekenai ia vara bamona,” be anina lasi. (Mataio 6:10, New International Version) To Iehova ena Witness taudia be unai bamona lasi. Idia abia dae momokani Iehova Dirava ese tanobada be “ia noho kava totona ia karaia lasi,” to “taunimanima idia noholaia diba gabuna, ia karaia.” (Isaia 45:12, 18) Vadaeni, idaunegai peroveta herevana, Lohiabada ena guriguri, bona Apokalupo ese ia gwauraia Lagani 1000 Lohia Negana ena helaro edia hereva be tamona. Keriso ena Lagani 1000 Lohia Negana lalonai, ia ese do ia hamomokania Iehova ena ura be tanobada dekenai do ia vara, guba dekenai ia vara bamona.
17. Dahaka dainai ita abia dae diba “lagani 1000” be nega korikorina ta?
17 Unai hereva “lagani 1000” be nega 7 bamona ia hedinarai Apokalupo ena karoa 20 siri 1-7 ena siri ginigunadia 7 lalonai. Inai danu ita laloa be namo, Greek Baibel lalonai, nega hani unai hereva be hereva ta ida idia torea, unai hereva ese ia hahedinaraia ia be lagani 1000 negana korikorina ta ia herevalaia, nega daudauna ta ia herevalaia lasi, Kerisendom taudia ese idia hadibaia bamona. Lagani 1000 lalonai dahaka do ia vara? Gau ginigunana be, Satani do idia koua unai lagani 1000 ibounai lalonai. (Apokalupo 20:1-3; mani Heberu 2:14 itaia.) Unai be sivarai namo hereana!
18. (a) Dahaka dainai Lagani 1000 Lohia Negana be hahemaoro ‘dinana’ ta ita gwauraia diba? (b) Lagani 1000 dokonai dahaka do ia vara?
18 “Kota biaguna ena siahu” be “lagani 1000 lalonai Keriso danu do idia lohia” taudia dekenai idia henia dainai, unai nega be lagani 1000 hahemaoro ‘dinana.’ (Apokalupo 20:4, 6; mani Kara 17:31; 2 Petero 3:8 itaia.) Mase taudia do idia toreisi lou bona, hisihisi badana amo idia roho mauri taudia ida, unai nega lalonai idia karaia karadia hegeregerena ai do idia hahemaoro henidia. (Apokalupo 20:12, 13) Lagani 1000 dokonai, Satani be nega sisina lalonai do idia ruhaia bona ia ese nega ginigabena taunimanima do ia tohoa, unai murinai Satani, ena demoni, bona tanobada ai ia idia badinaia gwau-edeede taudia be do idia ore vaitani. (Apokalupo 20:7-10) Unai hahetoho do idia hanaia taudia edia ladana be “mauri bukana” lalonai do idia torea, bona gau ta ese ia kokia diba lasi, bona mai moale ida do idia mauri ela bona hanaihanai, bona tanobada paradaisona lalonai Iehova do idia tomadiho bona do idia hesiai henia.—Apokalupo 20:14, 15; Salamo 37:9, 29; Isaia 66:22, 23.
19 Unai sivarai namona be Apokalupo bukana lalonai ia noho. Idia be taunimanima ese idia gwauraia kava gwauhamata herevadia lasi. Aposetolo Ioane ia gwau: “Helai gabuna badana latanai ia helai Diravana ia hereva, ia gwau, ‘Harihari be gau ibounai lau karaia matamata inai.’ Ma lau dekenai ia hereva, ia gwau, ‘Harihari inai hereva do oi torea, badina ia be maoromaoro bona momokani vadaeni, bona inai hereva do umui abidadama henia diba.’ ” (Apokalupo 21:5) Dahaka ita karaia be namo unai sivarai namona ia guguru negana lalonai ita noho totona? Dirava idia ura hamoalea taudia dekenai, Apokalupo bukana be mai ena sisiba namodia. Hereva gabena ese do ia hahedinaraia hegeregerena, unai sisiba ita badinaia ese moale bada do ia mailaia hari inai negai, ela bona hanaihanai.
[Footnote]
a Apokalupo bukana ena hereva ena anina oi diba namonamo totona, mani inai buka Apokalupo—Ena Hagugurua Negana Ia Kahirakahira! oi itaia, Watchtower Bible and Tract Society of New York, Inc. ese lagani 1994 ai ia halasia.
Hereva Badadia Riviulaia
◻ Apokalupo karoa 4 ia lao 6 lalonai, dahaka mai anina bada hereva momokanidia be sivarai namona ena kahana badana?
◻ Apokalupo karoa 7 lalonai dahaka sivarai namona ita davaria diba?
◻ Dahaka dainai kudou-maoro taudia be Apokalupo ena hahemaoro herevadia dainai idia gari lasi be namo?
◻ Edena dala ai Lagani 1000 Lohia Negana be hahemaoro ‘dinana’ ta?
3. Iehova ena Witness taudia edia haroro gaukarana be dahaka gaukara ida ia hegeregere?
4. (a) Apokalupo ena hamatamaia karoana ese dahaka mai anina bada hereva momokanidia ia herevalaia? (b) Idia ura sivarai namona amo namo idia abia taudia ese dahaka idia karaia be namo?
6. Karoa 4 ena matahanai ese taunimanima ia durua dahaka idia lalo-pararalaia totona?
10. (a) Karoa 7 ese dahaka mai anina bada hereva ia gwauraia? (b) Iesu ese Basileia do idia abia taudia be edena bamona ia herevalaidia?
11. (a) Karoa 7 lalonai dahaka sivarai namodia ita davaria diba? (b) “Hutuma bada herea” taudia ese dahaka hahenamo do idia abia?
19. (a) Dahaka dainai ita abia dae diba Apokalupo bukana lalonai idia noho gwauhamata namo hereadia be do idia guguru momokani? (b) Hereva gabena be dahaka do ia herevalaia?
[Picture on page 10]
King Iesu Keriso ese tanobada amo tuari, hitolo, bona mase do ia haorea vaitani