Manau Tauna Iosaia ese Iehova Ena Lalo-Namo Ia Abia
IUDA ena King ena tubuna mero Iosaia ena mauri laganidia be 5, bona reana ia gari bada. Iena sinana, Iedida, ia tai. Iedida ia tai badina Iosaia ena tubuna, King Manase, ia mase.—2 King Taudia 21:18.
Iosaia ena tamana, Amona, be Iuda do ia lohiaia. (2 Sivarai 33:20) Lagani rua murinai (lagani 659 B.C.E. ai), Amona be iena hesiai taudia ese idia alaia mase. To, hanua taudia ese Amona idia alaia taudia idia alaia mase bona mero matamata Iosaia be king ai idia halaoa. (2 King Taudia 21:24; 2 Sivarai 33:25) Amona ena lohia neganai, Ierusalema ena ruma edia guhi momo ai, taunimanima be dirava koikoidia dekenai muramura mai bonana namona idia bouboulaia, bona unai dainai Iosaia be unai bonana ia diba. Dirava koikoi edia hahelaga taudia idia raka loaloa bona tomadiho taudia—sibodia idia gwauraia Iehova idia tomadiho henia taudia danu—be dirava ladana Malcam amo gwauhamata idia karaia.—Sepanaia 1:1, 5.
Iosaia ia diba, Amona ese dirava koikoidia ia tomadiho henia be kara dikana momokani. Danu, Iuda edia king merona be Dirava ena peroveta tauna Sepanaia ena haroro herevadia ia lalo-pararalaia namonamo. Iosaia ena mauri laganidia be 15 neganai (lagani 652 B.C.E. ai), iena lohia laganidia be 8 bona dala ia tahua Sepanaia ena hereva ia badinaia totona. Iosaia be do mero maragi neganai, Iehova ia tahua matamaia.—2 Sivarai 33:21, 22; 34:3.
Iosaia ese Kara ta Ia Karaia Matamaia!
Lagani hani idia hanaia bona Iosaia be Iuda bona Ierusalema amo tomadiho koikoi kokia gaukarana ia hamatamaia (lagani 648 B.C.E. ai). Bala tomadiho henia karana idia gaukaralaia kaivakuku, au tubua, bona muramura mai ena bonana namona gabua patadia ia hadikaia. Dirava koikoi edia kaivakuku ia hamakohia maragimaragi bona edia kahu be mase taudia, unai gaudia dekenai boubou gaudia idia henia taudia, edia guria gabuna ai ia negea. Tomadiho koikoi totona idia gaukaralaia boubou patadia ia hadikaia bona ia hamakohia maragimaragi.—2 King Taudia 23:8-14.
Levi hahelaga tauna ta ena natuna, Ieremia, be Ierusalema dekenai ia mai neganai (lagani 647 B.C.E. ai), Iosaia be ena hagoevaia gaukarana ia habadaia. Iehova Dirava ese matamata tauna Ieremia be ena peroveta tauna ai ia halaoa, bona mai ena goada ida Iehova ena hereva, tomadiho koikoi dekenai, ia gwauraia hedinarai! Iosaia ena mauri lagani be Ieremia ena mauri lagani bamona. Ena be Iosaia ese hagoevaia gaukarana ia goadalaia bona Ieremia be mai gari lasi ida ia haroro, to karaharaga taunimanima be tomadiho koikoi ma idia badinaia lou.—Ieremia 1:1-10.
Davana Bada Gauna Idia Davaria!
Lagani ima bamona idia hanaia vadaeni. Iosaia ena mauri lagani be 25 bona lagani 18 bamona ia lohia. Ia ese seketere tauna, Sapana; Ierusalema ena lohia tauna, Maseaia; bona toretore tauna badana, Ioa, ia boiridia. King ese Sapana ia hagania, ia gwau: ‘Hahelaga Tauna Badana, Hilekaia dekenai oi lao, oi hamaoroa taunimanima ese Lohiabada ena Dubu Helaga idia abia vareai moni, iduara naria taudia idia gogoa moni, do ia abia bona Lohiabada ena Dubu Helaga lalonai hanamoa lou gaukarana idia karaia noho taudia dekenai inai moni, edia gaukara davana, do ia henia.’—2 King Taudia 22:3-6; 2 Sivarai 34:8.
Daba momokani amo, dubu hanamoa lou taudia idia gaukara goadagoada. Momokani, Iosaia be Iehova ia tanikiu henia badina iena tubuna dikadia haida ese Dirava ena ruma idia hadikaia gaudia be gaukara taudia ese idia hanamoa vadaeni. Gaukara idia karaia lalonai, Sapana be sivarai ta gwauraia totona ia mai. To, dahaka ia dogoatao? Oibe, lokua gauna ta ia dogoatao! Ia gwau Hahelaga Tauna Badana “Hilekaia ese Lohiabada ena Taravatu Buka, Dirava ese Mose dekenai ia henia gauna, ia davaria.” (2 Sivarai 34:12-18) Idia davaria gauna be mai anina bada—idia daradara lasi unai be Taravatu bukana ginigunana!
Iosaia ia ura bada unai buka ena hereva iboudiai ia kamonai. Sapana ese unai buka ia duahia lalonai, king ia ura ia itaia unai hahegani ta ta edia anina ia dekenai bona taunimanima dekenai be dahaka. To, unai buka ese tomadiho momokani ia gwauraia badabada dalana bona taunimanima ese tomadiho koikoi idia badinaia neganai do ia vara hisihisidia ia perovetalaia dalana ia hoalaia. Hari, Iosaia ia lalo-parara taunimanima be Dirava ena hahegani ibounai idia badinaia lasi, unai dainai iena dabua ia darea bona Hilekaia, Sapana bona ma haida dekenai oda henia, ia gwau: ‘Umui lao, Lohiabada umui nanadaia, inai idia davaria Buka ena hadibaia hereva do ita laloa namonamo totona. Badina Lohiabada be ita dekenai ia badu, iseda sene taudia ese iena hereva idia kamonai henia lasi, bona inai Buka ia torea hereva idia badinaia lasi dainai.’—2 King Taudia 22:11-13; 2 Sivarai 34:19-21.
Iehova Ena Hereva Ia Gwauraia
Iosaia ena gwaukau taudia be peroveta hahinena Hulida dekenai, Ierusalema ai, idia lao bona idia giroa lou neganai, hereva idia hamaorolaia. Hulida ese Iehova ena hereva ia gwauraia, ia hahedinaraia idia davaria bukana ese ia gwauraia panisi herevadia be tomadiho momokani negea besena dekenai do ia vara. To, Iosaia be Iehova Dirava ena vairana ai ia manau dainai, unai panisi kara do ia itaia lasi. Ia be do ia mase bona maino ai gara gabuna ai do idia abia lao.—2 King Taudia 22:14-20; 2 Sivarai 34:22-28.
Iosaia be tuari lalonai ia mase dainai, Hulida ena peroveta herevana be ia maoro, a? (2 King Taudia 23:28-30) Oibe, badina ia mase bena idia guria “maino” negana be kahirakahira Iuda taudia dekenai do ia vara “dika” amo ia idau momokani. (2 King Taudia 22:20; 2 Sivarai 34:28) Iosaia ia mase guna bena gabeai lagani 609-607 B.C.E. ena dika do ia vara, unai neganai Babulonia ese Ierusalema ia koua hegege bona ia hadikaia ore. Bona unai hereva “ia mase [“iena tubudia ida ia haboua,” NW ]” be dagedage amo ta ia mase ia gwauraia diba danu. Unai bamona hereva ta idia gaukaralaia dagedage amo ta ia mase bona ta be dagedage amo lasi to ia mase idia gwauraia totona.—Deuteronomi 31:16; 1 King Taudia 2:10; 22:34, 40, NW.
Tomadiho Momokani Ia Tubu
Dubu helaga, Iosaia ese Ierusalema taudia ia haboua bona Iehova ena ruma ai idia davaria ‘Taravatu Buka ena hereva ibounai,’ be idia dekenai ia duahia hedinarai. Bena gwauhamata ta ia karaia, ia gwau: “Lohiabada ena dala dekena do ia raka, bona Lohiabada ena oda bona iena hadibaia hereva, bona iena Taravatu do ia badinaia, mai ena kudouna ibounai, mai ena laumana ibounai danu. Ia gwauhamata danu, taravatu hereva, unai Buka lalonai torea gaudia ibounai do ia karaia.” Taunimanima ibounai be unai gwauhamata idia badinaia.—2 King Taudia 23:1-3.
Hari, King Iosaia be kaivakuku tomadiho henia karana kokia momokani totona kara badana ma ta ia karaia. Iuda ena dirava idaudia ena hahelaga taudia edia moni karaia dalana ia kokia. Tomadiho mirona idia karaia Levi taudia be Iehova ena hesiai gaukara ena hahenamo iena pata ai idia haboioa, bona King Solomona ena lohia neganai idia haginia atai gabudia be maoro lasi tomadiho totona. Danu, guna idia gwauraia iduhu 10 basileiana, Israela, matamanai Asuria ese ia hamorua basileiana (lagani 740 B.C.E ai), ena tano ai hagoevaia gaukarana ia karaia danu.
Lagani 300 gunanai, “Dirava ena tau” ta, ladana idia gwauraia hedinarai lasi tauna, ena peroveta herevana hegeregerena, Iosaia ese Betele ai King Ieroboama Ginigunana ese Bala totona ia haginia boubou patana Bala ena hahelaga taudia edia turia ia gabua. Unuseniai bona hanua ma haida ai atai gabudia idia kokia, bona kaivakuku ena hahelaga taudia be sibodia ese idia haginia boubou patadia dekenai idia alaia mase.—1 King Taudia 13:1-4; 2 King Taudia 23:4-20.
Pasova Aria Badana Idia Karaia
Dirava ese Iosaia ia durua tomadiho momokani ia habadaia totona. King ena mauri dinadia ibounai lalonai, Dirava do ia tanikiu henia badina taunimanima be Iehova, “edia sene taudia edia Dirava, ena dala dekena amo idia raka siri lasi.” (2 Sivarai 34:33) Bona Iosaia ese iena lohia laganina namba 18 lalonai ia vara gauna namona ta be ia laloaboio diba lasi, ani?
King ese taunimanima ia haganidia, ia gwau: “Lohiabada, emui Dirava ena Pasova aria do umui karaia, inai [idia davaria] Taravatu Bukana, dekenai ia torea hegeregerena.” (2 King Taudia 23:21) Taunimanima ibounai idia kamonai dainai, Iosaia ia moale bada. Unai aria totona, ia sibona be Pasova animal 30,000 bona boromakau 3,000 ia henia. Unai be Pasova aria bada hereana! Unai Pasova ariana ai, idia bouboulaia gaudia, idia palania namonamo gaudia, bona tomadiho taudia edia namba ese Samuela ena nega murinai idia karaia Pasova ariadia edia ia hanaia momokani.—2 King Taudia 23:22, 23; 2 Sivarai 35:1-19.
Ia Mase Neganai, Idia Taitailaia Bada
Iosaia ena lohia laganidia 31 lalonai (lagani 659-629 B.C.E. ai), ia be king namona. Iena lohia negana ena dokona ai, ia kamonai Farao Neko be palani ia karaia Iuda tanona do ia hanaia bona Babulonia ena ami do ia koua toho bona Euperate Sinavai ena ladana Karakemisi dekenai Asuria ena king do ia durua. Ita diba lasi dahaka dainai Iosaia ia lao bona Aigupito taudia ia tuari henia. Neko be Iosaia dekenai hereva gwauraia taudia ia siaia, ia gwau: “Dirava ese lau ia durua noho dainai, lau do oi koua toho lasi, Dirava ese oi do ia hadikaia garina.” To, Iosaia be ena toana ia haidaua bona Megido tano palakana ai, Aigupito taudia ia koua toho.—2 Sivarai 35:20-22.
Iuda ena king be dika ia davaria! Iena inai taudia edia peva gaukaralaia taudia ese Iosaia idia pidia, bena Iosaia ese iena hesiai taudia ia hamaoroa, ia gwau: “Tuari dekenai amo lau umui abia siri, badina bero dikana lau davaria!” Iosaia be ena kariota amo idia abia diho, ma kariota ta dekenai idia atoa, bena Ierusalema dekenai idia abia lao. Hanua dekenai eiava hanua idia lao henia noho lalonai, Iosaia be ia mase. Bona lauma helaga amo ia vara sivaraina ia gwau: “Vadaeni unuseni ia mase, bona idia ese Iuda king taudia edia guria gabuna dekenai idia guria. Iuda bona Ierusalema taudia ibounai ese Iosaia totona idia taitai.” Ieremia be Iosaia totona lalohisihisi ane ia abia, bona unai murinai, mai anina bada negadiai, lalohisihisi anedia lalonai king idia herevalaia.—2 Sivarai 35:23-25.
Oibe, King Iosaia be Aigupito taudia ia tuari henia neganai, ia ese abia hidi kererena ia karaia. (Salamo 130:3) To, tomadiho momokani totona ia hahedinaraia manau bona gini goada karana dainai, Dirava ena lalo-namo ia abia. Iosaia ena mauri sivaraina ese ia hahedinaraia Iehova be ia idia tomadiho henia hesiai taudia mai edia manau ia lalo-namo henidia!—Aonega Herevadia 3:34; Iamesi 4:6.
[Picture on page 29]
King mero matamata Iosaia be mai ena ura bada ida Iehova ia tahua
[Picture on page 31]
Iosaia ese atai gabudia ia hadikaia bona tomadiho goevana ia haginia