Dahaka Dainai Oi Guriguri be Namo?
“DIRAVA umui noia neganai, emui ura gauna umui davaria lasi, badina be mai laloa kerere danu umui noia . . . Dirava dekenai do umui raka kahirakahira lao, vadaeni ia ese umui dekenai do ia raka kahirakahira mai.” (Iamesi 4:3, 8) Iesu ena hahediba tauna Iamesi ena hereva ese ita ia doria eda guriguri ena badina ita laloa totona.
Guriguri be Dirava dekenai iseda ura gaudia ita hamaoroa dalana sibona lasi. Iesu ena Haroro Herevana Badana lalonai, ia gwau: “Emui Tamana guba dekenai ia noho, be umui ura gaudia ia diba vadaeni, do umui noinoi henia lasi neganai.” To danu, Iesu ia gwau: “Umui noinoi, vadaeni Dirava ese do ia henia umui dekenai.” (Mataio 6:8; 7:7) Vadaeni momokani Iehova ia ura iseda dabu gaudia ita hamaoroa ia dekenai. To guriguri karana ena badina be unai sibona lasi.
Turadia korikoridia be gau ta idia ura henia neganai sibona idia herevahereva lasi. Idia be ta ta idia laloa bada, bona edia hemami idia gwauraia hedinarai neganai edia turana karana ia tubu. Unai hegeregerena, guriguri be eda durua gaudia abia totona ita noia dalana sibona lasi, to mai ena badina badana. Ia be dala ia kehoa iseda hetura karana Iehova ida ita hagoadaia totona bema ia ita hadibaia mai kudouna ibounai ida ia ita badinaia.
Oibe, Iehova ese guriguri karana ia henia ita dekenai, ia kahirakahira dekenai ita lao diba totona. Unai ia vara dalana tamona be Dirava dekenai iseda hemami korikoridia ita gwauraia, to idia hadibaia guriguri ita gwauraidia loulou kava lasi. Guriguri amo Dirava ita hereva henia be moale gauna! Danu, Baibel ena aonega hereva ta ia gwau: “Taunimanima namodia idia guriguri neganai, Lohiabada ia moale noho.”—Aonega Herevadia 15:8.
Salamo torea tauna Asapa ia gwau: “Lau be Dirava badibadinai lau noho. Inai be namo herea momokani.” (Salamo 73:28) To Dirava kahirakahira dekenai ita lao totona, guriguri sibona lasi to gau ma haida ita karaia be namo. Mani oi itaia henunai ia noho sivarai ese edena bamona unai ia hahedinaraia:
“[Iesu ena] diba tahua tauna ta ese ia noia, ia gwau, ‘Lohiabada e, guriguri oi hadibaia ai dekenai.’ ” Iesu ia haere ia gwau: “Umui guriguri neganai be umui gwau: ‘Aiemai Tamana e, oiemu ladana do ai hahelagaia. Oiemu Basileia do ia mai.’ ” (Luka 11:1, 2) Iehova ena ladana ita diba lasi bona edena bamona do ia hahelagaia ita diba lasi lalonai, mai anina bada ida unai bamona ita guriguri diba, a? Bona bema ita lalo-parara lasi Dirava ena Basileia be dahaka, Iesu ena hereva hegeregerena unai bamona ita guriguri diba? Bema Baibel ita stadilaia namonamo unai gaudia ita lalo-pararalaia diba. Ita abia dibana ese ita do ia durua Dirava ita diba bona ena dala ita lalo-pararalaia totona. Danu, Iehova Dirava ita diba neganai do ita mamia ia be ita kahirakahira dekenai bona ia do ita badinaia momokani. Bena, unai ese ita do ia durua mai moale ida Ia ita guriguri henia totona.
Guriguri ese Hekwakwanai Ia Hanamoa Diba
Iehova ida hetura karana namona ita abia ese ita do ia durua hekwakwanai ita hanamodia totona. Oi itaia edena bamona unai ia vara, inai sivarai ta ta dekenai. Idia hahedinaraia idia guriguri taudia be Iehova ida edia hetura karana idia hagoadaia diba.
Brazil dekenai hahine ta ladana Maria be heduru totona Dirava dekenai ia guriguri. Unai gabu ena taunimanima ese idia abia dae daladia ia gwau-edeede henia badina edia koikoi karana ia itaia. Maria ese ena adavana, natudia, bona ruma ia rakatania danu. Ia ese drag ia gaukaralaia matamaia danu. To moale ia davaria lasi dainai, heduru totona ia guriguri, Dirava dekenai ena hemami ibounai ia gwauraia.
Daudau lasi, Iehova ena Witnes taudia rua idia mai bona Maria dekenai Gima Kohorona ta idia rakatania, ia ese Dirava ena hakaua herevadia abia dae karana ena namo ia herevalaia. Unai ese ena kudouna ia hamarerea, bona unai dina lalonai Witnes taudia danu Baibel ia stadilaia matamaia. Unai ese ena ruma bese ena mauri ia hanamoa lou. Iehova ia dibaia neganai, ia ura ena lalokau ia hahedinaraia ia dekenai. Maria ia gwau: “Lauegu kara lau hanamoa. Guna lauegu adavana bona ruma bese taudia ese egu Baibel stadi karana idia ura henia lasi. To idia itaia egu kara momo lau haidaua neganai, lau idia hagoadaia matamaia.” Gabeai, Maria ese ena mauri ia gwauhamatalaia guriguri ia Kamonai Diravana dekenai, ia hesiai henia totona.
Ena be José be mai ena adavana hairaina bona bisinesi namona Bolivia dekenai, to ia moale lasi. Ia heudahanai dainai ena adavana ese ia rakatania. Ia inuinu momo bona ia laloa ia be anina lasi. José ia gwau: “Mai egu kudouna ibounai ida lau guriguri, lau henanadai dahaka lau karaia be namo Dirava ia moale totona. Daudau lasi murinai Iehova ena Witnes taudia idia vadivadi egu bisinesi gabuna dekenai bona davana lasi Baibel stadi karana idia hahedinaraia, to idia lau dadaraia. Unai bamona ia vara nega toi. Nega ibounai heduru totona lau guriguri neganai, idia mai. Gabeai, egu lalona lau hadaia do idia mai neganai do lau kamonai henia. Baibel lau duahia vadaeni bona lau be mai egu henanadai momo, to idia be hanaihanai haere maorona idia henia. Iehova lau dibaia karana amo mauri lalonai badina matamatana lau davaria, bona egu turadia Witnes taudia huanai edia haheitalai namodia ese lau idia hagoadaia! Egu turana kekeni bona egu inuinu turadia lau rakatania. Nega sisina murinai, egu adavana bona natudia ida lau noho lou. Lagani 1999 ena matamana ai lau bapatiso.
Italy dekenai, hahine ta ladana Tamara ena headava be ia dika, unai dainai aonega totona ia guriguri. Ia be badu karana ia manadalaia, badina ena mauri lagani be 14 neganai idia botaia bona ruma bese amo idia lulua. Tamara ia gwau: “Baibel ta lau davaria bona lau duahia matamaia. Adorahi ta ai, lau duahia ‘aonega davaria karana be idia hunia kohu namodia oi davaria bamona.’ Unai aonega totona lau guriguri. (Aonega Herevadia 2:1-6) Daba ai, Iehova ena Witnes taudia idia vadivadi. Idia ida Baibel lau stadilaia matamaia, to nega sisina daudau ia lao ela bona lau dibaia gaudia be egu mauri lalonai lau badinaia. Gabeai, lau ura Keristani mauri dalana lau badinaia bona lau bapatiso. Hari, egu adavana ida, ma haida lau durua Dirava ena aonega amo namo idia abia totona.”
Beatriz be taga taudia danu ia noho hahinena ta Caracas, Venezuela dekenai. To, iena headava ia hadokoa bona ia lalohisihisi. Dala lasi dainai, nega ta hora momo lalonai ia guriguri. Daba ai, iduara ena gaba ia rege. Mai badu ida iduara ena matu amo ia itaia taunimanima rua be edia baege danu idia gini. Ia koikoi ia be ruma dekenai ia noho lasi bamona, to idia do lao lasi neganai, iduara henunai pepapepa ta idia atoa vareai. Unai pepapepa ia gwau: “Emu Baibel Oi Diba.” Reana hanuaboi lalonai ia guriguri dainai idia vadivadi, a? Idia ia boiria idia giroa mai totona. Nega daudau lasi bena idia ida Baibel ia stadilaia, bona gabeai ia bapatiso. Hari Beatriz ia moale bada, bona ma haida ia durua edena bamona moale idia davaria diba.
Carmen ia hekwarahilaia ogogami dainai ia guriguri. Ia be mai ena natudia 10 bona inuinu kekero adavana, Rafael. Carmen ia gwau: “Lau hekwarahi dabua huria gaukarana amo moni lau abia totona.” To Rafael ena inuinu karana ia dika ia lao. “Iehova ena Witnes taudia danu Baibel ai stadilaia matamaia neganai sibona, egu adavana ena kara ia haidaua matamaia. Basileia ena gwauhamata ai dibaia—Iehova ese kahirakahira tanobada amo ogogami bona hisihisi do ia haorea. Egu guriguri be Dirava ese ia haerelaia vadaeni!” Iehova ena dala dibaia karana ese Rafael ia durua ena inuinu karana ia hadokoa totona, bona ia ese “mauri matamata” ia atoa. (Efeso 4:24) Ia bona iena ruma bese be edia mauri dalana idia hanamoa diba. Rafael ia gwau: “Ena be ai be kohu momo lasi, bona aiemai ruma be ai ese ai biagua lasi, to ai be mai emai mauri durua gaudia, bona ai moale.”
Guriguri Ibounai Do Ia Haere Henidia Negana
Unai taudia dekenai guriguri ese gau namona ta ia havaraia, a? Oibe! Bona oi itaia diba edia guriguri ia haere dalana be Keristani kongregesen amo ta ese Baibel stadilaia karana amo ia durudia Dirava kahirakahira dekenai idia lao totona, ani?—Kara 9:11.
Unai dainai, badina namona ia noho ita guriguri totona. Kahirakahira, Dirava ena Basileia do ia mai bona ena ura gauna tanobada dekenai do ia karaia gurigurina be do ia haerelaia. (Mataio 6:10) Iehova ese iseda tanobada ai ia idia inai henia taudia ibounai ia kokidia murinai, “tanobada ibounai, be Lohiabada ena diba maoro dekena amo do ia honu momokani.” (Isaia 11:9) Bena Iehova idia lalokau henia taudia ibounai ese “Dirava ena natuna edia hairaina bamona do idia abia, ma Dirava ese edia dala do ia kehoa, vadaeni kwalimu momokani do idia abia”—bona edia guriguri be momokani do ia haere henia.—Roma 8:18-21.
[Picture on page 7]
Oi diba dahaka dainai ita guriguri be namo, a?