Hemami Dikadia Haheaukalaia Dalana

● Asapa ia maumau: “Lau ese lau kara kava, a? Nega ibounai lauegu lalona lau hagoevaia, bona kara dika ta lau karaia lasi. Inai kara dekena amo namo ta lau davaria, a? Badina be dina ibounai lau hisihisi noho, bona daba ibounai, matakani lau davaria noho.”​—⁠Salamo 73:​13, 14.

● Baruku be mai taitai ida ia gwau: “ ‘Lau madi o, lau be dika vadaeni, badina Lohiabada ese egu hisihisi ena latanai lalohisihisi ma ia atoa kau vadaeni, bona lau tai noho, ia mai bona lau hesiku vadaeni, bona laga-ani sisina lau davaria diba lasi.’ ”​—⁠Ieremia 45:⁠3.

● Naomi be mai lalo-hisihisi ida ia gwau: “Siahu Bada Diravana ena kara lau dekenai be auka. Mai gau momo lau ese inai gabu lau rakatania, to Lohiabada ese imana kavakava lau ia siaia lou. Dahaka dainai lauegu ladana Naomi umui atoa? Lohiabada ese lau ia hisihisi henia vadaeni. Siahu Bada Diravana ese lau ia hadikaia momokani.”​—⁠Ruta 1:​20, 21.

BAIBEL lalonai mai abidadama ida Iehova idia tomadiho henia taudia edia haheitalai momo idia noho, idia be nega haida lalo-manoka mamina idia abia. Momokani, ita be goevadae lasi taudia dainai, nega ta ta ai unai bamona hemami ita abia. Reana ita haida be ita lalo-manoka haraga​—⁠reana sibona eda hemami ita laloa momo​—⁠badina eda mauri lalonai hisihisi momo ita mamia vadaeni.

To, bema unai hemami oi biagua namonamo lasi, idia ese emu hetura karana Iehova Dirava bona ma haida ida idia hadikaia diba. Sibona ena hemami ia laloa momo Keristani hahinena ta ia gwau: “Nega momo hebamo karadia dekenai lau idia boiria neganai, lau lao lasi badina lau laloa lau be hegeregere lasi dainai, kongregesen ai idia noho taudia ese lau idia bamoa be namo lasi.” Unai bamona hemami ese ta ena mauri ia hadikaia diba! Unai oi hanaia totona dahaka oi karaia be namo?

Iehova Kahirakahira Dekenai Oi Lao

Salamo 73 ai, Asapa ese ia lalo-pararalaia lasi gauna ia torea. Iena noho dalana bona kara dika taudia edia noho dalana namona ia hahegeregerea neganai, ia mama. Ia itaia Dirava idia badinaia lasi taudia be idia heagi bona dagedage, bona toana be edia kerere ena davana idia abia lasi. Bena Asapa ese kara maorona badinaia karana ena namo ia daradaralaia herevadia ia gwauraia hedinarai.​—⁠Salamo 73:​3-9, 13, 14.

Asapa bamona, oi ese kara dika taudia oi itaia, mai kwalimu ida edia dika idia heagilaia, a? Asapa ese ena hemami dikana be edena bamona ia hanaia? Ma ia gwau: “Lau ese unai tau dikadia edia kara bona kwalimu, dekenai lau laloa momo, to ia auka dainai, lau be hegeregere lasi laloa maoro do lau davaria, ela bona Dirava ena Dubu Helaga dekenai lau vareai lao. Unai neganai tau dikadia edia dokona lau diba.” (Salamo 73:​16, 17) Asapa ese kara namona ta ia karaia, hegeregere Iehova dekenai ia guriguri. Aposetolo Paulo ese gabeai ia gaukaralaia herevadia bema ita gaukaralaia, ita gwau diba Asapa ese ia lalonai ia noho ‘lauma gaudia ia laloa tauna’ ia hanogaia karana amo ‘tauanina gaudia ia laloa tauna’ ia koua. Lauma dalanai ia itaia namonamo lou neganai, ia lalo-parara Iehova be kara dika ia inai henia bona ena nega korikorina ai kara dika taudia do ia panisia.​—⁠1 Korinto 2:​14, 15, NW.

Mai anina bada gauna be Baibel ese oi ia durua mauri ena momokani gaudia oi itaia namonamo totona! Iehova ese ita ia hadibaia lou, kara dika taudia ese idia karaia gaudia ibounai ia itaia. Baibel ese ita ia hadibaia, ia gwau: “Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. . . . Kara namodia ita karaia be namo, ita hesiku lasi.” (Galatia 6:​7-9) Iehova ese kara dika taudia be “dedidedi gabudia dekenai” ia atoa; ia ese “mase gabuna dekenai” idia do ia hamorua. (Salamo 73:18) Dokonai, Dirava ena hahemaoro maoromaoro be hanaihanai do ia kwalimu.

Hanaihanai Iehova ena teibolo amo lauma aniani oi ania bona hebamo namona Dirava ena taunimanima ida oi moalelaia karana ese oi do ia durua emu abidadama oi hagoadaia bona lalo-manoka bona hemami dikadia ma haida oi hanaia totona. (Heberu 10:25) Asapa hegeregerena, Dirava kahirakahira dekenai oi noho neganai, ena lalokau heduruna oi mamia diba. Asapa be ma ia gwau: “Lau be nega ibounai oi kahirakahira lau noho, bona oi ese egu imana oi dogoatao noho. Oi ese oiemu sisiba dekena amo lau oi hakaua noho. Dokona neganai oi ese lau do oi abia dae, guba ena hairai dekenai.” (Salamo 73:​23, 24) Ia maragi neganai idia hadikaia Keristani hahinena ta be ia dibaia unai hereva be aonega herevana. Ia gwau: “Kongregesen lau bamoa karana ese lau dekenai mauri ena kahana idauna ta ia hadibaia. Lau itaia namonamo Keristani elda taudia be mai edia lalokau, idia be pulisi taudia lasi to mamoe naria taudia.” Oibe, lalokau Keristani elda taudia be hemami dikadia haorea karana dekenai mai anina bada gaukarana idia karaia.​—⁠Isaia 32:​1, 2; 1 Tesalonika 2:​7, 8.

Iehova Ena Sisiba Abia Dae

Peroveta tauna Ieremia ena seketere tauna, Baruku, be ena gaukara ena lalo-hekwarahi dainai ia lalohisihisi. To, Iehova ese Baruku ena lalona ia veria idia vara gaudia momokanidia ia laloa totona. “Oi ese gau namo herea, oi sibona totona, oi tahua noho, a? Lau Lohiabada lau gwau: Inai bamona tahua kara do oi karaia lasi, badina be lau ese taunimanima ibounai dekenai dika do lau havaraia, to oiemu mauri be oi dekenai do lau henia. Do oi lao gabudia ibounai dekenai oi be do oi heau mauri.”​—⁠Ieremia 45:​2-5.

Iehova ese ia hahedinaraia goevagoeva, Baruku ena lalohisihisi be sibona ena mataganigani karana dainai ia vara. Baruku be Dirava ese ia henia gaukarana lalonai moale ia davaria diba lasi bema sibona ena ura gaudia ia tahua noho. Reana oi danu oi davaria lalo-manoka oi hanaia dalana momokanina be, lalona idia veria gaudia oi dadaraia bona Dirava amo ia mai lalo-maino oi dogoatao be namo.​—⁠Filipi 4:​6, 7.

Vabu hahinena Naomi be Moaba dekenai ena adavana bona natudia memero rua idia mase neganai, ia ura lasi lalohisihisi ese ia hamanokaia. To, ita itaia diba, nega ta ai ia sibona bona ena natuna memero edia adavadia rua ia laloa neganai hemami dikana ia abia. Ia siaidia lao neganai, Naomi ia gwau: “Lauegu lalona ia hisihisi umui dainai, badina be Lohiabada ese lau ia rakatania vadaeni.” Bona Betelehema dekenai ia ginidae neganai, ma ia hereva lou: “Lauegu ladana umui atoa lasi, Naomi, [“Lauegu Namo”] to Mara [“Idita”] do umui atoa, badina be Siahu Bada Diravana ena kara lau dekenai be auka.”​—⁠Ruta 1:​13, 20.

To, Naomi be lalohisihisi ia davaria gabuna dekenai​—⁠Iehova bona ena taunimanima amo daudau gabuna ai​—⁠ia noho lasi. Moaba dekenai ia kamonai “Lohiabada ese aniani hatubua nega namona iena bese dekenai ia henia vadaeni.” (Ruta 1:⁠6) Ia lalo-parara ia totona noho gabu namona be Iehova ena taunimanima ida. Unai murinai Naomi be ena ravana hahine Ruta ida ia giroa Iuda dekenai bona mai aonega ida Ruta ia hadibaia edena bamona edia varavara tauna Boasi, ia do ia hoia tauna, ia kara henia.

Hari inai negai danu, edia adavadia idia mase taudia be Keristani kongregesen lalonai idia bisi bada karana amo edia lalo-metau idia haheaukalaia. Naomi hegeregerena, idia be hanaihanai lauma gaudia idia laloa, dina ta ta ai Dirava ena Hereva idia duahia.

Dirava Ena Aonega Badinaia Karana amo Namo Ita Abia

Unai Baibel sivaraidia ese lalo-parara idia henia ta ese hemami dikadia amo idia vara gaudia ia haheaukalaia diba totona. Asapa be Iehova ena dubu dekenai heduru ia tahua bona mai haheauka ida Iehova ia naria. Baruku be sisiba ia abia dae bona kohu bada tahua karana ia dadaraia. Naomi be Iehova ena taunimanima huanai ia gaukara goada, hahine matamata Ruta ia durua Dirava momokani tomadiho henia karana lalonai hahenamo do ia abidia totona.​—⁠1 Korinto 4:7; Galatia 5:26; 6:⁠4.

Iehova ese ena taunimamina ta ta bona ibounai dekenai ia henia kwalimu karadia oi laloa karana amo, lalo-manoka bona hemami dikadia ma haida oi hanaia diba. Unai ia vara totona, Iehova ena lalokau karana badana, oiemu mauri davana ia henia karana, oi laloa dobu be namo. Keristani tadikaka oreana ena lalokau korikorina oi laloa bada. Nega vairai Dirava ena tanobada matamatana lalonai do oi abia mauri oi laloa. Bona namona be Asapa hegeregerena do oi gwau: “Lau be Dirava badibadinai lau noho. Inai be namo herea momokani. Siahu Ibounai Lohiabada e, oi be lauegu magu momokani. Hari lau ura oiemu kara ibounai do lau gwauraia hedinarai.”​—⁠Salamo 73:⁠28.