Kara Goeva Oi Badinaia Noho Diba
“Badina be Dirava ita lalokau henia ena anina be inai: Dirava ena taravatu do ita badinaia.”—1 IOANE 5:3.
1. Hari, ita itaia daidia edia kara be idau?
GUNAGUNA, peroveta tauna Malaki be Dirava ena lauma siahuna amo nega ta ia perovetalaia, unai nega ai Dirava ena taunimanima edia kara be do ia idau herea, Dirava idia tomadiho henia lasi taudia edia kara amo do ia idau momokani. Unai peroveta tauna ia gwau: “Unai neganai lauegu kara ena idau do umui itaia lou, kara maoromaoro taudia dekenai edena bamona do lau karaia, bona kara dika taudia dekenai edena bamona do lau karaia. Oibe, do umui itaia Dirava ena gaukara idia karaia, bona iena gaukara idia karaia lasi taudia dekenai, dahaka do ia vara.” (Malaki 3:18) Hari inai negai unai peroveta herevana ia guguru. Dirava ena taravatu, kara goeva taravatudia danu, ita badinaia be iseda mauri lalonai aonega karana maorona. To, nega haida unai be auka. Badina namona dainai, Iesu ia gwau Keristani taudia be hahemauri abia totona do idia hekwarahi goadagoada.—Luka 13:23, 24.
2. Tanobada dekenai edena kara dainai kara goeva badinaia be auka?
2 Dahaka dainai kara goevana badinaia noho be auka? Badina ta be tanobada taudia edia kara. Moale karadia idia havaraia bisinesi ese sihari kava karana idia hahedinaraia bona idia gwau unai be mai ena hairai, moale ia havaraia, bona unai be taunimanima badadia edia kara, to idia havaraia davana dikadia idia hahedinaraia momo lasi. (Efeso 4:17-19) Idia hahedinaraia mahuta hebou karadia, kahirakahira ibounai, be headava lasi taudia ese idia karaia. Nega momo muvini piksa bona televisen dekenai mahuta hebou karadia idia hahedinaraia neganai, idia karaia taudia be edia hetura karana idia laloa badabada lasi. Vaia, tura henia momokani bona hemataurai heheni mamina be lasi. Taunimanima momo be idia maragi negana amo unai bamona sivarai idia itaia loulou. Danu, taunimanima momo ese ita idia doria lebulebu karadia bona lalohadai ita abia dae totona, bona idia abia dae lasi taudia idia kirikirilaia eiava idia hereva dika henia.—1 Petero 4:4.
3. Tanobada taudia momo ese matabodaga karadia idia karaia ena badina haida be dahaka?
3 Ita lalonai idia noho uradia dainai kara goeva ita badinaia be auka danu. Iehova ese taunimanima ia havaraia neganai, mahuta hebou urana ia atoa, bona nega haida unai ura ia goada diba. Iseda ura bona iseda lalohadai idia gaukara hebou, bona Iehova ena lalohadai danu ia hegeregere lasi lalohadaina be matabodaga kara ia havaraia diba. (Iamesi 1:14, 15) Hegeregere, British Medical Journal ese tahua gaukarana ta ena sivarai ia halasia ia gwau, taunimanima momo idia gwau mahuta hebou karana ginigunana idia karaia badina be idia ura idia diba ia be edena bamona. Ma haida idia laloa edia lagani tamona taudia momo ese mahuta hebou karana idia karaia vadaeni dainai, idia ura lasi idia idau. Ma haida idia gwau edia hemami ia goada neganai unai ia vara, eiava idia “inuinu kekero negana ai” idia karaia. Bema ita ura iseda kara ese Dirava ia hamoalea, namona be iseda laloa dalana ia idau. Edena bamona lalohadai ese ita do ia durua kara goeva ita badinaia noho totona?
Lalona Oi Hadaia Auka
4. Kara goeva ita badinaia noho totona, dahaka ita karaia be namo?
4 Kara goeva ita badinaia noho totona, namona be ita diba unai bamona mauri dalana be mai anina. Unai be aposetolo Paulo ena hereva Roma lalonai idia noho Keristani taudia dekenai hegeregerena, ia gwau: “Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Ita diba kara goeva badinaia karana be mai anina badina Dirava ena Hereva ese matabodaga karadia ia gwauraia dika, to unai sibona be hegeregere lasi. Namona be matabodaga karadia ia gwauraia dika ena badina ita lalo-pararalaia bona unai kara ita dadaraia neganai ita dekenai dahaka namo do ia mailaia ita diba danu. Hereva gunana ese unai badina haida ia kikilaia vadaeni.
5. Edena badina badadia dainai Keristani taudia idia ura kara goeva idia badinaia noho?
5 To momokani, Keristani taudia ese sihari kava karadia idia dadaraia ena badina badana be edia hetura karana Dirava ida idia laloa dainai. Ita dibaia vadaeni ia be ita totona dahaka be namo ia diba. Iseda lalokau ia dekenai ese ita do ia durua kara dika ita inai henia totona. (Salamo 97:10) Dirava be “gau namodia ibounai, bona harihari gaudia namodia momokani ibounai” Henia Tauna. (Iamesi 1:17) Ita ia lalokau henia. Ia ita kamonai henia amo, ita hahedinaraia ia ita lalokau henia bona ita totona ia karaia gaudia ibounai ita laloa bada. (1 Ioane 5:3) Ita ura lasi Iehova ena kara maoromaoro taravatudia ita makohia dainai ia ita hahisia bona ia lalohisihisi. (Salamo 78:41, NW ) Ita ura lasi iseda kara ta dainai ma haida ese iena tomadiho momokanina bona helagana idia gwauraia dika. (Tito 2:5; 2 Petero 2:2) Kara goeva ita badinaia noho amo, Atai Momokani Diravana do ita hamoalea.—Aonega Herevadia 27:11.
6. Ma haida dekenai ita badinaia kara maoromaoro taravatudia ita gwauraia neganai, edena dala ai ita ia durua?
6 Iseda lalona ita hadaia kara goeva do ita badinaia noho neganai, ita do ia naria gauna ma ta be ma haida dekenai iseda lalohadai ita gwauraia. Namona be taunimanima idia diba oi be Iehova Dirava ena hesiai tauna bona emu lalona oi hadaia vadaeni iena taravatu namodia do oi badinaia noho. Unai be emu mauri, emu tauanina bona sibona oi abia hidi diba gauna. Dahaka oi haboioa diba? Emu hetura karana namona emu guba Tamana ida. Unai dainai namona be oi hahedinaraia goevagoeva kara maoromaoro do oi badinaia noho bona emu lalohadai be do ia idau lasi. Dirava ena hakaua herevadia oi abia isi noho dainai oi moale be namo. (Salamo 64:10) Namona be unai gaudia be ma haida ida oi herevalaia totona oi hemarai lasi. Unai gaudia oi gwauraia hedinarai neganai, oi do ia hagoadaia, oi do ia gimaia, bona ma haida do ia hagoadaia emu haheitalai idia tohotohoa totona.—1 Timoteo 4:12.
7. Iseda lalona ita hadaia kara goeva do ita badinaia murinai, edena dala ai unai lalohadai do ita dogoatao noho diba?
7 Iseda lalona ita hadaia taravatu namodia do ita badinaia bona iseda lalohadai be ma haida dekenai ita gwauraia murinai, namona be kara haida ita karaia unai lalohadai ita badinaia noho totona. Dala ta be iseda turadia ita abia hidi neganai ita naria namonamo. Baibel ia gwau: “Aonega tauna danu ia raka hebou noho tauna, be do ia aonega.” Namona be oi bamoa taudia be oi badinaia taravatudia idia badinaia danu; idia ese oi do idia hagoadaia. Unai siri ia gwau danu: “Kavakava taudia danu oi turana karaia neganai, dika do oi davaria.” (Aonega Herevadia 13:20) Bema mai dalana, namona be emu ura namona do idia hamanokaia diba taudia oi bamoa lasi.—1 Korinto 15:33.
8. (a) Dahaka dainai iseda lalona dekenai gau namodia ita atoa be namo? (b) Dahaka ita dadaraia be namo?
8 Danu, namona be iseda lalona dekenai ita atoa gaudia be kara namodia, taunimanima edia ladana idia hanamoa karadia, momokani karadia, bogahisihisi henia karadia, kara maoromaoro, kara goevagoeva, lalokau karadia, bona taunimanima namodia matauraia karadia. (Filipi 4:8) Unai ita karaia totona, ita itaia gaudia, ita duahia bukadia, bona ita kamonai henia miusiki ita abia hidi mai aonega ida. Bema ta ia gwau sihari kava karadia ia kikilaia bukadia ese ita do ia hadikaia lasi, edia hereva ena anina be hegeregere idia gwau kara maoromaoro idia herevalaia bukadia ese ita idia durua lasi. Ita laloaboio lasi, goevadae lasi taudia ese matabodaga karadia idia karaia haraga diba. Unai dainai mahuta hebou urana idia kikilaia buka, magasin, muvini piksa, bona miusiki ese ura kererena do idia havaraia, bona reana gabeai kara dika do ita karaia. Kara goeva ita badinaia noho totona, namona be iseda lalona be Dirava ena aonega amo ita hahonua.—Iamesi 3:17.
Matabodaga Lao Henia Karadia
9-11. Solomona ese ia gwauraia hegeregerena, edena kara ta ta ese eregabe tauna idia hakaua lao matabodaga karana ia karaia totona?
9 Nega momo, matabodaga lao henia karadia ita lalo-pararalaia diba. Ta ese unai kara ta ta ia karaia murinai, giroa lou dalana ia auka ia lao. Aonega Herevadia 7:6-23 ese ia herevalaia dalana mani oi laloa. Solomona ia gwau “eregabe tauna ta lau itaia, ia be mai ena laloa kavakava,” o ura maorona ia noho lasi. Unai tau matamatana be “hahine ta ia noho rumana kahirakahira, ia raka noho, ariara ena kona dekenai. Unai be dina ia diho ena murinai, dibura neganai.” Iena kerere ginigunana be unai. Dina ia diho negana ai, iena “laloa” ese ia hakaua kerere, dala ta ia abia hidi kava lasi, to ia diba ariara hahine do ia noho dalana dekenai ia lao.
10 Unai murinai ita duahia: “Unai neganai hahine ta danu ia hedavari. Hahine ena dabua ia kwatua ena toana, be lebulebu hahine bamona, bona iena kudouna lalonai be mai ena laloa dika.” Hari ia ese unai hahine ia itaia! Unai dala ia rakatania diba bona ena ruma dekenai ia giroa lao diba, to hari ia auka sisina, badina ia be kara maoromaoro ia badinaia goada lasi tauna. Hahine ese ia rosia bona ia kisi henia. Tau ese ena kisi henia karana ia koua lasi dainai, hari iena lalona ania herevadia ia kamonai henia, ia gwau: “Lauegu boubou gaudia be hari dina lau karaia vadaeni, bona boubou ena vamu haida, be lau dekenai ia noho.” Boubou gaudia haida be vamu, paraoa, dehoro, bona uaina. (Levitiko 19:5, 6; 22:21; Numera 15:8-10) Unai gaudia ia herevalaia ena badina be reana ia ura ia hahedinaraia toho ia be lauma gaudia ia laloa, bona ma ia ura ia hadibaia danu iena ruma dekenai aniani bona inuinu gaudia namodia momo idia noho. Ia noinoi, ia gwau: “Oi mai, hari hanuaboi do ita sihari ia lao bona dabai. Ita ta ta dekenai do ita ura henia, mai iseda moale danu.”
11 Do ia vara gauna ita daradaralaia lasi. “Hedibagani hereva momo dekena amo, unai tau ena lalona ia veria.” Hahine ena murina amo ia lao, ‘hegeregere boromakau be do idia alaia gabuna dekenai ia lao bamona’ bona “manu bamona, reke ena lalona dekenai ia roho vareai bamona.” Solomona ese lalona hadiaria herevadia ia gwauraia, ia gwau: “Ia diba lasi iena mauri be ia dika vadaeni.” Iena mauri ia dika vadaeni badina “Dirava ese heudahanai taudia bona headava hadikaia taudia edia kerere davana do ia henia momokani.” (Heberu 13:4) Tatau bona hahine dekenai unai be hadibaia herevana badana! Dirava ena lalo-namo haboioa dalana dekenai ita raka matamaia be namo lasi.
12. (a) Unai hereva “mai ena laloa kavakava” ena anina be dahaka? (b) Edena dala ai kara maoromaoro ita goadalaia diba?
12 Mani oi laloa, unai sivarai ia gwau unai tau matamatana “be mai ena laloa kavakava.” Unai hereva ia hahedinaraia iena lalohadai, iena ura, iena lalokau, iena hemami, bona iena mauri lalonai ia tahua gaudia be Dirava ia abia dae gaudia hegeregerena lasi. Ia lalo-manoka dainai ia dekenai dika ia vara. Hari inai “nega ena dokona dekenai” ita noho dainai, ita hekwarahi kara maoromaoro ita goadalaia totona. (2 Timoteo 3:1) Dirava ese ita idia durua gaudia ia henia noho. Keristani kongregesen heboudia ia henia bona unai ese ita idia durua dala maorona ai ita raka totona bona unuseniai ita tahua gaudia tamona idia tahua taudia ita bamoa diba. (Heberu 10:24, 25) Kongregesen elda taudia ese ita idia naria bona kara maoromaoro daladia idia hadibaia ita dekenai. (Efeso 4:11, 12) Dirava ena Hereva, Baibel, ita abia bona unai ese ita ia hakaua. (2 Timoteo 3:16) Nega ibounai, dala ia noho Dirava ena lauma ena heduru ita noia totona.—Mataio 26:41.
Davida Ena Kara Dika amo Ita Dibaia Gauna
13, 14. Dahaka dainai King Davida ese kara dika rohorohona ia karaia?
13 To madi, Dirava ena hesiai taudia namodia haida ese sihari kava karadia idia karaia danu. Tau ta be King Davida, lagani momo lalodiai Iehova ia hesiai henia ma abidadama ida tauna. Ita diba Dirava ia lalokau henia bada. To, kara dika ia karaia. Solomona ia herevalaia tau matamatana hegeregerena, Davida ena kara haida ese ia idia hakaua lao kara dika ta dekenai bena ena kara dika ia bada ia lao.
14 Unai neganai Davida be tau badana, reana ena mauri laganidia be 50 bamona. Iena ruma guhina dekena amo hahine hairaina, Bataseba, ia digu neganai, ia itaia. Ia ese haida ia nanadaia bena ia diba ia be daika. Ia davaria iena adavana, Uria, be Amono taudia edia hanua Raba idia koua hegege taudia danu ia noho. Davida ena hereva dainai Bataseba be ia dekenai idia hakaua mai, bona ia ida idia heudahanai. Gabeai, hekwakwanai ma haida idia vara—Davida dainai ia rogorogo. Davida ese tuari amo Uria ia boiria mai, badina ia ura hanuaboi ai iena adavana ida do ia noho. Unai dala amo, toana be Uria be Bataseba do ia havaraia natuna ena tamana. To Uria ia mai neganai ena ruma dekenai ia lao lasi. Davida ia ura dikadika unai kara dika ia hunia dainai, Uria ia siaia lou Raba dekenai mai ena revareva ida, bona ia ese tuari taudia ia biagua tauna ia hamaoroa tuari lalonai do idia hamasea gabuna dekenai Uria do ia atoa be namo. Unai dainai Uria ia mase, bona taunimanima idia do diba lasi ena vabu ia rogorogo neganai, Davida ese ia adavaia.—2 Samuela 11:1-27.
15. (a) Davida ena kara dika be edena bamona ia hedinarai? (b) Natana be aonega dalanai Davida ia sisiba henia neganai, Davida ese dahaka ia karaia?
15 Toana be Davida be ena kara dika hunia karana dekenai ia kwalimu. Hua haida idia ore. Edia natuna—mero ta—ia vara. Bema Davida ese Salamo 32 ia torea neganai unai ia laloa, ia hahedinaraia iena lalona ese ia hahisia bada. (Salamo 32:3-5) To, Dirava amo unai kara dika be ia hunia diba lasi. Baibel ia gwau: “Lohiabada ese Davida ena kara dainai ia badu.” (2 Samuela 11:27) Iehova ese peroveta tauna Natana ia siaia, bona mai aonega ida Davida dekenai ena kara kerere ia herevalaia. Davida be maoromaoro ena kara dikana ia gwauraia hedinaraia bona Iehova ia noia ena dika do ia gwauatao. Iena helalo-kerehai korikorina dainai, ia bona Dirava ida maino ia karaia. (2 Samuela 12:1-13) Davida be unai sisiba dainai ia badu lasi. Ia ese Salamo 141:5 ia herevalaia lalohadai ia hahedinaraia: “Tau namona ese, iena bogahisihisi dekena amo, lau do ia dadabaia, o lau dekenai do ia gwau henia, be namo.”
16. Solomona ese edena sisiba ia henia kara kerere taudia dekenai?
16 Solomona, Davida bona Bataseba edia natuna iharuana, be reana unai nega dikana iena tamana ena mauri lalonai ia laloa. Gabeai, inai hereva ia torea: “Bema oiemu kara dika oi hunia noho neganai, namo ta do oi davaria lasi. Oiemu kara dika do oi gwauraia hedinarai, bona dika do oi rakatania, unai neganai Dirava ese oi do ia bogahisihisi henia.” (Aonega Herevadia 28:13) Bema kara dikana ta ita karaia, namona be unai sisiba, Dirava ena lauma ese ia havaraia sisiba, ita badinaia. Namona be Iehova dekenai iseda kerere ita gwauraia bona kongregesen elda taudia dekenai ita lao heduru abia totona. Elda taudia edia maduna badana ta be kara dika idia karaia taudia do idia durua.—Iamesi 5:14, 15.
Kara Dika Ena Davana Dikana Haheaukalaia
17. Ena be Iehova ese kara dika ia gwauatao diba, to edena gaudia amo ita ia koua lasi?
17 Iehova ese Davida ena dika ia gwauatao. Dahaka dainai? Badina be Davida be kara maoromaoro badinaia tauna, ma haida ia hebogahisi henia, bona iena helalo-kerehai karana be momokani. To, Dirava ese unai kara dika dainai idia vara gaudia dikadia amo Davida ia gimaia lasi. (2 Samuel 12:9-14) Hari inai negai unai be momokani danu. Ena be Iehova ese helalo-kerehai taudia dekenai dika ia havaraia lasi, to edia kara kerere dainai idia vara gaudia dikadia ia koua lasi. (Galatia 6:7) Sihari kava karadia amo idia vara gaudia haida be headava hadokoa, natudia abia kava, gorere, bona ma haida edia abidadama bona hemataurai idia haboioa.
18. (a) Paulo ese Korinto kongregesen taudia ia hamaoroa matabodaga karana dikana ia karaia tauna be edena bamona idia kara henia be namo? (b) Iehova be edena dala ai lalokau bona hebogahisi ia hahedinaraia kara dika taudia dekenai?
18 Bema ita be kerere dikana ta ita karaia vadaeni, reana iseda kerere amo idia vara gau dikadia ita haheaukalaia lalonai iseda lalona ia manoka haraga diba. To, helalo-kerehai bona Dirava ida maino karaia lou karana totona gau ta ese ita ia koua lasi be namo. Aposetolo taudia edia negai, Paulo ese Korinto taudia ia tore henia bona ia gwau namona be heudahanai karana iena varavara ta ida ia karaia tauna be kongregesen amo idia atoa siri be namo. (1 Korinto 5:1, 13) Unai tauna ia helalo-kerehai momokani murinai, Paulo ese kongregesen ia hadibaia, ia gwau: “Iena dika do umui gwauatao, bona iena lalona do umui hagoadaia be namo, bona emui lalokau ia dekenai do umui hedinarai henia lou.” (2 Korinto 2:5-8) Dirava ena lauma ia havaraia sisibana lalonai, Iehova ena lalokau bona hebogahisi helalo-kerehai taudia dekenai ita itaia. Guba anerudia ese kara dika tauna ena helalo-kerehai idia itaia neganai idia moale bada.—Luka 15:10.
19. Bema ta be ena kara kerere dainai ia lalohisihisi, reana unai amo dahaka namo do ia davaria?
19 Ena be ita karaia vadaeni kara kererena dainai ita lalohisihisi, to unai lalohisihisi ese ita ia durua ‘do ita naria namonamo, kara kerere daladia dekenai do ita giroa lao garina.’ (Iobu 36:21) Momokani, kara dika ena davana dikana ita mamia murinai, namona be unai ese ita ia hadibaia unai kara dika do ita karaia lou lasi. Danu, Davida ese ena kara dika amo ia dibaia gaudia ia gaukaralaia ma haida ia sisiba henia totona. Ia gwau: “Unai neganai lau ese, oiemu dala be kerere taudia dekenai do lau hadibaia. Bona kara dika taudia ese, oi dekenai do idia giroa lou.”—Salamo 51:13.
Iehova Hesiai Henia Karana amo Moale Ia Vara
20. Dirava ena kara maoromaoro taravatudia badinaia karana amo dahaka namo idauidau idia vara diba?
20 Iesu ia gwau: “Dirava ena hereva idia kamonaia bona idia badinaia taudia be idia moale bada.” (Luka 11:28) Dirava ena kara maoromaoro taravatudia badinaia ese harihari ela bona hanaihanai do ia noho moalena ia mailaia. Bema kara goeva ita badinaia vadaeni, namona be ita badinaia noho totona, Iehova ia henia heduru gaudia ibounai ita gaukaralaia. Bema guna matabodaga karadia ita karaia, namona be inai hamoalea gauna ita laloa, Iehova ia gini hegaegae helalo-kerehai momokani taudia edia kerere ia gwauatao totona. Bona namona be iseda lalona ita hadaia auka unai kara dika do ita karaia lou lasi.—Isaia 55:7.
21. Edena sisiba, aposetolo Petero amo, ese ita do ia durua kara goeva ita badinaia noho totona?
21 Nega daudau lasi murinai inai kara dika tanobadana do ia ore, bona ena matabodaga karadia bona lalohadai do idia ore danu. Bema kara goeva ita badinaia noho, namo do ita davaria harihari ela bona hanaihanai. Aposetolo Petero ia gwau: “Lauegu lalokau taudia e, inai gaudia umui naria noho dainai, do umui noho namonamo. Mai goevagoeva bona kerere lasi danu Dirava ena vairanai do umui noho. Bona Dirava danu mai maino danu do umui noho. . . . Inai gaudia umui diba vadaeni. Unai dainai do umui naria namonamo, koikoi taudia ese umui do idia hakaua kerere garina. Oibe, umui emui gini goada gabuna dekena amo do umui moru garina, do umui naria namonamo.”—2 Petero 3:14, 17.
Anina Oi Gwauraia Diba, A?
• Dahaka dainai nega haida kara goeva badinaia karana be auka?
• Kara maoromaoro taravatudia do ita badinaia noho totona, edena gau haida ese ita do ia durua?
• Solomona ese ia gwauraia tau matamatana ena kara dika amo, dahaka ita dibaia diba?
• Davida ena sivarai amo helalo-kerehai karana dekenai dahaka ita dibaia?
[Picture on page 13]
Oi badinaia kara maoromaoro taravatudia be ma haida dekenai oi gwauraia neganai oi do ia gimaia
[Pictures on page 16, 17]
Davida ia helalo-kerehai momokani dainai, Iehova ese ena kara dika ia gwauatao