Moale Hanaihanai—Guba Dekenai Eiava Tanobada Dekenai?

OIEMU moale be oi noho gabuna sibona dainai ia vara eiava ia vara lasi, a? Taunimanima momo idia abia dae moale abia totona, gorere be lasi, mauri be mai anina, bona ma haida danu hetura karana namona idia abia be gau badana. Baibel ena aonega herevana ta be inai: “Raisi sibona, oiemu lalokau taudia danu do oi ania be namo, to vamu namo herea, badu noho taudia danu do oi ania be dika.”​​—⁠Aonega Herevadia 15:⁠17.

To madi, nega daudau lalonai iseda noho gabuna tanobada dekenai inai heheni karadia, dagedage, bona dika idauidau ma haida idia vara momo. To guba, lauma taudia edia gabu, taunimanima momo idia ura idia mase murinai do idia lao gabuna, be edena bamona? Ia be hanaihanai maino bada bona laga-ani gabuna, bona hagaria gauna ta be lasi, taunimanima momo ese idia laloa bamona, a?

Baibel ese ita ia hadibaia Dirava be guba dekenai lauma taudia, idia gwauraia aneru, milioni momo ida ia noho. (Mataio 18:10; Apokalupo 5:​11) Idia ia gwauraia Dirava ena lauma natudia. (Iobu 38:​4, 7, NW ) Taunimanima hegeregerena, aneru danu be mai edia ura kwalimu; idia be masini lasi. Unai dainai, idia danu ese idia abia hidi diba kara maoro eiava kara kerere do idia karaia. Aneru ese kara kerere dalana idia abia hidi diba, a? Reana haida do idia hoa bema idia diba lagani tausen momo gunanai, aneru momo be momokani, Dirava idia kara dika henia​​—⁠ia idia gwau-edeede henia!​​—⁠Iuda 6.

Gwau-Edeede Aneru Guba Dekenai

Kara dika be lauma gabunai ia vara badina aneru ta ia gwau-edeede, unai dainai ena ladana idia gwauraia Satani (Gwau-edeede Tauna) bona Diabolo (Ladana Hadikaia Tauna). Unai guna ia kamonai aneruna be ena ura kwalimu ia gaukaralaia bona kara kerere ia karaia. Unai murinai, ia ese lauma taudia ma haida ia hakaua kerere, unai dainai, Noa ena negai, Abata ia do vara lasi neganai, idia momo be Satani idia bamoa bona Dirava idia gwau-edeede henia.​​—⁠Genese 6:​2, NW, futnout; 2 Petero 2:⁠4.

Idia moru anerudia be maoromaoro guba amo idia lulua lasi. Lagani tausen momo lalonai, edia vareai dalana be Dirava ese ia koua lasi​​—⁠to toana be taravatu haida ia atoa.a To, Dirava ena haheauka unai kara dika taudia dekenai ia doko neganai, guba amo idia “negea diho,” gabeai do idia hadikadia ore totona. Bena gado ta guba amo ia gwau: “Guba e, bona guba lalonai noho taudia e! Unai kara dainai do umui moale bada!” (Apokalupo 12:​7-​12) Toana be abidadama anerudia idia moale bada, guba dekenai kerere idia karaia aneru dikadia be hari idia kokia vadaeni dainai!

Taunimanima momo idia diba lasi gaudia ita laloa, bona idia hahedinaraia goevagoeva taunimanima eiava aneru ese Dirava ena taravatu bona hakaua herevadia idia badinaia lasi neganai, maino korikori ia noho diba lasi. (Isaia 57:​20, 21; Ieremia 14:​19, 20) To, bema ibounai ese Dirava ena taravatu idia kamonai henia, maino bona noho namona idia noho. (Salamo 119:165; Isaia 48:​17, 18) Unai dainai, bema taunimanima iboudiai ese Dirava idia lalokau henia bona kamonai henia bona idia ta ta idia lalokau henia, tanobada be moale gabuna, a? Baibel ena haere be oibe!

To sibodia edia ura idia tahua dainai idia ura lasi edia kara dika idia hanamoa taudia be edena bamona? Idia ese Dirava ena ura idia ura karaia momokani taudia edia maino do idia hadikaia ela bona hanaihanai, a? Lasi, Dirava ese guba dekenai idia noho aneru dikadia ia kara henia hegeregerena, ia ese tanobada dekenai idia noho kara dika taudia danu do ia kara henia.

Tanobada Ia Goeva

Dirava ia gwau: “Guba be lauegu terona, bona tanobada be lauegu aena atoa gauna.” (Isaia 66:⁠1) Ia be helaga herea dainai, Dirava ese iena “aena atoa gauna” do ia rakatania lasi, dika amo idia hamiroa ela bona hanaihanai totona. (Isaia 6:​1-3; Apokalupo 4:⁠8) Guba dekena amo aneru dikadia ia kokia hegeregerena, tanobada dekenai taunimanima dikadia ibounai do ia kokia danu, inai Baibel siridia ese idia hahedinaraia hegeregerena:

“Badina kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu.”​​—⁠Salamo 37:⁠9.

“Badina be kara maoromaoro taudia, be inai tano dekenai do idia mauri noho, bona laloa maoromaoro taudia be, inai tano lalonai do idia noho momokani. To kara dika taudia be tano dekena amo, Dirava ese do ia abidia siri, bona kara koikoi taudia be, tano dekena amo do ia kokidia momokani.”​​—⁠Aonega Herevadia 2:​21, 22.

“Dirava ese kara maoromaoro do ia karaia. Hisihisi umui dekenai idia henia taudia dekenai, be ia ese hisihisi do ia henidia. Dirava ese umui bona ai, hisihisi ita abia noho taudia dekenai iena mauri namona do ia henia. Inai be do ia vara, Lohiabada Iesu bona iena aneru mai siahu bada danu guba dekena amo do idia mai neganai. Mai lahi siahu bada danu, Dirava ese ia idia ura lasi taudia, bona Lohiabada Iesu ena Sivarai Namona idia abia dae lasi taudia dekenai davana metau do ia henidia. Edia davana be inai: Idia be Lohiabada ena vairana, bona iena hairai siahuna dekena amo daudau do idia noho. Inai anina be, Dirava ese idia do ia hadikaia ore momokani, bona inai bamona do idia noho hanaihanai.”​​—⁠2 Tesalonika 1:​6-9.

“Tanobada [taunimanima dikadia], mai ena gau dikadia, taunimanima idia ura dikadika gaudia, be kahirakahira do idia ore. To Dirava ena ura ia karaia noho tauna be do ia noho ela bona hanaihanai.”​​—⁠1 Ioane 2:⁠17.

Tanobada ai Maino Do Ia Noho, A?

Ena be Buka Helaga ia hahedinaraia goevagoeva Dirava ese kara dika taudia ia haheauka henia be mai ena hetoana, to edena bamona ita diba guna ia haorea dika be do ia hedinarai lou lasi? Badina be Noa ena negai, Abata murinai, dika ia hedinarai lou bona ia bada momokani dainai Dirava ese taunimanima edia palani dikadia be gado ia haidaua karana amo ia koua.​​—⁠Genese 11:​1-8.

Ita diba dika do ia hedinarai lou lasi ena badina be nega daudau lasi abata murinai, taunimanima ese tanobada idia lohia matamaia, to do idia lohiaia lou lasi. Dirava ena Basileia ese do ia lohiaia. Unai Basileia be tanobada ena gavamani tamona ai do ia lao, guba amo do ia lohia. (Daniela 2:​44; 7:​13, 14) Bema ta ese kara dika karaia karana ia hamatamaia lou gwauraia, unai Basileia ese do ia koua haraga. (Isaia 65:20) Momokani, ia ese kara dika ia hamatamaia tauna​​—⁠Satani Diabolo​​—⁠mai ena demoni, ia idia badinaia aneru dikadia, be do ia hadikaia ore.​​—⁠Roma 16:⁠20.

Danu, taunimanima ese edia aniani, dabua, noho gabuna, bona gaukara do idia lalo-hekwarahilaia lasi​​—⁠hari inai negai unai gaudia be lasi dainai unai ese haida ia doria edia mauri lalonai raskol karadia idia karaia totona. Oibe, tanobada ibounai be anina namona do ia havaraia paradaisona ai do ia lao, gau momo do idia noho ibounai totona.​​—⁠Isaia 65:​21-​23; Luka 23:⁠43.

Mai anina bada gauna be, Basileia ese ia henunai do idia noho taudia be maino dalana ai do idia mauri totona do ia hadibadia, bona danu, idia do ia abia isi ela bona taunimanima goevadaedia ai do idia lao. (Ioane 17:3; Roma 8:​21) Unai murinai, taunimanima be manoka gaudia bona kara dika karaia urana dainai do idia hekwarahi lou lasi, bona Dirava kamonai henia karana goevadaena ena dalana do ia kehoa bona do idia moalelaia, tau goevadaena Iesu ese ia moalelaia hegeregerena. (Isaia 11:⁠3) Momokani, Iesu ese hedibagani bona hisihisi lalonai danu Dirava ia badinaia noho​​—⁠unai gaudia be Paradaiso maurina lalonai do idia noho lasi.​​—⁠Heberu 7:​26.

Haida be Guba Dekenai Idia Lao Ena Badina

To, Baibel idia duahia taudia momo be Iesu ena hereva idia laloa, ia gwau: “Egu Tamana ena ruma dekenai noho gabudia be momo herea . . . lau be do lau lao, gabu ta do lau karaia hegaegae umui emui.” (Ioane 14:​2, 3) Unai be iseda helaro, mauri hanaihanai tanobada paradaisona dekenai, ia hakoikoia, a?

Unai hahediba herevadia idia hakoikoia heheni lasi. Momokani, ta ese ma ta ia durua. Gau ginigunana be, Baibel ia gwau abidadama Keristani taudia edia namba maragina sibona​​—⁠idia be 144,000 taudia​​—⁠do idia toreisi, lauma taudia bamona guba dekenai idia noho totona. Dahaka dainai unai davana namona idia abia? Badina idia be Ioane ese matahanai lalonai ia itaia oreana lalonai idia noho, idia be “mase dekena amo idia mauri lou, vadaeni Keriso danu lohia siahu idia abia, ela bona lagani 1000 idia ore.” (Apokalupo 14:​1, 3; 20:​4-6) Tanobada dekenai idia noho taudia bilioni momo danu ita hahegeregerea neganai, momokani 144,000 taudia be “orea maragi.” (Luka 12:32) Danu, idia ese taunimanima bona tanobada idia namo lou totona gaukarana idia gunalaia neganai, taunimanima idia abia hekwakwanai idia abia vadaeni dainai, Iesu bamona idia ese “ita idia bogahisihisi henia diba.”​​—⁠Heberu 4:​15.

Tanobada​​—⁠Taunimanima Idia Noho Hanaihanai Gabuna

Iesu Keriso ena mauri davalaia boubouna amo, Dirava ese lagani 2,000 bamona gunanai 144,000 taudia ia haboua matamaia, bona toana be hari unai orea ibounai ia haboua vadaeni. (Kara 2:​1-4; Galatia 4:​4-7) To, Iesu ena boubou be 144,000 taudia edia kara dika sibona totona lasi, to ia be “taunimanima ibounai edia dika gwauatao dalana.” (1 Ioane 2:⁠2) Unai dainai, Iesu idia abidadama henia taudia ibounai edia helaro be mauri hanaihanai do idia abia. (Ioane 3:16) Guria gabuna lalonai idia mahuta taudia, to Dirava ia laloatao taudia, do idia toreisi lou, guba dekenai lasi, to tanobada goevana ai do idia mauri. (Hadibaia Tauna 9:5; Ioane 11:​11-13, 25; Kara 24:15) Dahaka do ia noho unuseniai idia totona?

Apokalupo 21:​1-4 ia haere, ia gwau: “Harihari Dirava ena noho gabuna be taunimanima edia huanai do ia noho. . . . Ia ese matana ranu ibounai edia matana dekena amo do ia dahua. Mase bona lalohisihisi, bona taitai, bona hisihisi be do idia ore momokani. Badina be gau gunadia be idia ore vadaeni.” Mani oi laloa​​—⁠taunimanima be mase amo ia ruhaia, bona mase ia havaraia hisihisi bona lalohisihisi do idia ore ela bona hanaihanai! Vadaeni, Iehova ena ura ginigunana tanobada bona taunimanima totona ena guguru negana namona be do ia ginidae.​​—⁠Genese 1:​27, 28.

Mauri Eiava Mase​​—⁠Ita Abia Hidi Diba

Adamu bona Heva dekenai guba dekenai do idia lao helarona be lasi. Dirava idia kamonai henia bena tanobada paradaisona ai do idia noho ela bona hanaihanai eiava Dirava idia kamonai henia lasi bena do idia mase. Madi, gwau-edeede karana idia abia hidi bona unai dainai “tano” ena kahu dekenai idia giroa lou. (Genese 2:​16, 17; 3:​2-5, 19) Dirava ia ura lasi taunimanima idia mase bona guri gabuna amo guba idia hahonua. Dirava ese aneru milioni momo ia karaia guba dekenai idia noho totona; unai lauma taudia be idia mase bona guba dekenai idia toreisi lou taudia lasi.​​—⁠Salamo 104:​1, 4; Daniela 7:​10.

Mauri hanaihanai tanobada Paradaiso lalonai ita abia totona, dahaka ita karaia be namo? Gau ginigunana be Dirava ena Hereva, Buka Helaga, ita stadilaia. Iesu be guriguri lalonai ia gwau, “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.”​​—⁠Ioane 17:⁠3.

Unai diba ita gaukaralaia be moale hanaihanai Paradaiso lalonai ena abia dalana ma ta. (Iamesi 1:​22-24) Dirava ena Hereva hegeregerena idia noho taudia edia helaro be edia matana amo inai bamona peroveta herevadia namodia, Isaia 11:9 (NW) lalonai ia noho gauna bamona, edia guguru negana do idia itaia. Ia gwau: “[Taunimanima] ta do idia hahisia lasi eiava do idia hadikaia lasi, egu ororo helagana ibounai dekenai; badina be tanobada be Iehova dibaia karana amo do ia honu, davara be ranu amo ia honuhonudae bamona.”

[Footnote]

[Pictures on page 7]

“Kara maoromaoro taudia ese, Dirava ia henidia tano dekenai do idia noho ela bona hanaihanai.”​​—⁠Salamo 37:⁠29