Gima Kohorona INTANET LAIBRI
Gima Kohorona
INTANET LAIBRI
Hiri Motu
  • BAIBEL
  • PABLIKEISEN
  • HEBOUDIA
  • w00 7/1 rau 19-21
  • Haheitalai Namodia—Idia amo Namo Oi Abia, A?

Oi abia hidi kahana ena vidio ia noho lasi.

Sori, hekwakwanai ia vara vidio ia loud totona.

  • Haheitalai Namodia—Idia amo Namo Oi Abia, A?
  • Gima Kohorona Iehova Ena Basileia Ia Harorolaia—2000
  • Sinado maragidia
  • Inai Bamona Atikol
  • Iesu Keriso​​—⁠Haheitalai Tauna Hereadaena
  • Mamoe Oreana Dekenai ‘Kara Namodia Idia Hahedinaraia’
  • Hari Inai Negai Haheitalai Namodia
  • Elda Taudia E, Aposetolo Paulo Umui Tohotohoa Noho
    Gima Kohorona Iehova Ena Basileia E Herevalaiamu (Stadi)—2022
  • Ma Haida Ita Durua Karana amo Iesu Ita Tohotohoa
    Gima Kohorona Iehova Ena Basileia E Herevalaiamu (Stadi)—2022
  • Iesu Keriso Ena Raka Dalana Tohotohoa
    Gima Kohorona Iehova Ena Basileia Ia Harorolaia—2005
  • “Ta Ta Do Umui Hagoadaia Noho”
    Gima Kohorona Iehova Ena Basileia E Herevalaiamu (Stadi)—2022
Ma Haida Itaia
Gima Kohorona Iehova Ena Basileia Ia Harorolaia—2000
w00 7/1 rau 19-21

Haheitalai Namodia—Idia amo Namo Oi Abia, A?

“KARA namo ena dala umui hedinaraia, Makedonia bona Akaia dekenai idia noho Keristani taudia ibounai dekenai.” Aposetolo Paulo ese Tesalonika ai idia noho abidadama Keristani taudia dekenai unai hereva ia torea. Edia Keristani tadikaka dekenai idia hahedinaraia haheitalai be namo herea. To, Tesalonika taudia be Paulo bona iena bamodia edia haheitalai namona idia tohotohoa. Paulo ia gwau: “Ai ese Sivarai Namona ai mailaia umui dekenai, hereva sibona dekenai lasi, to Lauma Helaga ena siahu dekenai danu. Oibe, ai diba momokani inai Sivarai Namona be hereva momokani dainai, ai gwauraia mai siahu danu. Unai dainai abidadama korikori umui davaria. Umui diba danu edena bamona ai noho umui emui huana dekenai, ai ese umui ai durua sibona. Umui ese aiemai mauri dalana umui itaia vadaeni aiemai mauri dala bamona umui noho.”​​—⁠1 Tesalonika 1:​5-​7.

Oibe, Paulo be haroro herevadia sibona ia gwauraia lasi. To, iena mauri dalana ibounai ese ma haida ia durua​​—⁠abidadama, haheauka, bona sibona ena ura dadaraia karana ia haheitalaia. Unai dainai, Paulo bona ena bamodia ese Tesalonika taudia edia mauri idia haidaua, bona ‘nega momo idia hisihisi henia’ lalonai, hereva momokani idia abia dae. To, Paulo bona ia ida idia gaukara taudia sibona be unai kamonai taudia edia mauri idia haidaua lasi. Hisihisi idia haheaukalaia taudia ma haida edia haheitalai danu be hagoadaia gauna momokani. Paulo be Tesalonika taudia dekenai ia gwau: “Aiemai varavara taudia e, umui be hegeregere Dirava ena ekalesia oreadia Iudea dekenai bamona, Keriso Iesu ena orea taudia unai gabu dekenai. Badina be Iuda taudia ese unai ekalesia idia hisihisi henia hegeregerena, umui emui bese taudia danu ese umui idia hisihisi henia vadaeni.”​​—⁠1 Tesalonika 2: ​14.

Iesu Keriso​​—⁠Haheitalai Tauna Hereadaena

Ena be Paulo ese haheitalai namona ia hahedinaraia bona ita tohotohoa diba, to ia hahedinaraia danu, Iesu Keriso be haheitalai tauna badana bona Keristani taudia ese idia tohotohoa be namo. (1 Tesalonika 1:⁠6) Guna bona hari, Keriso be iseda Haheitalai Tauna hereadaena. Aposetolo Petero ia gwau: “Dirava ese umui ia boiria, unai bamona do umui hisihisi totona. Badina be Keriso ese umui dainai hisihisi ia abia. Vadaeni iena kara toana umui dekenai ia hedinaraia, iena murinai do umui raka totona. Iena aena gabudia dekenai do umui raka.”​​—⁠1 Petero 2:​21.

To, kahirakahira lagani 2,000 gunanai, Iesu be ena tanobada maurina ia haorea vadaeni. Hari, ia be ia mase diba lasi lauma tauna ta “diaridiari bada dekenai.” Unai bamona ia noho dainai, taunimanima ta ese ia itaia lasi bona “vaira neganai do ia itaia diba lasi.” (1 Timoteo 6:​16, NW ) Vadaeni, edena dala ai ia ita tohotohoa diba? Dala ta be Baibel lalonai, Iesu ena mauri idia kikilaia bukadia hani ita stadilaia. Evanelia Bukadia dainai, iena kara, mauri, bona “laloa” dalana, ita lalo-pararalaia diba. (Filipi 2:​5-​8) Danu, bema Tau Hereadaena bukana, Iesu ena mauri lalonai ia karaia karadia be idia vara hegeregerena ia gwauraia bukana, ita stadilaia namonamo, unai ese iseda lalo-parara ia habadaia.a

Iesu ese sibona ena ura ia dadaraia karana be mai ena siahu bada aposetolo Paulo ena mauri ia haidaua totona. Korinto Keristani taudia dekenai ia gwau: “Lau be mai moale danu egu kohu do lau haorea, egu tauanina danu do lau haorea, umui emui laumadia do lau ubua totona.” (2 Korinto 12:15) Keriso ena kara bamona karana unai! Keriso ena haheitalai goevadaena ita laloa neganai, namona be ita ura iseda mauri ibounai lalonai ia do ita tohotohoa.

Hegeregere, Iesu ese ita ia hadibaia namona be Iehova ena gwauhamata, tauanina dalana ai ita do ia naria gwauhamatana, dekenai ita tabekau. To, unai sibona lasi. Nega ibounai Iehova dekenai unai bamona abidadama ia hahedinaraia danu. Ia gwau: “Uda sisia be mai edia nadi matuna, bona ataiai manudia danu mai edia ruma, to Taunimanima ena Natuna be mai ena mahuta gabuna lasi.” (Mataio 6:​25; 8:​20) Tauanina gaudia ese oiemu lalohadai bona kara idia biagua, a? Eiava emui mauri dekena amo oi hamomokania Basileia oi tahua guna, a? Bona oiemu lalohadai Iehova ena hesiai gaukara dekenai be edena bamona? Iseda Haheitalai Tauna, Iesu, ena bamona, a? Baibel ese ia hahedinaraia Iesu be goada karana ena namo ia harorolaia sibona lasi, to nega momo unai goada badana ia hahedinaraia. (Ioane 2:​14-​17) Ma danu, Iesu ese lalokau karana ia haheitalaia namo herea! Oibe, iena hahediba taudia dainai iena mauri ia bouboulaia! (Ioane 15:13) Emu Keristani tadikaka dekenai lalokau karana oi hahedinaraia karana amo, Iesu oi tohotohoa, a? Eiava haida edia goevadae lasi karadia dainai, emu lalokau oi koua, a?

Ena be Keriso ena haheitalai ita tohotohoa totona ita hekwarahi, to nega momo ita hegeregere lasi. To ita diba momokani Iehova ese iseda hekwarahi ‘Lohiabada Iesu Keriso ena tuari dabua ita atoa’ totona ia moalelaia.​​—⁠Roma 13:⁠14.

Mamoe Oreana Dekenai ‘Kara Namodia Idia Hahedinaraia’

Hari inai negai, kongregesen lalonai haida edia haheitalai ita tohotohoa diba, a? Oibe! Maduna idia huaia totona idia abia hidi tadikakadia ese haheitalai namona idia hahedinaraia be gau badana. Paulo ese Tito, Kerete ena kongregesen dekenai hesiai gaukara ia karaia bona gunalaia taudia ia abia hidi tauna, ia hamaoroa gau badana be ia abia hidi elda taudia ta ta “be kerere ta lasi tauna.” (Tito 1:​5, 6) Unai hegeregerena, aposetolo Petero be “gunalaia taudia” ia hagoadaia, mamoe taudia dekenai “kara namodia” do idia hahedinaraia. (1 Petero 5:​1-​3) Bona hesiai taudia be edena bamona? Idia danu “gaukara idia karaia namonamo” be gau badana.​​—⁠1 Timoteo 3:​13.

To momokani, ita laloa diba lasi elda taudia bona hesiai taudia ibounai be Keristani hesiai gaukara ena kahana ibounai idia karaia namonamo diba. Paulo be Roma Keristani taudia dekenai ia gwau: “Dirava ese ita ia henia hegeregerena, inai diba ita gaukaralaia be namo.” (Roma 12:⁠6) Tadikaka idauidau be gaukara idauidau idia karaia namonamo diba. Ita laloa diba lasi elda taudia be gau ibounai idia gwauraia bona karaia goevagoeva diba. Baibel be Iamesi 3:⁠2 dekenai ia gwau: “Ita ibounai ese nega momo kerere ita karaia. To bema tau ta ese iena hereva dekena amo kerere ta ia karaia lasi, ia be goeva bona namo momokani. Ia ese iena tauanina ibounai ia biagua bona naria diba.” To, ena be elda taudia be goevadae lasi, Timoteo bamona, ma haida dekenai haheitalaia namona idia hahedinaraia diba, bena edia “hereva namona, kara namona, lalokau, abidadama bona laloa goevagoeva” idia tohotohoa totona. (1 Timoteo 4:​12) Elda taudia be unai bamona idia karaia neganai, mamoe taudia be Heberu 13:7 ena sisiba do idia badinaia haraga, ia gwau: “Umui emui hakaua taudia gunadia do umui laloatao. . . . Edia mauri dalana do umui laloa lou, bona edia abidadama kara hegeregerena do umui badinaia.”

Hari Inai Negai Haheitalai Namodia

Idia hanaia laganidia haida lalonai danu, taunimanima momo herea be haheitalai namona idia hahedinaraia. Sibona edia ura idia dadaraia misinari taudia tausen momo, edia ‘ruma, o tadikaka, o taihu, o tamana, o sinana, o natuna, o tano, . . . idia rakatania’ bona tano idaudia dekenai Keristani taudia edia hahegani idia hagugurua taudia be edena bamona? (Mataio 19:29) Mani, loaloa naria taudia bona edia adavadia, Watch Tower Society ena opesi idauidau dekenai volantia gaukara idia karaia tatau bona hahine, bona kongregesen lalonai painia gaukara idia karaia taudia oi laloa. Unai bamona haheitalai ese haida idia durua, a? Asia dekenai Keristani hesiai tauna ta be Watchtower Bible School of Gilead ena klas namba 8 amo ia mai misinari tadikaka ta ia laloa. Ia gwau unai abidadama tadikakana be “mai ena ura ida nemo momo bona siahu bada ia haheaukalaia. . . . Lau laloa bada gauna be Chinese bona Malay gado dekenai ia haroro diba, herevana ia be England tauna ta.” Ena haheitalai namona dainai dahaka ia vara? Unai tadikaka ia gwau: “Ia manau bona ena lalona ia goada dainai lau ia hagoadaia lau bada neganai misinari gaukara lau karaia totona.” Ita hoa lasi gabeai unai tadikaka be misinari gaukara ia karaia.

Unai bamona sivarai namodia momo, Gima Kohorona bona Awake! magasin lalonai idia torea sivaraidia, edia lista be Watch Tower Publications Index bukana lalonai oi davaria diba. Unai tadikaka bona taihu edia sivarai ese idia hahedinaraia idia be tanobada ena dagi bada bona tahua gaudia idia rakatania, manoka gaudia idia hanaia, idia hekwarahi edia mauri idia haidaua totona, dika ia vara neganai idia lalo-goada, bona idia gaukara goadagoada, idia haheauka, idia abidadama, idia manau, bona sibona edia ura idia dadaraia. Unai sivarai ia duahidia murinai, hahine ta ia gwau: “Haida ese idia davaria gaudia lau duahia neganai, lau ia durua lalo-manau bona tanikiu karana ia hahedinaraia Keristani tauna ai lau lao totona, bona lau idia durua lau sibona lau laloa bada eiava lau hekokoroku lasi totona.”

Danu, namona be oiemu kongregesen dekenai haheitalai namona idia hahedinaraia taudia oi laloaboio lasi: edia ruma bese be tauanina bona lauma dalanai idia naria namonamo ruma bese kwaradia; mai hekwarahi ida edia natudia idia naria bona idia haroro noho taihudia​​—⁠adavana lasi sinadia danu; edia tauanina ia manoka bona gorere ia bada ia lao lalonai, idia abidadama noho buruka taudia bona gorere taudia. Unai bamona haheitalai ese oiemu kudouna idia hamarerea, ani?

Momokani, tanobada be haheitalai dikadia momo ese idia hahonua. (2 Timoteo 3:​13) To, Paulo ese Iudea ai idia noho Keristani taudia ia hagoadaia herevana be mani oi laloa. Paulo ese idaunegai abidadama tatau bona hahine momo edia haheitalai namona ia herevalaia murinai, ia hamaorodia ia gwau: “Unai dainai, witnes taudia hutuma bada ori ta bamona ese ita idia hagegea dainai, . . . ita vairanai ia noho heau helulu lalonai do ita heau mai eda haheauka ida.” “Iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua, ela bona dokona.” (Heberu 12:​1, 2, NW ) Hari inai negai, haheitalai namona taudia​​—⁠idaunegai bona iseda negai idia noho taudia​​—⁠ese “ori ta bamona” Keristani taudia idia hagegea danu. Idia amo namo oi abia, a? Do oi abia bema “dika tauna ena kara bamona do oi karaia lasi, to namo tauna ena kara bamona do oi karaia.” ​​—⁠3 Ioane 11.

[Footnote]

a Watchtower Bible and Tract Society of New York, Inc. ese ia halasia.

[Blurb on page 20]

Ita laloa lasi elda taudia bona hesiai taudia ibounai be Keristani hesiai gaukara ena kahana ibounai idia karaia namonamo diba

[Pictures on page 21]

Namona be elda taudia ese mamoe oreana dekenai ‘kara namodia idia hahedinaraia’

    Hiri Motu Pablikeisen (1987-2025)
    Log aut
    Login
    • Hiri Motu
    • Ta dekenai siaia
    • Preferens
    • Copyright © 2025 Watch Tower Bible and Tract Society of Pennsylvania
    • Gaukaralaia Taravatudia
    • Privacy Policy
    • Privacy Settings
    • JW.ORG
    • Login
    Ta dekenai siaia