Mai Ena Ura Bada ida Dirava Hesiai Henia

APOSETOLO Paulo ia gwau: “Lau be mai moale danu egu kohu do lau haorea, egu tauanina danu do lau haorea, umui emui laumadia do lau ubua totona.” (2 Korinto 12:15) Unai hereva ese dahaka ia hadibaia oi dekenai Iehova ena hesiai taudia ese idia abia be namo lalohadai bona kara dekenai? Baibel ia tahua tauna ta ia gwau, Paulo ese unai hereva Korinto Keristani taudia dekenai ia torea neganai, unai be hegeregere ia gwau: “Lau ura egu goada, bona nega, bona mauri, bona egu gau ibounai lau henia umui namo totona, tamana ese mai moale ida ena natudia totona ia karaia bamona.” Paulo ia hegaegae ena ‘tauanina danu do ia haorea,’ eiava “tauanina ena goada ibounai ia haorea” bema unai amo ena Keristani hesiai gaukara ibounai ia hagugurua diba.

Danu, Paulo be “mai moale danu” unai ibounai ia karaia. The Jerusalem Bible ia gwau, ia be ia ‘ura momokani’ unai ia karaia. Oi be edena bamona? Mai emu ura ida emu nega, goada, diba, bona kohu oi henia Iehova Dirava oi hesiai henia bona ma haida edia namo totona, ena be nega haida ‘tauanina ena goada ibounai oi haorea,’ a? Bona “mai moale danu” unai do oi karaia, a?

Idia be Hesiai Gaukara Idia Ura Lasi

Taunimanima momo be Dirava hesiai henia karana idia daradaralaia sibona lasi, to idia dadaraia momokani. Edia kara be tanikiu lasi, sibona ena ura tahua, bona gwau-edeede karana. Satani ese Adamu bona Heva ia veria danu unai bamona idia laloa totona. Mai koikoi ida ia gwau idia be ‘Dirava hegeregere do idia noho, kara namona bona kara dikana do idia diba’​​—⁠sibona idia abia hidi diba edena kara be maoro bona edena kara be kerere. (Genese 3:​1-5) Hari unai bamona lalohadai idia abia taudia idia laloa ura kwalimu momokani idia abia be namo, sibodia edia ura hegeregerena idia kara totona, idia ura lasi Dirava vairanai maduna idia abia eiava ia ese ia koudia. (Salamo 81:​11, 12) Idia ura edia gau iboudiai idia gaukaralaia sibodia edia ura karadia idia karaia totona.​​—⁠Aonega Herevadia 18:⁠1.

Reana oi be unai lalohadai oi abia lasi. Reana oi be mai momokani ida hari oi moalelaia harihari gauna, mauri, bona vaira nega namo hereana, mauri hanaihanai tanobada paradaisona dekenai, oi laloa bada. (Salamo 37:​10, 11; Apokalupo 21:​1-4) Iehova ese kara namo oi dekenai ia hahedinaraia dainai reana oi tanikiu henia bada. To ita ibounai ita naria namonamo be namo, badina Satani ese iseda laloa karana ia hagagevaia diba, bena Dirava ese iseda hesiai gaukara do ia dadaraia. (2 Korinto 11:⁠3) Edena bamona unai ia vara diba?

Mai Eda Ura ida Gaukara Ita Karaia be Namo

Iehova ia ura mai moale bona mai kudouna ibounai ida hesiai gaukara ita karaia. Ita ia doria lasi iena ura ita karaia totona. To Satani ese kara idauidau amo taunimanima ia doria eiava veria iena ura idia karaia totona. Baibel ese Dirava hesiai henia karana ia herevalaia lalonai, maduna, oda, taravatu, bona unai bamona gaudia ia gwauraia. (Hadibaia Tauna 12:13; Luka 1:⁠6) To, Iehova ita hesiai henia ena badina badana be ia ita lalokau henia.​​—⁠Esodo 35:21; Deuteronomi 11:⁠1.

Herevana Paulo be Dirava ena hesiai gaukara lalonai ia haorea nega bona goada ena bada be edena bamona, to ia diba ‘iena lalokau be lasi neganai’ unai ibounai be anina lasi. (1 Korinto 13:​1-3) Baibel torea taudia ese Keristani taudia idia gwauraia Dirava ena hesiai taudia neganai, igui hesiai gaukara idia herevalaia lasi. (Roma 12:11; Kolose 3:​24) To idia herevalaia gauna be Keristani taudia edia kamonai henia karana, mai edia ura ida idia karaia, badina Dirava bona ena natuna, Iesu Keriso, idia lalokau henidia bada mai kudouna ibounai ida.​​—⁠Mataio 22:37; 2 Korinto 5:​14; 1 Ioane 4:​10, 11.

Namona be iseda hesiai gaukara Dirava dekenai ese iseda lalokau taunimanima totona ia hahedinaraia danu. Paulo ese Tesalonika kongregesen ia tore henia ia gwau: “Umui emui huanai ai be manau, iena natuna ia ubua hahine bamona.” (1 Tesalonika 2:⁠7) Hari tano momo dekenai, taravatu henunai sinadia be mai edia maduna edia natudia idia naria totona. To sinadia momo be unai bamona idia karaia, badina taravatu idia ura badinaia, a? Lasi. Unai bamona idia karaia badina edia natudia idia laloa bada! Natuna ia ubua sinana be mai moale ida gau momo ia dadaraia iena natudia totona. Paulo be ia hesiai henia taudia ia “lalokau henia bada dainai” ia “noho hegaegae” (“mai ura ida,” King James Version; “mai moale ida,” New International Version) iena mauri ia gaukaralaia idia ia durua totona. Lalokau ese ita ia doria Paulo ena haheitalai ita tohotohoa totona.​​—⁠Mataio 22:⁠39.

Hesiai Gaukara mai Ura Lasi ida be Edena Bamona?

Momokani, namo lasi sibona lalokau henia karana ita laloa bada dainai Dirava bona taunimanima lalokau henia karana ita laloa bada lasi. Bema unai bamona ita karaia, reana mai eda kudouna ibounai ida lasi, to mai eda ura lasi ida hesiai gaukara do ita karaia. Badu mamina do ita abia matamaia diba, ita badu badina sibona eda ura hegeregerena iseda mauri ita noholaia diba lasi. Israela taudia haida dekenai unai bamona ia vara, Dirava dekenai edia lalokau idia haboioa to kara taravatuna sibona dainai iena hesiai gaukara idia karaia sisina. Unai amo dahaka ia vara? Dirava hesiai henia karana dekenai idia “hesiku.”​​—⁠Malaki 1:​13.

Namona be Dirava dekenai idia henia boubou animal be hanaihanai “bero lasi,” dika ta lasi gaudia, “namo hereadia” sibona. (Levitiko 22:​17-​20; Esodo 23:19) To, Malaki ena nega ai idia noho taudia be Iehova dekenai edia animal namodia idia henia lasi, to idia ura henia lasi gaudia idia bouboulaia. Iehova be dahaka ia karaia? Hahelaga taudia ia hamaoroa: “Bema boromakau, edia matana idia kepulu gaudia, be boubou totona dekenai umui mailaia neganai, [umui gwau] inai be kerere lasi, a? Bema ubua gaudia, mai edia gorere, o mai edia bero umui henia boubou totona, inai be maoro, a? Bema emui gavana dekenai inai gau dikadia umui henidia gwauraia neganai, ia be umui dekenai do ia moale, a? Ia ese gau namona ta umui dekenai do ia henia, a? . . . Umui ese lau dekenai inai gaudia umui henia boubou totona: Boromakau o ubua gaudia mai edia bero, bona mai edia gorere, bona aena dika gaudia danu. Umui laloa lau ese inai gaudia do lau abia dae, a? Lasi momokani.”​​—⁠Malaki 1:​8, 13.

Edena bamona unai ia vara diba ita ta dekenai? Bema mai kudouna bona lalona ibounai ida ita ura lasi karaia neganai, iseda boubou karadia dekenai do ita “hesiku.” (Esodo 35:​5, 21, 22; Levitiko 1:3; Salamo 54:6; Heberu 13:​15, 16) Hegeregere, Iehova dekenai be ma gau ta dekenai ita gaukaralaia lasi negadia sibona ita henia, a?

Bema Israela tauna ta ia ura lasi iena animal namona ia bouboulaia, to ena namo ia laloa ruma bese tauna ta eiava abidadama goada Levi tauna ta ese ia doria dainai ia karaia, do ita laloa diba Dirava ese ena boubou ia abia dae, a? (Isaia 29:13; Mataio 15:​7, 8) Iehova be unai bamona bouboudia ia dadaraia bona unai boubou idia henia taudia danu.​​—⁠Hosea 4:6; Mataio 21:⁠43.

Mai Moale ida Dirava Ena Ura Karaia

Dirava ese ia ura henia hesiai gaukarana ita karaia totona, namona be Iesu Keriso ena haheitalai ita tohotohoa. Ia gwau: “Lau sibona egu ura lau karaia lasi, to Dirava ena ura sibona lau karaia. Ia ese lau ia siaia.” (Ioane 5:30) Iesu be mai ena ura bada ida Dirava ia hesiai henia dainai moale bada ia davaria. Iesu ese Davida ena peroveta herevadia ia hagugurua, ia gwau: “Lauegu Dirava e, lau ura dikadika oiemu ura do lau karaia.”​​—⁠Salamo 40:⁠8.

Ena be Iesu ia ura bada Dirava ena ura ia karaia, to ia be mai ena hekwarahi. Mani ia idia do dogoatao, kota henia, bona hamasea lasi neganai ia vara gauna oi laloa. Iesu be Getesemane umana dekenai ia noho neganai, ena “lalona ia hisihisi bada.” Iena lalona ia metau bada herea dainai, ia guriguri neganai, “iena kopina ia siahu ranuna be rara bamona ia moru tano dekenai.”​​—⁠Mataio 26:38; Luka 22:⁠44.

Dahaka dainai Iesu be unai bamona hisihisi bada herea ia mamia? Sibona ena ura ia laloa eiava ia ura lasi Dirava ena ura ia karaia dainai lasi. Ia hegaegae ia mase totona, danu Petero ena hereva ia dadaraia mai goada ida, ia gwau: “Lohiabada e, unai bamona lasi. Unai bamona do idia karaia lasi oi dekenai.” (Mataio 16:​21-23) Iesu ia laloa bada gauna be taravatu utua tauna bamona do ia mase karana ese Iehova bona ena ladana helagana dekenai dahaka do ia havaraia. Iesu ia diba iena Tamana ena lalona do ia hisihisi bada badina ia itaia ena natuna be taunimanima dikana ta bamona idia kara henia.

Iesu ia lalo-parara danu, Iehova ena ura ia guguru negana badana be kahirakahira. Mai abidadama ida Dirava ena taravatu badinaia karana ese do ia hahedinaraia momokani Adamu be unai bamona ia karaia diba danu. Iesu ena badinaia karana ese do ia hahedinaraia Satani ena hereva, taunimanima be hetoho idia davaria neganai mai edia ura bona kamonai ida Dirava do idia hesiai henia lasi herevana, do ia hakoikoia. Iesu amo, Iehova ese dokona ai Satani do ia moia bona ena gwau-edeede karana ese ia havaraia dika ibounai do ia kokia.​​—⁠Genese 3:​15.

Unai be maduna bada herea Iesu ena pagana ataiai! Iena Tamana ena ladana, guba bona tanobada ena maino, bona taunimanima besena ena hahemauri dekenai Iesu ena badinaia karana be mai anina bada. Unai ia diba dainai, ia guriguri: “Egu Tamana e, bema mai dala, inai kapusi lau dekena amo do oi kokia. To lauegu ura lasi, oiemu ura sibona.” (Mataio 26:39) Ia lalo-hekwarahi bada lalonai danu, Iesu be Tamana ena ura ia badinaia neganai sibona ena ura ia laloa lasi.

“Lauma be Ia Ura, to Tauanina be Ia Manoka Vadaeni”

Iesu be Iehova ia hesiai henia lalonai lalo-hekwarahi bada ena hisihisi ia abia, unai hegeregerena ita Iehova ena hesiai taudia ita laloa diba Satani ese ita dekenai metau momo do ia henia diba. (Ioane 15:20; 1 Petero 5:⁠8) Danu, ita be goevadae lasi. Unai dainai, ena be ita ura Iehova ita hesiai henia, to do ita hekwarahi unai ita karaia totona. Iesu ia itaia edena bamona ena aposetolo taudia idia hekwarahi bada ia hamaoroa karadia idia karaia totona. Unai dainai ia gwau: “Emui lauma be ia ura, to emui tauanina be ia manoka vadaeni.” (Mataio 26:41) Gau ta ia manoka lasi Iesu ena goevadae tauanina dekenai. To, ia laloa gauna be ena hahediba taudia edia manoka tauanina, goevadae lasi tauna Adamu amo idia abia kara dika. Iesu ia diba idia abia hanai goevadae lasi maurina bona unai dainai idia vara taunimanima edia dika dainai, Iehova ena hesiai gaukara dekenai idia ura karaia gaudia idia karaia totona do idia hekwarahi bada.

Bena unai dainai, reana ita be aposetolo Paulo bamona ita laloa, ia lalo-hekwarahi bada badina ena kara dika dainai ia hegeregere lasi Iehova hesiai henia karadia ibounai ia karaia. Paulo ia gwau: “Lau ura kara namo do lau karaia, to karaia totona be lau hegeregere lasi.” (Roma 7:​18) Ita danu be unai bamona ita davaria, ita ura ita karaia gwauraia gau namodia ibounai ita karaia haorea diba lasi. (Roma 7:⁠19) Unai be ita ura lasi dainai ia vara lasi. Ena badina be tauanina ena manoka ese iseda hekwarahi namodia ia koua.

Ita lalo-hisihisi lasi be namo. Bema mai iseda kudouna ibounai ida ita karaia diba gaudia ita karaia, Iehova ese momokani iseda hesiai gaukara do ia abia dae. Namona be ita “gaukara goada” Keriso ita tohotohoa totona, ia ese mai ena kudouna ibounai ida Dirava ena ura henunai sibona ia atoa. (2 Timoteo 2:​15; Filipo 2:​5-7; 1 Petero 4:​1, 2) Unai bamona ura bada karana dainai Iehova ese davana namona do ia henia bona do ia durua. Ia ese ita dekenai “siahu badana” do ia henia iseda manoka gaudia ita hanaia totona. (2 Korinto 4:​7-10) Iehova ena heduru amo, Paulo bamona ita ese ‘mai moale danu iseda kohu do ita haorea, iseda tauanina danu do ita haorea’ Iena gaukara namo hereana lalonai.

[Picture on page 21]

Paulo be mai ena ura bada ida ena goada ibounai ia gaukaralaia Dirava ia hesiai henia totona

[Picture on page 23]

Iesu ia lalo-hewarahi bada negana lalonai danu, iena Tamana ena ura ia karaia