‘Oi Bona Oi Idia Kamonai Taudia Oi Hamauria’

“Oi sibona oiemu kara do oi naria namonamo, oiemu hadibaia hereva danu. . . . Badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.”​—⁠1 TIMOTEO 4:⁠16.

1, 2. Dahaka ese Keristani taudia momokanidia ia hagoadaia, edia hamauria gaukarana idia karaia noho totona?

THAILAND ena not kahanai, daudau ia noho hanua maragina ta dekenai, Iehova ena Witnes tauna ta bona ena adavana ese ororo iduhuna taudia idia haroro henia, bona vanegai sibona idia dibaia gadona idia tohoa. Hanua taudia dekenai Dirava ena Basileia ena sivarai namona idia harorolaia totona unai tau bona ena adavana be Lahu gado idia dibaia noho.

² Unai tau ia gwau: “Inai taunimanima namodia huanai ai gaukara dainai, ai mamia moalena be ai gwauraia diba lasi. Apokalupo 14:​6, 7 ena hereva ia guguru lalonai ai gaukara ena mamina ai abia momokani, badina ‘sivarai namona be bese ibounai, iduhu ibounai, bona gado ibounai’ dekenai ai harorolaia. Gabu haida sibona lalonai sivarai namona idia do harorolaia lasi, bona inai be unai bamona gabu ta. Ai abia Baibel stadi be momo herea dainai reana ma haida do ai abia be hegeregere lasi.” Ia hedinarai goevagoeva, unai taudia ruaosi idia ura idia sibona bona ma haida idia hamauria. Ita be Keristani taudia dainai, ita ibounai eda ura be unai bamona, ani?

“Oi Sibona Oiemu Kara Do Oi Naria Namonamo”

3. Ma haida ita hamauria totona dahaka ita karaia guna be namo?

³ Aposetolo Paulo ese Timoteo ia sisiba henia, “Oi sibona oiemu kara do oi naria namonamo, oiemu hadibaia hereva danu,” bona unai be mai anina bada Keristani taudia ibounai dekenai. (1 Timoteo 4:16) Momokani, taunimanima be hahemauri do idia abia totona ita durua neganai, namona be sibona eda kara ita laloa namonamo guna. Edena bamona unai ita karaia diba? Gau ta be iseda nega ita laloa namonamo. Iesu ese toa ta ia henia, ia amo ena murinai idia raka taudia idia diba ‘tanobada ena dokona’ negana ia matamaia vadaeni. To danu, Iesu ia gwau dokona ena nega ita diba lasi. (Mataio 24:​3, 36) Edena bamona unai ita laloa be namo?

4. (a) Inai tanobada ena dokona negana be edena bamona ita laloa be namo? (b) Dahaka lalohadai ita dadaraia be namo?

⁴ Namona be ita ta ta be sibona ita nanadaia, ‘Inai tanobada ena dokona negana be lau gaukaralaia, lau bona lauegu hereva idia kamonai taudia lau hamauria totona, a? Eiava lau laloa, “Dokona ena nega ita diba lasi dainai, do lau laloa bada lasi,” a?’ Lalohadai iharuana be dika do ia havaraia. Unai be Iesu ena hereva hegeregerena lasi, ia gwau: “Do umui hegaegae, badina be Taunimanima ena Natuna do ia mai ena hora be umui diba lasi.” (Mataio 24:44) Momokani, hari be Iehova ena hesiai gaukara dekenai iseda ura ita haboioa eiava tanobada amo noho namo eiava moale ita tahua negana lasi.​—⁠Luka 21:​34-36.

5. Keriso ia do vara lasi neganai idia noho Iehova ena witnes taudia edia haheitalai be edena bamona?

⁵ Sibona eda kara ita naria namonamo dalana ma ta be, iseda Keristani maurina lalonai ita haheauka. Dirava ena hesiai taudia gunadia idia haheauka noho, herevana edia hahemauri be kahirakahira eiava lasi. Paulo ese Keriso ia do vara lasi neganai idia noho witnes taudia, hegeregere Abela, Enoka, Noa, Aberahamo, bona Sara, ia herevalaia murinai, ia gwau: “Dirava ena gwauhamata ena anina idia do davaria lasi. To daudau herea dekena amo, unai gwauhamata gaudia idia itaia, bona idia moale bada, idia gwau, ‘Ai be gabu idau taudia bamona inai tano dekenai ai noho. Ai be inai tanobada dekenai do ai noho daudau lasi.’ ” Idia ese auka lasi maurina abia totona edia ura idia koua, bona idia badinai idia noho taudia edia matabodaga karadia idia dadaraia, to mai edia ura bada ida “unai gwauhamata” idia guguru negana idia naria.​—⁠Heberu 11:13; 12:⁠1.

6. Keristani taudia ginigunadia ese hahemauri idia laloa dalana ena anina edia mauri dekenai be edena bamona?

⁶ Keristani taudia ginigunadia danu idia laloa, inai tanobada lalonai idia be “idau taudia” bamona. (1 Petero 2:11) Lagani 70 C.E. ai Ierusalema idia hadikaia karana amo idia roho mauri murinai danu, Keristani taudia momokanidia be haroro gaukara idia hadokoa lasi eiava tanobada taudia bamona idia noho lasi. Idia diba idia kamonai noho taudia ese hahemauri namo hereana do idia abia. Momokani, lagani 98 C.E. ai, aposetolo Ioane ia gwau: “Tanobada, mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​—⁠1 Ioane 2:​17, 28.

7. Edena dala ai hari inai negai Iehova ena Witnes taudia idia haheauka?

⁷ Hari inai negai Iehova ena Witnes taudia be Keristani gaukara lalonai idia haheauka danu, ena be dagedage bada idia davaria. Idia haheauka kava, a? Lasi, badina Iesu ese ita ia hagoadaia, ia gwau: “Iena lalona do ia goada noho ela bona dokona, unai tauna be do ia mauri,” herevana unai be inai tanobada dikana ena dokona eiava ta ena mauri ena dokona. Toreisi lou lalonai, Iehova ese idia mase vadaeni kamonai hesiai taudia ibounai do ia laloatao bona edia davana do ia henia.​—⁠Mataio 24:13; Heberu 6:⁠10.

8. Edena dala ai ita hahedinaraia diba Keristani taudia gunadia edia haheauka karana ita laloa bada?

⁸ Danu, ita moale badina kamonai Keristani taudia gunadia be edia hahemauri sibona idia laloa lasi. Idia edia hekwarahi amo Dirava ena Basileia ena sivarai ita kamonai taudia ita moale badina idia be mai edia haheauka ida Iesu ena hahegani idia badinaia, ia gwau: “Do umui lao, bese ibounai be diba tahua taudia do umui halaoa, . . . idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:​19, 20) Dala ia do kehoa noho lalonai, sivarai namona idia kamonai lasi taudia dekenai ita haroro karana amo eda moale ita hahedinaraia diba. To, haroro gaukara be hahediba taudia halaoa gaukarana ena kahana ginigunana sibona.

‘Emu Hadibaia Karana Oi Naria Namonamo’

9. Edena dala ai lalohadai maorona ese ita ia durua, Baibel stadi ita hamatamaia totona?

⁹ Ita abia gaukarana be haroro gaukara sibona lasi to hadibaia gaukara danu. Iesu ese ita ia hagania, taunimanima do ita hadibaia ia hadibaia gaudia ibounai do idia badinaia totona. Momokani, teritori haida dekenai, toana be haida sibona idia ura Iehova idia diba. To bema lalohadai kererena iseda teritori dekenai ita abia, reana Baibel stadi hamatamaia totona do ita hekwarahi bada lasi. Haida idia gwauraia teritori aukana dekenai painia gaukara ia karaia taihuna ta, Yvette, ia itaia unai gabu dekenai idia vadivadi taudia, unai bamona lalohadai kererena idia abia lasi taudia, ese Baibel stadi idia hamatamaia. Yvette ese ena lalohadai ia hamaoromaoroa neganai, ia danu ese Baibel stadi idia ura abia taudia ia davaria.

10. Ita be Baibel hadibaia taudia dainai, iseda gaukara be dahaka?

¹⁰ Keristani taudia haida ese kamonai taudia dekenai Baibel stadi idia gwauraia hedinarai lasi, badina idia laloa idia hegeregere lasi stadi do idia hakaua. Momokani, iseda diba be idauidau. To Dirava ena Hereva ita hadibaia namonamo totona iseda diba ia bada momokani be gau ginigunana lasi. Baibel ena hereva goevana be mai ena siahu, bona Iesu ia gwau mamoe bamona taudia ese Mamoe Naria Tauna korikorina ena gadona do idia diba. Unai dainai, iseda gaukara be Mamoe Naria Tauna Namona, Iesu, ena hereva do ita harorolaia goevagoeva, ita karaia diba hegeregerena.​—⁠Ioane 10:​4, 14.

11. Edena dala ai Baibel stiuden tauna durua karana oi hanamoa diba?

¹¹ Edena dala ai Iesu ena hereva harorolaia gaukarana oi hanamoa diba? Gau ginigunana be umui herevalaia gauna dekenai Baibel ena hereva oi tahua. Hereva ta be ma ta dekenai oi hadibaia diba totona, oi ese unai hereva oi lalo-pararalaia guna be gau badana. Danu, hemataurai dalana ai stadi oi hakaua, to tura henia ena mamina ia noho be namo. Stiuden taudia, mauri lagani maragi taudia danu, be diba idia abia haraga, bema idia gari lasi bona bema hadibaia tauna ese hemataurai bona kara namo ia hahedinaraia.​—⁠Aonega Herevadia 16:⁠21.

12. Edena dala ai oi hamomokania diba, stiuden tauna ese oi hadibaia gaudia ia lalo-pararalaia?

¹² Oi be hadibaia tauna dainai, oi ura lasi hereva haida oi gwauraia sibona, stiuden tauna be oi murinai ia gwauraidia kava totona. Namona be oi durua, ia dibaia gaudia ia lalo-pararalaia totona. Stiuden tauna ese ena edukeisen, ena mauri lalonai ia dibaia gaudia, bona ena diba Baibel dekenai hegeregerena, oi herevalaia gaudia do ia lalo-pararalaia. Unai dainai, oi sibona oi nanadaia diba, ‘Stadi herevana lalonai idia hedinarai siri edia anina ia lalo-pararalaia, a?’ Ena lalohadai ia gwauraia totona, namona be oi henia henanadai be ‘oibe’ eiava ‘lasi’ amo do ia haerelaia diba lasi to do ia herevalaia. (Luka 9:​18-20) To danu, stiuden taudia haida idia ura lasi hadibaia tauna ena hereva idia henanadailaia. Unai dainai, do idia stadi noho ena be oi hadibaia gaudia idia lalo-pararalaia namonamo lasi. Namona be stiuden tauna oi hagoadaia, henanadai ia henia bona hereva ta ia lalo-pararalaia lasi neganai oi do ia hadibaia totona.​—⁠Mareko 4:10; 9:​32, 33.

13. Edena dala ai stiuden tauna oi durua diba, hadibaia tauna ai do ia lao totona?

¹³ Baibel stadi ita hakaua ena badina namona ta be stiuden tauna ita durua, hadibaia tauna ai ia lao totona. (Galatia 6:⁠6) Unai ia vara totona, emui stadi umui riviulaia neganai, namona be oi hagoadaia auka lasi dalanai sibona ena hereva amo oi dekenai hereva ta do ia hadibaia, nega ginigunana unai hereva ia kamonai tauna dekenai ia herevalaia bamona. Gabeai, ia hegeregere bona haroro gaukara ia karaia diba neganai, oi boiria diba haroro gaukara umui karaia hebou totona. Ena hemami do ia namo bema oi danu ia gaukara, bona unai amo diba ia abia ela bona ena lalona ia hegeregere ia sibona ia haroro totona.

Stiuden Tauna Oi Durua Iehova Ena Turana ai Ia Lao Totona

14. Oi be hadibaia tauna dainai emu tahua gauna badana be dahaka, bona dahaka ese oi do ia durua, unai oi karaia totona?

¹⁴ Keristani hadibaia taudia ibounai edia tahua gauna badana be stiuden tauna idia durua, Iehova ida hetura karana ia abia totona. Unai be oiemu hereva sibona lasi, to oiemu haheitalai amo oi karaia diba. Oiemu haheitalai amo stiuden tauna oi hadibaia neganai, unai ese ena kudouna do ia hamarerea. Kara ena siahu be bada to hereva ena siahu be maragi, bona kara maoromaoro bona lalo-goada karadia habadaia lalonai unai be mai anina bada. Bema oiemu hereva bona oiemu kara amo ia itaia oiemu hetura karana Iehova ida be namo, reana do ia ura bada unai bamona hetura karana ia abia danu.

15. (a) Dahaka dainai gau badana be stiuden tauna ese ura maorona dainai Iehova ia hesiai henia? (b) Edena dala ai oi ese stiuden tauna oi durua diba, lauma dalanai ia goada ia lao totona?

¹⁵ Oi ura stiuden tauna ese Iehova ia lalokau henia dainai ia hesiai henia, Aramagedono amo ia ura roho mauri sibona dainai lasi. Unai bamona ura goevana habadaia totona ia oi durua neganai, oi be emu haginia gaukarana lalonai lahi ese ia hadikaia diba lasi kohu oi gaukaralaia, bona unai be iena abidadama idia tohoa gaudia ese do idia hadikaia diba lasi. (1 Korinto 3:​10-15) Ura kererena, hegeregere ia ura oi eiava ma taunimanima ta ia tohotohoa, ese ia dekenai goada ia henia lasi Keristani lasi karadia ia dadaraia eiava mai gari lasi ida kara maorona ia badinaia totona. Namona be oi laloatao, oi ese ia do oi hadibaia noho lasi ela bona hanaihanai. Dala ia do kehoa lalonai, ia oi hagoadaia diba dina ta ta ai Dirava ena Hereva do ia duahia bona lalohadailaia, bena unai kara amo Dirava kahirakahira do ia lao. Unai dala ai, ia ese Baibel bona Baibel idia herevalaia bukadia amo “hereva momokani” do ia abia noho, herevana emui stadi umui haorea vadaeni.​—⁠2 Timoteo 1:⁠13.

16. Edena dala ai stiuden tauna oi durua diba mai ena kudouna ibounai ida ia guriguri totona?

¹⁶ Stiuden tauna be Iehova kahirakahira ia lao totona oi durua dalana ma ta be mai ena kudouna ibounai ida ia guriguri dalana oi hadibaia. Edena bamona unai oi karaia diba? Reana ia oi hagoadaia, Iesu ese ia hahedinaraia gurigurina ia itaia totona, bona Baibel lalonai mai edia kudouna ibounai ida idia gwauraia guriguri ma haida danu, hegeregere salamo bukana lalonai idia noho gaudia. (Salamo 17, 86, 143; Mataio 6:​9, 10) Danu, stiuden tauna ese emu guriguri stadi vairanai bona murinai ia kamonai neganai, ia ese oiemu hemami Iehova dekenai ia mamia. Unai dainai, namona be hanaihanai oi hahedinaraia oiemu guriguri be mai momokani ida oi gwauraia bona oiemu kudouna amo oi gwauraia, bona idia hahedinaraia lauma gaudia oi laloa bada bona hemami maorona oi abia.

Emui Natudia Hamauria Totona Umui Gaukara

17. Edena dala ai tama sina ese edia natudia idia durua diba, hahemauri dalana ai idia raka noho totona?

¹⁷ Momokani, ita ura hamauria taudia haida be eda ruma bese taudia. Keristani tama sina edia natudia momo be mai momokani ida ‘abidadama dekenai idia gini goada.’ To, ma haida be reana edia kudouna dekenai hereva momokani ia noho lasi. (1 Petero 5:9; Efeso 3:17; Kolose 2:⁠7) Unai bamona matamata taudia momo be taunimanima badadia ai idia lao neganai, Keristani mauri dalana idia rakatania. Bema oi be tamana ta o sinana ta, dahaka oi karaia diba unai ia vara lasi totona? Gau ginigunana be, ruma bese lalonai hemami namona umui havaraia. Ruma bese maurina namona ese dala ia kehoa siahu taudia idia laloa maoromaoro, kara maoromaoro taravatudia idia laloa bada, bona hebamo namona idia moalelaia totona. (Heberu 12:⁠9) Unai dainai, ruma bese ena hebamo namona lalonai, natuna ena hetura karana namona Iehova ida ia goada ia lao diba. (Salamo 22:10) Ruma bese goadadia be gau idauidau idia karaia hebou​—⁠herevana tama sina ese edia ura gaudia hagugurua totona idia gaukaralaia diba negana idia reaia. Unai dala ai, umui ese emui haheitalai amo emui natudia umui hadibaia diba, mauri lalonai gau maorodia idia abia hidi totona. Tama bona sina e, emui natudia ese umui amo idia ura abia gauna be kohu lasi, to umui​—⁠emui nega, goada, bona lalokau. Emui natudia dekenai unai gaudia umui henia, a?

18. Namona be tama sina ese edia natudia idia durua, edena bamona henanadai idia haerelaidia totona?

¹⁸ Namo lasi Keristani tama sina idia laloa edia natudia be maoromaoro Keristani taudia ai do idia lao danu. Daniel, elda ta mai ena natudia ima, ia gwau: “Namona be tama sina ese nega idia atoa, natudia be sikuli bona ma gabu haida ai idia abia dae daradara gaudia idia kokia totona. Namona be mai edia haheauka ida edia natudia idia durua inai henanadai edia haere idia abia totona: ‘Momokani ita be dokona negana lalonai ita noho, a? Momokani tomadiho momokanina be tamona sibona, a? Dahaka dainai sikuli turana namona ta be hebamo dikana? Headava lasi taudia idia mahuta hebou be hanaihanai ia kerere, a?’ ” Tama sina e, namona be umui diba Iehova ese emui hekwarahi do ia hanamoa, badina ia ese emui natudia edia namo ia tahua danu.

19. Dahaka dainai tama sina ese edia natudia idia stadi henia be namo herea?

¹⁹ Tama sina haida idia laloa idia hegeregere lasi edia natudia ida do idia stadi. To, namo lasi unai bamona umui laloa, badina ma ta ese umui bamona emui natudia ia hadibaia diba lasi. (Efeso 6:⁠4) Emui natudia ida umui stadi neganai, do umui itaia namonamo diba edia kudouna bona lalona dekenai be dahaka ia noho. Mai edia kudouna ibounai ida idia hereva eiava idia haere kava, a? Momokani idia dibaia gaudia idia abia dae, a? Idia abia dae Iehova be momokani ia noho, a? Unai bona mai anina bada henanadai ma haida edia haere umui abia dalana tamona be emui natudia ida umui stadi.​—⁠2 Timoteo 1:⁠5.

20. Edena dala ai tama sina ese ruma bese stadi idia karaia diba, iboudiai ese idia moalelaia bona ena namo idia abia totona?

²⁰ Ruma bese ena stadi umui hamatamaia murinai, edena dala ai sediual umui badinaia diba? Joseph, elda ta mai ena natuna mero ta bona kekeni ta, ia gwau: “Baibel stadi ibounai hegeregerena, namona be ruma bese ena stadi be umui moalelaia, namona be iboudiai ese idia ura henia. Emai ruma bese lalonai unai ia vara totona, nega ai badinaia auka herea lasi. Emai stadi ena lata be hora ta, to nega ta ta ai ena be miniti ten sibona lalonai ai stadi diba, stadi ai karaia. Emai natudia dekenai aiemai stadi be pura lalonai idia moalelaia bada gauna ta, bona unai ena badina ta be ai ese Lau Egu Bible Sivarai Buka ena sivarai be drama bamona ai karaia.a Unai amo ai stadilaia gaudia idia laloatao bona idia lalo-pararalaia namonamo be mai anina bada, paragraf hida ai stadilaia ena namo ia hereaia.”

21. Edena nega ai tama sina ese edia natudia idia hadibaia diba?

²¹ Momokani, stadi negadia sibona lalonai emui natudia umui hadibaia lasi. (Deuteronomi 6:​5-7) Hereva ena matamanai ai herevalaia Witnes tauna Thailand dekenai, ia gwau: “Egu tamana ese lau ia abia bena baisikele amo emai teritori ena daudau gabudia dekenai ai lao haroro negadia lau laloatao goevagoeva. Lau diba momokani, emai tama sina edia haheitalai, bona dala iboudiai dekenai ai idia hadibaia karana ese ai ia durua ful-taim hesiai gaukara ai matamaia totona. Bona ai dibaia gaudia ai laloaboio lasi. Teritori ena daudau gabudia ai lau do gaukara noho!”

22. ‘Oiemu kara bona oiemu hadibaia herevadia oi naria namonamo’ neganai, dahaka do ia vara?

²² Nega sisina murinai, nega maorona ai, Iesu do ia mai Dirava ena hahemaoro inai tanobada dekenai ia karaia totona. Gabeai unai kara badana be guba bona tanobada edia sivarai lalonai ia vara gauna ta sibona, to Iehova ena kamonai hesiai taudia be ia do idia hesiai henia noho ela bona hanaihanai. Oi ura oi be idia huanai oi noho, oiemu natudia bona oiemu Baibel stadi taudia ida, a? Vadaeni, inai oi laloaboio lasi: “Oi sibona oiemu kara do oi naria namonamo, oiemu hadibaia hereva danu. Inai kara namodia do oi karaia noho, badina unai dekena amo, oi sibona ese mauri do oi davaria, bona oi dekenai idia kamonai taudia danu ese mauri do idia davaria.”​—⁠1 Timoteo 4:⁠16.

[Footnotes]

Anina Oi Gwauraia Diba, A?

• Dirava ena hahemaoro dinana ita diba lasi dainai, edena bamona ita laloa be namo?

• Edena dala haida ai ‘iseda hadibaia herevadia ita naria namonamo’ diba?

• Edena dala ai stiuden tauna oi durua diba, Iehova ena turana ai ia lao totona?

• Dahaka dainai tama sina ese nega idia atoa edia natudia ida idia stadi totona be gau badana?

[Picture on page 15]

Hemataurai dalana ai stadi oi karaia to tura henia ena mamina ia noho neganai, diba do ia abia haraga

[Picture on page 18]

Baibel ena sivarai, Solomona ese ariara hahine rua ia hahemaoro henia bamona, be drama bamona umui karaia neganai, iboudiai ese stadi do idia moalelaia