Gima Tauna ida Hesiai Gaukara Ita Karaia
“Egu lohia e, gima kohoro ena latanai lau gini noho, dina bona hanuaboi ibounai.”—ISAIA 21:8.
1. Iehova ese ia gwauraia hedinarai gwauhamata namo hereadia be dahaka?
IEHOVA be Palani Karaia Diravana Badana. Satani Diabolo ai ia lao gwau-edeede aneruna ese kara ta ia karaia diba lasi Iehova ena palani badana koua totona. Unai palani be Iena ladana do ia hahelagaia bona Basileia mai hairaina do ia haginia paradaiso tanobadana lohiaia totona. (Mataio 6:9, 10) Unai lohia siahuna henunai, taunimanima ese hahenamo badana do idia abia. Dirava ese “mase do ia haorea momokani ela bona hanaihanai. Siahu Ibounai Lohiabada danu ese tai ena ranu be taunimanima ibounai edia matadia dekena amo do ia dahua ore.” Lalo-tamona taudia ese maino bona noho namo do idia moalelaia ela bona hanaihanai. (Isaia 25:8; 65:17-25) Iehova sibona ese unai gwauhamata namo hereadia ia gwauraia hedinarai!
2. Iehova ese ena witnes taudia ai ia halaoa taudia haida be daidia?
2 To, Havaraia Tauna be mai ena witnes taudia danu. Abela ena nega amo ela bona Keriso ia vara negana, “witnes taudia hutuma bada ori ta bamona” (NW) be mai edia haheauka ida idia raka, herevana nega momo unai dainai dika idia davaria. Edia haheitalai namodia ese hari inai negai Dirava idia badinaia Keristani taudia ia hagoadaia. Keriso Iesu be gari lasi witnes tauna ena kara ia hahedinaraia tauna hereadaena. (Heberu 11:1–12:2) Hegeregere, Pontio Pilato vairanai ia henia hereva ginigabena mani oi laloa. Iesu ia gwau: “Hereva momokani gwauraia hedinarai totona lau vara, bona lau mai inai tanobada dekenai.” (Ioane 18:37) Lagani 33 C.E. amo ema bona hari lagani 2000 C.E., lalo-goada Keristani taudia ese Iesu ena haheitalai idia tohotohoa bona idia haroro noho, mai gari lasi ida “Dirava ena hoa gaudia idia herevalaia.”—Kara 2:11.
Babulonia Ena Tomadiho Oreana Ia Parara
3. Edena dala ai Satani ese Iehova bona ena ura hahedinaraia karana ia dagedage henia?
3 Lagani tausen momo lalodiai Inai Tauna badana, Satani Diabolo, be mai ena lalo-dika ida Dirava ena witnes taudia edia hereva ia hakoikoia toho. Unai “huala badana, . . . unai idaunegai gaigaina,” be “koikoi ibounai edia tamana” dainai, “tanobada taudia ibounai ia koia noho.” Ia ese “Dirava ena taravatu idia badinaia momokani” taudia ia tuari henia, bona inai dina gabedia lalonai ia tuari henidia bada herea.—Ioane 8:44; Apokalupo 12:9, 17.
4. Edena dala ai Babulonia Badana ia vara?
4 Lagani 4,000 bamona gunanai, Noa ena negai ia vara Abata murinai, Satani ese Nimiroda, “labana tauna mai goada danu Lohiabada ena vairanai,” ia gaukaralaia. (Genese 10:9, 10) Nimiroda ena siti badana, Babulonia (Babela), be demoni tomadiho henia gabuna badana ai ia lao. Iehova ese Babela ena kohoro idia haginia taudia edia gado ia haidaua neganai, unai taunimanima be tanobada ena kahana kahana dekenai idia lao, bona edia tomadiho koikoina danu idia abia lao. Unai dala ai Babulonia be tanobada ena tomadiho koikoi ibounai, Apokalupo bukana ia gwauraia Babulonia Badana, ena badina ai ia lao. Apokalupo bukana ese unai idaunegai tomadiho oreana ena moru herevana ia gwauraia.—Apokalupo 17:5; 18:21.
Witnes Taudia Edia Bese
5. Iehova ese edena bese be ena witnes taudia ai ia halaoa, to dahaka dainai idia abidia lao karana ia koua lasi?
5 Lagani 500 bamona Nimiroda ena nega murinai, Iehova ese abidadama tauna Aberahamo ena tubudia be Israela besena ai ia halaoa, tanobada dekenai Iena witnes taudia ai idia lao totona. (Isaia 43:10, 12, NW ) Unai bese taudia momo ese Iehova idia hesiai henia mai kamonai ida. To, lagani handred momo idia hanaia lalonai, Israela taudia edia dekena besedia edia tomadiho koikoi ese idia ia hadikaia, bona Iehova ena gwauhamata besena be ia idia rakatania bona dirava koikoi idia tomadiho henidia. Unai dainai, lagani 607 B.C.E. ai, King Nebukanesa ese ia hakaua Babulonia tuari taudia ese Ierusalema bona ena dubu idia hadikaia bona Iuda taudia momo herea be Babulonia dekenai idia abia lao.
6. Iehova ena gima tauna ese ia gwauraia sivarai namona be dahaka, bona edena negai ena peroveta herevana ia guguru?
6 Unai be tomadiho koikoi ena moale bada negana! To, Babulonia ena siahu negana be ia kwadogi sibona. Lagani 200 bamona gunanai, gau badana ta ia do vara lasi neganai, Iehova ese hahegani ia henia, ia gwau: “Oi lao, gima tauna ta do oi atoa, ia itaia gaudia be do ia gwauraia hedinaraia.” Unai gima tauna be dahaka sivarai ia gwauraia hedinarai? “Babulonia be ia moru, ia moru vadaeni, iena dirava edia laulau ibounai, be idia makohia maragimaragi, bona tano dekenai idia hekure noho!” (Isaia 21:6, 9) Bona momokani, lagani 539 B.C.E. ai, unai peroveta herevana be ia guguru. Babulonia badana ia moru, bona Dirava ena gwauhamata besena be edia tano dekenai idia giroa lao diba.
7. (a) Iehova ena matahakani karana amo Iuda taudia be dahaka idia diba? (b) Idia giroa Iuda taudia be edena tarapu dekenai idia moru, bona unai dainai dahaka ia vara?
7 Idia giroa lao Iuda taudia idia diba vadaeni kaivakuku bona demoni tomadiho henia karadia idia rakatania be namo. To, lagani idia hanaia lalonai, tarapu ma haida dekenai idia moru. Greek lalohadai ese haida ia tarapua. Ma haida ese Dirava ena Hereva idia dadaraia bona taunimanima edia kara idia badinaia. Bese abia isi karana ese ma haida ia veria. (Mareko 7:13; Kara 5:37) Iesu ia vara neganai, unai bese ese tomadiho goevana ia rakatania lou vadaeni. Ena be Iuda taudia haida ese Iesu ia harorolaia sivarai namona idia abia dae, to unai bese ese ia idia dadaraia bona unai dainai Dirava ese idia ia dadaraia. (Ioane 1:9-12; Kara 2:36) Unai negana ai Israela besena be Dirava ena witnes besena lasi, bona lagani 70 C.E. ai, Ierusalema bona ena dubu idia hadikaia lou, bona unai nega ai Roma ena tuari taudia ese idia karaia.—Mataio 21:43.
8. Daidia be Iehova ena witnes taudia ai idia lao, bona dahaka dainai Paulo ese nega namona ai ia sisiba henidia?
8 Unai nega lalonai, “Dirava ena [Keristani] Israela” besena ia vara vadaeni, bona idia be tanobada besedia edia huanai Dirava ena witnes taudia. (Galatia 6:16) Karaharaga, Satani ese dala ia hegaegaelaia, unai lauma bese matamatana ia hadikaia totona. Lagani 100 C.E. be kahirakahira neganai, kongregesen idia hapararaia gaudia idia hedinarai vadaeni. (Apokalupo 2:6, 14, 20) Paulo ena sisiba be nega namona ai ia henia, ia gwau: “Umui naria namonamo, tau ta ese taunimanima edia aonega hereva kava dekena amo umui ia koia garina. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.”—Kolose 2:8.
9. Paulo ese ia henia sisiba hegeregerena, dahaka kara amo Kerisendom ia vara?
9 Gabeai, Greek lalohadai, Babulonia ena tomadiho lalohadai, bona taunimanima edia “aonega” herevadia, hegeregere evolusen bona Baibel idia hakoikoia toho herevadia, ese sibona idia gwauraia Keristani taudia momo edia tomadiho idia hadikaia. Paulo ena peroveta herevana bamona ia vara, ia gwau: “Lau diba, umui lau rakatania murinai, uda sisia dikadia umui emui huanai dohore idia mai, bona mamoe orea do idia hadikaia. Emui huanai tatau haida do idia toreisi, hereva koikoi do idia gwauraia, bona diba tahua taudia do idia hakaua kerere.” (Kara 20:29, 30) Unai hereva momokani negea karana amo, Kerisendom ia vara.
10. Edena gaudia ese idia hahedinaraia goevagoeva taunimanima ibounai be Kerisendom ese ia badinaia tomadiho dala dikana idia badinaia lasi?
10 Gau badana be tomadiho goevana idia badinaia momokani taudia be helaga taudia dekenai ia henia “abidadama lalonai do [idia] gini goada noho.” (Iuda 3) Tomadiho goevana bona Iehova gwauraia hedinarai gaukarana be tanobada amo do ia boio, a? Lasi. Gwau-edeede aneruna Satani bona ena gaukara ibounai hadikaia ore negana ia kahirakahira lalonai, ia hedinarai goevagoeva taunimanima ibounai be Kerisendom lalonai idia karaia tomadiho kara kereredia idia badinaia lasi. Lagani 1900 ia kahirakahira neganai, Pittsburgh, Pennsylvania, U.S.A. ai, Baibel idia tahua momokani stiuden taudia edia orea maragina idia haginia, bona ia be hari inai negai ia noho Dirava ena witnes oreana ena badina. Unai Keristani taudia ese Baibel amo idia hamomokania inai tanobada ena oromana ena dokona be kahirakahira. Baibel ena peroveta herevana hegeregerena, inai “tanobada [ena] dokona” be lagani 1914 ai ia matamaia, bona tanobada ibounai tuarina ginigunana ia matamaia ese unai ia hamomokania. (Mataio 24:3, 7) Hamomokania gaudia badadia ese idia hahedinaraia unai lagani murinai Satani bona ena demoni oreana be guba amo idia negea diho. Idia hanaia laganidia handred bamona lalonai idia vara kara dikadia ese idia hamomokania Satani be ia gaukara noho bona unai gaudia be guba Basileiana lalonai Iesu ia lohia ena toana idia hagugurua danu.—Mataio, karoa 24 bona 25; Mareko, karoa 13; Luka, karoa 21; Apokalupo 12:10, 12.
11. Satani ese dahaka ia karaia toho, to edena bamona ia kwalimu lasi?
11 June 1918 ai, Satani ia hekwarahi bada unai nega ai tano momo lalonai idia haroro vadaeni Bible stiuden taudia ia hadikaia ore totona. Ia ese edia gaukara oreana, The Watch Tower Bible and Tract Society, ia hadikaia toho danu. Society ena gunalaia taudia be dibura dekenai idia atoa, idia samania koikoi idia gwau gavamani idia gwau-edeede henia, aposetolo taudia edia negai Iesu idia samania koikoi bamona. (Luka 23:2) To lagani 1919 ai, unai gunalaia taudia idia ruhaia, bona edia hesiai gaukara idia karaia noho diba. Gabeai, kota ai idia hamomokania idia be kerere lasi taudia.
“Gima Tauna” Ta Ia Gima Noho
12. Daidia be hari Iehova ena gima tauna oreana, bona edia kara be edena bamona?
12 Unai dainai, “dokona negana” ia matamaia neganai, Iehova ena gima tauna ta ia noho, Iena ura idia hagugurua gaudia be taunimanima dekenai ia hadibaia totona. (Daniela 12:4; 2 Timoteo 3:1) Ema bona hari, unai gima tauna oreana—horoa Keristani taudia, Dirava ena Israela—be Isaia ese ena peroveta herevadia ai ia gwauraia gima tauna bamona ia gaukara. Isaia ia gwau: “Ia itaia namonamo. Vadaeni gima tauna ia boiboi [laiona bamona], ia gwau, ‘Egu lohia e, gima kohoro ena latanai lau gini noho, dina bona hanuaboi ibounai.’ ” (Isaia 21:7, 8) Unai gima tauna ese ena gaukara ia karaia namonamo!
13. (a) Iehova ena gima tauna ese ia gwauraia sivaraina be dahaka? (b) Dahaka dainai ita gwau diba Babulonia Badana ia moru vadaeni?
13 Unai gima tauna be dahaka ia itaia? Iehova ena gima tauna, ena witnes oreana, be ma ia gwau: “Babulonia be ia moru, ia moru vadaeni, iena dirava edia laulau ibounai, be [Iehova ese ia] makohia maragimaragi, bona tano dekenai idia hekure noho!” (Isaia 21:9) Tanobada Ibounai Tuarina Ginigunana murinai, ena siahu badana amo ia moru gauna be Babulonia Badana, tanobada ena tomadiho koikoi ibounai oreana. (Ieremia 50:1-3; Apokalupo 14:8) Unai ita hoalaia lasi! Tuari Badana, unai negai idia gaukaralaia ladana, be Kerisendom lalonai ia matamaia, bona idia tuari heheni kahana rua lalonai, dubu gunalaia taudia ese tatau matamata namodia idia veria tuari lalonai idia vareai totona, bona unai amo tuari idia habadaia. Unai be dika momokani! Lagani 1919 ai, Babulonia Badana ese Bible Student taudia, Iehova ena Witnes taudia edia ladana unai negai, ia koua diba lasi dainai idia gaukara lasi negana idia rakatania bona hari idia karaia noho tanobada ibounai haroro gaukarana idia hamatamaia. (Mataio 24:14) Unai ese Babulonia Badana ena moru ia hahedinaraia, lagani 600 B.C.E. murinai Israela taudia be Babulonia idia rakatania karana ese unai idaunegai Babulonia ena moru ia hahedinaraia hegeregerena.
14. Iehova ena gima tauna oreana ese edena magasin ia gaukaralaia goadagoada, bona edena dala ai Iehova ese unai kara ia hanamoa?
14 Gima tauna oreana be hanaihanai mai ena lalo-goada ida ena gaukara ia karaia bona ia ura bada kara maoromaoro ia badinaia. July 1879 ai, Bible Student taudia ese inai magasin idia halasia matamaia, unai nega ai ena ladana be Zion’s Watch Tower and Herald of Christ’s Presence. Lagani 1879 amo ela bona December 15, 1938, lalonai idia halasia magasin ta ta ena rau ginigunana ai ia hedinarai herevana be “ ‘Gima tauna e, Edena Negai Hanuaboi Do Ia Ore?’—Isaia 21:11.”a Hanaihanai, lagani 120 lalonai, Gima Kohorona ese tanobada dekenai idia vara gaudia bona edia anina peroveta herevadia dekenai ia itaia. (2 Timoteo 3:1-5, 13) Dirava ena gima tauna oreana bona ena bamodia, “mamoe idaudia,” ese inai magasin amo taunimanima idia hadibaia goevagoeva, Keriso ena Basileia ese Iehova ena lohia siahuna do ia hamomokania negana be kahirakahira. (Ioane 10:16) Iehova ese unai haroro gauna ia hanamoa, a? Lagani 1879 ai, Gima Kohorona ginigunana ena kopi be 6,000 idia printaia, hari tanobada hegegemadai kopi 22,000,000 mai kahana idia printaia gado 132 ai—unai gado 121 gaudia be nega tamona ai idia halasia. Oibe, tanobada ai idia halasia badabada tomadiho magasin ese Dirava momokani, Iehova, ena ladana ia abia isi be maoro momokani!
Ena Orea Ia Hagoevaia Noho
15. Lagani 1914 ia do abia lasi negana lalonai edena hagoevaia karana ia vara?
15 Lagani 40 bamona idia hanaia ela bona Keriso be guba dekenai lagani 1914 ai ia lohia matamaia, Bible Student taudia be Kerisendom ese Baibel amo ia abia lasi hahediba herevadia, hegeregere beibi bapatisoa, mase diba lasi soulina, pegatori, hel ena lahi hisihisina, bona Toi Tamona herevadia idia rakatania vadaeni. To ma lagani haida idia hanaia murinai, lalohadai kereredia ibounai idia rakatania. Hegeregere, lagani 1920 ena murina laganidia lalonai Bible Student taudia momo ese korosi bona korona edia toana ia hahedinaraia gauna ta be edia dabua dekenai idia pinia tao, bona Kerisimasi bona tomadiho koikoi dinadia ma haida idia hanamoa. To, tomadiho karana ia goeva totona kaivakuku tomadiho henia toadia ibounai idia negea be namo. Namona be Dirava ena Hereva, Buka Helaga, be Keristani taudia edia abidadama bona mauri dalana ena badina tamona. (Isaia 8:19, 20; Roma 15:4) Dirava ena Hereva dekenai gau ta atoa eiava kokia be kerere.—Deuteronomi 4:2; Apokalupo 22:18, 19.
16, 17. (a) Lagani momo lalonai gima tauna oreana ese edena lalohadai kererena idia laloa bada? (b) “Boubou patana” bona “Aigupito” dekenai ia gini “nadi namona badana” edia anina korikorina be dahaka?
16 Haheitalai ta ese ia hahedinaraia goevagoeva unai hakaua herevana be mai anina bada. Lagani 1886 ai, C. T. Russell ese buka ta ladana The Divine Plan of the Ages ia halasia neganai, ia lalonai mapu ta ese taunimanima edia sivarai edia nega be Aigupito ena Great Pyramid ida ia hakapua. Idia laloa Farao Khufu hanamoa totona idia haginia gauna be Isaia 19:19, 20 ese ia gwauraia nadina, ia gwau: “Unai dina dekenai Lohiabada ena boubou patana ta be Aigupito tano dekenai do ia noho, bona Lohiabada ena ladana hanamoa totona, nadi namona badana do idia haginia Aigupito ena tano hetoana dekenai. Inai boubou patana, bona nadi namona badana, be Siahu Ibounai Lohiabada ia noho Aigupito dekenai ena toadia.” Edena dala ai unai nadi be mai anina Baibel dekenai? Hegeregere, idia gwau unai Great Pyramid lalonai idia noho raka daladia haida edia lata ese Mataio 24:21 ia kikilaia “hisihisi bada herea” ia matamaia negana ia hahedinaraia, edia lalohadai unai negai hegeregerena. Bible Student taudia haida be unai Great Pyramid ena kahana idauidau makaia karana idia goadalaia, gau haida hegeregere guba dekenai do idia lao dinana idia diba totona!
17 Unai gauna, idia gwauraia Nadi Baibel, be lagani momo lalonai idia laloa bada, ela bona Gima Kohorona November 15 bona December 1, 1928 gaudia ese idia hahedinaraia goevagoeva Iehova vairanai kaivakuku idia tomadiho henia farao taudia ese idia karaia nadi gaudia mai edia laulau, demoni tomadiho henia lalonai hisiu edia toadia tahua karana ena laulau idauidau, be anina lasi Baibel ena hereva hamomokania totona. To, idia itaia Isaia ena peroveta herevana be mai anina bada lauma dalanai. Apokalupo 11:8 lalonai bamona, “Aigupito” ese Satani ena tanobada ia laulaulaia. “Lohiabada ena boubou patana” dainai ita ese hari inai tanobada dekenai nega sisina idia noho horoa Keristani taudia edia boubou gaudia, Iehova ese ia moalelaia boubou gaudia, ita laloa. (Roma 12:1; Heberu 13:15, 16) “Aigupito ena tano hetoana dekenai” ia noho nadi namona badana ese horoa Keristani taudia edia kongregesen ia laulaulaia, ia be “hereva momokani ena du, bona hereva momokani ia gimaia maguna” bona ia be do idia rakatania tanobadana, “Aigupito,” dekenai Iehova ena hereva hamomokania gauna bamona ia gini.—1 Timoteo 3:15.
18. (a) Edena dala ai Iehova ese Baibel idia tahua momokani stiuden taudia edia lalo-parara ia habadaia noho? (b) Bema Keristani tauna ese Baibel ena hereva ta dekenai idia halasia diba matamata ia lalo-pararalaia be auka, aonega lalohadaina be dahaka?
18 Lagani idia hanaia lalonai, Iehova ese ita dekenai hereva momokani ia hahedinaraia noho, iena peroveta herevana ena anina ia hahedinaraia goevagoeva danu. (Aonega Herevadia 4:18) Vanegai laganidia ai, ita idia hagoadaia mai eda lalo-parara ida inai gaudia—bona gau ma haida—do ita laloa, hegeregere dokona ia vara neganai ia do noho uruna, nanigosi bona mamoe parabolena, gau dika rohorohona bona gabu helagana ai do ia gini negana, gwauhamata matamatana, Iesu ena toana ia idau negana, bona Esekiela bukana ena dubu matahanaina. Reana nega haida unai bamona diba matamata ita lalo-pararalaia be auka, to gabeai unai diba matamata edia badina idia hedinarai. Bema Keristani tauna ese siri ta dekenai idia halasia diba matamata ia lalo-pararalaia lasi, namona be mai manau ida peroveta tauna Mika ena hereva bamona ia laloa, ia gwau: “Lau ese Lohiabada do lau naria noho. Ia ese lauegu guriguri do ia kamonai, bona lau abidadama henia, ia ese lau do ia hamauria.”—Mika 7:7.
19. Edena dala ai horoa orena taudia bona edia bamodia, hutuma bada herea taudia, be inai nega dokona ai laiona bamona idia gari lasi?
19 Namona be oi laloatao gima tauna be laiona bamona “ia boiboi, ia gwau: ‘Egu lohia e, gima kohoro ena latanai lau gini noho, dina bona hanuaboi ibounai.’ ” (Isaia 21:8) Horoa orena taudia be laiona bamona idia gari lasi bona tomadiho koikoi ena kerere idia gwauraia hedinarai bona taunimanima dekenai heau mauri dalana idia hahedinaraia. (Apokalupo 18:2-5) Idia be “hesiai tauna mai ena kamonai, bona mai ena kara maoromaoro” oreana dainai, Baibel, magasin, bona buka ma haida gado idauidau dekenai idia halasia—‘aniani neganai aniani idia henia.’ (Mataio 24:45) Idia ese “hutuma bada herea . . . bese idauidau bona iduhu idauidau bona kopina idauidau bona gado idauidau amo” (NW ) gogoa gaukarana idia gunalaia. Unai taudia danu ese Iesu ena mauri davalaia rarana amo sibona idia hagoevaia bona idia hahedinaraia laiona bamona mai gari lasi ida “dina bona hanuaboi” Dirava idia hesiai henia. (Apokalupo 7:9, 14, 15) Ia hanaia laganina lalonai Iehova ena horoa Witnes taudia oredia bona edia bamodia, hutuma bada herea taudia, ese idia havaraia anina be edena bamona? Hereva gabena ese unai do ia hahedinaraia.
[Footnote]
a January 1, 1939 ai, unai idia haidaua “ ‘Do idia diba lau be Iehova.’—Esekiela 35:15.”
Oi Laloatao, A?
• Lagani idia hanaia lalonai Iehova ese edena witnes taudia ia gaukaralaia?
• Babulonia Badana be edena bamona ia vara?
• Dahaka dainai Iehova ese Ierusalema, ena witnes besena edia hanua badana, idia hadikaia karana ia koua lasi lagani 607 B.C.E. ai? lagani 70 C.E. ai?
• Iehova ena gima tauna oreana bona edia bamodia be edena bamona kara idia hahedinaraia?
[Picture on page 7]
“Egu lohia e, gima kohoro ena latanai lau gini noho, dina bona hanuaboi ibounai”
[Pictures on page 10]
Iehova ena gima tauna oreana ese ena gaukara ia laloa bada