Dirava Kahirakahira Oi Raka Lao Dalana
Iamesi 4:8 ia gwau: “Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” Iehova Dirava be ita totona iena Natuna ia henia, unai amo ia hahedinaraia ia ura bada taunimanima ia tura henia.
APOSETOLO Ioane be unai lalokau ia herevalaia, ia gwau: “Ita be mai iseda lalokau, bona ena badina korikori be inai: Dirava ese ita ia lalokau henia guna.” (1 Ioane 4:19) To, Dirava kahirakahira ita raka lao totona dala haida ita badinaia be namo. Unai dala be hereva ginigunana ese ia hahedinaraia daladia hani bamona, taunimanima idia hetura heheni daladia unai. Namona be hari unai ita herevalaia.
Dirava Ena Kara Namodia Ita Laloa
Iehova ena kara namodia be momo, unai kara badadia haida be lalokau, aonega, hahemaoro maoromaoro, bona siahu. Iena aonega bona siahu be daudau gabuna ai ia noho iunives bona ita idia gegea gaudia ibounai, hegeregere hisiu edia orea badadia ela bona atom maragimaragidia, ese idia hahedinaraia badabada. Salamo torea tauna ia gwau: “Guba ese Dirava ena hairaina ia hedinaraia, bona guba dekenai noho gaudia ese, Dirava ia karaia gaudia idia hedinaraia noho.”—Salamo 19:1; Roma 1:20.
Dirava ia karaia gaudia ese iena lalokau idia hahedinaraia danu. Hegeregere, Dirava ese ita ia karaia dalana amo ia hahedinaraia, ia ura ita be mauri ita moalelaia. Kala idauidau ita itaia diba, gau idauidau ita mamia bona bonaia, miusiki ita moalelaia, ita kiri diba, hairai ita moalelaia, bona ita dekenai diba bona hemami momo, iseda mauri lalonai ita gaukaralaia momo lasi gaudia unai, ia henia danu. Oibe, Dirava be hariharibada, manau, bona lalokau Diravana—unai dainai, ita daradara lasi ia be “moale Diravana.”—1 Timoteo 1:11; Kara 20:35.
Iehova ia moale bada herea badina ena lohia siahuna ia gaukaralaia ena badina bona ia havaraia taudia ese idia abia isi ena badina korikori be lalokau. (1 Ioane 4:8) Momokani, ena be Iehova be Guba bona Tanobada edia Lohia Badana, to lalokau tamana ta ese ena natuna ia kara henidia bamona taunimanima ia kara henidia, bona ia idia badinaia hesiai taudia be unai bamona ia kara henidia badabada. (Mataio 5:45) Edia namo ia havaraia gauna ta ia hunia lasi. (Roma 8:38, 39) Ita herevalaia vadaeni bamona, iena vara guna Natuna tamona ia henia mauri ita davaria totona. Oibe, Dirava ena lalokau dainai, ita mauri noho bona mauri hanaihanai do ita abia.—Ioane 3:16.
Iesu ese ita dekenai Dirava ena kara ia hahedinaraia goevagoeva, badina iena Tamana ena haheitalai ia tohotohoa namo herea. (Ioane 14:9-11) Ia be sibona ena namo ia tahua lasi, to haida edia namo ia tahua, bona ia lalodia bada. Nega ta, Iesu dekenai taia kudima bona hereva diba lasi tauna ta idia abia lao. Reana oi laloa diba unai tau be taunimanima hutuma edia huanai ia hemarai. To, Iesu ese unai tau be gabu ta dekenai ia hakaua siri bona unuseniai ia hanamoa. (Mareko 7:32-35) Oiemu hemami idia laloa bada bona oi idia matauraia taudia edia kara oi laloa bada, a? Bema oibe, Iehova bona Iesu edia kara oi diba noho lalonai idia kahirakahira do oi raka lao momokani.
Dirava Ena Kara Oi Laloa
Momokani, tau ta be kara namodia ia hahedinaraia diba, to unai tau ita tura henia totona iena kara ita laloa be namo. Iehova danu be unai bamona. Ia kahirakahira ita raka lao totona, mai anina bada gauna iharuana be iena kara do ita laloa dobu. King Davida, Iehova ia lalokau henia bada tauna bona Dirava ese ia gwauraia ‘iena lalokau tauna,’ ia gwau: “Dina gunadia lau laloa noho. Oiemu kara gunadia ibounai lau laloa noho. Oiemu imana edia kara badadia ibounai lau laloatao noho.”—Kara 13:22; Salamo 143:5.
Davida bamona, Dirava ia havaraia hoa gaudia oi itaia eiava Dirava ena Hereva, Baibel, oi duahia neganai, oi itaia bona duahia gaudia oi laloa dobu, a? Natuna merona ta be ia lalokau henia bada tamana amo revareva ia abia karana mani oi laloa. Edena bamona ia laloa unai revareva dekenai? Unai revareva ia abia neganai, do ia itaia haraga lasi bena maua dekenai do ia udaia haraga lasi. To, unai revareva ena hereva do ia stadilaia namonamo, hereva ta ta ibounai do ia itaia namonamo bona edia anina do ia laloa. Unai hegeregerena, namona be ita dekenai Dirava ena Hereva be dava bada gauna, Salamo torea tauna dekenai bamona, ia gwau: “Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.”—Salamo 119:97.
Herevahereva Namonamo Karana Hanamoa
Herevahereva namonamo be hetura karana hagoadaia karana badana. Unai ena anina be hereva bona kamonai—bona mai lalona ida sibona lasi to mai kudouna ida danu. Guriguri dekena amo Havaraia Tauna ita hereva henia, bona unai be Dirava tomadiho henia karana ta. Iehova be ia idia lalokau henia taudia bona idia hesiai henia taudia bona Iesu Keriso idia gwauraia Iena gwaukau tauna badana edia guriguri ia moalelaia.—Salamo 65:2; Ioane 14:6, 14.
Idaunegai, Dirava be dala idauidau amo taunimanima ia hereva henia, hegeregere matahanai lalonai, nihi lalonai, bona aneru edia amo. To, hari inai negai, ia be ia torea Herevana, Buka Helaga amo, ita ia hereva henia. (2 Timoteo 3:16) Ia torea Herevana be mai ena namo idauidau. Nega idauidau ai ena sisiba ita tahua diba. Revareva bamona, iena hereva ita moalelaia loulou diba. Nega momo uduna dekenai idia gwauraia herevana ia idau diba, to Baibel be unai bamona lasi. Unai dainai, namona be oi laloa Baibel be oiemu guba lalokau Tamana ese ia henia revareva momo bamona, bona unai revareva amo ita ia hereva henia loulou.—Mataio 4:4.
Hegeregere, Baibel be Iehova ena lalohadai maoro bona kerere dekenai ia gwauraia hedinarai. Iena ura taunimanima bona inai tanobada totona ia gwauraia hedinarai. Bona taunimanima bona bese idauidau, ia idia tomadiho henia taudia bona ia idia inai henia taudia, ia kara henidia dalana ia gwauraia hedinarai. Iehova ese taunimanima ia kara henidia edia sivarai be unai bamona ia torea dainai, unai ese iena kara ia hahedinaraia goevagoeva. Iena lalokau, moale, lalohisihisi, badu, hebogahisi, laloa bada karadia—oibe, iena lalohadai bona hemami, bona ia hahedinaraidia edia badina—be taunimanima idia lalo-pararalaia diba dalana ai ia gwauraia hedinarai.—Salamo 78:3-7.
Dirava ena Hereva kahana ta oi duahia murinai, oi duahia gauna amo dahaka namo oi abia diba? Bona edena dala amo Dirava kahirakahira oi lao diba? Gau ginigunana be, oi duahia gauna bona unai amo Dirava oi dibaia dalana oi laloa namonamo, bona unai hereva ta ta ese emu kudouna idia hamarerea. Bena Iehova oi guriguri henia neganai, oi duahia gauna dekenai oiemu lalohadai bona hemami oi gwauraia hedinarai, bona ena namo do oi abia dalana danu. Unai be herevahereva. Oibe, bema gau haida ma oi laloa, oiemu guriguri lalonai oi gwauraia hedinarai diba danu.
Dirava ida Gau Ibounai Umui Karaia Hebou
Baibel ia gwau abidadama taudia ginigunadia haida be Dirava momokanina ida, eiava ia vairanai, idia raka. (Genese 6:9, NW; 1 King Taudia 8:25) Unai ena anina be dahaka? Edia mauri dinadia ta ta lalodiai idia noho neganai, Dirava be idia huanai ia noho bamona. Momokani, idia be kara dika taudia. To, Dirava ena taravatu bona hahekau herevadia idia ura henia bada, bona Iehova ena ura hegeregerena idia noho. Iehova be unai bamona taudia kahirakahira dekenai ia noho, bona ia naridia, Salamo 32:8 ia gwau bamona, ia gwau: “Lau ese oiemu raka dalana oi dekenai do lau hadibaia. Lau ese oi do lau hakaua, bona sisiba oi dekenai do lau henia.”
Oi danu ese Iehova be oiemu turana korikorina—oi ida ia raka tauna, oi ia naria tauna, bona tamana ta bamona sisiba ia henia tauna—ai oi halaoa diba. Peroveta tauna Isaia ese Iehova be inai bamona ia kikilaia, ia gwau: “Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho.” (Isaia 48:17) Davida ia mamia bamona, unai hahenamo ita abia neganai, ita mamia Iehova be ita “dekenai ia noho” bamona.—Salamo 16:8.
Dirava Ena Ladana —Iena Kara Ia Hahedinaraia
Tomadiho momo bona idia hahanaia Baibel momo herea lalodiai be Dirava ena ladana korikori idia gaukaralaia lasi bona idia gwauraia hedinarai lasi. (Salamo 83:18) To, Heberu gado ai idia torea revarevadia lalodiai, unai ladana—Iehova—be nega 7,000 bamona idia torea! (To, Baibel hahanaia taudia momo be Dirava ena ladana idia kokia, to dirava koikoidia, hegeregere Bala, Bel, Merodaka, bona Satani, edia ladana idia rakatania!)
Taunimanima haida idia laloa Dirava ena ladana idia kokia be gau maragina sibona. To mani oi laloa: Ladana lasi tauna ta oi tura henia namonamo be auka eiava ia haraga? Reana dagi ladadia, hegeregere Dirava bona Lohia (unai ladadia be dirava koikoidia totona idia gaukaralaia danu) be reana Iehova ena siahu, eiava dagi, idia gwauraia, to iena ladana sibona ese ia sibona mo ia gwauraia. (Esodo 3:15; 1 Korinto 8:5, 6) Dirava korikorina ena ladana ese iena kara idia hahedinaraia namonamo. Tomadiho ia stadilaia tauna Walter Lowrie ia gwau: “Dirava ena ladana ia diba lasi tauna be Dirava ena kara ia diba lasi.”
Australia dekenai, Katolik ia badinaia auka hahinena Maria ena sivarai mani ita laloa. Nega ginigunana Maria be Iehova ena Witnes taudia ia davaria neganai, nega ia henia Witnes taudia ese ia dekenai Dirava ena ladana idia hahedinaraia totona. Edena bamona ia haere? “Nega ginigunana Baibel lalonai Dirava ena ladana lau itaia neganai, lau taitai. Dirava ena ladana lau dibaia diba bona lau gaukaralaia diba herevana ese egu lalona ia hamarerea.” Maria ese Baibel ia stadilaia noho, bona nega ginigunana iena mauri lalonai Iehova ia dibaia namonamo bona ia tura henia.
Oibe, ‘Dirava dekenai do ita raka kahirakahira lao’ diba, ena be iseda matana korikori amo ita itaia lasi. Iseda lalona bona kudouna lalonai iena kara hairaidia ita “itaia” bona unai dainai iseda lalokau ia dekenai do ia bada. Unai bamona lalokau dainai, “do [ita] noho hebou namo herea, mai laloa tamona danu.”—Kolose 3:14.
[Box/Picture on page 6]
Iehova ese Oiemu Lalokau Ia Dekenai Ia Abia Dae
HETURA karana be mai ena kahana rua. Dirava ita lao henia kahirakahira neganai, ia danu ita dekenai ia mai kahirakahira. Mani iena hemami buruka taudia Simeona bona Ana dekenai ita laloa, idia ruaosi be Baibel lalonai ia ese ia herevalaidia namo herea. Evanelia bukana ia torea tauna Luka ese ita ia hamaoroa Simeona “be kara maoromaoro tauna bona Dirava dekenai ia gari tauna,” Mesia ia naria. Iehova ese Simeona ena lalona dekenai kara namodia ia itaia bona unai buruka tauna namona dekenai lalokau ia hahedinaraia badina ia hadibaia, “do ia mase lasi ela bona Lohiabada ena Keriso do ia itaia guna.” Iehova be ena gwauhamata hegeregerena Simeona ia hakaua lao beibi maragina Iesu dekenai, Ia be ena tamana bona sinana ese Ierusalema ena dubu helaga dekenai idia abia lao. Simeona be mai ena moale bona hemataurai bada ida, beibi maragina ia rosia bona ia guriguri: “Lohiabada e, oiemu hesiai tauna harihari mase dekenai mai maino danu do lau lao, oiemu gwauhamata hegeregerena. Badina be egu matana ese oiemu Hamauria Kara ia itaia vadaeni.”—Luka 2:25-35.
‘Unai hora korikori dekenai,’ Iehova ese mauri lagani 84 hahine burukana Ana dekenai ena lalokau ia hahedinaraia danu bona ia danu be Iesu dekenai ia hakaua lao. Baibel ese ita ia hamaoroa inai vabu namo hereana be hanaihanai dubu dekenai Iehova “ia tomadiho henia.” Simeona hegeregerena, ia danu be mai moale bada ida Iehova ena harihari bada karana namo hereana dainai ia tanikiu henia, bona gabeai “Ierusalema hamauria totona idia naria noho taudia dekenai” unai mero ena sivarai ia gwauraia.—Luka 2:36-38.
Oibe, Iehova ese Simeona bona Ana ia itaia, ia idia lalokau henia bona gari henia bada bona iena ura ia guguru dalana idia laloa bada. Inai Baibel sivaraina ese oi ia hakaua lao Iehova dekenai, ani?
Iesu be ena Tamana hegeregerena, ia danu be taunimanima edia lalona korikori ia dibaia diba. Ia be dubu helaga dekenai ia hadibaia noho lalonai, “vabu ogogamina” ese siliva moni maragidia rua ia henia ia itaia. Unai idia itaia taudia haida dekenai iena harihari gauna be anina lasi to Iesu dekenai be lasi. Ia ese unai hahine ia hanamoa badina ia dekenai ia noho gauna ibounai ia henia. (Luka 21:1-4) Hari inai negai, Iehova bona Iesu be ita dekenai do idia moale bema iseda goada ibounai hegeregerena ita henia, herevana iseda harihari gauna be bada eiava maragi.
Dirava be ia idia lalokau henia taudia dekenai ia moale, to ia lalohisihisi bema taunimanima be ia dekena amo idia raka siri bona kara dika ena dala idia badinaia neganai. Genese 6:6 ese ita ia hamaoroa Iehova ena “lalohisihisi be ia bada momokani” badina be Noa ena negai, Abata ia do mai lasi negai taunimanima edia kara dika be bada herea. Gabeai, Salamo 78:41 ia gwau gwau-edeede Israela besena be “Dirava ena bogahisihisi idia tohoa lou, tohoa lou, bona idia ese Israela edia Helaga Dirava idia habadua.” Oibe, Dirava be hemami lasi “Havaraia Siahuna” ta lasi. Ia be lauma tauna korikorina ta, ena hemami be hegeregere momokani eiava ia manoka lasi, goevadae lasi maurina ese iseda hemami ia hamanokaia bamona.
[Pictures on page 7]
Iehova ia karaia gaudia ita laloa karana be Ia kahirakahira dekenai ita lao dalana ta