Lauma Paradaisona be Dahaka?

GUSTAVO be Brazil ena siti maragina ta dekenai ia tubu daekau.a Ia maragi neganai ia idia hadibaia taunimanima namodia idia mase neganai idia lao guba dekenai. Ia diba lasi Dirava ena ura be nega ta abidadama taudia be tanobada paradaisona dekenai mauri goevadaena do idia moalelaia. (Apokalupo 21:​3, 4) Bona gau ma ta ia diba lasi danu. Ia diba lasi hari inai negai, lauma paradaisona dekenai ia noho diba.

Guna lauma paradaiso herevana oi kamonai, a? Oi diba ia be dahaka bona dahaka oi karaia be namo ia lalonai oi noho totona, a? Bema ta ia ura ia moale momokani, unai paradaiso ia dibaia be namo.

Lauma Paradaisona Davaria

Ita gwau taunimanima be hari paradaiso ta dekenai idia noho diba neganai, reana toana be ia momokani diba lasi. Inai tanobada be paradaiso ta lasi. Taunimanima momo be idaunegai Heberu pavapavana ese ia gwauraia bamona gauna idia mamia: “Haida ese idia dagedage henidia taudia idia tai noho, bona tau ta ese ia durudia lasi. Io, tau ta ese unai hisihisi taudia ia durudia lasi, badina be unai dagedage taudia be mai edia siahu danu.” (Hadibaia Tauna 4:⁠1) Taunimanima milioni momo be politikol, tomadiho, bona moni gaukaralaia daladia dainai hisihisi idia abia, bona heduru be lasi, “ta ese ia durudia lasi.” Ma momo idia hekwarahi bada ruma gaudia edia davana idia henia, natudia idia ubua, bona gau momo idia karaia idia mauri noho totona. Idia danu idia ura ta ese ia durudia, ta ese edia metau ia hamaragia sisina. Idia ibounai dekenai, mauri be paradaiso ta bamona lasi.

Lauma paradaisona be edeseniai? English gado herevana “paradise” be Greek, Persia, bona Heberu gado herevadia hegeregerena, edia anina be maino ia noho laga-ani uma gabuna. Baibel ia gwauhamata, nega ta inai tanobada be paradaiso korikorina, kara dika lasi taudia ena uma bamona noholaia gabuna ai do ia lao. (Salamo 37:​10, 11) Unai hereva ita laloa neganai, ita lalo-parara lauma paradaisona be iseda matana bona hemami ia hanamoa noho dalana, ia dainai ta ese maino do ia moalelaia taunimanima bona Dirava ida. Hari, Gustavo ia davaria hegeregerena, unai bamona paradaiso ia noho, bona ia lalonai idia noho taudia edia namba ia bada ia lao.

Iena mauri lagani be 12 neganai, Gustavo ese ena lalona ia hadaia ia ura Roman Katolik pris ta ai do ia lao. Tama sina edia gwaumaoro ia abia, bona tomadiho sikulina ta lalonai ia vareai. Unuseniai ia be miusiki, drama, bona politikol karadia lalonai ia vareai, unai be dubu ese idia gaukaralaia momo matamata taudia idia veria totona. Ia diba pris ena gaukara be sibona ia henia taunimanima ia durua totona bona do ia headava lasi. To, Gustavo ia diba pris taudia bona tomadiho sikuli taudia haida be matabodaga karadia idia karaia. Unai bamona gabu dekenai, daudau lasi murinai Gustavo be ia inuinu momo. Ia hahedinaraia goevagoeva, lauma paradaisona ia do davaria lasi.

Dina ta, Gustavo ese tanobada paradaiso ia herevalaia Baibel pepapepana ta ia duahia. Unai gauna dainai mauri ena anina ia laloa. Ia gwau: “Baibel lau duahia matamaia hanaihanai, to lau lalo-pararalaia lasi. Lau itaia lasi Dirava be mai ena ladana.” Unai tomadiho sikuli ia rakatania bona Iehova ena Witnes taudia dekenai ia lao, ia idia durua Baibel ia lalo-pararalaia totona. Unai murinai, lauma dalanai ia goada ia lao bena daudau lasi murinai Dirava dekenai iena mauri ia gwauhamatalaia. Gustavo be lauma paradaisona ia dibaia.

Dirava Ena Ladana Idia Abia Taudia

Gustavo ia dibaia Dirava ena ladana Iehova, be Baibel stiuden tauna ese ia laloa herevana maragina sibona lasi. (Esodo 6:⁠3) Unai be tomadiho ena kahana badana ta. Iesu ese ia murinai idia raka taudia dekenai inai guriguri ia hadibaia: “Aiemai Tamana e, guba dekenai oi noho, oiemu ladana do ai hahelagaia.” (Mataio 6:⁠9) Keristani taudia ai idia lao Idau Bese taudia ia herevalaia neganai, hahediba tauna Iamesi ia gwau: “Dirava ese idau bese taudia ia abia dae, bona iena bese taudia ia halaodia.” (Kara 15:14) Aposetolo taudia edia negai, Keristani kongregesen be “iena bese taudia.” Hari Dirava ena ladana idia abia taudia idia noho, a? Oibe, bona Gustavo ia lalo-parara unai be Iehova ena Witnes taudia.

Iehova ena Witnes taudia be tano bona gabu 235 dekenai idia gaukara noho. Idia ibounai be haroro taudia milioni 6 ia hanaia bamona, bona kamonai taudia, ma milioni 8 bamona, be edia hebou dekenai idia lao vadaeni. Taunimanima momo ese edia haroro gaukara idia diba, bona Iesu ena hereva idia hagugurua: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Dahaka dainai Gustavo be Iehova ena Witnes taudia ia bamoa dainai ia mamia lauma paradaisona ia davaria vadaeni? Ia gwau: “Lau ese tanobada bona tomadiho sikulina dekenai lau itaia gaudia be Iehova ena Witnes taudia dekenai lau davaria gaudia ida lau hahegeregerea. Ia idau gauna badana be Iehova ena Witnes taudia huanai lalokau ia noho.”

Taunimanima ma haida danu be Iehova ena Witnes taudia idia herevalaia unai bamona. Brazil hahine matamatana, Miriam, ia gwau: “Moale mamina lau diba lasi, egu ruma bese lalonai moale be lasi. Nega ginigunana lalokau be kara amo lau itaia be Iehova ena Witnes taudia huanai.” Tau ta ladana Christian ia gwau: “Nega haida meamea karadia lau karaia, to lau dekenai tomadiho be gau badana lasi. Taunimanima edia lalohadai lau dekenai bona egu ensinia gaukarana lau laloa bada. To lauegu adavana be Iehova ena Witnes taudia ida Baibel ia stadilaia matamaia neganai, lau itaia iena kara ia idau. Ia idia vadivadi henia Keristani hahine edia moale bona gaukara goadagoada urana dainai lau laloa bada danu.” Dahaka dainai taunimanima be Iehova ena Witnes taudia idia herevalaia unai bamona?

Lauma Paradaisona be Dahaka?

Iehova ena Witnes taudia edia idau ia hahedinaraia gauna ta be idia ese Baibel ena diba idia laloa bada. Idia abia dae Baibel be momokani bona ia be Dirava ena Hereva. Unai dainai, idia ura lasi edia tomadiho ena hereva badadia sibona idia diba. Idia be mai edia program sibodia edia stadi bona Baibel duahiduahi totona. Bema ta be nega daudau Iehova ena Witnes taudia ia bamoa, Dirava bona Iena ura, do ia dibaia namonamo, Baibel lalonai ia hedinarai bamona.

Unai diba ese Iehova ena Witnes taudia ia ruhaia taunimanima edia moale idia kokia gaudia amo, hegeregere taunimanima idia gari henidia gaudia bona idia ia hadikaia diba lalohadai. Iesu ia gwau: “Hereva momokani ese umui do ia ruhaia,” bona Iehova ena Witnes taudia idia davaria unai be momokani. (Ioane 8:32) Fernando, guna meamea karadia ia karaia tauna, ia gwau: “Mauri hanaihanai lau dibaia neganai unai be heduru gauna badana. Lau eiava egu tama sina idia mase garina lau gari.” Hereva momokani ese Fernando ia gari henia laumadia bona idia gwauraia mase murinai maurina garina amo ia ruhaia.

Baibel lalonai, Dirava dibaia karana be paradaiso ida ia gwauraia hebou. Peroveta tauna Isaia ia gwau: “Siona, Dirava ena ororo helagana dekenai, dika ta, o hadikaia gauna ta do ia noho lasi. Badina be tanobada ibounai, be Lohiabada ena diba maoro dekena amo do ia honu momokani, davara be ranu dekenai ia honu bamona.”​—⁠Isaia 11:⁠9.

Momokani, diba sibona ia hegeregere lasi Isaia ese ia perovetalaia maino ia mailaia totona. Ta be ia dibaia gaudia ia karaia be namo. Fernando be inai bamona ia gwau: “Ta be lauma ena huahua ia habadaia neganai, ia be lauma paradaisona ia durua.” Fernando be aposetolo Paulo ena hereva ia gwauraia lou, ia ese Keristani taudia ese idia habadaia be namo kara namodia ia gwauraia lauma helaga ena huahua. Ia gwau idia be “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana.”​—⁠Galatia 5:​22, 23.

Taunimanima edia orea ta be idia hekwarahi unai bamona kara namodia idia habadaia totona bona idia oi bamoa neganai, oi itaia diba dahaka dainai unai be paradaiso ta bamona, ani? Peroveta tauna Sepanaia ese ia perovetalaia lauma paradaisona be unai bamona taudia huanai ia noho. Ia gwau: “Kara dika ta do idia karaia lasi. Hereva koikoi ta do idia gwauraia lasi, bona kara koikoi do idia karaia lasi. Noho namo do idia davaria, bona do idia mahuta namonamo. Idia ese tau ta dekenai do idia gari henia lasi.”​—⁠Sepanaia 3:⁠13.

Lalokau be mai Anina Bada

Reana oi itaia vadaeni Paulo ese ia herevalaia lauma ena huahua ginigunana be lalokau. Baibel ese unai kara ta ia herevalaia momo. Iesu ia gwau: “Unai dekena amo taunimanima ibounai do idia diba umui be lauegu diba tahua taudia, ta ta dekenai do umui lalokau henia dainai.” (Ioane 13:35) Momokani, Iehova ena Witnes taudia idia goevadae lasi. Iesu ena aposetolo taudia bamona, nega haida idia huanai hekwakwanai ia vara. To idia ta ta idia lalokau henia momokani, bona unai kara idia habadaia lalonai, lauma helaga ena heduru abia totona idia guriguri.

Unai dainai, edia hebamo karana be idau. Idia huanai, iduhu abia isi eiava bese abia isi hapararaia karana be lasi. Momokani, lagani 2000 be kahirakahira laganidia ai, Witnes taudia be ia vara noho bese idauna hamasea ore karana huanai idia noho, to idia ta ta idia gimaia, herevana sibodia edia mauri idia haboioa diba. Ena be “idia be bese idauidau, iduhu idauidau, kopina idauidau, bona gado idauidau” taudia, to idia moalelaia lalo-tamona oi lalo-pararalaia diba lasi ela bona oi mamia.​—⁠Apokalupo 7:⁠9.

Dirava Ena Ura Idia Karaia Taudia Huanai Paradaiso Ia Noho

Lauma paradaisona dekenai mataganigani, kara dikadia, bona sibona ena ura tahua karadia totona gabu ta be lasi. Keristani taudia ese inai hahegani idia abia: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:⁠2) Bema kara goeva maurina ita badinaia bona dala idauidau ai Dirava ena ura ita karaia, ita be lauma paradaisona haginia karana do ita durua bona iseda moale do ita habadaia. Carla ia davaria unai be momokani. Ia gwau: “Lauegu tamana ese lau ia hadibaia lau gaukara goada be namo, moni dalanai sibona lau naria totona. Ena be univesiti dekenai lau stadilaia gaudia dainai noho namo mamina lau abia, to Dirava ena Hereva amo ita abia diba sibona ese ruma bese ena lalo-tamona bona noho namo korikorina ia henia diba bona unai lau reaia.”

Momokani, lauma paradaisona ita moalelaia ese tauanina dalanai iseda mauri ena hekwakwanai ia kokia lasi. Keristani taudia ese gorere idia abia noho. Idia noholaia tanona dekenai reana tuari heheni karana ia vara. Momo idia ogogami. To, Iehova Dirava ida turana karana namona ita abia​—⁠unai be lauma paradaisona ena kahana badana ta​—⁠ena anina be heduru totona ia dekenai ita lao diba. Oibe, ita ia boiria ‘iseda laloa hekwarahi be ia dekenai do ita henia,’ bona momo idia gwau diba hekwakwanai bada lalonai, ia ese heduru ia henia. (Salamo 55:22; 86:​16, 17) Dirava ia gwauhamata ia idia tomadiho henia taudia ida do ia noho, “mase ena dibura koura gabuna” dekenai danu. (Salamo 23:⁠4) Ita diba Dirava ia gini hegaegae ita ia gimaia totona, bona unai ese ita do ia durua ‘Dirava ena maino taunimanima edia diba ia hanaia,’ gauna do ita dogoatao totona, bona unai be lauma paradaisona ena ki ta.​—⁠Filipi 4:⁠7.

Lauma Paradaisona Ita Durua

Taunimanima momo be laga-ani gabuna eiava loaloa uma gabuna vadivadi henia karana idia moalelaia. Idia ura ia lalonai idia raka loaloa eiava patapata ta dekenai idia helai bona gabu idia moalelaia. Unai hegeregerena, momo be Iehova ena Witnes taudia idia bamoa karana idia moalelaia. Idia davaria edia hebamo karana be namo herea, maino, bona goada ia henia. To, uma gabu mai hairaina be paradaiso bamona ia noho hanaihanai totona, namona be ta ese ia naria. Unai hegeregerena, lauma paradaisona be inai paradaiso lasi tanobadana lalonai ia noho, ia noho ena badina be Iehova ena Witnes taudia ese idia naria dainai, bona Dirava ese edia hekwarahi ia hanamoa. To, edena dala ai ta be unai paradaiso ia durua diba?

Gau ginigunana be, Iehova ena Witnes taudia edia kongregesen oi bamoa, idia ida Baibel oi stadilaia, bona lauma paradaisona ena badina, Baibel ena diba, oi abia be namo. Carla ia gwau: “Bema lauma aniani be lasi lauma paradaisona be lasi.” Anina be Baibel oi duahia hanaihanai bona oi duahia gaudia oi laloa. Oi abia dibana dainai, Iehova Dirava kahirakahira dekenai do oi lao, bona ia do oi lalokau henia. Ia guriguri henia karana danu do oi dibaia bona iena hahekau bona iena lauma ena heduru do oi noia, ena ura do oi karaia diba totona. Iesu ese ita ia hamaoroa namona be guriguri karana ita goadalaia noho. (Luka 11:​9-13) Aposetolo Paulo ia gwau: “Nega ibounai do umui guriguri.” (1 Tesalonika 5:17) Guriguri amo Dirava oi hereva henia be hahenamo ta bona oi diba momokani ia ese oi ia kamonai henia be lauma paradaisona ena mai anina bada gauna.

Gabeai, oi dibaia gaudia ese emu mauri do ia hanamoa, bena do oi ura ma haida dekenai unai oi herevalaia. Bena Iesu ena hahegani do oi badinaia diba: “Umui emui diari taunimanima edia vairana dekenai unai bamona do umui hedinaraia, vadaeni umui emui kara namodia do idia itaia neganai, umui emui Tamana guba dekenai do idia hanamoa.” (Mataio 5:16) Taunimanima ma haida dekenai Iehova Dirava bona Iesu Keriso edia diba bona taunimanima dekenai idia hahedinaraia lalokau badana ita herevalaia neganai, moale bada ia mailaia.

Nega ta do ia mai bona tanobada ibounai be paradaiso korikorina ai do ia lao​—⁠unai uma bamona gabuna ai hadikaia gaudia be lasi bona ia be noho gabuna namona abidadama taudia totona. Hari inai “nega ena dokona dekenai, metau dikadia momo” negana lalonai, lauma paradaisona ia noho, ia be Dirava ena siahu ia hahedinaraia bona unai be vaira negana ai ia karaia diba bona do ia karaia momokani gaudia edia toana sibona.​—⁠2 Timoteo 3:⁠1.

Hari danu, lauma paradaisona idia moalelaia taudia be lauma dalanai Isaia 49:10 ia guguru dalana idia mamia: “Idia be do idia hitolo o ranu mase lasi. Dina bona tano kaukau gabuna ena siahu ese, idia do ia hadikaia lasi, badina be idia ia lalokau henia tauna, ese do ia hakaudia. Ranu namona gabudia badinai ia ese do ia hakaudia.” José ia gwau diba unai be hereva momokani. Ia ura ia be taunimanima momo idia diba miusiki gadaralaia tauna ai ia lao, to ia davaria Keristani kongregesen ida Dirava hesiai henia karana amo moale bada ia davaria. Ia gwau: “Hari mauri mai anina lau moalelaia. Keristani tadikaka huanai noho namona lau mamia, bona lau diba Iehova be lalokau Tamana bamona, ia ita abidadama henia diba.” José ena moale​—⁠bona ia bamona taudia milioni momo edia moale​—⁠be Salamo 64:10 ese ia hahedinaraia: “Kara maoromaoro taudia ese, Lohiabada dainai do idia moale bada, bona idia ese Lohiabada dekenai do idia heau mauri.” Unai be lauma paradaisona ena toana ia gwauraia hedinarai namonamo herevana!

[Footnote]

[Picture on page 10]

Lauma paradaisona ita moalelaia noho lalonai, habadaia gaukarana ita durua!