Dirava Ia Hamoalea Miusiki

Miusiki idia gwauraia “taunimanima ese idia dibaia gaukara namodia iboudiai amo, ia be vaia edia diba ta bona gunana momokani.” Gado idia diba hegeregerena, miusiki aonegana dainai taunimanima be animal amo idia idau. Miusiki ese lalona ia hamarerea. Taiana ia hamoalea diba, darana ese ia laloa daudau diba bona, gau badana be, miusiki ese Dirava ia hamoalea diba.

BAIBEL ese ia hahedinaraia hegeregerena, Israela taudia be miusiki idia karaia momo taudia. Unger’s Bible Dictionary ia gwau, “idaunegai Baibel negadia ai” miusiki be “idia karaia momo gaukara namona ta.” Dina iboudiai, edia tomadiho lalonai ane idia abia bona miusiki gaudia idia karaia momo. To idia karaia kara badana be ane idia abia.

King Davida ese Levi taudia amo tatau haida ia abia hidi palai dubu dekenai “ane do idia gunalaia totona”, iena natuna, Solomona, ese ia haginia dubuna ia do hahelagaia lasi negana ai. (1 Sivarai 6:​31, 32) Iehova ena noho ia hahedinaraia gauna, taravatu mauana, be Ierusalema dekenai idia mailaia neganai, Davida ese Levi taudia ia boiridia “[Iehova], Israela ena Dirava, do idia guriguri henia, bona do idia hanamoa, mai ane abia danu.” Ane idia abia neganai idia ese “gita badadia bona maragidia [idia] gadaralaia, . . . auri laboralabora botaia gaudia [idia] botaia, . . . kibi . . . idia hiriria.” Unai tatau be “Davida ese ia abidia hidi, ane do idia abia totona taudia, do idia gwau, ‘[Iehova] do ita hanamoa, badina iena lalokau be do ia noho hanaihanai, doko lasi.’ ”​​—⁠1 Sivarai 16:​4-6, 41; 25:⁠1.

Unai hereva “[Iehova ena] lalokau bona bogahisihisi do idia noho hanaihanai” be nega momo Salamo dekenai idia torea, unai Baibel bukana dekenai miusiki idia herevalaia momo. Hegeregere, Salamo 136 lalonai unai hereva be siri iboudiai 26 ena kahana iharuana ai idia torea. Baibel ia diba bada tauna ta ia gwau, “unai hereva ia kwadogi dainai taunimanima edia udu bibinadia ese idia gwauraia haraga diba. Idia kamonaia taudia iboudiai idia laloatao diba.”

Salamo siridia ataiai idia torea herevadia ese idia hahedinaraia miusiki gadaralaia gaudia idia gaukaralaia momo. Salamo 150 ese kibi, gita maragina, gaba, ivilikou, botaia auri, bona gita badadia ia herevalaia. To unai salamo lalonai hereva badana be taunimanima edia gado dekenai. Siri 6 ena hagoadaia hereva ia gwau: “Umui mauri noho gaudia ibounai e, [Iehova] ena ladana do umui hanamoa!”

Miusiki be iseda lalona ia hahedinaraia dainai, Baibel edia nega ai lalohisihisi dainai idia abia anedia, eiava idia gwauraia loulou anedia, amo idia hahedinaraia. To unai bamona ane karaia dalana be Israela edia miusiki dekenai idia davaria momo lasi. Baibel ensaiklopidia Insight on the Scriptures ia gwau, “Lalohisihisi dainai idia abia anedia eiava taitai anena sibona lalonai hereva idia gwauraia loulou dalana idia ura, to nega momo idia ura miusiki ena rege namona eiava hereva korikori gwauraia bona gado regena ena dae bona diho idia kamonai.”a

Iesu bona iena abidadama aposetolo taudia be Iehova dekenai ane idia abia Iesu ia do mase lasi hanuaboina ai, bona sedira Hallel edia Salamo herevadia unai ane lalonai idia abia. (Salamo 113-118) Unai ese Iesu ena hahediba taudia ia hagoadaia bada edia Biaguna idia haboioa lalohisihisina neganai! Unai sibona lasi, to nega ima unai ane herevana, “iena lalokau bona bogahisihisi do idia noho hanaihanai,” idia abia neganai, mai abidadama danu tanobada bona guba ibounai ena Lohia Hereana, Iehova, idia hesiai henia noho urana be idia hagoadaia.​​—⁠Salamo 118:​1-4, 29.

Gunaguna Keristani taudia Efeso bona Kolose dekenai be “salamo bona Dirava hanamoa anedia” (“tomadiho anedia”) idia abia. Unai idia abia bona “lauma anedia” danu be edia kudou lalonai idia abia. (Efeso 5:19; Kolose 3:16) Ane bona hereva amo Dirava idia hanamoa. Iesu ia gwau, “tau ena lalona ia honu momokani gaudia dekena amo iena uduna ia hereva,” ani?​​—⁠Mataio 12:⁠34.

Dirava Ia Habadua Miusiki

Baibel lalonai idia herevalaia miusiki ibounai ese Dirava ia hamoalea lasi. Sinai Ororona dekenai ia vara gauna oi laloa, unuseniai Mose ese Taravatu ia abia, unai be Taravatu Ten danu. Mose be ororo amo ia diho neganai, dahaka ia kamonai? “Kwalimu dainai idia moale regena lasi, bona idia lusi dainai idia tai regena lasi, to ane [idauna] idia abia noho.” Unai miusiki be kaivakuku tomadiho henia dainai idia karaia, unai kara ese Dirava ia habadua bona unai miusiki idia karaia taudia 3,000 bamona idia mase.​​—⁠Esodo 32:​18, 25-28.

Ena be taunimanima be miusiki idauidau idia torea diba, idia gadaralaia diba, bona idia moalelaia diba, to ita gwau lasi unai ibounai ese Dirava ia hamoalea. Badina be dahaka? Keristani aposetolo Paulo ese ia gwauraia hedinarai, ia gwau: “Ita ibounai ita kara dika vadaeni, bona Dirava ena hairaina guba dekenai ita abia be hegeregere lasi.” (Roma 3:23) Kaivakuku tomadiho henia taudia be natudia momo havaraia totona kastom karadia, taunimanima edia souli ia mase diba lasi hahediba herevana, bona Maria be “Dirava ena sinana” idia matauraia bada karana be nega momo miusiki toretoredia dekenai idia hahedinaraia bada. To unai hahediba herevadia bona unai kara ese hereva momokani Diravana idia hadikaia, badina unai be iena lauma amo ia havaraia Herevana, Baibel, lalonai ia torea herevadia amo idia idau.​​—⁠Deuteronomi 18:​10-​12; Esekiela 18:4; Luka 1:​35, 38.

Aonega Dalana ai Miusiki Abia Hidi

Ita abia hidi diba miusiki idauidau momo dainai ita daradara bada. CD edia maua laulaudia ese hoia taudia edia lalona ia veria miusiki idauidau momo idia hoia totona. To bema Dirava ia tomadiho henia tauna ia ura Ia ia hamoalea, do ia naria namonamo bona mai aonega ida miusiki do ia abia hidi, tomadiho koikoi hahediba eiava lebulebu bona demoni karadia idia hahedinaraia bada anedia bona miusiki do ia dadaraia.

Albert, guna ia be Keristani misinari gaukara ia karaia Africa dekenai, ia gwau unuseniai ia be dala lasi bamona piano ia gadaralaia totona. To ia abia lao rekod haida be nega momo ia kamonai loulou. Albert be ena tano dekenai ia giroa, bona hari ia be loaloa naria tauna bona Keristani kongregesen vadivadi henia gaukarana ia karaia. Miusiki ia kamonai totona iena nega be bada lasi. Ia gwau, “Lau ura henia bada miusiki torea tauna be Beethoven. Lagani momo lalodiai, lau ese iena symphony, concerto, sonata, bona quartet momo edia rekodi gaudia lau haboudia.” Unai ia kamonai neganai ia moale bada. Momokani, taunimanima ta ta idia ura henia miusiki be idauidau, to ita be Keristani taudia dainai Paulo ena sisiba ita laloa: “Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.”​​—⁠1 Korinto 10:⁠31.

Miusiki Bona Gwauhamata

Susie ena lalokau gauna badana be miusiki. Ia gwau: “Egu lagani be 6 neganai piano lau gadaralaia matamaia, egu lagani be 10 neganai violin lau gadaralaia, bena egu lagani be 12 neganai gitara maragina lau gadaralaia.” Gabeai Susie ia lao London, England, ena Royal College of Music dekenai, gitara maragina ia stadilaia totona. Lagani hani lalodiai Spain amo gitara maragina ia gadaralaia ladana bada hahine ta ida ia stadi, bona ma lagani ta ai Paris Conservatoire dekenai ia stadi, unuseniai miusiki dekenai degree badana ia abia bona gitara maragina ia gadaralaia bona piano ia hahedibalaia dainai diploma ia abia.

Susie be London lalonai Iehova ena Witnes taudia edia kongregesen ta ida ia hebamo. Unuseniai Witnes turadia edia laloa bada bona lalokau momokani ena mamina ia davaria. Sisina sisina, iena lalokau Iehova dekenai ia bada ia lao, bona Iena hesiai gaukara karaia urana ia bada dainai dala ia tahua ia hesiai henia totona. Unai dainai ia gwauhamata bona bapatiso ia abia. Susie ia gwau: “Miusiki be egu gaukara ai ia lao dainai egu mauri be unai totona lau henia, unai dainai gau ta totona mauri henia dalana be lau diba vadaeni.” Concert ia karaia ena nega ia maragi badina Iesu ena hahegani ia badinaia bona Keristani hesiai gaukara lalonai Dirava ena Basileia sivarai namona ia harorolaia.​​—⁠Mataio 24:14; Mareko 13:⁠10.

Hari ia be nega sisina sibona taunimanima vairadiai miusiki ia gadaralaia dainai, iena mamina be edena bamona? Ia gwau: “Nega haida lau lalohisihisi badina egu nega be bada lasi miusiki lau gadaralaia totona, to egu miusiki karaia gaudia lau gadaralaia noho bona lau moalelaia. Miusiki be harihari gauna Iehova ena amo. Iena hesiai gaukara be egu mauri lalonai lau atoa gauna ginigunana dainai, miusiki lau moalelaia bada diba.”​​—⁠Mataio 6:⁠33.

Dirava Ia Hanamoa Miusiki

Albert bona Susie bona Iehova ena Witnes taudia 6 milioni bamona be miusiki amo Iehova Dirava idia hanamoa hanaihanai. Tano 234 ai Keristani hebou be Kingdom Hall dekenai idia karaia, bona edia hebou idia hamatamaia bona idia hadokoa neganai, bema mai edia dala, Iehova dekenai ane idia abia. Miusiki regedia idauidau amo, miusiki namodia idia karaia bona Baibel herevadia ida Iehova Dirava hanamoa anedia idia abia.

Idia hebou taudia iboudiai be mai gado-namo ida ane dekenai idia gwau Iehova be ita ia laloa Diravana (Ane 44). Iehova hanamoa ane idia abia (Ane 190). Edia ane dekenai idia hahedinaraia Keristani tadikaka oreana lalonai, Keristani mauri dalana ai, bona Keristani karadia ai idia moale bona idia be mai edia maduna. Edia moale ia habadaia gauna be unai ane idia havaraia neganai Asia, Australia, Europe, bona North bona South America amo miusiki daladia idauidau idia gaukaralaia.b

Salamo ena nega lalonai king edia Dirava hanamoa ane badana ta ena hamatamaia herevadia dekenai ia gwau: “Lohiabada dekenai ane matamatana do umui abia. Tanobada dekenai noho taudia ibounai e, Lohiabada dekenai ane do umui abia. Lohiabada dekenai ane do umui abia. Iena ladana do umui abia isi! . . . Dina ibounai lalonai inai sivarai namona, be taunimanima dekenai do ita gwauraia. Lohiabada ena hairaina be bese idauidau ibounai dekenai, do umui gwauraia hedinarai. Iena kara badadia be idia ibounai dekenai do umui hadibaia.” (Salamo 96:​1-3) Oiemu gabu dekenai Iehova ena Witnes taudia be unai idia karaia, bona oi idia boiria unai hanamoa ane oi karaia danu. Edia Kingdom Hall dekenai oi do idia welkam henia, unuseniai Iehova hamoalea miusiki amo Ia oi hanamoa dalana do oi diba.

[Footnotes]

[Picture on page 28]

Iehova dekenai hanamoa ane idia karaia