Inai Oi Laloatao, A?

Oi ese vanegai idia halasia Gima Kohorona magasin oi moalelaidia, a? Vadaeni, mani henunai idia noho henanadai oi haerelaia toho:

• Dahaka dainai ita diba momokani Isaia 65:​17-​19 ese ia perovetalaia “tanobada matamata bona guba matamata” ena guguru negana be igui hesiai amo idia giroa lou Iuda taudia ia gwauraia sibona lasi?

Badina aposetolo Petero bona Ioane, Keristani taudia ginigunadia edia nega dekenai revareva idia torea neganai, idia hahedinaraia anina ta be vaira negana ai do ia vara, bona ena hahenamo idauidau be idia do vara lasi. (2 Petero 3:​13; Apokalupo 21:​1-4)​​—⁠4/15, rau 10-​12.

• Idaunegai Greek taudia edia gori, goada herea bona dagedage taudia edia sivarai, ese dahaka ia hamomokania?

Reana unai gori be idia hahairaia toho bona idia haidaua gaudia, to sivarai momokanina be tanobada ai abata ia do vara lasi neganai, aneru haida be taunimanima edia tauanina idia abia bona idia dagedage bona matabodaga karadia idia karaia. (Genese 6:​1, 2)​​—⁠4/15, rau 27.

• Headava ariadia dekenai, lo Keristani taudia ese do idia gimaia karadia haida be dahaka?

Regerege bada havaraia karadia idia dadaraia be gau badana, unai ia vara diba bema kekero muramura idia biagua lasi bona miusiki ena regena ia bada neganai, hemataurai lasi mavaru dikadia ia havaraia diba. Bema headava aria dekenai taunimanima ibounai idia lao diba herevana idia gwauraia lasi, vadaeni namona be idia boiria lasi taudia be idia lao lasi. Namona be headava matamata tauna ia diba momokani maduna idia huaia namonamo Keristani taudia haida be do idia noho ela bona hora namona ta ai aria idia hadokoa.​​—⁠5/1, rau 19-​22.

• Salamo 128:3 dekenai, inai hereva natuna memerodia be “olive au matamatadia bamona” teibolo idia gegea, ena anina be dahaka?

Hanaihanai olive au matamatadia be olive au ena badina amo idia tubu. Unai au ena rigi badana ena gabana be guna hegeregerena huahua momo ia atoa lasi neganai, unai rigi matamatadia be unai au do idia gegea bona tubu namo herea diba. Unai hegeregerena, tama sina idia itaia edia natudia ese huahua idia havaraia bona idia ida Iehova idia hesiai henia dainai, idia moale.​​—⁠5/15, rau 27.

• Ruma bese lalonai hemami namona ese natudia ia durua daladia haida be dahaka?

Unai ese dala ia kehoa siahu taudia idia laloa maoromaoro, taravatudia idia laloa bada, bona hebamo namona idia moalelaia totona. Danu, unai bamona kara ese idia ia durua edia hetura karana namona Dirava ida idia hagoadaia totona.​​—⁠6/1, rau 18.

• Far East tanona ta dekenai, dahaka idia karaia bena unai amo idia hahedinaraia badabada Keristani taudia ibounai be tadikaka?

Kongregesen ibounai be idia ia hagoadaia ladana abia isi herevadia amo haida idia gwauraia lasi. To, namona be ibounai do idia gwauraia tadikaka.​​—⁠6/15, rau 21, 22.

• Iehova ena Witnes taudia ese rara amo idia karaia muramuradia idia abia dae, a?

Ai abia dae momokani Baibel ena hahegani, ‘rara umui dadaraia noho’ herevana, anina be rara eiava ena kahana ta, (plasma, sel kakakakadia, sel kurokurodia, bona pleitelet) henia hanai karana be taravatu. (Kara 15:​28, 29, NW ) Rara ena kahana badadia amo idia hapararaia kahana maragidia dekenai, Keristani ta ta sibona ese unai ia laloa namonamo be namo, bona ia laloa bada gauna be Baibel ena hereva bona iena hetura karana Dirava ida.​​—⁠6/15, rau 29-​31.

• Hari inai negai, lalo-maino ita davaria diba, a?

Oibe. Baibel amo, Iesu Keriso ese tomadiho dalana goevana dekenai taunimanima ia hakaua lao bona Isaia 32:18 dekenai ia gwauraia mainona idia abia. Unai sibona lasi, to Salamo 37:​11, 29 ese ia gwauraia tanobadana lalonai, noho hanaihanai mainona do idia abia.​​—⁠7/1, rau 7.

• Hari, tiokratik sivaraina lalonai, George Young be dahaka maduna ia huaia?

Lagani 1917 ai, tano momo dekenai, ia hamomokania ia be Basileia ena sivarai namona ena diari ia abia loaloa tauna. Iena haroro gaukara dainai, Canada, Caribbean ena motumotu idauidau, Brazil bona South America ena tano ma haida, Central America, Spain, Portugal, unai negai idia gwauraia Soviet Union, bona United States dekenai ia lao.​​—⁠7/1, rau 22-​7.

• Korinto Ginigunana 15:29 ia gwau haida be “bapatiso idia abia mase taudia totona” ena anina be dahaka?

Hereva badana be Keristani taudia be lauma helaga amo idia horoa neganai, anina be edia mase bona guba toreisi louna dekenai idia ia hakaua mauri dalana idia badinaia.​​—⁠7/15, rau 17.

• Aposetolo Paulo ena sivarai lasi laganidia lalonai, dahaka ia karaia?

Reana Suria bona Kilikia dekenai heduru ia henia, kongregesen haginia bona hagoadaia totona. Korinto Iharuana 11:​23-​27 lalonai ia herevalaia hisihisi idauidau be reana unai nega lalonai idia vara, bona unai ese ia hahedinaraia ia be haroro gaukara ia goadalaia.​​—⁠7/15, rau 26, 27.

• Dahaka ese ita ia durua iseda ura gaudia ita laloa maoromaoro totona?

Ita laloaboio lasi Iehova be hebogahisi Diravana. Guriguri ese iseda laloa dalana ia hanamoa, bona manau karana ia hahedinaraia. Lo turana ta ida ita herevahereva karana amo lalohadai ta ita abia be heduru dalana ma ta.​​—⁠8/1, rau 29, 30.