Duahiduahi Bona Stadi Totona Nega Hoia
“Emui nega do umui haorea kava lasi, badina hari nega be nega dikana.” —Efeso 5:16.
1. Dahaka dainai iseda nega ita haria namonamo be gau badana, bona iseda nega ita gaukaralaia dalana ese ita be edena bamona ia hahedinaraia?
TAUNIMANIMA idia gwau “nega abia hidi ena anina be nega halusia lasi.” Do ia karaia gaudia totona nega ia atoa tauna be nega momo iena nega amo anina namona do ia abia. Aonega tauna King Solomona ia gwau: “Gau iboudiai be mai edia hora korikori, nega ia noho guba henuna gaudia iboudiai totona.” (Hadibaia Tauna 3:1, Moffatt) Ita ibounai dekenai ia noho negana ena bada be hegeregere; to edena bamona do ita gaukaralaia be ita sibona eda ura hegeregerena. Do ita karaia gaudia ita atoa bona iseda nega ita haria dalana ese do ia hahedinaraia badabada iseda kudouna ena ura be dahaka.—Mataio 6:21.
2. (a) Iesu ena Haroro Herevana Badana lalonai, do ita abia lauma gaudia be edena bamona ia gwauraia? (b) Ita sibona eda noho be edena bamona ita tahua namonamo be namo?
2 Nega ita atoa do ita aniani bona mahuta totona be namo, badina tauanina ese unai do ia abia be namo. To do ita abia lauma gaudia be edena bamona? Ita diba namona be unai gaudia ita abia danu. Iesu ena Haroro Herevana Badana lalonai, ia gwau: “Idia diba lauma gaudia idia tahua be namo taudia idia moale.” (Mataio 5:3, NW ) Unai badina dainai “hesiai tauna mai ena kamonai, bona mai ena kara maoromaoro” ese ita ia hadibaia loulou Baibel duahia bona stadi totona nega ita atoa be mai anina bada. (Mataio 24:45) Reana oi diba unai be mai anina bada, to reana oi laloa oi be nega lasi stadi totona eiava Baibel duahia totona. Bema unai be momokani, mani Dirava ena Hereva duahia totona, sibona eda stadi totona, bona laloa dobu karana totona nega ita henia daladia ita laloa.
Baibel Duahia Bona Stadi Totona Nega Atoa
3, 4. (a) Iseda nega gaukaralaia karana dekenai aposetolo Paulo be dahaka sisiba ia henia, bona unai ena anina be dahaka danu? (b) Paulo ese ita ia sisiba henia, ia gwau ‘ita sibona totona nega namona do ita hoia,’ ena anina be dahaka?
3 Ita noho negana ita laloa dainai, ita ibounai ese aposetolo Paulo ena hereva ita laloa noho be gau badana, ia gwau: “Unai dainai umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi [“umui sibona totona nega namona umui hoia,” NW ], badina hari nega be nega dikana. Unai dainai do umui kavakava lasi, to Lohiabada ena ura gaudia sibona do umui tahua.” (Efeso 5:15-17) Momokani, unai sisiba be ita gwauhamata Keristani taudia eda mauri daladia ibounai ia herevalaia, hegeregere guriguri, stadi, hebou, bona “Basileia ena Sivarai Namona” harorolaia namonamo totona nega ita atoa be namo.—Mataio 24:14; 28:19, 20.
4 Toana be hari Iehova ena hesiai taudia momo edia mauri lalonai Baibel duahia bona stadi dobu karana idia atoa be ia auka. Momokani, dina ta dekenai hora ma ta ita atoa kau diba lasi, unai dainai Paulo ena hereva ena anina be idau. Greek gado dekenai, unai hereva “nega namona umui hoia” ena anina be gau ta ena gabu ai ma gau ta do oi hoia. W. E. Vine be ena Expository Dictionary lalonai ia gwau unai ena anina be “idia hedinarai daladia ibounai ita gaukaralaia namonamo, ta ta ita gaukaralaia namo bada havaraia totona, badina bema ita reaia do ita abia lou be auka.” Dahaka amo eiava edeseni amo Baibel duahia bona stadilaia ena nega namona ita hoia diba?
Do Ita Atoa Guna Gaudia Ita Abia Hidi
5. Dahaka dainai bona edena dala ai ‘gau namodia edia toana do ita diba’?
5 Tauanina ena maduna idauidau latanai, ita ese lauma gaudia momo do ita laloa danu be namo. Ita be Iehova ena gwauhamata hesiai taudia dainai, ‘Lohiabada ena gaukara momo do ita karaia’ danu. (1 Korinto 15:58) Unai badina dainai, Paulo ese Filipi Keristani taudia ia hamaorodia “gau namodia edia toana do [idia] diba” be namo. (Filipi 1:10) Unai ena anina be gau haida do ita atoa guna. Hanaihanai lauma gaudia do ita laloa guna bona tauanina gaudia be gabeai. (Mataio 6:31-33) To, iseda maduna lauma dalanai ita huaia neganai ita laloa namonamo danu be gau badana. Iseda Keristani mauri dalana ena kahana idauidau dekenai iseda nega be edena bamona ita haria? Distrik bona sekit naria taudia idia gwau Keristani tauna ese do ia karaia “gau namodia” mai anina bada, hegeregere sibona ena stadi bona Baibel duahia karana, be idia laloaboio noho.
6. Moni gaukara bona ruma gaukara ita laloa neganai, reana nega hoia totona dahaka do ita karaia?
6 Ita itaia vadaeni, nega ita hoia ena anina be “idia hedinarai daladia ibounai ita gaukaralaia namonamo” bona “ta ta ita gaukaralaia namo bada havaraia totona.” Unai dainai bema iseda Baibel duahia karana bona stadi karadia ita hanamoa be namo, namona be sibona eda mauri ita tahua namonamo, iseda nega ita gaukaralaia dalana ita diba totona. Bema iseda moni gaukara be mai ena hekwarahi, bona iseda nega bona goada bada herea ia haorea, namona be Iehova dekenai ita gurigurilaia. (Salamo 55:22) Reana gau haida ita haidaua diba, unai amo nega bada do ia noho Iehova tomadiho henia lalonai mai anina bada gaudia, hegeregere stadi bona Baibel duahiduahi ita karaia totona. Taunimanima idia hereva maoro idia gwau hahine ena gaukara be ia ore diba lasi. Unai dainai namona be Keristani taihu danu be do idia atoa guna gaudia idia abia hidi bona nega idia atoa Baibel idia duahia bona idia stadi namonamo totona.
7, 8. (a) Nega momo edena bamona kara amo nega ita hoia diba duahiduahi bona stadi totona? (b) Moale karadia ita karaia edia badina be dahaka, bona edena dala ai unai lalohadai ese ita ia durua diba do ita atoa guna gaudia ita abia hidi totona?
7 Ita momo be anina bada lasi karadia amo stadi totona nega ita hoia diba. Reana ita sibona ita henanadai diba, ‘Magasin idaudia bona niuspepa duahia karana, televisen raraia, miusiki kamonai henia, bona vidio gadara gaudia dekenai lau haorea negana ena bada be edena bamona? Kompiuta dekenai nega bada lau haorea to Baibel duahia totona unai bamona lau karaia lasi, a?’ Paulo ia gwau: “Do umui kavakava lasi, to Lohiabada ena ura gaudia sibona do umui tahua.” (Efeso 5:17) Toana be Witnes taudia momo ese sibona edia stadi bona Baibel duahiduahi totona nega idia atoa lasi ena badina badana ta be televisen idia gaukaralaia namonamo lasi.—Salamo 101:3; 119:37, 47, 48.
8 Reana haida idia gwau idia stadi hanaihanai diba lasi, bona moale karadia haida idia karaia be namo. Unai be momokani, to mani laga-ani karadia dekenai oi haorea negana bona Baibel stadilaia eiava duahia negana oi hahegeregerea. Reana do oi hoa. Moale bona laga-ani karadia ita karaia be namo, to namona be edia gabu korikori ai ita atodia. Unai gaudia ita karaia edia badina be iseda hemami do idia hanamoa lou bena lauma gaudia ma ita karaia noho totona. Televisen dekenai program momo bona vidio gadara danu ese tau ta do ia hahesikua diba, to Dirava ena hereva duahia bona stadilaia be hemami ia hanamoa lou bona lalona ia hagoadaia.—Salamo 19:7, 8.
Haida ese Stadi Ena Nega Idia Davaria Dalana
9. Dina Iboudiai Buka Helaga Tahua—1999 buklet lalonai ia noho sisibana ita badinaia neganai dahaka heduru do ita abidia?
9 Lagani 1999 ena Dina Iboudiai Buka Helaga Tahua buklet ena hamatamaia herevana ia gwau: “Bema dina ena siri bona ena hereva daba dekenai oi herevalaia, namo bada do oi davaria. Do oi mamia iseda Hadibaia Tauna Badana, Iehova, ese oi ia hanogaia iena hahediba herevadia amo. Baibel ese ia perovetalaia daba ibounai Iesu Keriso be Iehova ena hadibaia herevadia amo namo ia davaria: ‘Daba ibounai ia [Iehova] ese laloa goada lau dekenai ia henia noho, vadaeni iena hadibaia hereva lau kamonaia namonamo.’ Unai bamona hadibaia herevadia ese Iesu dekenai ‘dahaka do ia hereva gauna ia hadibaia,’ vadaeni ‘manoka taudia do ia hagoadaia diba.’ (Isa. 30:20; 50:4; Mat. 11:28-30) Bema daba ta ta ibounai oi toreisi bona nega korikori ai oi idia hadibaia sisiba namodia Dirava ena Hereva amo oi abia, unai ese oi idia durua sibona emu hekwakwanai oi hanaia totona sibona lasi, to danu ‘dahaka oi hereva gauna ia hadibaia,’ bona unai amo ma haida do oi durua diba.”a
10. Haida be edena bamona nega idia davaria Baibel duahia bona stadi totona, bona dahaka hahenamo idia abia?
10 Keristani taudia momo be unai sisiba hegeregerena, daba momokani ai dina ena siri bona ena hereva haida idia duahia bona Baibel idia duahia eiava idia stadi. France dekenai, abidadama painia taihu ta be daba momokani ai ia toreisi bona miniti 30 lalonai Baibel ia duahia. Dahaka ese ia durua idia hanaia laganidia lalonai unai bamona ia karaia totona? Ia gwau: “Egu lalona ia ura dikadika, bona herevana dahaka ia vara, egu Baibel duahiduahi sediual lau badinaia!” Herevana edena nega ita abia hidi, to gau badana be eda sediual ita badinaia. René Mica, lagani 40 lalonai Europe bona North Africa dekenai painia hesiai gaukara ia karaia tadikaka ta, ia gwau: “Lagani 1950 amo lauegu tahua gauna be lagani ta ta ibounai Baibel ibounai do lau duahia, bona hari nega 49 lau karaia vadaeni. Lau laloa unai bamona lau karaia be mai anina bada, lauegu hetura karana lau ia Havaraia Tauna ida do ia namo noho totona. Dirava ena Hereva laloa dobu karana ese lau ia durua Iehova ena hahemaoro maoromaoro bona iena kara ma haida lau lalo-pararaladia namonamo totona bona unai amo goada bada herea lau abia.”b
‘Aniani Neganai, Aniani Ia Henia’
11, 12. (a) “Kohu naria tauna mai ena kamonai” ese edena lauma “aniani” ia henia? (b) Edena dala ai “aniani” be nega korikori ai idia henia?
11 Aniani namonamo karana ese tauanina ia hagoadaia hegeregerena, stadi bona Baibel duahia hanaihanai karana be lauma dalanai goada ia havaraia. Luka ena Evanelia bukana lalonai, Iesu ena hereva ita duahia, ia gwau: “Kohu naria tauna mai ena kamonai, bona mai ena kara maoromaoro, iena biaguna ese ia abia hidi, iena ruma do ia naria, bona aniani neganai, iena hesiai taudia edia aniani do ia henia, tauna be daika?” (Luka 12:42) Idia hanaia vadaeni laganidia 120 lalonai, “aniani neganai,” lauma aniani be Gima Kohorona amo, bona Baibel herevalaia bukadia ma haida amo danu ia henia.
12 Unai hereva “aniani neganai” oi itaia. Nega korikori ai, iseda “Hadibaia Tauna,” Iehova, ese ena natuna Iesu bona hesiai tauna oreana amo iena hesiai taudia edia hahediba herevadia bona kara dekenai idia ia hakaua. Unai be hegeregere ita ibounai be nega tamona gado ta ita kamonai, ita ia hamaoroa ia gwau: “Idiba kahanai o lauri kahanai do umui raka siri neganai, . . . ‘Dala be inai, ia dekenai do umui raka lao.’ ” (Isaia 30:20, 21) Unai sibona lasi, taunimanima ta ta be Baibel bona Baibel herevalaia bukadia ibounai idia duahia namonamo neganai, nega momo mamina idia abia, unai hereva be idia dekenai ia gwauraia. Oibe, Dirava ena sisiba bona hadibaia hereva be ita dekenai nega korikori ai do ia mai, bona ita do ia durua hahetoho ita dadaraia eiava aonega dalana ta ita abia hidi totona.
Aniani Daladia Namodia Habadaia
13. Lauma dalanai aniani namonamo lasi karadia haida be dahaka?
13 Nega korikori ai idia henia “aniani” ena namo ibounai ita abia totona, namona be iseda aniani daladia idia namo. Baibel duahiduahi bona sibona eda stadi do ita karaia hanaihanai ena sediual ta ita karaia be gau badana bona unai ita badinaia hanaihanai. Lauma dalanai oiemu aniani karadia idia namo bona hanaihanai oi stadi namonamo, a? Eiava ita totona idia hegaegaelaia namonamo gauna oi duahia kava sibona, hegeregere oi aniani haragaharaga, eiava aniani haida oi reaia, a? Lauma dalanai aniani namonamo lasi karadia dainai haida edia abidadama be ia manoka—bona idia moru danu.—1 Timoteo 1:19; 4:15, 16.
14. Dahaka dainai toana be ita diba vadaeni herevana ta ita itaia namonamo lou be namo?
14 Reana haida idia laloa idia be hahediba hereva badadia idia diba vadaeni bona idia halasia herevadia ibounai amo ta ia matamata momokani lasi. Unai dainai, idia laloa stadi bona hebou lao henia be anina lasi. To, Baibel ese ia hahedinaraia ita dibaia vadaeni gaudia ita dekenai idia gwauraia lou be gau badana. (Salamo 119:95, 99; 2 Petero 3:1; Iuda 5) Aniani ia nadua tauna namona ese aniani badadia be mamina namo herea daladia idauidau ai ia hegaegaelaia hegeregerena, hesiai tauna oreana ese lauma aniani be dala idauidau ai ia hegaegaelaia. Guna idia herevalaia loulou gaudia ma idia gwauraia herevadia dekenai danu, idia hedinarai namonamo gaudia ita lalo-pararalaia be namo. Momokani, ita duahia herevana stadilaia totona ita atoa nega bona hekwarahi ena bada hegeregerena, ena namo do ita abia.
Duahiduahi Bona Stadi Edia Namo Lauma Dalanai
15. Baibel duahia bona stadilaia karana be edena dala ai ita idia durua Dirava ena Hereva harorolaia taudia namodia ai ita lao totona?
15 Baibel duahia bona stadilaia karadia amo ita abia hahenamodia be momo herea. Ita ia durua iseda Keristani maduna badana ta ita huaia totona, anina be, ita ta ta be ‘gaukara namona momokani tauna ai do ita lao, vadaeni ita ese hereva momokani do ita hadibaia maoromaoro, bona do ita hemarai lasi.’ (2 Timoteo 2:15) Baibel ita duahia bona stadilaia momo neganai, iseda lalona be Dirava ena lalohadai amo do ita hahonua badabada. Bena, Paulo hegeregerena, ‘Buka Helaga be taunimanima danu do ita herevalaia, bona idia do ita hadibaia namonamo’ Iehova ena palani edia hereva momokani namodia do idia diba totona. (Kara 17:2, 3) Hadibaia karana dekenai iseda diba do ia hanamoa, bona iseda herevahereva, ita henia herevadia, bona iseda sisiba be lauma dalanai ma haida do idia hagoadaia bada.—Aonega Herevadia 1:5.
16. Ita ta ta be edena dala ai Baibel duahia bona stadilaia dalana amo namo ita davaria diba?
16 Danu, Dirava ena Hereva tahua totona nega ita atoa karana ese ita do ia durua Iehova ena dala hegeregerena iseda mauri dalana ita hanamoa momokani totona. (Salamo 25:4; 119:9, 10; Aonega Herevadia 6:20-23) Iseda kara namodia do ia hagoadaia, hegeregere manau, badinaia karana, bona moale. (Deuteronomi 17:19, 20; Apokalupo 1:3) Baibel duahia bona stadilaia karana amo ita abia dibana ita gaukaralaia neganai, iseda mauri lalonai Dirava ena lauma ena gaukara do ita moalelaia, unai amo ita karaia gaudia ibounai dekenai lauma ena huahua do ia hedinarai badabada.—Galatia 5:22, 23.
17. Edena dala ai Iehova ida eda hetura karana dekenai, sibona eda Baibel duahia bona stadilaia karadia edia bada bona edia namo be mai anina?
17 Mai anina bada gauna be, kara ma haida amo Baibel duahia bona stadilaia ena nega ita hoia neganai, Dirava ida iseda hetura karana ena hahenamo namodia momo do idia vara. Paulo be ena Keristani tadikaka dainai ia guriguri Dirava ‘ese iena ura dalana idia dekenai do ia hadibaia, bona Lauma Helaga ena diba bona diari idia dekenai do ia henia. Vadaeni Lohiabada ena ura hegeregerena do idia noho, bona nega ibounai idia ese ia do idia hamoalea.’ (Kolose 1:9, 10) Unai hegeregerena, ‘Iehova ena ura hegeregerena do ita noho’ totona, namona be ‘iena ura dalana ita dibaia bona Lauma Helaga ena diba bona diari’ ita abia. Ia hedinarai goevagoeva, Iehova ena hahenamo bona lalo-namo ita abia totona, iseda Baibel duahia bona stadilaia karadia ita habadaia bona hanamoa be mai anina.
18 “Mauri hanaihanai be inai: Idia ese oi Dirava momokani tamona do idia diba, bona Iesu Keriso, oi ese oi siaia tauna danu do idia diba.” (Ioane 17:3) Unai siri be Iehova ena Witnes taudia ese idia gaukaralaia momo, ma haida idia durua Dirava ena Hereva stadilaia karana idia laloa bada totona. Ita ta ta danu be unai bamona do ita karaia be gau badana. Iseda mauri hanaihanai helarona ia momokani totona Iehova bona ena Natuna, Iesu Keriso, ita dibaia noho be mai anina. Bona unai ena anina mani oi laloa. Iehova ita dibaia karana do ia doko lasi—bona ia sivaraina do ita diba noho ela bona hanaihanai!—Hadibaia Tauna 3:11; Roma 11:33.
Riviu Henanadai
• Iseda nega ita gaukaralaia dalana ese dahaka ia hahedinaraia?
• Edena kara haida amo nega ita hoia diba Baibel duahia bona stadilaia totona?
• Dahaka dainai lauma dalanai iseda aniani karadia do ita naria namonamo?
• Buka Helaga duahia bona stadilaia karadia amo dahaka namo idia vara?
[Footnotes]
a Watchtower Bible and Tract Society of New York, Inc. ese ia halasia buklet.
b May 1, 1995 ena Gima Kohorona, rau 20-1 lalonai idia halasia hereva ladana “Idia Duahia Negadia Bona Idia Abia Hahenamodia” itaia.
18. Ioane 17:3 ai Iesu ia gwauraia herevadia bema ita badinaia, dahaka hahenamo do ita davaria?
[Pictures on page 20, 21]
Baibel duahia bona stadilaia hanaihanai karana ese ita do ia durua ‘hereva momokani do ita hadibaia maoromaoro totona’
[Pictures on page 23]
Iseda mauri lalonai eda gaukara idauidau bona lauma gaudia tahua karana ita laloa namonamo ese hahenamo namodia momo ia havaraia