Gini Goada Bona Dirava Ena Ura Diba Namonamo
‘Itaia! Hutuma Bada Herea!’
UNAI be lagani momo lalonai Iehova ena hesiai taudia ese idia daradaralaia henanadai ta. Nega daudau lalonai idia hekwarahi, Baibel amo ena haere idia davaria totona. Unai henanadai be herevahereva momo lalonai idia kikilaia. To gabeai, Baibel ena haere idia davaria, unai ese lagani 1935 ai, Washington, D.C. dekenai, idia karaia hebouhebouna ta dekenai idia noho taudia ia hamoalea dikadika.
Unai herevahereva idauidau edia badina be henanadai tamona: Apokalupo 7:9 ese ia herevalaia “hutuma bada” (King James Version), eiava “hutuma bada herea” (New World Translation), ena anina be dahaka? Unai abidadama oreana be guba dekenai do idia noho, a?
Nega Daudau Ia Noho Henanadai Ta
Aposetolo Ioane ena nega amo ia mai bona iseda nega ai, Keristani taudia be “hutuma bada herea” ena anina idia daradaralaia. Bible Student taudia idia laloa hutuma bada herea taudia be guba dekenai do idia lao orea iharuana, idia be Baibel ena hereva momokani ena diba idia abia to idia harorolaia bada lasi.
To, horoa Keristani taudia idia bamoa taudia haida be haroro gaukara idia karaia goadagoada taudia. To guba dekenai lao lalohadaina idia abia lasi. Momokani, edia helaro be Iehova ena taunimanima ese lagani 1918 ia lao 1922 ai idia henia pablik tok, “Hari Idia Noho Taudia Milioni Momo be Do Idia Mase Lasi,” ena hereva hegeregerena. Unai bamona taudia be tanobada dekenai mauri hanaihanai ena hahenamo do idia abia.
The Watch Tower, October 15, 1923 gauna, ese Iesu ena parabole ta, mamoe bona nanigosi parabolena, ia herevalaia bona ia gwau: “Mamoe ese bese idauidau taudia ibounai idia laulaulaia, lauma helaga amo idia vara lou lasi, to kara maoromaoro idia ura henia, bona edia lalona dekenai idia abia dae Iesu Keriso be Lohiabada. Idia tahua bona idia naria gauna be, Iesu ia lohia neganai noho namona do idia davaria.”—Mataio 25:31-46.
Diari ma Haida
Lagani 1931 ai, Vindication, Buka Ginigunana, ese Esekiela karoa 9 ia herevalaia bona ia hahedinaraia, tanobada ena dokona lalonai mauri do idia abia totona edia baguna dekenai maka idia abia taudia be Iesu ena parabolena lalonai idia noho mamoe. Vindication, Buka Ihatoina (lagani 1932 ai idia halasia), ese Israela lasi tauna Iehonadaba, ena kudou-maoro karana ia hahedinaraia, Israela ena horoa king Iehu ena kariota dekenai ia guia bona Iehu ida ia lao, tomadiho koikoi ia hadikaia karana ia itaia totona. (2 King Taudia 10:15-28) Unai buka ia gwau: “Iehonadaba ia laulaulaia oreana taudia be harihari tanobada dekenai idia noho, Satani ena orea idia dadaraia, bona kara maoromaoro ena kahana ai idia gini. Bona Lohiabada ese Aramagedono bona unai hisihisi amo do ia hamauridia bona mauri hanaihanai tanobada dekenai do ia henidia. Unai taudia be ‘mamoe’ taudia.”
Lagani 1934 ai, The Watchtower magasin ese ia hahedinaraia goevagoeva, edia helaro be tanobada dekenai do idia mauri hanaihanai Keristani taudia ese Iehova idia gwauhamata henia bona bapatiso idia abia be gau badana. Edia lalo-parara unai tanobada oreana dekenai ia bada ia lao momokani, diari ia bada ia lao hegeregerena!—Aonega Herevadia 4:18.
Lalo-Parara Ena Diari Ia Hedinarai Goevagoeva
Apokalupo 7:9-17 ena hereva dekenai lalo-parara ena diari ia hedinarai goevagoeva gwauraia. (Salamo 97:11) The Watchtower ia gwau, idia ura May 30 ia lao June 3, 1935 lalonai, Washington, D.C., U.S.A. dekenai idia karaia hebouhebou ese Iehonadaba ia laulaulaia taudia “edia lalona do ia hanamoa bona edia mauri do ia durua.” Bona unai bamona ia vara!
J. F. Rutherford ese hebouhebou dekenai idia mai taudia 20,000 bamona dekenai hereva namona ta ia henia, ena hereva kwarana be “Hutuma Bada Herea Taudia.” Unai hereva lalonai, Baibel amo ia hamomokania, hari inai nega ena “mamoe idaudia” taudia be Apokalupo 7:9 lalonai ia gwauraia “hutuma bada herea” (NW ) taudia. (Ioane 10:16) Ena hereva ia hadokoa gwauraia neganai, hereva henia tauna ia gwau: “Emui helaro be tanobada dekenai mauri hanaihanai do umui abia taudia e, mani umui gini toreisi!” Helai taudia momo herea idia gini toreisi neganai, Rutherford ia boiboi: “Itaia! Hutuma bada herea!” Nega sisina lalonai regerege be lasi, bena helai taudia idia boiboi badabada. Unai dina murinai, Witnes taudia matamatadia 840 idia bapatiso, idia kahirakahira iboudiai idia gwau idia be unai hutuma bada herea taudia.
Noho Idauna Ta
Lagani 1935 ia do abia lasi neganai, Baibel ena hereva idia abia dae bona sivarai namona idia harorolaia goadagoada taudia momo idia gwauraia hedinarai mauri hanaihanai tanobada Paradaisona dekenai idia ura abia. Idia ura lasi idia lao guba, badina Dirava ese idia dekenai guba helarona ia henia lasi. Idia abia dae idia be mamoe idaudia taudia ese ia hahedinaraia, lagani 1935 ia abia neganai, 144,000 horoa Keristani taudia boiria negana be kahirakahira do ia ore.—Apokalupo 7:4.
Tanobada Ibounai Tuarina Iharuana ia matamaia neganai, Satani Diabolo ia hekwarahi bada hutuma bada herea taudia haboua gaukarana ia koua totona. Tano momo dekenai Basileia harorolaia gaukarana idia koua toho. Unai hekwakwanai negana ai, bona J. F. Rutherford ena mase negana, January 1942, be ia kahirakahira neganai, ia gwau: “Toana be ‘hutuma bada herea’ taudia edia orea be bada momokani lasi.”
To Dirava ena hahenamo dainai, hutuma bada herea taudia edia namba ia bada daekau. Idia ‘gini goada bona Dirava ena ura idia diba namonamo’ dainai, horoa taudia bona edia bamodia, mamoe idaudia taudia, be hahediba taudia halaoa haheganina idia badinaia noho. (Kolose 4:12; Mataio 24:14; 28:19, 20) Lagani 1946 ia abia neganai, tanobada ibounai dekenai idia haroro noho Iehova ena Witnes taudia edia namba be 176,456—idia momo be hutuma bada herea taudia. Lagani 2000 ai, Witnes taudia 6,000,000 ia hanaia be tano 235 dekenai mai abidadama ida Iehova idia hesiai henia noho—momokani unai be hutuma bada herea! Bona unai namba ia bada ia lao noho.