‘Dirava E, Emu Diari Oi Siaia Mai’
“Oiemu diari bona oiemu hereva momokani, be mani oi siaia mai, . . . lau do idia hakaua.”—SALAMO 43:3.
1. Edena dala ai Iehova ese ena ura ia hahedinaraia?
IEHOVA be ena hesiai taudia dekenai ena ura ia hahedinaraia neganai idia ia laloa bada. Nega tamona hereva momokani ena diari ibounai ia hahedinaraia lasi ita daradara garina, to ia be sisina sisina iseda lalona ia hadiaria. Mauri dalana dekenai ita raka be reana dala daudauna dekenai ia raka loaloa tauna ida ita hahegeregerea diba. Daba momokani ai ia raka matamaia bona gau momo ia itaia lasi. Dina be metairametaira ia daekau neganai, loaloa tauna be kahirakahira idia noho gaudia ia itaia diba. Oredia ia itaia namonamo lasi. To dina ia daekau noho lalonai, ia be daudau ai idia noho gaudia ia itaia diba. Dirava ia henia lauma diarina danu be unai bamona. Dala ia kehoa gau idauidau be edia nega ta ta ai ita lalo-pararalaia totona. Dirava ena natuna, Iesu Keriso, ese lauma diari be unai bamona ia henia danu. Iehova be idaunegai ena taunimanima dekenai diari ia henia dalana, bona hari inai negai unai ia karaia dalana mani ita itaia.
2. Keriso be tanobada dekenai ia do mai lasi neganai edena dala ai Iehova ese diari ia henia?
2 Toana be Kora ena natudia ese Salamo karoa 43 idia torea. Idia be Levi taudia dainai, hahenamo idia abia Dirava ena taravatu be taunimanima dekenai idia hadibaia totona. (Malaki 2:7) Momokani, Iehova be edia Hadibaia Tauna Badana, bona idia abia dae ia be aonega ibounai ena Badina. (Isaia 30:20) Salamo torea tauna ia guriguri: “Dirava e, . . . oiemu diari bona oiemu hereva momokani, be mani oi siaia mai, . . . lau do idia hakaua.” (Salamo 43:1, 3) Iehova ese Israela taudia dekenai ena dala ia hadibaia, bema ia idia kamonai henia. Lagani 100 haida murinai, Iehova ese diari bona hereva momokani idau hereana amo idia ia hanamoa. Dirava ese ena natuna tanobada dekenai ia siaia neganai, unai bamona ia karaia.
3. Edena dala ai Iesu ena hahediba herevana ese Iuda taudia ia tohoa?
3 Dirava ena Natuna Iesu Keriso be tau neganai, ia be “tanobada ena diari.” (Ioane 8:12) Ia ese taunimanima be “gau momo ia hadibaia parabole dekenai”—gau matamatadia unai. (Mareko 4:2) Pontio Pilato ia hamaoroa: “Lauegu Basileia be inai tanobada gauna lasi.” (Ioane 18:36) Roma tauna bona edia bese idia abia isi Iuda taudia dekenai unai be lalohadai matamatana, badina idia laloa Mesia ese Roma Basileiana do ia hamorua bona Israela ena hairai do ia habadaia, guna bamona. Iesu be Iehova ena amo ia mai diarina ia hahedinaraia, to Iuda lohia taudia, “taunimanima edia hanamoa dekenai idia ura henia bada, Dirava ena hanamoa dekenai idia ura henia maragi” taudia, be iena hereva dainai idia moale lasi. (Ioane 12:42, 43) Taunimanima momo idia ura taunimanima edia sene karadia do idia badinaia, to Dirava ena amo ia mai lauma diarina bona hereva momokani idia abia dae lasi.—Salamo 43:3; Mataio 13:15.
4. Edena bamona ita diba Iesu ena hahediba taudia ese edia lalo-parara do idia habadaia noho?
4 To, kudou-maoro taudia haida, tatau bona hahine, be Iesu ese ia hadibaia hereva momokanina idia abia dae mai edia moale ida. Dirava ena ura dekenai edia lalo-parara idia habadaia noho. To, edia Hadibaia Tauna ena mauri tanobada dekenai ia ore gwauraia, bona ma gau momo idia do dibaia be namo. Iesu ese ia hamaorodia: “Lauegu hereva momo idia noho, lau ura hereva henia umui dekenai, to harihari umui be inai hereva do umui abia dae diba lasi.” (Ioane 16:12) Oibe, hahediba taudia be Dirava ena hereva momokani dekenai edia lalo-parara do idia habadaia noho.
Diari ia Hedinarai Noho
5. Aposetolo taudia edia nega ai edena henanadai ia vara, bona daidia be maduna idia abia unai idia hamaoromaoroa totona?
5 Iesu ena mase bona toreisi lou murinai, Dirava ia henia diarina be ia hedinarai badabada, guna bamona lasi. Petero ia abia matahanai lalonai, Iehova ese ia hahedinaraia edia kopina idia utua lasi Idau Bese taudia be unai nega amo Iesu ena murinai idia raka taudia ai idia lao diba. (Kara 10:9-17) Unai be gau matamatana momokani! To gabeai, henanadai ta ia vara: Iehova ia ura unai Idau Bese taudia be Keristani taudia ai idia lao murinai, kopina utua karana do idia abia, a? Unai matahanai ese unai henanadai ia haerelaia lasi, bona Keristani taudia huanai unai idia hepapahuahulaia bada. Edia lalo-tamona karana namona idia hadikaia garina, idia hamaoromaoroa be namo. Unai dainai, Ierusalema ai, ‘aposetolo bona kwarana taudia idia hebou, unai idia herevalaia totona.’—Kara 15:1, 2, 6.
6. Kopina utua karana ena henanadai idia laloa neganai, aposetolo bona kwarana taudia ese edena dala idia badinaia?
6 Edena dala ai unai hebou lalonai idia noho taudia be Dirava ena ura abidadama Idau Bese taudia dekenai idia diba? Iehova ese aneru ta ia siaia lasi edia herevahereva ia gunalaia totona, eiava idia dekenai matahanai ia henia lasi. To, aposetolo bona kwarana taudia dekenai heduru ia henia. Idia ese Iuda Keristani taudia haida edia hereva idia laloa, unai taudia idia itaia Dirava ese idau bese taudia ia kara henia matamaia bona ena lauma helaga be kopina utua lasi taudia dekenai ia bubua. Danu, idia ese heduru abia totona Baibel ena hereva idia tahua. Unai dainai, hahediba tauna Iamesi be edia lalona ia hadiaria Baibel siri amo hereva ta ia gwauraia. Unai hereva idia laloa neganai, Dirava ena ura ia hedinarai goevagoeva. Unai idau bese taudia ese Dirava ena lalo-namo idia moalelaia totona kopina utua karana do idia abia be anina lasi. Unai aposetolo bona kwarana taudia be karaharaga idia abia lalohadai idia torea, unai ese edia Keristani tadikaka do ia hakaua diba totona.—Kara 15:12-29; 16:4.
7. Edena dala ai aposetolo taudia edia nega ai idia noho Keristani taudia idia goada?
7 Iuda Keristani taudia momo be Iuda tomadiho gunalaia taudia, edia sene taudia edia taravatu idia badinaia goadagoada taudia, bamona lasi, to Dirava ena ura idau bese taudia dekenai be dala matamatana ai idia lalo-pararalaia dainai idia moale, ena be unai idia abia dae totona edia lalohadai idia haidaua bona taunimanima momo ese Idau Bese taudia idia laloa dalana idia rakatania be namo. Iehova ese edia manau karana ia hanamoa, bona “ekalesia taudia edia abidadama ena goada ia bada daekau, bona dina ibounai edia hutuma be ia bada daekau lao.”—Kara 15:31; 16:5.
8. (a) Edena bamona ita diba aposetolo taudia edia nega murinai ma diari bada ia hedinarai noho? (b) Edena mai anina bada henanadai haida do ita laloa?
8 Aposetolo edia nega ibounai lalonai lauma diarina ia hedinarai noho. To Iehova ese Keristani taudia ginigunadia dekenai ena ura ibounai ia hahedinaraia lasi. Aposetolo Paulo ese ena Keristani tadikaka ia hamaorodia: “Harihari . . . hevarivari gunana lalonai gau ita itaia goeva lasi.” (1 Korinto 13:12) Unai hevarivari dekenai gau haida idia hedinarai goevagoeva lasi. Vadaeni, matamanai lauma diarina dekenai lalo-parara be bada lasi. Aposetolo taudia idia mase murinai, nega sisina lalonai diari ia maragi, to hari inai negai Baibel amo eda diba ia bada herea. (Daniela 12:4) Hari inai negai, Iehova ese edena dala ai ena taunimanima edia lalona ia hadiaria? Bona iseda lalo-parara Baibel siridia dekenai ia habadaia neganai, edena bamona ita kara be namo?
Diari Ia Bada Ia Lao
9. Edena stadi dalana namona bona idauna be Baibel Stiuden taudia ginigunadia ese idia badinaia?
9 Hari inai negai diari korikorina be lagani 1875 murina laganidia lalonai, Keristani tatau bona hahine haida be mai momokani ida Baibel idia stadilaia matamaia neganai, ia hedinarai matamaia. Idia ese Baibel stadilaia dalana namona ta idia hamatamaia. Ta ese henanadai ta ia gwauraia; bena idia ibounai ese unai gauna idia herevalaia Baibel siri iboudiai idia tahua. Bema toana be Baibel siri ta ese ma ta ia hakoikoia, unai lalo-momokani Keristani taudia idia hekwarahi unai siri ruaosi idia lalo-pararalaia namonamo totona. Baibel Stiuden taudia (unai nega ai Iehova ena Witnes taudia edia ladana) be unai nega ena tomadiho gunalaia taudia bamona lasi, idia ese edia lalona idia hadaia kastom bona taunimanima edia lalohadai ese idia do ia hakaua lasi, to Buka Helaga ese idia do ia hakaua totona. Idia ese hamomokania siridia ibounai idia tahua murinai, idia davaria gaudia idia torea. Unai dala amo edia lalo-parara Baibel ena hahediba hereva badadia momo dekenai idia hamaoromaoroa.
10. Charles Taze Russell ese edena Baibel stadi karana idia durua buka namodia ia torea?
10 Unai Baibel Stiuden taudia namona ta be Charles Taze Russell. Ia ese Baibel stadi karana idia durua buka namodia 6 ia torea, edia ladana be Studies in the Scriptures. Tadikaka Russell ia ura unai buka namba 7 do ia torea, unai ese Baibel bukadia Esekiela bona Apokalupo do ia herevalaia. Ia gwau: “Ki lau davaria neganai, unai buka namba 7 do lau torea.” To, ma ia gwau: “Bema Lohiabada ese ki be ma ta dekenai ia henia, unai tauna ese ia torea diba.”
11. Edena dala ai Dirava ena ura lalo-pararalaia karana dekenai nega korikori be mai anina bada?
11 Unai C. T. Russell ena hereva ese ia hahedinaraia Baibel ena hereva haida ita lalo-pararalaia totona gau ta be mai anina bada—nega korikori. Tadikaka Russell ia diba ia ese Apokalupo bukana ia hadiaria diba lasi, loaloa tauna ese dina ena daekau negana ia do abia lasi neganai ia daekau totona kara ta ia karaia diba lasi hegeregerena.
Dirava ese Ia Hahedinaraia —To Ena Nega Korikori Ai
12. (a) Edena nega ai Baibel ena peroveta herevadia ita lalo-pararalaia namonamo diba? (b) Edena haheitalai ese ia hahedinaraia Baibel ena peroveta herevadia ita lalo-pararalaia totona Dirava ena sediual be mai anina bada? (Futnout itaia.)
12 Iesu ia mase bona ia toreisi-lou murinai, aposetolo taudia ese Mesia idia perovetalaia herevadia momo idia lalo-pararalaia hegeregerena, hari inai negai Keristani taudia ese Baibel ena peroveta herevadia idia guguru murinai, edia kahana ibounai idia lalo-pararalaia namonamo. (Luka 24:15, 27; Kara 1:15-21; 4:26, 27) Apokalupo be peroveta bukana ta, unai dainai ita laloa diba ia gwauraia gaudia idia vara neganai do ita lalo-pararalaia namonamo. Hegeregere, C. T. Russell be Apokalupo 17:9-11 lalonai laulau dalanai ia hedinarai dagedage gauna kakakakana ena anina ia lalo-pararalaia namonamo diba lasi, badina unai dagedage gauna ese ia laulaulaia oreadia, League of Nations bona United Nations, be ia mase murinai idia hedinarai.a
13. Nega haida dahaka ia vara bema Baibel ena hereva ta dekenai diari ia hedinarai?
13 Keristani taudia ginigunadia idia kamonai kopina idia utua lasi Idau Bese taudia be edia abidadama tamona taudia ai idia lao diba neganai, idau bese taudia ese kopina idia utua be namo karana dekenai henanadai matamatana ia vara. Unai ese aposetolo bona kwarana taudia ia veria, kopina utua herevana idia tahua lou totona. Hari inai negai unai ia vara danu. Baibel ena hereva ta dekenai diari ia hedinarai goevagoeva dainai, nega haida Dirava ena horoa hesiai taudia, “hesiai tauna mai ena kamonai, bona mai ena kara maoromaoro,” ia hakaua unai hereva dekenai anina bada herevadia ma haida idia tahua lou totona, vanegai ia vara gauna ese ia hahedinaraia bamona.—Mataio 24:45.
14-16. Iseda lalohadai lauma dubuna dekenai ita hamaoromaoroa karana ena anina iseda lalo-parara Esekiela karoa 40 ia lao 48 dekenai be dahaka?
14 Lagani 1971 ai, inai buka ladana “The Nations Shall Know That I Am Jehovah”—How? lalonai, Esekiela ena peroveta herevana ena anina idia hahedinaraia. Unai buka ena karoa ta ese Esekiela ena matahanai dubu ta dekenai ia herevalaia sisina. (Esekiela, karoa 40-48) Unai nega ai, nega matamata lalonai Esekiela ena matahanai dubu dekenai be edena bamona do ia guguru idia laloa bada.—2 Petero 3:13.
15 To, Gima Kohorona, December 1, 1972 gauna lalonai, idia halasia hereva rua ese iseda lalo-parara Esekiela ena matahanai dekenai ia habadaia. Unai hereva rua ese Heberu karoa 10 ai aposetolo Paulo ese ia gwauraia lauma dubuna badana idia herevalaia. Gima Kohorona ia hahedinaraia lauma dubuna ena daiutu Helagana bona lalona kahana ariara be mai anina bada tanobada ai idia do noho horoa taudia edia noho dekenai. Esekiela karoa 40 ia lao 48 be lagani haida murinai idia tahua lou neganai, idia lalo-parara lauma dubuna be hari ia gaukara noho hegeregerena, Esekiela ese ena matahanai lalonai ia itaia dubuna danu be hari ia gaukara noho. Edena dala ai?
16 Esekiela ena matahanai lalonai, hahelaga taudia be hahelaga lasi iduhu taudia totona hesiai gaukara idia karaia noho lalonai dubu ena ariara gabuna ai idia raka loaloa. Ia hedinarai goevagoeva, unai hahelaga taudia ese “pavapava bona hahelaga taudia” idia laulaulaia, Iehova ena horoa hesiai taudia unai. (1 Petero 2:9, NW ) To, idia be Keriso ena Lagani 1000 Lohia Negana ibounai lalonai dubu ena tanobada ariara gabunai do idia gaukara lasi. (Apokalupo 20:4) Unai nega ena kahana badana, eiava unai nega ibounai, lalonai horoa taudia be lauma dubuna ena Helaga Herea gabuna, “guba,” dekenai Dirava do idia hesiai henia. (Heberu 9:24) Esekiela ese ia itaia dubuna lalonai hahelaga taudia be dubu ariara gabunai idia loaloa dainai, unai matahanai be hari inai negai, horoa taudia haida be tanobada ai idia do noho lalonai, ia guguru noho. Unai hegeregerena, inai magasin March 1, 1999 gauna ese unai hereva laloa dalana matamatana ia hahedinaraia. Unai dala ai, lagani 1900 amo ema bona hari, lauma diarina ese Esekiela ena peroveta herevana ia hahedinaraia noho.
Mai Emu Ura ida Emu Lalohadai Oi Haidaua
17. Hereva momokani oi dibaia negana amo oi ese edena bamona lalohadai oi haidaua, bona unai amo dahaka namo oi davaria?
17 Bema ta be hereva momokani ia ura diba, namona be mai ena ura ida ena ‘lalohadai ia guia noho, Keriso do ia kamonai henia totona.’ (2 Korinto 10:5) Nega haida unai be mai ena hekwarahi, bona bema lalohadai idauidau ita abia dae goada, do ita hekwarahi bada. Hegeregere, Dirava ena hereva momokani oi do dibaia lasi neganai, reana oi bona emu ruma bese ese tomadiho dina helagadia haida umui moalelaia hebou. To Baibel oi stadilaia neganai, oi lalo-parara unai moale karadia be kaivakuku tomadiho henia karana amo idia matamaia. Matamanai, reana oi ura lasi oi dibaia gaudia oi badinaia. To gabeai, emu lalokau Dirava dekenai ia bada, bena tomadiho lalohadaidia oi dadaraia, bona Dirava ese ia moalelaia lasi moale karadia oi hadokoa. Iehova ese oi abia hidi gauna ia hanamoa, ani?—Heberu 11:25 itaia.
18. Edena bamona ita kara be namo bema Baibel ena hereva momokani dekenai iseda lalo-parara idia habadaia?
18 Hanaihanai hahenamo ita davaria bema Dirava ena dala ita badinaia. (Isaia 48:17, 18) Unai dainai bema Baibel ena hereva ta dekenai iseda lalo-parara idia habadaia, mani ia hedinarai goevagoeva hereva momokanina ita abia dae mai moale ida! Momokani, iseda lalona idia hadiaria noho ese ia hahedinaraia ita be dala maorona ai ita raka noho. Unai be “kara maoromaoro taudia idia raka noho dalana,” bona ia “be daba rere bamona . . . ena diari be ia bada lao noho, ela bona dina tubua momokani ia hedinarai.” (Aonega Herevadia 4:18) Momokani, harihari ita ese Dirava ena ura ena kahana haida “ita itaia goeva lasi.” To Dirava ena nega ia ginidae neganai, hereva momokani ena hairai do ita itaia goevagoeva, bema iseda aena be kara maoromaoro “dalana” dekenai idia gini goada. To hari, namona be Iehova ese ia hahedinaraia hereva momokani ita moalelaia, bona ita do lalo-pararalaia lasi gaudia dekenai diari do ia hedinarai totona ita naria noho.
19. Edena dala ta amo ita hahedinaraia ita ese hereva momokani ita ura henia?
19 Edena dala namona ai ita ese iseda lalokau diari dekenai ita hahedinaraia diba? Dala ta be Dirava ena hereva ita duahia loulou—bema mai dalana dina ta ta iboudiai. Oi ese Baibel duahiduahi ena sediual ta oi badinaia noho, a? Gima Kohorona bona Awake! magasin danu ese lauma aniani namodia momo ita idia henia, ita moalelaidia totona. Danu, iseda namo totona idia karaia buka, buklet, bona ma gau idauidau oi laloa. Bona Yearbook of Jehovah’s Witnesses lalonai, ita idia hagoadaia Basileia harorolaia gaukarana ena sivarai idauidau be edena bamona?
20. Iehova ena amo ia mai diari bona hereva momokani dekenai iseda hebou lao henia karana ena anina be dahaka?
20 Oibe, Iehova be dala hereadaena amo Salamo 43:3 ai ia noho gurigurina ia haerelaia. Unai siri ena dokona kahanai, ia gwau: “Vadaeni [oiemu diari bona oiemu hereva momokani] ese maoromaoro oiemu ororo helagana, Siona dekenai lau do idia hakaua. Unai be oiemu Dubu Helaga, oi noho gabuna.” Oi ura bada ma taunimanima momo ida Iehova oi tomadiho henia noho, a? Iseda hebou idauidau ai idia henia lauma gaudia be dala badana ta, hari inai negai Iehova ese iseda lalona ia hadiaria totona. Dahaka ita karaia diba iseda Keristani heboudia laloa bada karana ita habadaia totona? Oi ai noia mai guriguri ida hereva gabena oi laloa totona.
[Footnote]
a C. T. Russell ia mase murinai, Studies in the Scriptures ena buka namba 7 idia karaia, Esekiela bona Apokalupo bukadia edia anina hahedinaraia totona. Unai buka ena hereva haida be Russell ese unai Baibel bukadia dekenai ia gwauraia herevadia. To, unai peroveta herevadia edia anina hahedinaraia negana be ia do ginidae lasi, bona unai Studies in the Scriptures bukana lalonai idia gwauraia herevadia momo idia hedinarai namonamo lasi. Unai murinai idia hanaia laganidia lalonai, Iehova ena hebogahisi bada karana bona tanobada dekenai idia vara gaudia ese Keristani taudia edia dala ia kehoa unai peroveta bukadia idia lalo-pararalaia maoromaoro totona.
Oi Haere Diba, A?
• Dahaka dainai Iehova ese ena ura be sisina sisina ia hahedinaraia noho?
• Edena dala ai aposetolo bona kwarana taudia Ierusalema ai ese kopina utua karana ena henanadai idia hamaoromaoroa?
• Edena Baibel stadilaia dalana be Baibel Stiuden taudia ginigunadia ese idia badinaia, bona dahaka dainai ia idau?
• Oi hahedinaraia edena dala ai lauma diari be Dirava ena nega korikori ai ia hedinarai.
[Picture on page 12]
Charles Taze Russell ia diba Dirava ena nega korikori ai Apokalupo bukana dekenai diari do ia hedinarai