Hepapahuahu be Edena Bamona Oi Hamaoromaoroa Diba?

DINA iboudiai ita be taunimanima idauidau ida ita kara heheni. Nega momo, unai ese moale bona lalohadai matamatadia ia havaraia. To nega haida, hepapahuahu ia havaraia danu, bona idia haida be lalohisihisi badadia bona ma haida be iseda mauri dinadia ta ta lalodiai idia vara lalohisihisi maragidia sibona. To, herevana iseda hepapahuahu ena bada be edena bamona, ita hamaoromaoroa dalana be mai anina bada iseda laloa dalana, hemami, bona lauma dalana dekenai.

Bema hepapahuahu hamaoromaoroa totona ita hekwarahi, mauri namona do ita moalelaia bona ma haida ida maino ai do ita noho. Idaunegai aonega herevana, ia gwau: “Bema oiemu kudouna be mai ena maino danu neganai, oiemu tauanina do ia noho namo.”​​—⁠Aonega Herevadia 14:⁠30.

To, inai hereva danu be momokani, ia gwau: “Ia badu neganai mai ena haheauka lasi tauna, be hanua ta mai ena magu lasi bamona, idia hadikaia ore vadaeni.” (Aonega Herevadia 25:28) Ita daika ia ura lalohadai kereredia do ia abia haraga, bena dala kereredia​​—⁠ita bona haida ia hadikaia diba daladia​​—⁠do ia karaia? Badu biagua lasi karana be unai bamona dika ia havaraia diba. Haroro Herevana Badana lalonai, Iesu ia gwau namona be iseda lalohadai ita tahua namonamo, badina ita bona haida huanai ia noho hepapahuahu ita hamaoromaoroa dalana dekenai unai be mai ena siahu. (Mataio 7:​3-5) Namo lasi taunimanima haida edia kara ita maumauraia momo, to namona be lalohadai bona kara idauidau taudia do ita hetura henidia dalana ita laloa.

Iseda Lalohadai

Lalohisihisi kava eiava hepapahuahu korikorina ta ita hamaoromaoroa totona, gau ginigunana be ita lalo-parara ita be lalohadai bona kara kereredia ita badinaia diba. Baibel ia gwau, ita ibounai be kara dika taudia bona “Dirava ena hairaina guba dekenai ita abia be hegeregere lasi.” (Roma 3:​23) Ma danu, laloa namonamo karana ese reana do ia hahedinaraia, iseda hekwakwanai ena badina be ma tau ta ena kerere lasi. Unai hegeregerena, mani Iona ena haheitalaia ita laloa.

Iehova ese Iona ia hadibaia hegeregerena, ia be Nineva hanua dekenai ia lao Dirava ese unai hanua taudia do ia hahemaoro henia karana ia harorolaia totona. Moale gauna be inai, Nineva hanua taudia ibounai idia helalo-kerehai bona Dirava momokanina idia abidadama henia. (Iona 3:​5-​10) Iehova ia laloa idia helalo-kerehai dainai edia dika ia gwauatao, bona ia hamasedia lasi. “To, Iona ia moale lasi inai kara dekenai, ia be ia badu.” (Iona 4:⁠1) Iona ese Iehova ena hebogahisi ia laloa dalana be hoa gauna. Dahaka dainai Iona be Iehova ia badu henia? Reana, Iona be sibona ena hemami ia laloa, ia laloa unai hanua taudia ese ia do idia laloa lasi. Iehova ena hebogahisi ia laloa bada lasi. To, Iehova be mai ena hebogahisi ida haheitalai ta amo Iona ia hadibaia, unai amo Iona ia durua ena lalohadai ia haidaua bona Dirava ena hebogahisi ena namo bada ia itaia. (Iona 4:​7-​11) Ia hedinarai goevagoeva, Iehova ena lalohadai lasi, to Iona ena lalohadai ia haidaua be namo.

Unai hegeregerena, nega haida iseda lalohadai gau ta dekenai do ita haidaua be namo, a? Aposetolo Paulo ia gwau: “Umui ta ta dekenai danu do umui matauraia.” (Roma 12:10) Unai ena anina be dahaka? Dala ta dekenai, ia ese ita ia hagoadaia ita laloa maoromaoro bona Keristani taudia ma haida ita matauraia bada. Unai ena anina be ita abia dae, taunimanima ta ta be sibona ena ura hegeregerena gau ta ia abia hidi diba. Paulo be ita ia hadibaia, ia gwau: “Ta ta sibona ena metau, ena metau do idia huaia.” (Galatia 6:⁠5) Unai dainai, hepapahuahu koua totona, aonega karana be ita laloa namonamo bema iseda lalohadai do ita haidaua be namo! Gau badana be ita hekwarahi Iehova ena lalohadai ita hahedinaraia totona bona Dirava idia lalokau henia taudia ida maino ai ita noho.​​—⁠Isaia 55:​8, 9.

Ita Karaia Diba Karana

Mani natuna maragidia rua oi laloa, ta ta be gadara gauna tamona idia veria helulu, ta ia ura ma ta amo unai gadara gauna ia abia dainai mai ena goada ida kahana ia veria. Unai bamona idia karaia lalonai, reana badu herevadia idia gwauraia heheni ela bona idia ta ese unai gadara gauna ia rakatania eiava ma ta ia mai bona idia ia koua.

Genese bukana ia gwau, Aberahamo ena boromakau naria taudia bona iena kakana ena natuna Lota ena boromakau naria taudia huanai hepapahuahu ta ia vara bona Aberahamo be unai ia kamonaia. Aberahamo be Lota dekenai ia lao guna bona ia gwau: “Ita be varavara, oiemu taudia bona lauegu taudia idia heai be dika.” Aberahamo ese ena lalona ia hadaia, hepapahuahu karana ta be edia hetura karana do ia hadikaia lasi. Bena dahaka ia karaia? Mai ena ura bada ida ena tau buruka dagina hegeregerena gau ta do ia abia hidi guna ena maoro ia atoa diho; ia hegaegae gau ta do ia henia. Aberahamo be gwaumaoro ia henia, Lota ese ena ruma bese bona boromakau edia noho gabuna ia abia hidi guna totona. Bena Lota ese Sodoma bona Gomora ena tano mai hairaina ia abia hidi. Aberahamo bona Lota be mai maino ida idia parara.​​—⁠Genese 13:​5-​12.

Aberahamo ia karaia bamona, ita hegaegae vadaeni taunimanima ma haida ida ita maino totona, a? Bema ita ura hepapahuahu ta ita hamaoromaoroa, unai Baibel ena haheitalai hereadaena ita tohotohoa be namo. Aberahamo ia gwau: “Idia heai be dika.” Aberahamo ia ura bada maino do ia havaraia. Momokani, unai bamona maino havaraia herevana ese idia ia durua edia lalohadai kereredia idia atoa siri totona. Bona Aberahamo be ia gwau, “ita be varavara.” Sibona ena ura eiava hekokoroku dainai unai bamona hebamo namona do ia hadikaia be anina lasi, ani? Aberahamo be anina bada gaudia ia laloa bada. Unai bamona ia karaia lalonai, ena ladana namona ia laloa mai hemataurai ida bona iena kakana ena natuna danu ia matauraia.

Nega haida taunimanima rua huanai hepapahuahu ia vara neganai reana hamaoromaoroa totona ma ta ena heduru idia tahua diba, to bema idia ruaosi sibona ese idia hamaoromaoroa diba, unai be namo herea! Iesu be ita ia hagoadaia iseda tadikaka ida maino ita karaia dalana do ita matamaia, bona ita sori henia, bema unai bamona ita karaia be namo.a (Mataio 5:​23, 24) Unai bamona ita karaia totona, manau eiava lalo-manau be gau badana, Petero ia gwau: “Do umui laloa manau, vadaeni umui ta ta dekenai durua do umui henia. Badina be Buka Helaga ia gwau: ‘Dirava ese hekokoroku taudia edia dala ia koua, to manau taudia dekenai iena hariharibada ia henia.’ ” (1 Petero 5:⁠5) Iseda tomadiho tamona tadikaka ita kara henia dalana be mai anina bada Dirava ita tura henia karana dekenai.​​—⁠1 Ioane 4:​20.

Keristani kongregesen lalonai, reana nega haida mai eda maoro ida ita karaia diba gauna ta do ita dadaraia maino ia noho totona. Hari Iehova ena Witnes taudia idia bamoa taudia momo be idia hanaia laganidia ima lalonai, Dirava ena tomadiho momokani ena ruma bese taudia ai idia lao. Unai ese iseda kudouna ia hamoalea! Kongregesen lalonai unai taudia bona ma haida dekenai iseda kara be mai anina bada. Unai dainai, namona be moale karadia, ita ura henia karadia, hebamo karadia, eiava moni gaukara ita abia hidi neganai ita laloa namonamo, taunimanima haida ese ita idia laloa dalana do ita laloa be namo. Iseda kara bona hereva do idia laloa kerere bena haida do idia hahekwakwanaidia, a?

Aposetolo Paulo be ita ia hadibaia, ia gwau: “Momokani, gau ibounai be taravatu lasi ita dekenai, to namo lasi ita laloa gau ibounai be namo ita dekenai. Gau ibounai be taravatu lasi ita dekenai, to namo lasi ita laloa gau ibounai ese ita do idia hagoadaia. Tau tamona sibona ena namo do ia tahua lasi, to namona be tau haida edia namo do ia tahua.” (1 Korinto 10:​23, 24) Ita be Keristani taudia dainai, Keristani tadikaka oreana ena lalokau bona lalo-tamona habadaia dalana ita laloa bada.​​—⁠Salamo 133:1; Ioane 13:​34, 35.

Hanamoa Herevadia

Hereva be mai edia siahu namo do ia havaraia. “Hereva namodia mai bogahisihisi danu, be hani bamona, edia mamina be namo, lauma dekenai, bona tauanina dekenai danu.” (Aonega Herevadia 16:24) Gideona ese idia bona Eparaima taudia huanai ia vara hepapahuahu ia koua sivaraina ese unai aonega hereva momokanina ena anina ia hahedinaraia.

Midiana taudia idia tuari henia noho lalonai, Gideona be Eparaima iduhu taudia edia heduru ia noia. To tuari ia ore murinai, Eparaima taudia be Gideona idia badu henia bona idia maumau, idia gwau tuari ia matamaia neganai ia boiridia lasi. Unai sivarai lalonai ia gwau idia be “Gideona dekenai idia badu momokani.” Gideona ia haere, ia gwau: “Umui ese umui karaia karadia be bada, to lau karaia gaudia be bada lasi. Eparaima taudia e, sedira umui laloa umui karaia gauna be maragi, to emui kara ese lauegu kara ia hereaia momokani. Dirava ese Oreba bona Sebe, Midiana gunalaia taudia emui imana dekenai ia atodia. Lauegu kara ese emui kara ia hereaia diba, a?” (Gunalaia Taudia 8:​1-3) Gideona ese ena lalo-namo herevadia ia abia hidi namonamo dainai, tuari ia havaraia diba hepapahuahu ia koua. Reana Eparaima iduhu taudia edia hekwakwanai be sibona edia namo idia laloa bada bona idia hekokoroku. To, unai ese Gideona ena hekwarahi maino havaraia totona be ia koua lasi. Unai bamona ita karaia diba, a?

Reana haida do idia badu bona ita do idia inai henia. To, namona be edia hemami ita laloa bada, bona ita hekwarahi edia lalohadai ita lalo-pararalaia totona. Dala haida amo ita ese edia hemami ita hadikaia, a? Bema oibe, unai badu ita havaraia dalana ita gwauraia hedinarai bona unai hekwakwanai ita habadaia dainai ita sori. Ita laloa namonamo herevadia be reana ita hadikaia hetura karana ia hanamoa lou diba. (Iamesi 3:⁠4) Reana idia lalohisihisi taudia haida be iseda hebogahisi herevadia sibona idia kamonai be namo. Baibel ia gwau, “bema au be lasi neganai, lahi be ia bodo noho, bona bema hadikaia hereva be lasi neganai, heai be do ia doko.” (Aonega Herevadia 26:20) Oibe, nega maorodia ai ita abia hidi hereva namodia “ese badu ia koua,” bona hemami do ia hanamoa.​​—⁠Aonega Herevadia 15:⁠1.

Aposetolo Paulo ia gwau: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.” (Roma 12:18) Momokani, ita be haida edia hemami ita biagua diba lasi, to maino ita karaia diba. Namo lasi ita eiava ma haida edia goevadae lasi karadia ese ita ia biagua, to namona be hari Baibel ena taravatu ita badinaia noho. Iehova ena hadibaia dalana hegeregerena hepapahuahu ita hamaoromaoroa karana ese maino bona moale hanaihanai do ia havaraia.​​—⁠Isaia 48:⁠17.

[Footnote]

[Picture on page 24]

Ita ura ita sibona eda dala ita badinaia, a?

[Picture on page 25]

Aberahamo be haheitalai namona ia hahedinaraia, mai ena lalo-manau ida hepapahuahu ia hamaoromaoroa