Duahia Taudia Edia Henanadai

Taunimanima momo ese idia karaia karana, idia hoia kompiuta program be ma haida dekenai idia henia, be Keristani taudia momokanidia ese edena bamona idia laloa be namo?

Reana haida be unai kara idia gwauraia maoro toho totona Iesu ena hereva idia gwauraia: “Gau momo umui abia vadaeni, davana lasi. Unai dainai gau momo do umui henia, davana lasi.” Momokani, Iesu be buka eiava kompiuta program mai edia laiseni, taravatu hegeregerena ita gaukaralaia diba gaudia, be haida dekenai henia kava karana ia herevalaia lasi. Ena hereva ena anina be, henia karana be hesiai gaukara ena kahana. Iesu be siti bona hanua idauidau dekenai idia lao aposetolo taudia ia hamaorodia Basileia do idia harorolaia, gorere taudia do idia hanamoa, bona lauma dikadia do idia lulua. Aposetolo taudia ese unai gaukara totona davana idia atoa lasi, to idia karaia “davana lasi.”​​—⁠Mataio 10:​7, 8.

Sibodia edia kompiuta bona bisinesi kompiuta edia namba ia bada daekau dainai, taunimanima momo idia ura kompiuta program idauidau idia abia. Nega momo unai idia hoia be namo. Momokani, taunimanima haida ese program haida idia karaia bona idia henia davana lasi, bona idia gwau unai program ena kopi haida idia karaia bona ma haida dekenai idia henia diba. To kompiuta program momo be bisinesi taudia ese idia hoihoilaia. Herevana idia sibona ese ruma dekenai idia gaukaralaia totona eiava bisinesi totona idia hoia, to kompiuta program idia gaukaralaia taudia ese do idia hoia, davana do idia henia. Bema tau ta be kompiuta program ta ia abia eiava ena kopi ta ia karaia bona davana ia henia lasi, unai be taravatu utua karana, ia be hegeregere ta ese buka edia kopi momo ia karaia bona ia henia kava, herevana moni ia abia lasi.

Kompiuta program momo (gadara program danu) be mai edia laiseni, biaguna/gaukaralaia tauna be mai ena maduna ena taravatu bona hetoana ia badinaia totona. Unai bamona laiseni momo idia gwau tau tamona sibona ese unai program be kompiuta lalonai ia atoa bona ia gaukaralaia diba​​—⁠nega momo kompiuta tamona sibona dekenai ia atoa diba, herevana ia be ruma ai, bisinesi ai, eiava sikuli dekenai. Laiseni haida idia gwau ia gaukaralaia tauna be ia sibona totona kopi ta ia karaia diba, to taunimanima ma haida totona kopi haida ia karaia diba lasi. Bema biaguna ia ura unai program ibounai (laiseni bona pepa danu) ia henia, ia karaia diba. To, unai kara dainai sibona ena maoro ia gaukaralaia totona be ia hadokoa unai. Laiseni be idauidau, unai dainai bema ta ese program ta ia hoia eiava tau ta amo ia abia, namona be unai laiseni ena taravatu ia tahua.

Tano momo be taravatu ta (copyright taravatuna) lalonai idia noho, unai ese kompiuta program, bona gau ma haida ia gimaia, bona idia ura unai taravatu badinaia karana idia hagoadaia. Hegeregere, January 14, 2000, The New York Times ese ia hahedinaraia “German bona Denmark pulisi taudia ese idia gwauraia kompiuta program edia kopi momo idia karaia oreana ta idia dogoatao,” idia ese kompiuta program bona gadara idauidau edia kopi momo herea idia karaia bona idia hoihoilaia, Internet dekenai haida idia hoihoilaia danu.

Unai kara dainai Keristani kongregesen be dahaka ia karaia? Iesu ia gwau: “Kaisara ena gaudia umui henia Kaisara dekenai, Dirava ena gaudia umui henia Dirava dekenai.” (Mareko 12:17) Unai dainai Keristani taudia ese edia tano ena taravatu, Dirava ena taravatu idia utua lasi taravatudia unai, do idia kamonai henia be gau badana. Gavamani ia herevalaia neganai, aposetolo Paulo ia gwau: “Taunimanima ibounai ese gavamani do idia kamonai henia . . . Gavamani ena hereva idia kamonai henia lasi taudia be Dirava danu idia kamonai henia lasi. Edia kerere davana do idia abia.”​​—⁠Roma 13:​1, 2.

Haida edia kompiuta sekea gaukarana be Keristani kongregesen lalonai idia noho elda taudia edia maduna lasi, hegeregere idia be mai edia siahu lasi unai taravatu badinaia dalana idia gwauraia hedinarai bona ma haida ese idia badinaia karana idia biagua. To idia abia dae bona idia hadibaia Keristani taudia ese ma haida edia gau idia abia lasi bona namona be idia hekwarahi taravatu idia badinaia totona. Unai dainai Keristani taudia ese taravatu idia utua lasi bona panisi idia abia lasi, bona unai dainai Dirava vairanai edia lalona ena mamina ia namo noho. Paulo ia gwau: “Unai dainai, gavamani mai ena siahu taudia do umui kamonai henidia, Dirava ena badu umui laloa dainai lasi, to badina be emui lalona dekenai umui diba dala maorona be unai.” (Roma 13:⁠5) Unai hegeregerena, Paulo ese Keristani taudia momokanidia edia ura be inai hereva amo ia hahedinaraia, ia gwau: “Badina ai laloa aiemai kudouna ena laloa be maoromaoro, Dirava ena vairanai. Bona ai ura be nega ibounai kara maoromaoro do ai karaia.”​​—⁠Heberu 13:⁠18.

[Box on page 29]

Bisinesi bona sikuli haida be momo ese idia gaukaralaia diba laiseni idia hoia, unai ese maoro ia henia taunimanima momo ese unai program idia gaukaralaia totona. Lagani 1995 lalonai, Iehova ena Witnes taudia idia herevalaia herevana ta lalonai be inai sisiba ia noho:

“Kompiuta program idia hegaegaelaia bona hoihoilaia kampani momo be copyright taravatuna henunai unai program idia atoa, bona idia henia laiseni ese ia hahedinaraia hoia taudia ese edena bamona unai program be taravatu hegeregerena idia gaukaralaia diba. Nega momo unai laiseni ia gwau biaguna be program ena kopi be taunimanima haida dekenai do ia henidia diba lasi; momokani, unai intenesenel copyright taravatu dainai, unai idia karaia be taravatu utua karana. . . . Kampani badadia haida ese idia hoihoilaia kompiuta lalonai program mai ena laiseni idia atoa vadaeni. To, kompiuta sitoa haida ese laiseni idia henia lasi badina kompiuta lalonai idia atoa vadaeni program be taravatu utua dalanai idia karaia kopi, anina be unai kompiuta ia hoia tauna ese program ia gaukaralaia neganai taravatu do ia utua. Unai hegeregerena, Keristani taudia ese copyright taravatuna henunai idia noho gaudia (Society edia buka bona magasin be unai bamona), bona biagudia amo gwaumaoro idia abia lasi to kopi idia karaia gaudia, be electronic bulletin boards lalonai idia atoa eiava ia amo idia abia lasi be namo.”