“Umui Ibounai be Tadikaka”
“Taunimanima ese umui do idia gwauraia lasi ‘Hadibaia Tauna.’ Badina be umui emui Hadibaia Tauna be tamona sibona, bona umui ibounai be tadikaka.”— MATAIO 23:8.
1. Edena kara ita laloa be namo?
ORIENT tanona ta ai Keristani hahinena ta be Australia amo ia mai misinari hahinena ta ia nanadaia, “Daika ita matauraia bada, misinari tauna eiava Betele tauna?” Ia ura diba daika do ia matauraia bada be namo, ma tano ta amo ia mai misinari tauna eiava ena gabu amo ia mai Watch Tower Society ena brens opesi ai ia gaukara tauna. Unai henanadai maragina, ena bese lalonai dagi idia laloa bada karana ia hahedinaraia henanadai, ese misinari taihu ia hahoaia. To, inai henanadai daika be bada, ia vara badina taunimanima idia ura diba daika be mai ena siahu bona ladana bada.
2. Iseda tadikaka be edena bamona ita lalodia be namo?
2 Unai lalohadai be matamata lasi. Iesu ena hahediba taudia danu be idia hepapahuahu noho idia daika be herea. (Mataio 20:20-24; Mareko 9:33-37; Luka 22:24-27) Idia danu be dagi idia laloa momo besena amo idia mai, unai be aposetolo taudia edia nega ai ia noho Iuda besena. Iesu ese unai bamona taudia ia laloa noho lalonai, ena aposetolo taudia ia sisiba henia: “Taunimanima ese umui do idia gwauraia lasi ‘Hadibaia Tauna.’ Badina be umui emui Hadibaia Tauna be tamona sibona, bona umui ibounai be tadikaka.” (Mataio 23:8) Baibel ia tahua tauna Albert Barnes ia gwau tomadiho dagi ladana hegeregere “Rabi,” ena anina be “Hadibaia Tauna,” “ese idia abia taudia dekenai hekokoroku bona idia be bada lalohadaina ia havaraia, bona idia abia lasi taudia dekenai mama bona idia be maragi lalohadaina ia havaraia; bona unai lalohadai bona ura ibounai be ‘Keriso ena manau karana’ amo ia idau momokani.” Momokani, Keristani taudia ese edia huanai idia noho naria taudia idia gwauraia lasi “Elda unai bona unai,” inai hereva “elda” idia gaukaralaia lasi ta idia hanamoa koikoi totona. (Iobu 32:21, 22) To, Iesu ena sisiba herevana idia badinaia elda taudia ese kongregesen taudia ma haida idia matauraia, Iehova ese ia idia badinaia taudia ia matauraia bona Iesu Keriso ese ena murinai idia raka kamonai taudia ia matauraia hegeregerena.
Iehova Bona Iesu Edia Haheitalai
3. Edena dala ai Iehova ese ena aneru ia matauraidia?
3 Ena be Iehova be “Ataiai Momokani Diravana,” to matamana amo ia ese ia havaraia taudia dekenai ena gaukara lalonai gaukara ia henia karana amo idia ia matauraia. (Salamo 83:18) Taunimanima ginigunana ia havaraia neganai, Iehova ese ia havaraia Natuna tamona be “gaukara karaia tauna bamona” ia gaukaralaia. (Aonega Herevadia 8:27-30; Genese 1:26) Iehova ese ena lalona ia hadaia kara dika King Ahaba do ia hamasea neganai, ia ese ena guba anerudia ia boiria idia sibona do idia hahedinaraia edena bamona unai do idia karaia.—1 King Taudia 22:19-23.
4, 5. Edena dala ai Iehova ese taunimanima ia matauraidia?
4 Iehova be guba bona tanobada edia Atai Herea Lohiabadana. (Deuteronomi 3:24) Taunimanima edia heduru ia abia be anina lasi. To, ita gwau diba, taunimanima ia laloa dainai ia manau. Salamo torea tauna ta ia gwau: “Daika be Lohiabada iseda Dirava hegeregerena? Lohiabada be guba ena ataiai ia helai noho, to ia ese iena kwarana ia atoa diho, iena matana ia negea, guba bona tanobada ia itaia noho. Ia ese ogogami taudia, be tano ena kahu dekena amo ia abia isi noho.”—Salamo 113:5-8.
5 Iehova ese Sodoma bona Gomora ia do hadikaia lasi neganai, Aberahamo ena henanadai ia kamonai bona Aberahamo ena hemami hahemaoro karana dekenai ia hagugurua. (Genese 18:23-33) Ena be Iehova ia diba vadaeni dahaka do ia vara, to mai ena haheauka ida Aberahamo ena noinoi ia kamonai bona abia dae.
6. Habakuku ia henanadai neganai Iehova ese ia matauraia dainai dahaka ia vara?
6 Iehova be Habakuku ena hereva ia kamonai danu, ia henanadai: “Lohiabada e, nega momo oi dekenai lau boiboi vadaeni. Edena negai lauegu boiboi do oi kamonai”? Iehova ia laloa unai henanadai amo Habakuku ese iena siahu ia hepapahuahulaia, a? Lasi, ia laloa Habakuku ena henanadai idia maoro, bona unai dainai ia hahedinaraia ia ura Kaldea taudia do ia gaukaralaia ena hahemaoro karana do idia karaia totona. Ia ese unai peroveta tauna ia hamaoroa ‘unai peroveta herevana be do ia vara momokani.’ (Habakuku 1:1, 2, 5, 6, 13, 14; 2:2, 3) Iehova ese Habakuku ena lalo-hekwarahi gaudia ia laloa bada bona ia haere henia karana amo unai peroveta tauna ia matauraia. Unai dainai, unai lalohisihisi peroveta tauna ia moale lou, bona ena hahemauri Diravana dekenai ia abidadama momokani. Unai be Dirava ena lauma amo ia vara Habakuku bukana ese ia hahedinaraia, ita ia hagoadaia hari inai negai Iehova dekenai ita tabekau totona.—Habakuku 3:18, 19.
7. Dahaka dainai Petero ena kara Pentekoste 33 C.E. ai be mai anina bada?
7 Ma haida matauraia karana dekenai haheitalai namona ma ta be Iesu Keriso. Iesu be ena hahediba taudia dekenai ia gwau “taunimanima edia vairana dekenai lau do ia gwauraia hedinarai lasi tauna be lauegu Tamana . . . ena vairana dekenai, ia do lau gwauraia hedinarai lasi.” (Mataio 10:32, 33) To, ia idia samania hanuaboina ai, ena hahediba taudia iboudiai ese idia rakatania, bona aposetolo Petero ese nega toi ia gorea. (Mataio 26:34, 35, 69-75) Iesu ese murimuri ena toana sibona ia laloa lasi bona ia ese Petero ena hemami korikorina, iena helalo-kerehai momokani karana, ia laloa bada. (Luka 22:61, 62) Dina 51 sibona murinai, Keriso ese ia helalo-kerehai aposetolo tauna dekenai hahenamo ia henia, Pentekoste dinana ai ena aposetolo taudia 120 dainai ia hereva bona “Basileia ena ki” ginigunana ia gaukaralaia diba, unai amo ia hahedinaraia Petero ia matauraia. (Mataio 16:19; Kara 2:14-40) Petero dekenai dala ia kehoa do ia ‘giroa mai bona ena tadikaka do ia hagoadaia.’—Luka 22:31-33.
Ruma Bese Taudia Matauraia
8, 9. Edena dala ai tau ta ese ena adavana dekenai hemataurai ia hahedinaraia neganai, Iehova bona Iesu ia tohotohoa diba?
8 Namona be headava tatau bona tama sina ese Dirava amo idia abia siahuna idia gaukaralaia neganai, Iehova bona Iesu Keriso idia tohotohoa. Petero ia gwau: “Tatau e, umui danu, emui adavana danu umui noho hebou ena dala do umui laloa namonamo. Hahine ena tauanina be goada herea lasi, unai dainai do umui naria namonamo, bona matauraia.” (1 Petero 3:7) Mani oi laloa oi be uro namona ta oi dogoatao, ia be au gauna lasi to ia be ia makohi haraga diba gauna. Do oi naria namonamo, ani? Headava tauna ta be unai bamona ia karaia diba bema Iehova ia tohotohoa, bona ruma bese gaudia ia abia hidi neganai ena adavana ena lalohadai ia kamonai. Oi laloatao Iehova be nega ia henia Aberahamo ida ia herevahereva totona. Ia goevadae lasi dainai, headava tauna ese gau ibounai ia lalo-pararalaia lasi. Unai dainai ia be aonega karana bema ena hahine ia matauraia bona ena lalohadai ia laloa namonamo, ani?
9 Tatau edia siahu idia laloa bada tanodia ai, namona be headava tauna ia laloatao reana iena adavana ese ena lalohadai ia gwauraia be auka herea. Iesu Keriso be tanobada ai ia noho neganai, ena hahediba taudia, vaira negana ai ena headava matamata kekeni oreana taudia haida unai, ia kara henia dalana oi tohotohoa. Ia lalodia bada, tauanina bona lauma dalanai edia goada ia laloa, edia dabu gaudia idia do gwauraia hedinarai lasi neganai danu. (Mareko 6:31; Ioane 16:12, 13; Efeso 5:28-30) Danu, nega oi atoa emu hahine ese oi bona emu ruma bese totona ia karaia gaudia oi laloa totona, bona emu hereva bona kara amo emu tanikiu karana oi hahedinaraia. Iehova bona Iesu ese kara namo taudia idia laloa bada, idia hanamodia, bona idia dekenai hahenamo idia henia. (1 King Taudia 3:10-14; Iobu 42:12-15; Mareko 12:41-44; Ioane 12:3-8) Orient dekenai Keristani hahinena ta, ena adavana be Iehova ena Witnes tauna ai ia lao murinai, be ia gwau: “Guna egu tau be vairana kahana dekenai ia raka, lau ia rakatania kohu ibounai lau huaia totona. Hari ia ese baege ia huaia bona ruma dekenai lau karaia gaudia dainai ena moale ia hahedinaraia!” Hanamoa herevana ese emu hahine do ia durua bena do ia diba ia oi laloa bada.—Aonega Herevadia 31:28.
10, 11. Iehova ese gwau-edeede Israela besena ia kara henia karana amo, tama sina be dahaka idia dibaia?
10 Natudia idia durua neganai, bona edia kerere idia hamaoromaoroa be namo neganai inai be gau badana, tama sina ese Dirava ena haheitalai idia tohotohoa be namo. ‘Lohiabada ese Israela bona Iuda taudia ia sisiba henia noho,’ edia kara dika amo do idia giroa, to idia ese “edia lalona idia ha-aukaia.” (2 King Taudia 17:13-15) Israela taudia “edia hereva ibounai be koikoi sibona. Idia ese Dirava idia hanamoa koikoi.” Tama sina momo idia laloa edia natudia be nega haida unai bamona idia karaia. Israela taudia ese “Dirava . . . idia tohoa lou, tohoa lou” bona ena lalona idia hahisia. To, Iehova be idia “dekenai ia bogahisihisi henia. Idia edia kara dika ia gwauatao, bona ia ese idia ia hadikaia ore lasi.”—Salamo 78:36-41.
11 Danu, Iehova ese Israela taudia ia noia: “Harihari umui mai, ita hereva hebou. Momokani, umui emui dika be bada, rara ia kakakaka momokani bamona, to lau ese umui do lau huria, vadaeni do umui goeva, sinou ia kurokuro bamona.” (Isaia 1:18) Ena be Iehova ia kerere lasi, to ia ese unai gwau-edeede besena ia noia ia ida edia kerere do idia herevalaia hebou bona idia hamaoromaoroa totona. Unai be kara namo hereana tama sina ese edia natudia idia durua neganai idia tohotohoa totona! Bema gau ta ia vara, idia oi matauraia dainai edia hereva oi kamonai, bona idia ida oi herevahereva dahaka dainai idia ese edia kara idia haidaua be namo.
12. (a) Dahaka dainai iseda natudia matauraia bada to Iehova matauraia maragi karana ita dadaraia be namo? (b) Natudia ita sisiba henia neganai idia ita laloa bada dainai dahaka ita karaia be namo?
12 Momokani, nega haida natudia ese sisiba aukana idia abia be namo. Tama sina idia ura lasi Eli bamona idia karaia, ia be ‘ena natudia ia matauraia bada, to Iehova ia matauraia maragi.’ (1 Samuela 2:29) To, namona be natudia idia itaia diba unai sisiba ena badina be lalokau. Namona be idia lalo-parara edia tama sina ese idia lalokau henidia. Paulo ese tamadia ia sisiba henia, ia gwau: “Emui natudia do umui habadua kava lasi, to Iehova ena matahakani bona lalona biagua karana ai do umui naridia.” (Efeso 6:4, NW ) Tamana ese ena siahu ia gaukaralaia lalonai, gau badana be ena natudia ia laloa bada bona namo lasi ia kara auka dainai idia ia habadua. Oibe, natudia idia laloa bada dainai tama sina ese edia nega bona goada idia henia, to unai bamona idia karaia amo idia abia huahua ese idia henia gaudia ibounai ia hereaia.
13. Baibel ena lalohadai be dahaka ruma bese lalonai idia noho buruka taudia dekenai?
13 Ruma bese taudia matauraia karana ena anina be natudia bona hahine ita laloa bada karana sibona lasi. Japan taudia edia aonega herevana ta ia gwau, “Oi buruka neganai, emu natudia oi kamonai henia.” Unai hereva ena anina be idia buruka tama sina ese edia siahu edia natudia dekenai idia rakatania bona edia natuna badadia edia hereva idia laloa be namo. Ena be Baibel ena hereva hegeregerena tama sina ese edia natudia idia matauraia dainai edia hereva idia kamonai, to namo lasi natudia ese ruma bese lalonai idia noho buruka taudia dekenai hemataurai lasi karana idia hahedinaraia. Aonega Herevadia 23:22, (NW ) ia gwau: “Oiemu sinana do oi dadaraia lasi badina hari ia buruka dainai.” King Solomona ese unai hereva ia badinaia bona ena sinana ese noinoi gauna ta ia dekenai ia gwauraia neganai ia matauraia. Solomona ese terona ta iena idibana kahanai ia atoa bona iena sinana burukana, Bataseba, ena hereva ia kamonai.—1 King Taudia 2:19, 20.
14. Edena dala ai kongregesen ai idia noho buruka taudia ita matauraia diba?
14 Iseda lauma ruma bese badana lalonai, ita dekenai dala ia kehoa kongregesen lalonai idia noho buruka taudia ita “matauraia” totona. (Roma 12:10) Reana hari idia karaia gaukara ena bada be guna hegeregerena lasi bona unai dainai idia lalohisihisi diba. (Hadibaia Tauna 12:1-7) Nega ta gorere rumana ai ia hekure buruka horoa Witnes hahinena ta be unai bamona lalohisihisi ia hahedinaraia, ia gwau: “Lau ura dikadika lau mase haraga bona do lau gaukara lou.” Unai bamona buruka taudia ita laloa bada bona matauraia karana ese idia ia durua. Israela taudia be hahegani idia abia: “Tau buruka edia vairanai do umui toreisi, bona buruka taudia ibounai do umui matauraia.” (Levitiko 19:32) Idia oi matauraia bema oi hahedinaraia idia bona edia gaukara oi laloa bada. Oi “toreisi” ena anina ta be oi helai diho bona lagani momo gunanai idia karaia gaudia edia sivarai idia gwauraia be oi kamonai. Unai be buruka taudia laloa bada karana bona iseda mauri lauma dalanai ia hanamoa.
“Matauraia” Karana Oi Goadalaia
15. Elda taudia be dahaka idia karaia diba kongregesen taudia idia matauraia totona?
15 Elda taudia ese kongregesen taudia totona haheitalai namona idia hahedinaraia neganai kongregesen taudia idia goada. (1 Petero 5:2, 3) Ena be idia bisi bada, to hebogahisi elda taudia ese matamata taudia, ruma bese kwaradia, adavana lasi sinadia, headava hahinedia, bona buruka taudia idia hereva henidia, herevana idia be mai edia hekwakwanai eiava lasi. Elda taudia ese kongregesen taudia idia ura herevalaia gaudia idia kamonai bona idia karaia diba gaudia dainai idia hanamoa. Gau idauidau ia itaia bona tadikaka ta eiava taihu ta ese ia karaia gaudia dainai hanamoa hereva ia gwauraia elda tauna ese tanobada dekenai ia havaraia gaudia ia laloa bada tauna, Iehova, ia tohotohoa.
16. Dahaka dainai elda taudia bona kongregesen taudia ma haida ita matauraia be namo?
16 Iehova idia tohotohoa dainai, elda taudia ese Paulo ena hereva badinaia karana dekenai haheitalai namona idia hahedinaraia, ia gwau: “Umui ta ta do umui lalokau henia, tadikaka edia lalokau ta ta dekenai bamona. Umui ta ta dekenai danu do umui matauraia.” (Roma 12:10) Reana dagi idia laloa bada tanodia ai idia noho elda taudia dekenai unai be ia auka. Hegeregere, Orient tanona ta ai, idia be mai edia hereva rua inai hereva “tadikaka” idia gwauraia neganai, ta be dagi taudia matauraia herevana bona ma ta be taunimanima oredia ia gwauraia herevana. Ema bona vanegai, kongregesen taudia be elda taudia bona taunimanima badadia dekenai dagi taudia matauraia herevana idia gaukaralaia, ma haida dekenai be taunimanima oredia ia gwauraia herevana idia gaukaralaia. To, idia hagoadadia nega ibounai taunimanima oredia ia gwauraia herevana do idia gaukaralaia, badina Iesu ese ena murinai idia raka taudia ia hamaoroa hegeregerena, “umui ibounai be tadikaka.” (Mataio 23:8) Ena be reana ma tano haida dekenai dagi laloa bada karana be unai bamona ia hedinaraia goevagoeva lasi, to namona be ita ibounai ese iseda lalohadai dagi laloa bada karana dekenai ita naria namonamo.—Iamesi 2:4.
17. (a) Dahaka dainai elda taudia dekenai ita lao be auka lasi be namo? (b) Kongregesen taudia idia kara henia neganai edena dala idauidau ai elda taudia ese Iehova idia tohotohoa diba?
17 Momokani, Paulo ese ita ia hagoadaia elda taudia haida do ita “matauraia bada,” to idia be do tadikaka. (1 Timoteo 5:17, NW ) Bema “mai gari lasi danu” Guba bona Tanobada edia Lohia Badana “ena bogahisihisi ia noho helai gabuna dekenai ita raka kahirakahira lao” diba, vadaeni Iehova idia tohotohoa elda taudia dekenai ita lao diba danu, ani? (Heberu 4:16; Efeso 5:1) Bema elda taudia idia ura diba ma haida be idia dekenai idia mai be auka eiava auka lasi, namona be idia tahua nega hida ma haida be idia dekenai idia mai sisiba eiava heduru herevadia abia totona. Iehova ese ma haida be ena gaukara lalonai ia abia vareai karana amo diba oi abia. Ma haida ia laloa bada dalana be idia dekenai maduna ia henia. Ena be toana be ma Witnes ta ese ia gwauraia heduru herevadia do idia gaukaralaia lasi, to namona be elda taudia ese unai tauna ena lalohadai idia moalelaia. Namona be Iehova ena haere dalana Aberahamo ena henanadai bona Habakuku ena taitai mai daradoko dekenai oi laloa.
18. Haida ese edia kara idia haidaua totona elda taudia ese heduru idia henia neganai, edena dala ai Iehova idia tohotohoa diba?
18 Keristani tadikaka haida ese edia kara idia haidaua be namo. (Galatia 6:1) To, Iehova ena matana ai idia be do mai anina bada dainai, elda taudia ese mai hemataurai ida idia kara henidia be namo. Witnes tauna ta ia gwau, “Bema sisiba ia henia tauna ta ese lau ia matauraia, lau gari lasi ia lau hereva henia totona.” Taunimanima momo ese sisiba idia badinaia bema mai hemataurai ida idia kara henidia. Reana nega bada ia haorea, to bema elda taudia ese kerere taudia edia hereva idia kamonai, sisiba namodia ibounai do idia abia dae haraga. Namona be umui laloatao edena bamona Iehova be ena hebogahisi dainai Israela taudia ia hereva henia loulou. (2 Sivarai 36:15; Tito 3:2) Elda taudia be mai hebogahisi ida sisiba idia henia neganai, unai ese heduru idia abia be namo taudia edia kudouna ia hamarerea.—Aonega Herevadia 17:17; Filipi 2:2, 3; 1 Petero 3:8.
19. Keristani taudia idia abidadama hegeregerena idia abidadama lasi taudia be edena bamona ita laloa be namo?
19 Iseda hemataurai karana be vaira negana ai iseda tadikaka ai do idia lao diba taudia dekenai danu ita hahedinaraia. Reana hari unai bamona taudia ese iseda sivarai idia abia dae haraga lasi, to namona be ita haheauka bona idia ita matauraia. Iehova “ia ura lasi tau ta ia mase. Ia ura taunimanima ibounai ese dika dekena amo edia lalona do idia giroa.” (2 Petero 3:9) Iehova ena lalohadai ita abia be namo, ani? Taunimanima ibounai ita laloa neganai, ita ese haroro totona dala ita kehoa diba bema hanaihanai dekena tauna laloa karana ita hahedinaraia. To momokani, lauma dalanai ita ia hadikaia diba hebamo karana ita dadaraia. (1 Korinto 15:33) To, ita ese “bogahisihisi” karana ita hahedinaraia noho, bona iseda abidadama hegeregerena idia abidadama lasi taudia ita laloa maragi lasi.—Kara 27:3.
20. Iehova bona Iesu Keriso edia haheitalai dainai dahaka ita karaia be namo?
20 Oibe, Iehova bona Iesu Keriso idia laloa ita ta ta ibounai be hegeregere idia matauraia totona. Namona be edia kara ita laloatao bona idia hegeregerena matauraia karana ita goadalaia. Bona namona be iseda Lohiabada Iesu Keriso ena hereva ita laloatao, ia gwau: “Umui ibounai be tadikaka.”—Mataio 23:8.
Edena Bamona Do Oi Haere?
• Emu tadikaka be edena bamona oi lalodia be namo?
• Edena dala ai Iehova bona Iesu edia haheitalai ese oi ia durua ma haida oi matauraia totona?
• Edena dala ai headava tatau bona tama sina ese ma haida idia matauraia diba?
• Elda taudia ese Keristani taudia be edia tadikaka bamona idia laloa dainai dahaka idia karaia?
[Picture on page 18]
Hanamoa herevadia amo emu adavana oi matauraia
[Picture on page 18]
Emu natudia edia hereva oi kamonai karana amo idia oi matauraia
[Picture on page 18]
Mai hemataurai ida kongregesen taudia oi kara henia