Toreisi Lou Helarona be Helaro Korikorina!
“Lau be mai egu abidadama Dirava dekenai, . . . mase taudia dohore idia toreisi lou.”—KARA 24:15.
1. Dahaka dainai toreisi lou helarona ita abia dae diba?
IEHOVA ese ita dekenai toreisi lou helarona ena badina namodia ia henia. Iena hereva dainai ita diba mase taudia be do idia toreisi lou, mauri do idia davaria lou. Bona iena palani mase lalonai idia mahuta taudia totona be do ia guguru momokani. (Isaia 55:11; Luka 18:27) Dirava ese ia hahedinaraia vadaeni ia be mai ena siahu mase taudia ia hatorea isi lou totona.
2. Edena dala ai toreisi lou helarona ese ita ia durua?
2 Dirava ese iena Natuna, Iesu Keriso, amo mase taudia do ia hatorea isi lou dalana ita abidadama henia neganai, unai ese hekwakwanai lalodiai ita do ia durua. Toreisi lou helarona be helaro korikorina dainai, ita ia durua iseda guba Tamana ita badinaia ela bona mase. Baibel lalonai mase taudia hamauria sivaraidia ita laloa neganai, iseda toreisi lou helarona do ia goada. Unai hoa gaudia ibounai be Siahu Ibounai Lohiabadana ena siahu amo idia vara.
Toreisi Lou Dainai Edia Mase Taudia Idia Davaria Lou
3. Sarepata dekenai ia noho vabu ena natuna mero ia mase neganai, Elia ese siahu ia abia dahaka ia karaia totona?
3 Aposetolo Paulo ese Keriso ia do vara lasi neganai idia noho Iehova ena witnes taudia idia hahedinaraia abidadama ia herevalaia neganai, ia gwau: “Hahine danu ese edia mase taudia idia davaria lou, idia toreisi lou dainai.” (Heberu 11:35; 12:1) Unai hahine ta be Poinikia ena hanua Sarepata dekenai ia noho ogogami vabuna ta. Ia ese Dirava ena peroveta tauna Elia dekenai heabidae karana ia hahedinaraia dainai, hitolo bada lalonai iena paraoa bona dehoro be hoa dalanai idia ore lasi, bena ia bona ena natuna mero idia roho mauri. Gabeai unai mero ia mase neganai, Elia ese mahuta patana dekenai ia atoa, ia guriguri, nega toi mero ena latanai ia hekure diho, bona ia noinoi: “Lohiabada, lauegu Dirava e, inai mero do oi hamauria lou!” Dirava ese unai mero dekenai mauri ia henia lou. (1 King Taudia 17:8-24) Unai vabu ese ena sivarai idia torea toreisi lou ginigunana—iena natuna mero ena—amo ena abidadama ena davana namona ia abia neganai, ena moale mani oi laloa!
4. Elisaia ese Suneme hanua dekenai dahaka hoa karana ia karaia?
4 Toreisi lou amo ena mase natuna ia abia lou hahinena ma ta be Suneme hanua dekenai ia noho. Ia be tau buruka ta ena adavana, bona peroveta tauna Elisaia bona ena bamoa tauna dekenai kara namo ia hahedinaraia. Ena davana namona be natuna mero ia abia. To, lagani haida murinai, unai peroveta tauna ia boiria, bena hahine ena ruma dekenai mero ia davaria, ia mase vadaeni. Elisaia ia guriguri bona kara haida ia karaia murinai, “mero ena tauanina ia siahu sisina lao.” Ia be “nega 7 ia asimana, unai murinai iena matana idia kehoa.” Ita diba unai toreisi lou dainai sinana bona ena natuna mero idia moale bada. (2 King Taudia 4:8-37; 8:1-6) To, tanobada dekenai “toreisi lou ena mauri namo herea”—do idia mase lou lasi dalana ia kehoa ena toreisi lou—idia abia neganai, do idia moale bada herea! Unai be toreisi lou ena lalokau Diravana, Iehova, ita tanikiu henia ena badina namona!—Heberu 11:35.
5. Elisaia ia mase murinai, mase tauna ta dekenai dahaka hoa karana ia vara?
5 Elisaia ia mase bona idia guria murinai danu, Dirava ese lauma helaga amo ena turia dekenai siahu ia henia. Unai sivarai ia gwau: “Dina ta Israela tauna ta idia guria neganai, . . . Moaba tuari taudia idia hedinarai, unai dainai karaharaga mase tauna be Elisaia ena guri lalonai idia negea diho. [Mase tauna] be Elisaia ena turiana dekenai ia kamokau, vadaeni maoromaoro ia mauri lou, bona ia toreisi, aena dekenai ia gini.” (2 King Taudia 13:20, 21) Reana unai tau ia hoa bada bona ia moale bada danu! Iehova Dirava ena palani, do ia guguru momokani palanina, hegeregerena iseda lalokau taudia be do idia toreisi lou, unai neganai ita abia moalena be do ia bada!
Dirava Ena Natuna ese Mase Taudia Ia Hatorea Isi Lou
6. Naina hanuana kahirakahira dekenai Iesu ese dahaka hoa karana ia karaia, bona unai ena anina ita dekenai be dahaka?
6 Dirava ena Natuna, Iesu Keriso, ese ia karaia karadia dainai ita abidadama diba mase taudia be do idia toreisi lou, bena edia helaro be do idia mauri noho ela bona hanaihanai. Naina hanuana kahirakahira dekenai ia vara gauna ese ita ia durua, bena ita lalo-parara unai bamona hoa gauna be Dirava ia henia siahuna amo ia vara diba. Nega ta, Iesu ia itaia idia taitai taudia ese hanua amo mase tauna ta idia huaia lao idia guria totona. Ia be vabu ta ena natuna tamona. Iesu ese ia hamaoroa, ia gwau: “Oi tai lasi.” Bena mase patana ia dogoatao bona ia gwau: “Uhau tauna e, lau hereva henia oi dekenai, oi toreisi.” Vadaeni, ia helai bona ia hereva. (Luka 7:11-15) Unai hoa karana ese iseda abidadama ia hagoadaia, bena ita diba momokani toreisi lou helarona be helaro korikorina.
7. Iairo ena kekeni dekenai dahaka ia vara?
7 Kaperanauma ena dubu lohia tauna Iairo dekenai ia vara gauna mani oi laloa danu. Ia ese Iesu ia noia do ia mai bona iena lagani 12 kekenina lalokauna ia mase gwauraia do ia durua. Nega sisina murinai idia hadibaia kekeni ia mase vadaeni. Iesu ese ia lalohisihisi bada tauna Iairo ia hagoadaia ia abidadama totona, bona ia ida iena ruma dekenai ia lao, unuseniai taunimanima idia taitai noho. Iesu dekenai idia kiri badina ia gwau: “Kekeni ia mase lasi, ia mahuta.” Momokani ia mase vadaeni, to Iesu ia ura ia hahedinaraia taunimanima be mase amo ia hatorea isi diba, mahuta amo ia hanogaia diba hegeregerena. Kekeni ena imana ia abia bena ia gwau: “Kekeni e, oi toreisi.” Maoromaoro ia toreisi, bona “kekeni ena tamana bona iena sinana idia hoa dikadika.” (Mareko 5:35-43; Luka 8:49-56) Ita daradara lasi, mase taudia be paradaiso tanobadana dekenai do idia toreisi lou neganai, edia lalokau ruma bese taudia do idia “hoa dikadika” danu.
8. Lasaro ena guri gabuna dekenai Iesu be dahaka ia karaia?
8 Lasaro be dina hani gunanai ia mase vadaeni, bena Iesu be ena guri gabuna kahirakahira ia lao bona ia gwau vareai gabuna ena nadi do idia kokia. Iesu be taunimanima vairanai ia guriguri, badina ia ura unai kara itaia taudia idia diba ia be Dirava ia henia siahuna dekenai ia tabekau, bena ia hereva badabada: “Lasaro e, oi mai murimuri dekenai.” Bena ia raka murimuri dekenai! Iena aena bona imana idia kumia dabua be idia do noho, bona dabua ta ese ena vairana ia koua. Iesu ia gwau: “Kumia dabua umui kokia, umui rakatania.” Lasaro ena taihudia, Maria bona Mareta, hagoadaia totona idia noho taudia momo be unai hoa karana idia itaia neganai, Iesu dekenai idia abidadama. (Ioane 11:1-45) Unai sivarai dainai emu helaro ia goada, Dirava ena tanobada matamatana lalonai oiemu lalokau taudia do idia toreisi lou, ani?
9. Dahaka dainai ita diba momokani Iesu ese hari mase taudia ia hatorea isi lou diba?
9 Ioane Bapatiso be dibura dekenai ia noho neganai, Iesu ese ia dekenai inai hagoadaia herevana ia siaia, ia gwau: “Matakepulu taudia edia matana idia kehoa, . . . mase taudia idia toreisi lou.” (Mataio 11:4-6) Iesu be tanobada dekenai ia noho neganai mase taudia ia hatorea isi lou diba dainai, ita diba momokani hari Dirava amo siahu ia abia laumana ai ia lao neganai unai do ia karaia diba. Iesu be ‘toreisi lou bona mauri,’ bona ita lalo-goada badina ita diba nega sisina murinai “mase guria gabu dekenai idia noho taudia ibounai ese iena gadona do idia kamonai. Vadaeni guria gabu dekena amo do idia toreisi”!—Ioane 5:28, 29; 11:25.
Iseda Helaro Idia Hagoadaia Toreisi Lou Karadia ma Haida
10. Aposetolo taudia idia karaia toreisi lou ginigunana be edena bamona do oi gwauraia?
10 Iesu ese Basileia harorolaia totona ena aposetolo taudia ia siaia neganai, ia gwau: “Mase taudia do umui hatorea isi.” (Mataio 10:5-8) Momokani, unai idia karaia diba totona, Dirava ena siahu dekenai idia tabekau be gau badana. Lagani 36 C.E. ai, Iopa dekenai Dirava ia badinaia hahine Doreka (Tabita) ia mase. Ena kara namodia haida be ogogami vabu taudia edia dabua ia turia, bona idia ese ena mase idia taitailaia bada. Hahediba taudia ese guria totona ia idia hegaegaelaia bona aposetolo Petero idia boiria, reana idia do ia hagoadaia totona. (Kara 9:32-38) Petero ese ataiai daiutuna amo iboudiai ia siaia murimuri dekenai, ia guriguri, bena ia gwau: “Tabita e, oi toreisi.” Iena matana ia kehoa, ia helai, Petero ena imana ia abia, bena Petero ese ia haginia. Unai aposetolo taudia idia karaia toreisi lou ginigunana dainai, momo be abidadama taudia ai idia lao. (Kara 9:39-42) Unai be toreisi lou helarona ita dogoatao ena badina ma ta.
11. Baibel ese ia hahedinaraia toreisi lou ginigabena be dahaka?
11 Baibel ese ia hahedinaraia toreisi lou ginigabena be Troa dekenai ia vara. Paulo be ena misinari laolaona ihatoina lalonai unuseniai ia noho neganai, ena hereva ia halataia ela bona hanuaboi momokani. Tau matamata Eutiko be ia hesiku bona reana lamepa momo bona hebou gabuna dekenai taunimanima hutuma idia noho ese siahu bada ia havaraia dainai, ia be ia mahuta bona sitori ihatoina ena uindo amo ia moru. “Idia abia isi neganai, idia davaria ia mase momokani vadaeni.” Paulo be Eutiko latanai ia hekure, ia rosia, bona idia noho taudia dekenai ia gwau: “Tai hadokoa, ia be ia mauri noho!” Paulo ena hereva ena anina be tau matamata ese mauri ia davaria lou vadaeni. Idia noho taudia “edia lalona be namo bada herea.” (Kara 20:7-12) Hari inai negai Dirava ena hesiai taudia idia lalo-goada, badina idia diba guna idia ida Dirava idia hesiai henia taudia dekenai toreisi lou helarona be do ia guguru momokani.
Toreisi Lou—Idaunegai Helarona
12. Roma edia Gavana Tauna Feliki vairanai Paulo ese ia hahedinaraia abidadama be dahaka?
12 Paulo be kota dekenai, Roma Gavana Tauna Feliki vairanai ia hereva, ia gwau: “Mose ena taravatu bona peroveta bukadia lalonai idia torea gaudia ibounai lau abidadama henia noho. Lau be mai egu abidadama Dirava dekenai, . . . mase taudia dohore idia toreisi lou, kara maoromaoro taudia, bona kara maoromaoro lasi taudia danu.” (Kara 24:14, 15) Edena dala ai Dirava ena Hereva ena kahana haida, hegeregere “Mose ena taravatu,” ese mase taudia hatorea isi lou karana idia hahedinaraia?
13. Dahaka dainai ita gwau diba Dirava ese peroveta herevana ginigunana ia gwauraia neganai, toreisi lou lalohadaina ia hahedinaraia?
13 Dirava ese Eden lalonai peroveta herevana ginigunana ia gwauraia neganai, toreisi lou lalohadaina ia hahedinaraia. Dirava ese “idaunegai gaigaina,” Satani Diabolo, ia hahemaoro henia neganai, ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Apokalupo 12:9; Genese 3:14, 15, NW ) Hahine ena garana ena aena geduna haberoa karana ena anina be Iesu Keriso do idia hamasea. Unai Garana ese gaigai ena kwarana do ia haberoa totona, Keriso be mase amo do ia toreisi lou be gau badana.
14. Edena dala ai Iehova be “mase taudia edia Dirava lasi, to mauri taudia edia”?
14 Iesu ia gwau: “Mase dekena amo idia toreisi lou herevana be Mose ese ia hamomokania vadaeni au ginigini ia araia ena sivarai lalonai. Inai bamona ia gwau, ‘Lohiabada be Aberahamo ena Dirava, Isako ena Dirava, Iakobo ena Dirava.’ Unai dainai, ia be mase taudia edia Dirava lasi, to mauri taudia edia, badina taunimanima ibounai be ia dainai idia mauri.” (Luka 20:27, 37, 38; Esodo 3:6) Aberahamo, Isako, bona Iakobo idia mase vadaeni, to Dirava ena palani idia ia hatorea isi lou totona be do ia guguru momokani dainai, iena matanai idia be idia mauri noho.
15. Dahaka dainai Aberahamo be toreisi lou helarona ia abia dae?
15 Aberahamo be toreisi lou helarona ia abia dae, badina ia bona iena adavana, Sara, be buruka momokani, bona edia natuna havaraia siahuna ia ore vadaeni neganai, Dirava ese hoa dalanai unai siahu ia henia lou. Unai be toreisi lou bamona. (Genese 18:9-11; 21:1-3; Heberu 11:11, 12) Edia natuna, Isako, ena lagani be 25 bamona neganai, Dirava ese Aberahamo ia hamaoroa do ia bouboulaia. To, Aberahamo ese Isako ia hamasea gwauraia neganai, Iehova ena aneru ese ena imana ia koua. Aberahamo ena lalohadai be “ ‘bema Isako ia mase, Dirava be mai ena siahu do ia hatorea isi lou.’ To inai bamona ita herevalaia diba, ani? ‘Aberahamo ese Isako ia abia lou mase dekena amo.’ ”—Heberu 11:17-19; Genese 22:1-18.
16. Hari Aberahamo be mase dekenai ia mahuta bona gabeai dahaka do ia vara?
16 Aberahamo ena helaro be Mesia, gwauhamata Garana, ena lohia negana lalonai toreisi lou do ia vara. Dirava ena Natuna be tanobada dekenai ia do vara lasi neganai, ia noho gabuna amo Aberahamo ena abidadama ia itaia diba. Unai dainai, tanobada dekenai ia noho neganai Iesu Keriso ese Iuda taudia ia hamaoroa, ia gwau: “Emui tamana Aberahamo be ia ura dikadika lauegu nega ia itaia.” (Ioane 8:56-58; Aonega Herevadia 8:30, 31) Hari Aberahamo be mase dekenai ia mahuta, gabeai do ia toreisi lou bona Dirava ena Mesia Basileiana henunai tanobada dekenai do ia mauri.—Heberu 11:8-10, 13.
Taravatu Bona Salamo Edia Hereva
17. Edena dala ai ‘Mose ena taravatu lalonai idia torea gaudia’ ese Iesu Keriso ena toreisi lou idia hahedinaraia?
17 Paulo ena toreisi lou helarona be ‘Mose ena taravatu lalonai idia torea gaudia’ hegeregerena. Dirava be Israela taudia ia hamaoroa, ia gwau: “Emui koni guia gauna ginigunana be hahelagaia tauna dekenai do umui henia. Vadaeni ia ese [Nisan 16 ai] unai aniani gauna do ia abia, bona Lohiabada ena vairanai do ia davea, Lohiabada ese umui do ia hanamoa totona.” (Levitiko 23:9-14) Reana Paulo ese unai taravatu ia laloa dainai, ia gwau: “Keriso be Dirava ese mase dekena amo ia hatorea isi . . . , mase lalonai idia mahuta noho taudia edia [huahua ginigunana].” Iesu be “huahua ginigunana” bamona, Nisan 16, 33 C.E. ai, Iehova ese ia hatorea isi lou. Gabeai, iena noho negana lalonai, ‘huahua ma haida’—Iesu murinai idia raka horoa taudia—be do idia toreisi lou.—1 Korinto 15:20-23; 2 Korinto 1:21; 1 Ioane 2:20, 27.
18. Edena dala ai Petero ia hahedinaraia Salamo bukana ese Iesu ena toreisi lou ia perovetalaia?
18 Salamo bukana danu ese toreisi lou hamomokania gaudia ia hahedinaraia. Pentekoste 33 C.E. ai, aposetolo Petero ese Salamo 16:8-11 ena hereva ia gwauraia lou, ia gwau: “Davida be inai bamona Iesu ia herevalaia, ia gwau: ‘[Iehova] be nega ibounai egu vairana dekenai lau itaia. Ia be lau kahirakahira ia noho dainai, gau ta ese lau ia hagaria lasi. Unai dainai lauegu kudouna ia moale, bona mai moale danu lau hereva noho. Lau be taunimanima sibona, to Dirava ese ia gwauhamata gau namodia, be lau naria noho. Badina be mase taudia edia gabu dekenai, lauegu lauma do oi rakatania lasi. Bona oiemu Helaga Tauna be bodaga do ia abia lasi, oiemu ura dainai.’ ” Petero be ma ia gwau: “Davida ese diba guna hereva ia gwauraia, Keriso dohore ia toreisi lou, ia gwau, ‘Dirava ese do ia rakatania lasi mase taudia edia gabu dekenai, bona iena tauanina ese bodaga do ia abia lasi.’ Inai Iesu be Dirava ese ia hatorea isi vadaeni.”—Kara 2:25-32.
19, 20. Edena negai Petero ese Salamo 118:22 ena hereva ia gwauraia, bona edena dala ai unai hereva be mai anina Iesu ena mase bona toreisi lou dekenai?
19 Dina haida murinai, Petero be Sanhedrin vairanai ia gini bona Salamo bukana ena hereva ia gwauraia lou. Edena dala ai aena dika ogogami tauna ia hanamoa idia henanadailaia neganai, aposetolo tauna ia gwau: “Namo umui ibounai umui diba, bona namo Israela taudia ibounai danu idia diba, inai Iesu Keriso, Nasareta tauna, umui hasatauroa, bona Dirava ese mase dekena amo ia hatorea isi tauna, iena ladana dainai inai tau be umui emui vairana dekenai ia gini mai goada danu. Iesu be Buka Helaga ese ia herevalaia, inai bamona: ‘Inai nadi, umui ruma haginia taudia ese umui ura henia lasi, to hari ia be ruma ena kona nadi badana momokani ia gini noho.’ Hamauria be Iesu sibona ese ia henia diba taunimanima dekenai. Badina be tanobada ibounai lalonai, ladana idauna ta Dirava ese ia henia lasi, ita do ia hamauria totona.”—Kara 4:10-12.
20 Petero ese Salamo 118:22 ena hereva ia gwauraia, bona ia hahedinaraia unai hereva be mai anina Iesu ena mase bona toreisi lou dekenai. Iuda taudia be edia tomadiho gunalaia taudia ese idia veria dainai, idia ese Iesu idia dadaraia. (Ioane 19:14-18; Kara 3:14, 15) ‘Ruma haginia taudia ese unai nadi idia ura henia lasi’ dainai Keriso ia mase, to ‘unai nadi be ruma ena kona nadi badana’ ai ia lao ena anina be toreisi lou amo guba dekenai lauma ena hairai ia abia. Salamo torea tauna ese ia perovetalaia hegeregerena, ‘unai be Iehova ena kara.’ (Salamo 118:23) Unai “nadi” be ruma ena Kona Nadi Badana ai ia halaoa anina ta be Keriso ia abia isi King ai do ia lao totona.—Efeso 1:19, 20.
Toreisi Lou Helarona ese Ita Ia Durua
21, 22. Iobu ese edena helaro ia hahedinaraia, Iobu 14:13-15 ena hereva hegeregerena, bona unai ese hari inai negai edia lalokau taudia edia mase idia taitailaia taudia be edena bamona ia hagoadaia?
21 Ena be toreisi lou karana ta ita itaia lasi, to toreisi lou idia hamomokania sivarai haida Baibel amo ita itaia vadaeni. Unai dainai, kara maoromaoro tauna Iobu ia hahedinaraia helarona ita abia diba. Hisihisi ia ania neganai, ia noinoi: “Lau ura [oi Iehova ese] mase gabuna dekenai lau do oi hunia. . . . Vadaeni nega ta do oi gwauraia, unai neganai oi ese lau do oi laloa. Bema tau ta ia mase, ia be do ia mauri lou, a?” “Do oi boiboi, bena oi dekenai lau sibona do lau haere. Oiemu imana edia gaukara do oi ura dikadika.” (Iobu 14:13-15, NW ) Dirava ese ‘ena imana edia gaukara do ia ura dikadika,’ anina be ia ura bada Iobu do ia hatorea isi lou. Unai be helaro namona ita dekenai ia hahedinaraia!
22 Reana Dirava ia gari henia ruma bese lalonai ta be ia gorere bada, Iobu bamona, bona reana do ia mase. Reana ia dainai idia lalohisihisi taudia idia taitai, Iesu ese Lasaro ena mase ia taitailaia bamona. (Ioane 11:35) To ita diba momokani Dirava do ia boiboi bena ia laloatao taudia ibounai be do idia haere, bona unai ese ita ia hagoadaia momokani! Toana be laolao ta amo idia giroa bamona—mai gorere o dika ida lasi, to mai edia goada momokani ida.
23. Edena dala ai haida ese idia hahedinaraia toreisi lou helarona idia abia dae momokani?
23 Kamonai Keristani hahine buruka ia mase neganai, abidadama tamona taudia be mai hebogahisi ida inai hereva idia torea: “Emu sinana ia mase dainai mani emai sori herevana oi abia dae. Nega sisina murinai ia do ita welkam henia lou—mai ena hairai bona goada ida!” Edia natuna mero ia mase tamana bona sinana ta idia gwau: “Jason do ia noga dinana ai naria noho mai emai lalo-goada ida! Gabu do ia itaia, guna ia naria noho Paradaisona lalonai ia noho vadaeni. . . . Unai ese ai, ia ai lalokau henia taudia, ia hagoadaia bada, unuseniai do ai noho danu totona.” Momokani, bona ita tanikiu bada diba badina toreisi lou helarona be helaro korikorina!
Emu Haere be Dahaka?
• Dirava ese mase taudia do ia hatorea isi lou karana ita abidadama henia neganai, edena bamona ita do ia durua?
• Dahaka sivarai Baibel lalonai ese ita dekenai badina idia henia toreisi lou helarona ita abia dae totona?
• Dahaka dainai ita gwau diba toreisi lou be idaunegai helarona?
• Ita ia durua helarona mase taudia dekenai be dahaka?
[Picture on page 10]
Elia ese Iehova ia henia siahuna amo vabu ta ena natuna mero ia hamauria
[Picture on page 12]
Iesu ese Iairo ena natuna kekeni ia hamauria neganai, kekeni ena tama sina idia hoa dikadika mai moale ida
[Picture on page 15]
Pentekoste 33 C.E. ai, aposetolo Petero ese mai gari lasi ida ia hamomokania Iesu be mase amo ia toreisi lou