Ita Goada Noho, Ita Itaia Diba Lasi Diravana Ita Itaia Bamona!
“Mose ena lalona ia goada noho, ita itaia diba lasi Diravana, be Mose ese matana dekenai ia itaia bamona.”—HEBERU 11:27.
1. Iesu ena Haroro Herevana Badana lalonai, Dirava ia herevalaia neganai, edena hereva idauna ta ia gwauraia?
IEHOVA be ita itaia diba lasi Diravana. Mose ese Iena hairai do ia itaia totona ia noia neganai, Iehova ena haere be inai: “To lauegu vairana be oi dekenai do lau hedinaraia lasi, badina be bema tau ta ese lauegu vairana ia itaia neganai, unai tau be do ia mase.” (Esodo 33:20) Bona aposetolo Ioane ia gwau: “Matamaia neganai ia mai bona harihari tau ta ese Dirava ia itaia lasi.” (Ioane 1:18) Iesu Keriso be tanobada ai taunimanima ta bamona ia noho neganai, ia danu ese Dirava ia itaia diba lasi. To Iesu ena Haroro Herevana Badana lalonai, ia gwau: “Edia lalona goevagoeva taudia be idia namo, badina idia ese Dirava do idia itaia.” (Mataio 5:8) Iesu ena hereva ena anina be dahaka?
2. Dahaka dainai iseda matana korikoridia amo Dirava ita itaia diba lasi?
2 Baibel ia hahedinaraia Iehova be ita itaia diba lasi Laumana. (Ioane 4:24; Kolose 1:15; 1 Timoteo 1:17) Unai dainai, Iesu ia gwau lasi ita taunimanima be iseda matana korikoridia amo Iehova ita itaia diba. Momokani, horoa Keristani taudia idia toreisi lou bona lauma taudia ai idia lao neganai, guba dekenai Iehova Dirava do idia itaia. To “lalona goevagoeva taudia” bona tanobada dekenai mauri hanaihanai helarona idia abia taudia be Dirava idia “itaia” diba danu. Edena bamona unai ia vara diba?
3. Edena dala ai taunimanima be Dirava ena kara haida idia itaia diba?
3 Iehova ia havaraia gaudia itaia namonamo karana amo, ena kara ita diba. Reana ena siahu ita hoalaia bona ia dainai ita abia dae diba Dirava be iseda Havaraia Tauna. (Heberu 11:3; Apokalupo 4:11) Unai dainai, aposetolo Paulo ia gwau: “Dirava ese tanobada ia karaia negana ia mai bona harihari, taunimanima idia kamonai diba Dirava ena siahu be ia doko diba lasi, bona danu idia diba ia sibona be Dirava momokani. Inai bamona idia diba, badina be edia matana dekenai Dirava ese ia karaia gaudia ibounai idia itaia vadaeni. Inai gaudia idia itaia dainai, idia be Dirava ena hunia gaudia idia kamonai diba danu.” (Roma 1:20) Unai dainai Iesu ia gwau Dirava ita itaia diba ena anina ta be Iehova ena kara haida ita itaia diba. Unai bamona itaia karana dekenai, diba maoromaoro bona lauma dalanai iseda “lalona” ena matana amo ita itaia be mai anina. (Efeso 1:18) Iesu ena hereva bona kara ese Dirava ena kara momo idia hahedinaraia danu. Unai dainai, Iesu ia gwau: “Lau ia itaia tauna ese egu Tamana danu ia itaia.” (Ioane 14:9) Iesu ese Iehova ena kara ia hahedinaraia goevagoeva. Unai dainai, Iesu ena mauri bona hadibaia herevadia ita diba neganai, ita idia durua Dirava ena kara haida ita itaia, eiava ita lalo-pararalaia totona.
Lauma Gaudia Ita Laloa Bada be mai Anina
4. Hari edena dala ai taunimanima momo idia hahedinaraia lauma gaudia idia laloa maragi?
4 Hari, abidadama bona lauma gaudia laloa bada momokani karana ita davaria momo lasi. Paulo ia gwau: “Taunimanima haida sibona be mai edia abidadama Dirava dekenai.” (2 Tesalonika 3:2) Taunimanima momo ese sibodia edia ura idia tahua badabada bona Dirava idia abidadama henia lasi. Idia kara dika bona lauma gaudia idia laloa bada lasi dainai, mai lalo-parara ida Dirava idia itaia lasi. Aposetolo Ioane ia gwau: “Kara dika ia karaia noho tauna ese Dirava ia itaia lasi.” (3 Ioane 11) Badina unai bamona taudia be edia matana korikoridia amo Dirava idia itaia diba lasi, idia kara hegeregere Dirava ese idia ia itaia lasi. (Esekiela 9:9) Lauma gaudia idia laloa maragi, unai dainai ‘Dirava idia diba’ lasi. (Aonega Herevadia 2:5) Paulo ese inai ia torea be maoro, ia gwau: “Tauanina ia abidadama henia tauna ese Dirava ena Lauma gaudia ia abia dae diba lasi, badina be ia dekenai idia be kavakava bamona. Inai Lauma ena gau namodia be Lauma Helaga sibona dekena amo ita abia diba. Vadaeni Lauma ia do diba lasi tauna be unai gaudia edia anina ia davaria diba lasi.”—1 Korinto 2:14.
5. Lauma gaudia idia laloa bada taudia ese dahaka idia diba?
5 Bema lauma gaudia ita laloa bada, ita diba ena be Iehova be kerere tahua Diravana lasi, to iseda lalohadai bona ura dikadia ita hagugurua neganai ia diba. Momokani, “edia kara be Lohiabada ese ia itaia noho. Lohiabada ese taunimanima ta ta ibounai, edia dala ibounai ia tahua noho.” (Aonega Herevadia 5:21) Bema kara dika ta ita karaia, ita helalo-kerehai bona Iehova ena gwauatao ita tahua, badina ia ita lalokau henia bona ita ura lasi ia ita hahisia.—Salamo 78:41, NW; 130:3.
Dahaka Dainai Iseda Lalona Ia Goada Noho?
6. Iseda lalona ia goada noho ena anina be dahaka?
6 Ena be iseda matana amo Iehova ita itaia diba lasi, to namona be ita laloatao ia ese ita ia itaia diba. Bema ita diba ia noho bona ia dekenai idia boiboi taudia kahirakahira ia noho, unai ese ita do ia durua iseda lalona ia goada noho totona—iseda abidadama ia dekenai do ia marere lasi do ia gini goada. (Salamo 145:18) Namona be ita be Mose bamona. Paulo ia gwau: “Mose ese Dirava ia abidadama henia. Unai dainai ia toreisi, Aigupito ia rakatania, king ena badu dekenai ia gari lasi. Mose ena lalona ia goada noho, ita itaia diba lasi Diravana, be Mose ese matana dekenai ia itaia bamona.”—Heberu 11:27.
7, 8. Dahaka dainai Mose be Farao vairanai ia gari lasi?
7 Mose ese Dirava ia henia gaukarana, Israela taudia be Aigupito ena igui hesiai gaukara amo ia ruhaia, ia karaia totona, nega momo dagedage tauna Farao bona ena ruma badana idia hahonua tomadiho bona tuari gunalaia taudia vairanai ia lao. Reana ena ruma badana ena haba dekenai kaivakuku momo idia noho. Ena be Mose be Iehova ia itaia diba lasi to ia dekenai ia be momokani, Aigupito ena kaivakuku bamodia lasi, idia be ena mauri lasi diravadia idia laulaulaia sibona. Unai dainai ita hoa lasi Mose ese Farao ena kara dainai ia gari lasi!
8 Dahaka ese Mose ia hagoadaia bena mai gari lasi ida Farao vairanai ia lao loulou? Baibel ia gwau, “Mose be tanobada taudia ibounai edia huanai ia sibona be manau herea.” (Numera 12:3) Ia hedinarai goevagoeva, lauma dalanai ia goada bona ia diba Dirava be ia ida dainai, Mose ese goada ia abia Aigupito ena hebogahisi lasi pavapava vairanai, “ita itaia diba lasi Diravana” ena gwaukau gaukarana ia karaia totona. Ita itaia diba lasi Diravana idia “itaia” taudia be edena dala haida ai edia abidadama ia dekenai idia hahedinaraia hari?
9. Edena dala ta ai ita goada noho diba?
9 Ita itaia diba lasi Diravana idia itaia bamona taudia, ese abidadama bona gini goada idia hahedinaraia dalana ta be dagedage idia davaria neganai, mai gari lasi ida idia haroro noho. Iesu be ena hahediba taudia ia sisiba henia, ia gwau: “Taunimanima ibounai ese do idia badu henia umui dekenai lau dainai.” (Luka 21:17) Idia dekenai ma ia gwau: “Hesiai tauna ese iena biaguna ia hereaia lasi. Bema idia ese lau dekenai idia dagedage henia, umui dekenai danu do idia dagedage henia.” (Ioane 15:20) Iesu ena hereva hegeregerena, iena mase murinai ena hahediba taudia ese dagedage, dibura, bona dadabaia karadia idia haheaukalaia. (Kara 4:1-3, 18-21; 5:17, 18, 40) Ena be dagedage bada karana ia vara, to Iesu ena aposetolo taudia bona hahediba taudia ma haida ese mai gari lasi ida sivarai namona idia harorolaia.—Kara 4:29-31.
10. Ita diba Iehova ena naria karana ia noho dainai, unai ese edena bamona haroro gaukara lalonai ita ia durua?
10 Mose bamona, Iesu murinai idia raka taudia ginigunadia ese idia itaia inai taudia momo idia gari henia lasi. Iesu ena hahediba taudia ese Dirava idia abidadama henia, bona unai dainai, idia davaria dagedage aukana idia haheaukalaia diba. Oibe, idia goada noho, idia itaia diba lasi Diravana idia itaia bamona. Hari, ita diba Iehova ena naria karana be hanaihanai ia noho ese ita ia hagoadaia, ia dainai ita gari lasi, to mai boga auka ida Basileia haroro gaukara ita karaia. Dirava ena Hereva ia gwau, ‘taunimanima oi gari henia neganai, dika do oi davaria, tarapu lalonai oi moru bamona, to bema Lohiabada oi abidadama henia, mauri do oi davaria noho.’ (Aonega Herevadia 29:25) Unai dainai, ena be dagedage ese ita ia hagaria to ita gaukara noho, bona iseda haroro gaukara dainai ita hemarai lasi. Iseda abidadama be ita ia hagoadaia iseda dekena taudia, gaukara turadia, sikuli turadia, bona ma haida ita haroro henia mai gari lasi ida totona.—Roma 1:14-16.
Ita Itaia Diba Lasi Diravana ese Ena Taunimanima Ia Hakaua
11. Petero bona Iuda edia hereva hegeregerena, Keristani kongregesen idia bamoa taudia haida be edena dala ai idia hahedinaraia lauma gaudia idia laloa maragi?
11 Abidadama dainai ita itaia Iehova be ena tanobada oreana ia hakaua. Unai dainai kongregesen lalonai maduna idia huaia tadikaka ita maumauraia lasi. Aposetolo Petero bona Iesu ena tadina Iuda idia gwau haida be lauma gaudia idia laloa maragi dainai Keristani gunalaia tadikakadia idia gwauraia dika. (2 Petero 2:9-12; Iuda 8) Bema unai kerere tahua taudia be edia matana korikorina amo Iehova idia itaia, ia vairanai unai bamona do idia hereva, a? Lasi! To tauanina gaudia idia laloa taudia ese Dirava idia itaia diba lasi dainai, Dirava vairanai edia kara ena badina gwauraia karana idia laloa lasi.
12. Kongregesen hakaua taudia dekenai, edena bamona lalohadai ita abia be namo?
12 Momokani, Keristani kongregesen lalonai goevadae lasi taudia sibona idia noho. Elda gaukara idia karaia taudia ese kerere idia karaia, nega haida unai kerere be mai anina ita dekenai. To, Iehova ese unai bamona tatau ia gaukaralaia ena mamoe oreana idia naria totona. (1 Petero 5:1, 2) Lauma gaudia idia laloa bada tatau bona hahine idia lalo-parara, unai be Iehova ese ena taunimanima ia hakaua dalana ta. Unai dainai, ita be Keristani taudia dainai, namona be Dirava ia haginia tiokratik daladia ita matauraia bona maumau karana ita dadaraia. Ita idia hakaua taudia ita kamonai henia neganai, ita hahedinaraia ita itaia diba lasi Diravana ita itaia bamona.—Heberu 13:17.
Dirava Ita Itaia Ia be Iseda Hadibaia Tauna Badana Bamona
13, 14. Iehova ita itaia ia be iseda Hadibaia Tauna Badana bamona, ena anina be dahaka oi dekenai?
13 Lauma dalanai lalo-parara ita abia ena badina ma ta ia noho. Isaia ia peroveta, ia gwau: “Emui matadia dekenai, emui Hadibaia Tauna do umui itaia.” (Isaia 30:20) Abidadama dainai ita lalo-parara Iehova be ena tanobada oreana amo ita ia hadibaia noho. (Mataio 24:45-47) Dirava ita itaia ia be iseda Hadibaia Tauna Badana bamona, ena anina be Baibel ita stadilaia bona Keristani heboudia ita lao henia hanaihanai sibona lasi. Ena anina be Dirava ia henia lauma gaudia ibounai ita gaukaralaia namonamo. Hegeregere, namona be Iehova ese Iesu amo ia henia hakaua herevadia ita dogoatao bona badinaia, unai amo lauma dalanai do ita boio lasi.—Heberu 2:1.
14 Nega haida ita hekwarahi bada be namo lauma aniani ena namo ibounai abia totona. Hegeregere, reana Baibel sivarai haida ita lalo-pararalaia be auka dainai idia ita duahia haraga sibona. Gima Kohorona bona Awake! magasin ita duahia neganai, reana hereva haida ita duahia lasi badina idia herevalaia gaudia ita ura henia bada lasi. Eiava Keristani hebou lalodiai gau ma haida ita lalohadailaia. To, bema idia herevalaia gaudia ita lalohadailaia namonamo, do ita hesiku lasi. Bema idia hadibaia lauma gaudia ita laloa bada, ia hahedinaraia ita lalo-parara Iehova be iseda Hadibaia Tauna Badana.
Iseda Kara Ena Badina Do Ita Gwauraia Hedinarai
15. Edena dala ai haida edia kara be hegeregere Iehova ese idia ia itaia lasi?
15 Hari inai “dokona negana” lalonai kara dika be bada herea, unai dainai ita itaia diba lasi Diravana ita abidadama henia be gau badana. (Daniela 12:4) Gabu ibounai lalonai koikoi karadia bona matabodaga karadia be momo herea. Momokani, aonega karana be ita laloatao taunimanima ese iseda kara idia itaia diba lasi to hanaihanai Iehova ese ia itaia diba. Haida be unai hereva momokanina idia laloa noho lasi. Taunimanima ma haida ese idia itadia lasi neganai, reana Baibel ia taravatua karana ta idia karaia. Hegeregere, haida ese Internet, televisen, bona gau ma haida ese idia hahedinaraia moale karadia dikadia bona matabodaga laulaudia raraia hedibaganina idia dadaraia lasi. Unai bamona gaudia be hehuni gabuna ai idia karaia diba dainai, haida edia kara be hegeregere idia laloa Iehova ese idia ia itaia lasi.
16. Iehova ena taravatu hereadaedia ita badinaia totona, dahaka ese ita do ia durua?
16 Namona be aposetolo Paulo ena hereva ita laloatao: “Ita ibounai ta ta ese, iseda kara ena badina, be Dirava ena vairana dekenai do ita gwauraia hedinarai.” (Roma 14:12) Namona be ita diba, nega ta ta ai ita kara dika neganai, ita be Iehova dekenai ita kara dika noho. Unai ita diba dainai, ita ia durua iena taravatu hereadaedia ita badinaia bona kara miro ita dadaraia. Baibel ese ita ia hadibaia: “Gau ta Dirava dekena amo ita hunia diba lasi. Dirava ese ia karaia gaudia ibounai nega ibounai ia itaia noho. Idia be hanaihanai iena matana edia vairanai idia noho. Bona Dirava ese danu iseda kara do ia kota henia.” (Heberu 4:13) Momokani, Dirava dekenai iseda kara ena badina do ita gwauraia hedinaraia, to Iehova ena ura ita karaia bona iena kara maoromaoro taravatudia ita badinaia ena badina badana be ia ita lalokau henia bada. Unai dainai namona be moale karadia ita abia hidi neganai, eiava ita adavaia lasi tau o hahine ita kara henia neganai, aonega ita gaukaralaia bona ita naria namonamo.
17. Iehova ese ita ia itaia neganai, edena bamona ita ia laloa?
17 Iehova be mai ura bada ida ita dekenai idia vara gaudia ia itaia, to ita gwau lasi unai ena anina be ita kerere bena ita do ia panisi henia totona ia naria. Lasi, lalokau tamana bamona ita ia itaia, ia ura ena kamonai natudia dekenai ahuna namona ia henia. Iseda guba Tamana be iseda abidadama dainai ia moale bona ia ‘idia tahua taudia ibounai be davana namona do ia henidia,’ unai ita diba be moale gauna! (Heberu 11:6) Namona be Iehova ita abidadama henia momokani bona ‘iena hesiai gaukara ita karaia mai iseda kudouna ibounai ida.’—1 Sivarai 28:9.
18. Iehova ese ita bona iseda abidadama karadia ia itaia dainai, Baibel ese edena hagoadaia herevadia ia henia ita dekenai?
18 Aonega Herevadia 15:3 ia gwau: “Lohiabada ese gabu ibounai ia itaia noho . . . iseda kara ibounai ia itaia noho, kara dikadia bona kara namodia danu.” Oibe, Dirava ese kara dika taudia ia itaia bona unai hegeregerena ia kara henia. To, bema ita be “kara namodia” taudia huanai ita noho, ita diba Iehova ese iseda abidadama karadia ia itaia. Ita diba, ‘Lohiabada ena gaukara lalonai, iseda hekwarahi be hekwarahi kava lasi’ bona ita itaia diba lasi Diravana ena ladana dainai ita hahedinaraia lalokauna bona iseda “kara namodia do ia laloaboio lasi,” bona unai ese iseda abidadama ia hagoadaia momokani!—1 Korinto 15:58; Heberu 6:10.
Iehova Ita Boiria Ita Ia Tahua
19. Iehova abidadama henia goadagoada karana amo, dahaka namo haida ita davaria?
19 Ita be Iehova ena abidadama hesiai taudia dainai, ita be dava bada gaudia ia dekenai. (Mataio 10:29-31) Ena be ia ita itaia diba lasi, to ita dekenai ia noho momokani, bona iseda hetura karana namona ia ida ita laloa bada diba. Bema iseda guba Tamana dekenai unai bamona lalohadai ita abia, namo idauidau momo do ita abia. Iseda abidadama goadana ese ita do ia durua Iehova vairanai kudou goevana bona lalona ena mamina namona ita abia totona. Bema iseda abidadama lalonai koikoi be lasi, mauri daladia rua be nega tamona ai do ita badinaia lasi. (1 Timoteo 1:5, 18, 19) Dirava dekenai iseda abidadama goadana ese haheitalai namona ia henia bona ma haida do ia hagoadaia diba. (1 Timoteo 4:12) Danu, unai bamona abidadama ese Dirava badinaia karadia do ia habadaia, bona Iehova ena kudouna ia hamoalea.—Aonega Herevadia 27:11.
20, 21. (a) Dahaka dainai ita ura Iehova ese ita ia tahua noho be namo? (b) Edena dala ai ita be Salamo 139:23, 24 ita badinaia diba?
20 Bema ita aonega momokani, do ita moale Iehova be ita ia itaia noho. Ita ura ia ese ita ia itaia sibona lasi, to ita ura danu ia ese iseda lalohadai bona kara ia tahua namonamo. Guriguri lalonai, namona be Iehova ita noia ita ia tahua namonamo bona ia itaia bema maoro lasi uradia idia noho. Ia ese ita ia durua diba iseda hekwakwanai ita haheaukalaia bona gau haida ita haidaua totona. Mai maoro ida salamo torea tauna Davida be inai ane ia abia: “Dirava e, egu kudouna do oi tahua, ena dala ibounai do oi diba. Egu lalona danu do oi tohoa, bona egu laloa gaudia do oi davaria. Do oi itaia, bema egu lalona dekenai dika ta ia noho, bona noho hanaihanai dalana dekenai mani lau do oi hakaua.”—Salamo 139:23, 24.
21 Davida be Iehova ia noia ia do ia tahua bona do ia itaia bema ia lalonai “dika ta ia noho.” Salamo torea tauna hegeregerena, ita ura Dirava be iseda kudouna ia tahua bona do ia itaia bema ita lalonai ura kereredia idia noho, ani? Namona be mai abidadama ida Iehova ita noia ita do ia tahua. To edena bamona bema ita gari ita lalonai kerere ta eiava gau dikana ta do ia davaria? Namona be iseda lalokau Diravana, Iehova, dekenai ita guriguri noho bona mai manau ida iena lauma helaga ena hakaua henunai ita noho bona iena Hereva ena sisiba do ita badinaia. Ita diba momokani ita do ia durua bona mauri hanaihanai ia lao henia dalana dekenai do ita raka diba.—Salamo 40:11-13.
22. Ita itaia diba lasi Diravana ita laloa neganai, iseda lalona ita hadaia dahaka do ita karaia?
22 Oibe, bema Iehova ena hahegani ita badinaia, mauri hanaihanai ena hahenamo do ia henia. Momokani, iena goada bona siahu ita abia dae be namo, aposetolo Paulo ese ia karaia hegeregerena, ia gwau: “Dirava be Noho Hanaihanai King, ia mase diba lasi, matana dekenai ita itaia diba lasi, ia sibona mo be Dirava. Ia do ita matauraia, bona ia do ita hanamoa bada, harihari ia lao bona hanaihanai. Amen.” (1 Timoteo 1:17) Namona be nega ibounai Iehova dekenai unai bamona hemataurai bada karana ita hahedinaraia. Bona herevana dahaka ia vara, namona be iseda lalona ita hadaia ita goada noho bona itaia diba lasi Dirava ita itaia bamona.
Edena Bamona Do Oi Haere?
• Taunimanima be edena dala ai Dirava idia itaia diba?
• Bema Iehova be momokani ita dekenai, dagedage ita abia neganai edena bamona do ita kara?
• Iehova be iseda Hadibaia Tauna Badana bamona ita itaia ena anina be dahaka?
• Dahaka dainai ita ura Iehova ese ita ia tahua be namo?
[Picture on page 18]
Mose be Farao dekenai ia gari lasi, iena kara be Iehova, ia itaia diba lasi Diravana, ia itaia bamona
[Picture on page 21]
Namo lasi Iehova ese ita ia itaia lasi bamona ita kara
[Picture on page 23]
Dirava ena diba ita tahua goadagoada badina ita itaia ia be iseda Hadibaia Tauna Badana