‘Gau Ibounai Karaia Matamata Negadia’ be Kahirakahira!
Iesu be kahirakahira guba dekenai ia lao neganai, iena abidadama hahediba taudia haida ese idia nanadaia: “Lohiabada e, inai negana be, basileia do oi henia lou Israela taudia dekenai, a?” Iesu ena haere ese ia hahedinaraia lagani haida do idia ore murinai Basileia do ia mai. Unai nega lalonai, ena murinai idia raka taudia be gaukara badana ta do idia karaia. Idia ese Iesu do idia gwauraia hedinarai “Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.”—Kara 1:6-8.
UNAI gaukara be dina haida, pura haida, eiava hua haida lalonai do idia haorea diba lasi. To, hahediba taudia be maoromaoro haroro gaukara idia hamatamaia. To hanamoa lou negana idia laloa momo noho. Ierusalema dekenai idia hebou hutuma dekenai, aposetolo Petero ese unai ia herevalaia, ia gwau: “Emui lalona umui giroa, bona Dirava ese emui kara dika do ia kokia. Gabeai Lohiabada ese goada matamata do ia henia umui dekenai. Bona Dirava ese Keriso umui dekenai do ia siaia mai, ia ese guna umui totona ia Abia Hidi Tauna, Iesu unai. To guba dekenai do ia noho, ela bona Dirava ese gau ibounai do ia karaia matamata, ia ese guna iena peroveta taudia helagadia edia uduna dekenai ia hereva bamona.”—Kara 3:19-21.
Inai ‘gau ibounai karaia matamata negadia’ lalonai Iehova ia henia “goada matamata” do ia mai. Idia perovetalaia hanamoa lou negana be mai ena kahana rua. Ginigunana be, lauma dalana ai gau ibounai do ia hanamoa lou, unai be hari ia vara noho. Gau iharuana be, unai murinai, paradaiso be tanobada ai do ia haginia.
Hanamoa Lou Negana Ia Matamaia
Aposetolo Petero ese unai hutuma Ierusalema dekenai ia hamaorodia hegeregerena, Iesu be “guba dekenai do ia noho.” Unai bamona ia vara ela bona lagani 1914 ai, bena Iesu ese ena lohia siahuna ia abia bona Dirava ese ia abia hidi King bamona ia lohia matamaia. Unai neganai, Petero ia peroveta, ia gwau Iehova ese ena Natuna “do ia siaia mai,” anina be Ia ese gwaumaoro do ia henia Iesu be Dirava ena ura hagugurua tauna badana ena gaukara do ia matamaia. Baibel ese unai nega be laulau dalanai ia herevalaia: “Vadaeni [Dirava ena guba oreana] ia mara, mero ta ia abia. Unai mero [Dirava ena Basileia, Iesu Keriso ena imana dekenai] ese vaira neganai auri itotohi dekena amo bese ibounai do ia gunalaia.”—Apokalupo 12:5.
To tanobada besedia idia ura lasi Keriso ena lohia siahuna henunai do idia noho. Momokani, idia ese Basileia henunai do idia noho kamonai taudia idia dagedage henidia, idia be Iehova ena Witnes taudia. Guna idia noho aposetolo taudia bamona, Witnes taudia ese mai ura bada ida “Iesu ena hereva momokani idia gwauraia hedinarai.” (Apokalupo 12:17) Inai henia karana be tano ta amo ia lao ma tano ta dekenai ia vara unai lalo-momokani Keristani taudia ese idia karaia gaukarana dekenai. Lagani 1918 ai, Brooklyn, New York dekenai, Watch Tower Society ena hedikwota taudia badadia be kota dekenai idia samania koikoi bona hahemaoro maoromaoro lasi dainai idia gwau lagani momo lalodiai dibura dekenai do idia noho. Nega sisina lalonai toana be unai “tanobada ena kahana ibounai” haroro gaukarana be do ia doko.—Apokalupo 11:7-10.
To, lagani 1919 ai, idia hadiburaia hedikwota taudia idia ruhaia bona idia samania koikoi herevadia idia kokia, idia gwau idia be mai edia kerere lasi. Tadikaka ese nega idia haorea kava lasi, to lauma dalanai gau ibounai hanamoa lou gaukarana idia hamatamaia lou. Unai nega amo ema bona hari, Iehova ena taunimanima be lauma dalanai noho namo idia moalelaia.
Gaukara badana ta idia karaia, Iesu ena hahegani ia murinai idia raka taudia dekenai be bese ibounai taudia dekenai do idia hadibadia. (Mataio 28:20) Ita ia hamoalea bada gauna be, guna animal bamona karadia idia hahedinaraia taudia haida ese edia kara idia haidaua! Idia ese mauri gunana idia kokia, unai mauri ese “badu,” “hereva dika,” bona “hereva mirodia” gwauraia karana ia havaraia. Mauri matamatana idia atoa, unai ese ‘diba matamata ia henia noho, ia lao bona Dirava ena toana momokani idia abia.’ Lauma dalanai, hari inai negai, peroveta tauna Isaia ena hereva idia guguru: “Bona uda sisiana [guna uda sisiana ena kara ia hahedinaraia tauna] be mamoe natuna maruanena [manau karana ia hahedinaraia tauna] ida nega sisina do idia noho, bona lepadi be nanigosi natuna ida do idia hekure, bona boromakau natuna bona laiona matamatana mai huina latana bona idia ubua animal be do idia noho hebou.”—Kolose 3:8-10; Isaia 11:6, 9, NW.
Hanamoa Lou Karadia ma Haida be Kahirakahira!
Hari inai negai, hanamoa lou karana dainai lauma paradaiso ia vara, to iseda tanobada be paradaiso korikorina ai do ia lao negana ia kahirakahira momokani danu. Iehova ese iseda tubudia, Adamu bona Heva, be Eden umana dekenai ia atodia neganai, tanobada ena kahana maragina be paradaiso ta. (Genese 1:29-31) Unai dainai ita gwau diba Paradaiso ia karaia lou. To, unai ia do vara lasi neganai, Dirava idia matauraia lasi tomadiho koikoi oreadia ibounai be tanobada amo do ia haorea be namo. Inai tanobada ena politikol oreadia ese unai do idia karaia. (Apokalupo 17:15-18) Bena, politikol bona bisinesi oreadia, bona idia badinaia taudia, be do idia hadikaia ore. Dokonai, Dirava ena inai taudia oredia—Satani Diabolo bona ena demoni—be lagani 1000 ai, hanamoa lou negana lalonai—do ia koudia. Unai nega lalonai, “taunimanima idia noho lasi tanona, bona tano kaukauna be do idia moale, bona palauapalaua be unai tano dekenai do idia tubu namonamo.” (Isaia 35:1) Tanobada ibounai be dika amo do ia ruhaia. (Isaia 14:7) Idia mase taudia milioni momo be tanobada ai do idia toreisi lou. Ibounai ese mauri davana karaia boubouna amo hanamoa lou karana ena hahenamo do idia abia. (Apokalupo 20:12-15; 22:1, 2) Unai neganai matakepulu, taia kudima, eiava aena dika taudia be lasi tanobada ai. Unuseniai “idia noho taudia ta ese do ia gwau lasi, ‘Lau be gorere.’ ” (Isaia 33:24) Nega sisina Keriso ena Lagani 1000 Lohia Negana murinai, Diabolo bona ena demoni be nega kwadogi lalonai do idia ruhaia bona Iehova ena ura, ia hagugurua vadaeni kahana, do idia itaia. Dokonai, do idia hadikadia ore vaitani.—Apokalupo 20:1-3.
Tanobada ena lagani 1000 hanamoa lou negana ena dokona ia ginidae neganai, idia “mauri noho gaudia ibounai” ese Iehova do idia hanamoa, bona unai bamona do idia karaia ela bona hanaihanai. (Salamo 150:6) Oi danu be edia huanai do oi noho, a? Oi noho diba.