Hari Daidia be Dirava Ena Haroro Taudia?
“Dirava sibona ese aonega ai dekenai ia henia, vadaeni inai gaukara ai karaia diba. Ia sibona ese ai dekenai diba ia henia, vadaeni, taravatu matamata do ai gwauraia hedinarai.”—2 KORINTO 3:5, 6.
1, 2. Keristani taudia ginigunadia ibounai ese edena maduna idia abia, to gabeai edena gaudia idia idau?
APOSETOLO taudia edia negai, Keristani taudia ibounai ese mai anina bada maduna ta idia abia—unai maduna be sivarai namona harorolaia. Idia ibounai be horoa taudia bona gwauhamata matamatana harorolaia taudia. Idia haida be maduna ma haida idia abia, hegeregere kongregesen lalonai hadibaia gaukara idia karaia. (1 Korinto 12:27-29; Efeso 4:11) Ruma bese lalonai tama sina edia maduna be bada. (Kolose 3:18-21) To idia ibounai ese unai mai anina bada haroro gaukara idia karaia. Keristani Revarevadia ginigunadia be Greek gado ai idia torea, bona unai maduna idia torea di·a·ko·niʹa—hesiai gaukara ta, eiava haroro gaukara.—Kolose 4:17.
2 Nega ia hanaia, bona gau haida idia idau. Pris o pasto taudia edia orea ia vara, bona idia sibodia ese unai hahenamo, haroro gaukara, idia karaia diba. (Kara 20:30) Sibodia idia gwauraia Keristani taudia hutuma be dagi lasi taudia, to idia haida sibona be pris o pasto taudia. Ena be unai dagi lasi taudia idia hadibadia idia be mai edia maduna haida, hegeregere pris o pasto edia davana karaia totona kontribusen moni idia henia be namo, to idia momo be haroro herevana idia kamonai sibona bona kara ta idia karaia lasi.
3, 4. (a) Kerisendom lalonai, edena dala ai taunimanima be haroro taudia ai idia lao? (b) Kerisendom lalonai daidia be haroro taudia, bona dahaka dainai Iehova ena Witnes taudia idia idau?
3 Pris o pasto taudia idia gwau idia be haroro taudia (Latin gado ai di·aʹko·nos, “hesiai tauna,” idia hahanaia herevana, minister, amo idia abia).a Unai gaukara totona, pris o pasto edia sikuli eiava koledi dekenai idia lao, bena idia hasiahudia. The International Standard Bible Encyclopedia ia gwau: “ ‘Haroro tauna hasiahua karana’ amo tau ta dekenai haroro tauna eiava pris ena dagi idia henia, bona dubu ena hahelagaia karadia idia karaia dainai, siahu idia henia Hereva harorolaia eiava tomadiho karadia karaia, eiava idia ruaosi do idia karaia totona.” Daika ese unai hasiahua gaukarana ia karaia? The New Encyclopædia Britannica ia gwau: “Guna ema bona hari, bisop ta ia noho dubudia lalonai, hasiahua gaukarana be bisop tauna ena. Presbyterian dubu lalodiai, dubu gunalaia taudia ta ese hasiahua karana ia karaia.”
4 Unai dainai, Kerisendom ena dubu lalodiai, haroro tauna ena gaukara be hahenamo ta bona momo ese idia abia diba lasi. To, Iehova ena Witnes taudia ese unai lalohadai idia badinaia lasi. Badina be dahaka? Badina be Keristani kongregesen ginigunana lalonai unai bamona idia karaia lasi.
Daidia be Dirava Ena Hesiai Taudia?
5. Baibel ena hereva hegeregerena, hesiai taudia be daidia?
5 Baibel ia gwau, Iehova idia tomadiho taudia ibounai—guba bona tanobada dekenai—be hesiai taudia. Aneru ese Iesu idia hesiai henia. (Mataio 4:11; 26:53; Luka 22:43) Aneru idia “lao, mauri do idia abia taudia durua totona.” (Heberu 1:14; Mataio 18:10) Iesu be hesiai tauna. Ia gwau: “Taunimanima ena Natuna bamona, ia mai lasi taunimanima ese iena hesiai gaukara do idia karaia totona, to ia be taunimanima edia hesiai gaukara karaia totona ia mai.” (Mataio 20:28; Roma 15:8) Iesu murinai idia raka taudia be iena ‘aena gabudia dekenai do idia raka’ dainai ita hoa lasi idia danu be hesiai taudia.—1 Petero 2:21.
6. Iesu be edena bamona ia hahedinaraia iena hahediba taudia be haroro taudia ai do idia lao?
6 Iesu be guba dekenai ia do daekau lasi neganai, iena hahediba taudia dekenai ia gwau: “Do umui lao, bese ibounai be diba tahua taudia do umui halaoa, bona Tamana, Natuna, bona Lauma Helaga ena ladanai do umui bapatiso henia idia dekenai. Bona idia dekenai do umui hadibaia, umui dekenai lau henia hereva ibounai be do idia badinaia.” (Mataio 28:19, 20) Iesu ena hahediba taudia be hahediba taudia halaoa gaukara do idia karaia—idia be haroro taudia. Edia hahediba taudia matamatadia do idia hadibaia Iesu ena hahegani ibounai do idia kamonai henia, bona ena hahegani ta be do idia lao hahediba taudia halaoa gaukarana karaia totona. Herevana ta be tau o hahine, ia bada vadaeni o ia be mero o kekeni ta, bema ia be Iesu Keriso ena hahediba tauna korikorina, ia be haroro tauna.—Ioela 2:28, 29.
7, 8. (a) Edena siri idia hahedinaraia Keristani taudia ibounai be haroro taudia? (b) Haroro tauna hasiahua karana ena henanadai haida be dahaka?
7 Unai hegeregerena, Pentekoste 33 C.E. ai, Iesu ena hahediba taudia idia hebou, bona idia ibounai, tau bona hahine, be “Dirava ena hoa gaudia idia herevalaia.” (Kara 2:1-11) Danu, aposetolo Paulo ia gwau: “Badina be iseda kudouna ena abidadama dekena amo Dirava ena vairanai do ita maoromaoro, bona inai abidadama be iseda uduna dekenai ita gwauraia hedinarai, be mauri do ita davaria.” (Roma 10:10) Paulo ese pris o pasto taudia edia orea maragina dekenai lasi, to ‘Roma dekenai idia noho taudia, Dirava ese ia lalokau henia taudia ibounai dekenai’ revareva ia siaia. (Roma 1:1, 7) Unai hegeregerena, ‘Dirava ena taudia Efeso dekenai, Keriso Iesu idia abidadama henia taudia,’ ese edia ‘aena dekenai maino ena Sivarai Namona do idia atoa, tamaka bamona,’ be namo. (Efeso 1:1; 6:15) Bona Heberu taudia dekenai ia lao revarevana idia kamonai henia taudia ese edia ‘abidadama idia dogoatao goada noho, bona idia gwauraia noho’ be namo.—Heberu 10:23.
8 Tau ta be edena negai haroro tauna ai ia lao diba? Eiava, edena negai haroro tauna ai idia halaoa diba? Bona daika ese unai ia karaia?
Hasiahua Karana—Edena Negai?
9. Edena negai Iesu be haroro tauna ai ia lao, bona daika ese unai dagi ia henia?
9 Edena negai ta be haroro tauna ai ia lao bona daika ese ia hasiahua ita diba totona, namona be Iesu Keriso ena haheitalai ita laloa. Ia ese haroro tauna ena setifiket o hamomokania pepana dubu ena sikuli ta amo ia abia lasi, bona taunimanima ta ese unai dagi ia henia lasi. To dahaka dainai ita gwau diba ia be haroro tauna ta? Badina be Isaia ese lauma helaga ena siahu amo ia torea herevana be ia dekenai idia guguru: “Lohiabada ena Lauma ese lau ia hahonua. Ia ese lau ia abia hidi vadaeni, Sivarai Namona ogogami taudia dekenai do lau haroro henia.” (Luka 4:17-19; Isaia 61:1) Unai hereva dainai ita daradara lasi, Iesu ese sivarai namona harorolaia gaukarana ia abia. Daika ese ia henia? Badina be Iehova ena lauma helaga amo ia horoa unai gaukara ia karaia totona, ia hedinarai goevagoeva Iehova Dirava ese Iesu dekenai haroro tauna ena dagi ia henia. Edena negai unai ia vara? Iesu ese bapatiso ia abia neganai, Iehova ena lauma be Iesu dekenai ia diho mai. (Luka 3:21, 22) Unai dainai, bapatiso ia abia negana ai, haroro tauna ai ia lao.
10. Keristani haroro tauna be daika amo ena dagi ia abia bena ia hegeregere ‘unai gaukara do ia karaia’?
10 To Iesu murinai idia raka taudia ginigunadia be edena bamona? Edia haroro tauna ena dagi danu be Iehova ese ia henia. Paulo ia gwau: “Dirava sibona ese aonega ai dekenai ia henia, vadaeni inai gaukara ai karaia diba. Ia sibona ese ai dekenai diba ia henia, vadaeni, taravatu matamata do ai gwauraia hedinarai.” (2 Korinto 3:5, 6) Edena dala ai Iehova ese ia idia tomadiho henia taudia dekenai diba ia henia haroro taudia ai idia lao totona? Paulo ia gwau Timoteo be “Dirava ena hesiai tauna Keriso ena Sivarai Namona harorolaia totona,” bona ena haheitalai namona do ita laloa.—1 Tesalonika 3:2.
11, 12. Edena dala ai Timoteo be haroro tauna ai ia lao?
11 Timoteo dekenai idia siaia herevadia ese ita idia durua haroro tauna ai ia lao dalana ita lalo-pararalaia totona, idia gwau: “To oi ese oi abia dae, bona oi abidadama henia hereva momokani, be do oi badinaia namonamo noho. Inai hereva momokani oi dekenai ai hadibaia taudia ibounai oi diba noho, ani? Bona inai danu oi diba noho, oi be mero maragi neganai, Buka Helagadia dekenai oi manada momokani. Inai Buka Helagadia ese oi dekenai aonega idia henia noho diba, ela bona hamauria do oi davaria, Keriso Iesu oi abidadama henia dainai.” (2 Timoteo 3:14, 15) Timoteo ena abidadama ena badina be Baibel ena diba namona, unai amo do ia ura taunimanima ia haroro henidia. Sibona ena duahiduahi karana ia hegeregere unai ia karaia totona, a? Lasi, Timoteo ese ia duahia gaudia dekenai diba maoromaoro bona lauma dalanai lalo-parara ia abia totona heduru ia abia be namo. (Kolose 1:9) Unai dainai, haida ese Timoteo ena lalona idia veria bena unai gaudia ia “abia dae.” Toana be iena tamana be Keristani tauna lasi, to iena hadibaia taudia ginigunadia be ena sinana bona tubuna hahine dainai, ia be ‘mero maragi neganai, Buka Helagadia dekenai ia manada’ vadaeni.—2 Timoteo 1:5.
12 To Timoteo be haroro tauna ai ia lao totona kara ma haida be mai anina danu. Gau ta be, kahirakahira idia noho kongregesen lalonai idia noho tadikaka edia hebamo ese ena abidadama ia hagoadaia. Dahaka dainai unai ita diba? Badina be Paulo ese Timoteo ia hedavari henia negana ginigunana ai, tadikaka “Lusitera bona Ikonio dekenai, idia gwau Timoteo be tau namona.” (Kara 16:2) Danu, unai nega lalonai, tadikaka haida ese kongregesen idauidau dekenai revareva idia siaia, unai kongregesen idia hagoadaia totona. Bona kongregesen naria taudia ese idia vadivadi henidia, edia abidadama idia hagoadaia totona. Unai bamona gaudia ese Keristani taudia, Timoteo bamona, idia durua bena lauma dalanai idia goada idia lao.—Kara 15:22-32; 1 Petero 1:1.
13. Edena negai Timoteo be haroro tauna ai ia lao, bona dahaka dainai oi gwau diba unai neganai lauma dalanai ena tubu daekau dalana ia ore lasi?
13 Iesu ena hahegani Mataio 28:19, 20 ai hegeregerena, ita diba gabeai Timoteo ena abidadama ese ia hagoadaia Iesu ia tohotohoa totona bona bapatiso ia abia. (Mataio 3:15-17; Heberu 10:5-9) Unai be Timoteo ese Dirava dekenai ena mauri ia henia mai ena lalona ibounai ida ia laulaulaia karana. Timoteo ia bapatiso neganai, haroro tauna ai ia lao. Unai murinai, iena mauri, iena goada, bona ena gau ibounai ia henia Dirava dekenai. Unai be ena tomadiho, o ‘hesiai gaukara helagana,’ ena kahana ta. To, Timoteo ese unai ia karaia murinai ia laloa lasi tubu daekau dalana do ia ore. Lasi, lauma dalanai ia tubu noho, bona lo Keristani haroro tauna ai ia lao. Unai ia vara badina Timoteo ese lo Keristani taudia, Paulo bamona, ia bamoa, sibona ena stadi karana ia karaia, bona ia haroro goadagoada dainai.—1 Timoteo 4:14; 2 Timoteo 2:2; Heberu 6:1.
14. Hari inai negai, “mauri hanaihanai abia totona” ia hegeregere tauna be edena dala ai haroro tauna ai ia lao diba?
14 Hari inai negai, ta be Keristani haroro tauna ai ia lao dalana danu be guna bamona. Bema ta be “mauri hanaihanai abia totona” tauna, Baibel stadi ia henia tauna ese ia do ia durua Dirava bona Dirava ena ura do ia dibaia totona. (Kara 13:48) Ia ese Baibel ena hakaua herevadia do ia badinaia ena mauri lalonai bona Dirava dekenai mai anina bada guriguridia henia dalana do ia dibaia. (Salamo 1:1-3; Aonega Herevadia 2:1-9; 1 Tesalonika 5:17, 18) Abidadama tamona taudia ma haida ia bamoa bona “hesiai tauna mai ena kamonai, bona mai ena kara maoromaoro” ese idia henia durua gaudia bona idia haginia daladia ia gaukaralaia. (Mataio 24:45-47; Aonega Herevadia 13:20; Heberu 10:23-25) Unai amo, unai gaudia ia dibaia namonamo dainai, lauma dalanai ia tubu daekau.
15. Tau ta ese bapatiso ia abia neganai dahaka ia vara? (Mani futnout oi itaia.)
15 Gabeai, Baibel stiuden tauna ese Iehova Dirava ia lalokau henia bada bona Iesu ena mauri davalaia boubouna ia abidadama henia mai ena goada ida dainai, do ia ura ena mauri ibounai ia henia ena guba Tamana dekenai. (Ioane 14:1) Guriguri amo Iehova ia hamaoroa ia ura ena mauri ia henia ia dekenai bena taunimanima vairanai, unai gwauhamata hamomokania totona, bapatiso do ia abia. Iena bapatiso be haroro tauna ai ia lao karana, badina unai neganai ia be gwauhamata bona bapatiso ia abia vadaeni hesiai tauna, Dirava ena di·aʹko·nos. Namona be tanobada amo ia gini siri noho. (Ioane 17:16; Iamesi 4:4) Ia ese ena goada ibounai ‘Dirava dekenai ia henia, boubou gauna bamona, mai mauri bona mai helaga danu,’ bona kahana ta be ia sibona totona ia dogoatao lasi. (Roma 12:1)b Ia be Dirava ena hesiai tauna, Keriso ia tohotohoa tauna.
Keristani Haroro Gaukara be Dahaka?
16. Timoteo be haroro tauna dainai edena maduna ia abia?
16 Timoteo ena haroro gaukara lalonai dahaka ia karaia? Iena maduna idauna ta be Paulo ia loaloa neganai ia ese ia bamoa. Bona Timoteo be elda tauna ai ia lao neganai, ia gaukara goadagoada iena Keristani tadikaka ia hadibaia bona hagoadaia totona. To iena hesiai gaukara ena kahana badana, Iesu bona Paulo edia gaukara hegeregerena, be sivarai namona harorolaia bona hahediba taudia halaoa gaukarana. (Mataio 4:23; 1 Korinto 3:5) Paulo ese Timoteo ia hamaoroa: “To oi ese nega ibounai do oi laloa maoromaoro. Hisihisi lalonai do oi haheauka. Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.”—2 Timoteo 4:5.
17, 18. (a) Keristani haroro taudia ese idia karaia hesiai gaukarana be dahaka? (b) Keristani haroro tauna ese haroro gaukara be edena bamona ia laloa?
17 Keristani haroro taudia dekenai hari ia be unai bamona danu. Idia ese taunimanima idia haroro henia, evanelia gaukarana idia karaia, bona ma haida idia durua Iesu ena boubou ia mailaia hahemauri idia dibaia bona manau taudia idia hadibaia Iehova ena ladana idia boiboilaia totona. (Kara 2:21; 4:10-12; Roma 10:13) Baibel amo idia hamomokania Basileia sibona ese hisihisi idia mamia taudia do ia durua, bona idia hahedinaraia hari danu namo do ita davaria bema Dirava ena hahegani ita badinaia. (Salamo 15:1-5; Mareko 13:10) To Keristani haroro tauna be taunimanima edia hekwakwanai idia hanamoa hakaua herevadia idia harorolaia sibona lasi. Lasi, idia ia hadibaia “Dirava totona ita treinini noho, ia ese iseda lauma do ia hagoadaia, bona inai kara ese ita do ia durua bada herea.”—1 Timoteo 4:8.
18 Momokani, haroro taudia momo ese dala idauidau ai hesiai gaukara idia karaia, bona reana Keristani ta ena gaukara be Keristani ma ta ena gaukara amo ia idau. Momo ese ruma bese lalonai maduna idia huaia. (Efeso 5:21–6:4) Elda bona hesiai taudia be mai edia maduna kongregesen lalonai. (1 Timoteo 3:1, 12, 13; Tito 1:5; Heberu 13:7) Keristani taudia momo ese Kingdom Hall haginia gaukarana idia durua. Haida be hahenamo namo hereana idia abia, Watch Tower Society ena Betele rumana ta ai volantia gaukara idia karaia. To, Keristani haroro taudia ibounai ese sivarai namona idia harorolaia. Ta be ia idau lasi. Taunimanima vairanai unai gaukara ia karaia tauna ia hahedinaraia ia be Keristani haroro tauna korikorina.
Keristani Haroro Tauna Ena Lalohadai
19, 20. Keristani haroro taudia ese edena lalohadai idia abia be namo?
19 Kerisendom ena haroro taudia momo idia laloa taunimanima ese idia matauraidia bada be namo, bona dagi ladadia haida idia abia hegeregere “reverend” bona “fada.” To, Keristani haroro tauna ia diba Iehova sibona be hegeregere unai bamona hemataurai badana abia totona. (1 Timoteo 2:9, 10) Keristani haroro tauna ta do ia gwau lasi unai bamona abia isi karana ia abia eiava ena ladana idauna ta idia hatoa be maoro. (Mataio 23:8-12) Ia diba di·a·ko·niʹa ena anina badana be “hesiai gaukara.” Nega haida, Baibel ese unai bamona herevana ia gaukaralaia hesiai gaukara ta, hegeregere teibolo dekenai aniani mailaia hesiai gaukarana, ia kikilaia totona. (Luka 4:39; 17:8; Ioane 2:5) Ena be Keristani haroro gaukara ia kikilaia neganai unai gaukara ataiai ia atoa, to ena anina badana ia idau lasi, di·aʹko·nos be hesiai tauna ta.
20 Badina namona ia noho lasi Keristani haroro tauna ta be sibona ena namo ia heagilaia bada totona. Keristani haroro taudia korikoridia—kongregesen lalonai maduna idauidau idia abia taudia danu—be idia manau hesiai taudia. Iesu ia gwau: “To umui be unai bamona do umui laloa lasi. Bema ta ia ura be do ia lohia gwauraia, ia be umui emui hesiai gaukara do ia karaia. Bona bema ta ia ura be guna tauna, ia be umui emui hesiai tauna do umui halaoa.” (Mataio 20:26, 27) Iesu ese ena hahediba taudia dekenai edena lalohadai namona do idia goadalaia ia hahedinaraia neganai, edia aena ia huria, dagi lasi hesiai tauna ena gaukara ia karaia. (Ioane 13:1-15) Unai be manau ia hahedinaraia gaukarana! Unai dainai, Keristani haroro taudia ese Iehova Dirava bona Iesu idia hesiai henia mai manau ida. (2 Korinto 6:4; 11:23) Idia ta ta idia hesiai henia neganai, lalo-manau idia hahedinaraia. Bona sivarai namona idia harorolaia neganai, sibona edia ura idia dadaraia bona edia abidadama lasi dekena taudia idia durua.—Roma 1:14, 15; Efeso 3:1-7.
Haroro Gaukara Lalonai Haheauka
21. Paulo be haroro gaukara dekenai ia haheauka dainai edena davana namona ia abia?
21 Paulo be haroro tauna dainai, ia haheauka be gau badana. Kolose taudia ia hamaoroa, idia dekenai sivarai namona ia harorolaia totona hisihisi momo ia haheaukalaia. (Kolose 1:24, 25) To, ia haheauka dainai, momo ese sivarai namona idia abia dae bona haroro taudia ai idia lao. Lauma helaga ese idia ia horoa bona Dirava ena natudia bona Iesu Keriso ena tadikaka ai idia lao, bona edia helaro be lauma taudia ai do idia lao bona ia danu do idia noho guba dekenai. Haheauka ena davana namo hereana ta!
22, 23. (a) Dahaka dainai hari inai negai Keristani haroro taudia idia haheauka be namo? (b) Keristani haheauka amo dahaka huahua namona ia vara?
22 Hari, Dirava ena haroro taudia korikoridia dekenai haheauka be gau badana. Momo be dina ta ta ai idia hekwarahi badina idia gorere eiava buruka ena hisihisi idia mamia dainai. Tama sina—idia momo be adavana lasi taudia—idia gaukara goadagoada edia natudia idia naria namonamo totona. Memero kekeni be sikuli dekenai lalo-ani karadia bona herevadia idia dadaraia mai edia gari lasi ida. Keristani taudia momo idia hekwarahi bada moni abia totona. Bona idia momo ese hisihisi o dagedage idia davaria badina ‘nega ena dokona dekenai, metau dikadia momo idia vara’! (2 Timoteo 3:1) Oibe, Iehova ena haroro taudia kahirakahira milioni 6 ese aposetolo Paulo bamona idia gwau diba: “To aiemai kara ibounai dekena amo ai hedinaraia ai be Dirava ena hesiai taudia. Inai bamona kara ai karaia: Metau ibounai neganai ai haheauka.” (2 Korinto 6:4) Keristani haroro taudia ese edia gaukara idia rakatania lasi. Edia haheauka dainai, idia ai hanamoa.
23 Danu, Paulo dekenai ia vara gauna hegeregerena, haheauka ese huahua namona ia havaraia. Ita haheauka neganai, iseda hetura karana Iehova ida ita gimaia bona iena kudouna ita hamoalea. (Aonega Herevadia 27:11) Iseda abidadama ita hagoadaia bona hahediba taudia halaoa gaukara ita karaia, bena Keristani oreana ita habadaia. (1 Timoteo 4:16) Inai nega dokona lalonai, Iehova ese ena haroro taudia ia hagoadaia bona edia haroro gaukara ia hanamoa. Unai dainai, 144,000 taudia oredia idia haboua vadaeni, bona taunimanima milioni ma haida edia helaro be tanobada paradaisona dekenai mauri hanaihanai do idia moalelaia. (Luka 23:43; Apokalupo 14:1) Momokani, Keristani haroro gaukara be Iehova ena hebogahisi ia hahedinaraia gaukarana. (2 Korinto 4:1) Namona be ita ibounai ese unai ita laloa bada bona ia havaraia huahua be do ia noho ela bona hanaihanai dainai Dirava ita tanikiu henia.—1 Ioane 2:17.
[Footnotes]
a Greek herevana di·aʹko·nos amo, English gado herevana “deacon” idia abia, bona unai be dubu ena dagi tauna. Dubu haida dekenai hahine be diakono ai idia lao danu, to hahine idia gwauraia diakono hahinena.
b Ena be Roma 12:1 ese horoa Keristani taudia ia herevalaia, to “mamoe idaudia” dekenai ena hakaua herevana be mai anina danu. (Ioane 10:16) Unai taudia be Iehova ena ‘orea lalonai idia vareai, ia do idia tomadiho henia totona, bona Lohiabada ena ladana do idia lalokau henia, bona ena hesiai gaukara do idia karaia.’—Isaia 56:6.
Anina Oi Gwauraia Diba, A?
• Keristani taudia ginigunadia ibounai ese edena maduna idia abia?
• Daika ese tau ta Keristani haroro tauna ia hasiahua, bona edena negai ia vara?
• Keristani haroro tauna ese edena bamona lalohadai ia abia bona goadalaia be namo?
• Dahaka dainai Keristani haroro tauna ese hekwakwanai ia davaria neganai ia haheauka be namo?
[Pictures on page 16, 17]
Timoteo ia maragi negana amo, Dirava ena Hereva idia hadibaia. Ia bapatiso neganai, haroro tauna ai ia lao
[Picture on page 18]
Bapatiso ese ia hahedinaraia Dirava dekenai emu mauri oi gwauhamatalaia, bona haroro tauna ai oi lao negana ia makaia
[Picture on page 20]
Keristani haroro taudia ese hesiai gaukara idia karaia mai edia ura ida