Badinaia Karana Ita Hahedinaraia Ena Anina be Dahaka?

LAGANI 200 B.C.E. murinai idia noho Hasidim taudia idia laloa idia ese badinaia karana idia hahedinaraia momokani. Edia ladana be inai hereva cha·sidhʹ amo ia mai, Heberu gado dekenai ena anina be “badinaia karana.” Ia be inai hereva cheʹsedh amo idia abia bona nega momo idia hahanaia “hebogahisi mai lalokauna,” “lalokau mai abidadama,” “kara namo,” “namo,” bona “hebogahisi.” Theological Dictionary of the Old Testament ena hereva bamona, cheʹsedh be “ia goada, ma haida ida ia gaukara hebou, bona ia haheauka [bona] ia be taunimanima edia lalohadai sibona lasi, to unai lalohadai amo ia vara kara ia hahedinaraia danu. Unai kara ese mauri ia gimaia eiava ia durua. Dika ta eiava hisihisi ia davaria tauna totona kara ta ia karaia. Hetura karana ia hahedinaraia.”

Ia hedinarai, gado momo dekenai hereva tamona ese Baibel lalonai idia gaukaralaia bamona unai Heberu herevana ena anina ia hahedinaraia goevagoeva diba lasi. To, Baibel lalonai badinaia karana ena anina be mai kamonai ida gwauhamata badinaia karana sibona lasi. Ena anina ta be lalokau bona ma haida durua karadia hahedinaraia karana. Badinaia karana momokanina ita lalo-pararalaia totona, Iehova ese Aberahamo, Mose, Davida, Israela besena, bona taunimanima ibounai dekenai unai kara ia hahedinaraia dalana mani oi itaia.

Iehova ese Badinaia Karana Ia Hahedinaraia

Iehova ese ena turana Aberahamo ia hamaoroa: “Lau be oiemu kesi.” (Genese 15:1; Isaia 41:⁠8) Iehova ia hereva kava lasi. Ia ese Aberahamo bona ena bese taudia be Farao bona Abimeleka amo ia hamauria. Aberahamo ia durua, Lota be king taudia hani amo ia hamauria totona. Bona mauri lagani 100 tauna Aberahamo bona mauri lagani 90 hahinena Sara dekenai natuna havaraia siahuna ia henia lou, gwauhamata Garana be idia amo ia vara diba totona. Iehova be hanaihanai Aberahamo ida ia herevahereva matahanai, nihi, bona ena hesiai anerudia amo. Momokani, Iehova ese Aberahamo ena mauri negana ai ia dekenai badinaia karana ia hahedinaraia bona ia mase murinai danu. Ena be Aberahamo ena tubudia, Israela besena, idia gwau-edeede to Iehova ese ena gwauhamata idia dekenai ia makohia lasi. Iehova ena hetura karana Aberahamo ida ese badinaia karana momokanina ia hahedinaraia​​—⁠ia be kara amo ia hedinarai lalokauna.​​—⁠Genese, karoa 12 ia lao 25.

Baibel ia gwau, “Lohiabada ese Mose ia hereva henia, tau ta ese iena turana ia hereva henia bamona.” (Esodo 33:11) Oibe, Mose ena hetura karana Iehova ida be Iesu ia do vara lasi neganai idia noho peroveta taudia ma haida edia hetura karana ia hereaia. Edena dala ai Iehova ese Mose dekenai badinaia karana ia hahedinaraia?

Mose ena mauri lagani be 40 bona ia be mai ena goada bona diba dainai, ia sibona ese ena taunimanima ia ruhaia gwauraia. To unai be nega maorona lasi. Iena mauri ia haboioa garina ia heau. Lagani 40 ai, Midiana tanona dekenai mamoe ia naridia. (Kara 7:​23-​30) To, Iehova ese ia rakatania lasi. Nega maorona ai, Mose be Aigupito dekenai ia siaia lou Israela taudia ia ruhaia totona.

Unai hegeregerena, Iehova ese Israela ena ladana bada king iharuana Davida dekenai badinaia karana ia hahedinaraia. Davida be do matamata neganai, Iehova be peroveta tauna Samuela dekenai ia gwau: “Oi toreisi, ia dekenai olive dehoro do oi bubua, lau ura henia tauna be inai.” Unai nega amo, Iehova ese Davida, vaira negana ai Israela ibounai ena king ai do ia lao tauna, ia rakatania lasi to ia gimaia bona hakaua. Iehova ese Davida be “laiona bona bea” dekena amo bona Pilistia tauna badana Goliata amo ia hamauria. Iehova ese Davida ia durua nega momo Israela taudia edia inai taudia ia hadarerea totona, bona mama bona badu tauna Saulo ena io amo ia hamauria.​​—⁠1 Samuela 16:12; 17:37; 18:11; 19:⁠10.

Momokani, Davida be goevadae tauna lasi. Oibe, kara dika badana ia karaia. To, Davida ia helalo-kerehai momokani dainai Iehova ese ia rakatania lasi, to ia dekenai lalokau mai abidadama ia hahedinaraia. Davida ena mauri dinadia ibounai lalonai, Iehova ese Davida ena mauri ia gimaia bona ia durua. Hisihisi ia davaria tauna totona kara ta ia karaia. Hebogahisi mai lalokauna ia hahedinaraia!​​—⁠2 Samuela 11:1–​12:25; 24:​1-​17.

Israela besena ibounai be Sinai Ororona dekenai idia gwau Iehova ese Mose amo ia karaia Taravatu gwauhamatana ena hereva do idia badinaia neganai, unai gwauhamata dainai idia be Iehova ida hetura karana do idia moalelaia. (Esodo 19:​3-8) Unai dainai, Israela besena be Iehova ida ia headava bamona. Baibel ese Israela besena inai bamona ia gwauraia: “Israela e, oi be headava matamata hahine bamona.” Bona Iehova be ia dekenai ia gwau: “Lauegu lalokau be oi dekenai do lau henia, ela bona hanaihanai.” (Isaia 54:​6, 8) Unai hetura karana lalonai, Iehova ese edena dala ai badinaia karana ia hahedinaraia?

Iehova ese Israela taudia edia dabu gaudia ia henia bona ena hetura karana idia ida ia hagoadaia. Ia ese Aigupito amo idia ia ruhaia, bese ta ai ia halaoa, bona “aniani namodia gabuna” dekenai ia hakaudia lao. (Esodo 3:⁠8) Ia ese hahelaga taudia, Levi taudia, peroveta bona ena hereva idia gwauraia taudia ma haida amo hanaihanai lauma dalanai idia ia hadibaia. (2 Sivarai 17:​7-9; Nehemia 8:​7-9; Ieremia 7:​25) Unai bese ese dirava ma haida idia tomadiho henia neganai, Iehova ese idia ia matahakani henidia. Idia helalo-kerehai neganai, ia gwaudiatao. Israela be “hahine” mai ena kara aukana. To, Iehova ese ia rakatania haraga lasi. Aberahamo dekenai ia henia gwauhamatana dainai, Israela taudia Ia badinaia ela bona Iena ura idia totona ia hagugurua. (Deuteronomi 7:​7-9) Hari inai negai, unai be haheitalai namo herea headava taudia totona!

Iehova ese taunimanima ibounai dekenai badinaia karana ia hahedinaraia danu, idia ibounai, kara maoromaoro taudia bona kara maoromaoro lasi taudia, dekenai mauri durua gaudia badadia ia henia. (Mataio 5:​45; Kara 17:25) To unai sibona lasi, ia ese ena Natuna be mauri davalaia boubou gauna bamona ia henia danu, unai amo taunimanima ibounai dekenai dala ia kehoa, kara dika bona mase ena igui amo idia ia ruhaia diba bona tanobada Paradaisona dekenai mauri goevadaena idia moalelaia diba ela bona hanaihanai totona. (Mataio 20:28; Ioane 3:​16) Unai mauri davalaia boubouna be kara hereadaena mauri gimaia bona durua totona. “Dika ta eiava hisihisi ia davaria tauna totona kara ta ia karaia” karana ia hahedinaraia momokani.

Kara Namodia amo Oiemu Badinaia Karana Oi Hamomokania

Badinaia karana be inai hereva, hebogahisi mai lalokauna, hegeregerena dainai, ia ese ma ta dekenai kara namo haloua urana ia hahedinaraia danu. Bema ta be oi dekenai hebogahisi mai lalokauna ia hahedinaraia, ia laloa diba oi be unai bamona kara ia dekenai do oi hahedinaraia danu. Ta ena badinaia karana hegeregerena do oi henia lou. Davida ese ena hereva amo ia hahedinaraia unai hereva cheʹsedh ena anina ia lalo-pararalaia, badina ia gwau: “Oiemu Dubu Helaga ena vairana dekenai do lau tui diho, bona oiemu ladana do lau hanamoa.” Dahaka dainai? Badina “oiemu noho hanaihanai lalokauna, bona oiemu abidadama kara” dainai. (Salamo 138:⁠2) Davida be Iehova ena hebogahisi mai lalokauna ia mamia bona unai ese ia veria, Iehova ia tomadiho henia bona hanamoa totona. Unai dainai, Iehova ese ita dekenai ia hahedinaraia hebogahisi mai lalokauna ita lalohadailaia neganai, unai ese ita ia veria ia dekenai unai bamona do ita karaia totona, a? Hegeregere, bema haida ese Iehova ena ladana idia hadikaia, ena ladana oi laloa bada dainai unai ese oi do ia veria ia totona do oi hereva, a?

Keristani tauna matamatana bona ena adavana be edia varavara ta, motabaik aksiden ia abia bona ia mase tauna, ena mase guria hebou totona idia lao neganai, unai bamona idia karaia. Dubu dekenai idia karaia lasi, unai dainai idia mai taudia ese mase tauna idia herevalaia diba. Hereva ia henia tauna ta ia gwau unai tau matamatana ia mase haraga be Dirava ena kerere, ia gwau, ‘Dirava ia ura ia be guba dekenai ia lao, unai dainai ena mauri ia kokia.’ Iseda Keristani tadikaka ia davaria ia hereva lasi be auka. Ena be ia dekenai Baibel ia noho lasi bona pepa dekenai hereva haida ia torea lasi, to platfom dekenai ia raka lao. Bena ia nanadaidia: “Umui laloa hebogahisi bona siahu ibounai Diravana ese unai bamona kara ia lalo-namo henia a?” Bena miniti 10 lalonai Baibel siridia amo ita mase ena badina, Dirava ese taunimanima be mase amo ia ruhaia totona ia kehoa dalana, bona toreisi lou bona tanobada paradaisona dekenai noho hanaihanai helaro namona ia gwauraia hedinarai. Unai mase guria hebou totona idia mai taudia 100 mai kahana be nega daudau lalonai edia imana idia hapatapataia. Unai tadikaka be gabeai ia gwau: “Egu lalona dekenai guna lau mamia lasi moalena lau mamia. Iehova lau tanikiu henia, badina iena aonega be lau dekenai ia hadibaia bona dala ia kehoa, ena ladana helagana lau gwauraia hedinarai totona.”

Iehova ita badinaia ena anina ta be ena Hereva, Baibel, ita badinaia. Dahaka dainai? Badina Baibel amo Iehova ese ita dekenai mauri dalana maorona ia hadibaia. Ia lalonai idia noho taravatu bona hakaua herevadia be mauri ena hadibaia herevadia namo herea bona unai amo namo ita davaria. (Isaia 48:17) Namo lasi ma haida ese idia doria dainai eiava sibona emu manoka gaudia dainai, Iehova ena taravatu badinaia karana amo oi raka siri. Dirava ena Hereva oi badinaia noho.

Dirava oi badinaia ena anina ma ta be ena orea do oi badinaia. Idia hanai lagani lalodiai, iseda lalo-parara Baibel ena siri haida dekenai idia hamaoromaoroa bona habadaia. Taunimanima ma haida be lauma dalanai idia boga kunu lasi, ita bamona. (Mataio 24:​45-​47) Ita daradara lasi, Iehova ese ena hari inai negai oreana ia durua noho. Ita danu be unai bamona ita karaia be namo, ani? A. H. Macmillan be unai bamona ia karaia. Kahirakahira do ia mase neganai, ia gwau: “September 1900 ai, egu mauri lagani be 23 bona Dirava dekenai egu mauri lau gwauhamatalaia neganai, Iehova ena orea be maragi bona lau itaia Dirava ena hereva momokani idia harorolaia goadagoada moale taudia edia tanobada ibounai oreana ai ia lao. . . . Hari, tanobada ai egu hesiai gaukara Dirava dekenai ia ore gwauraia neganai lau diba momokani, Iehova ese ena taunimanima ia hakaua bona idia abia be namo gaudia be nega korikori ai ia henidia.” Tadikaka Macmillan ese lagani 66 lalonai Iehova ia badinaia bona mai kamonai ida ena hesiai gaukara ia karaia, ela bona August 26, 1966 ai ia mase. Iehova ena tanobada oreana badinaia karana ena haheitalai namona ia hahedinaraia.

Orea dekenai sibona lasi, to ita ta ta dekenai badinaia karana ita hahedinaraia, a? Dagedage bada ita davaria diba neganai, iseda tadikaka bona taihu do ita badinaia noho, a? Tanobada Tuarina Iharuana lalonai, iseda tadikaka Netherlands dekenai ese badinaia karana dekenai haheitalai namona idia hahedinaraia. Groningen Kongregesen ena elda ta ladana Klaas de Vries be Nazi Gestapo taudia ese mai edia hebogahisi lasi ida idia henanadai henia, dina 12 ai dibura daiutuna maragina lalonai ia sibona ia noho bona ia dekenai beredi bona ranu sibona idia henia, bena idia henanadai henia lou. Ipidi be ia dekenai idia poinia bona idia gwau do idia hamasea, bema miniti rua lalonai maduna idia huaia tadikaka idia noho gabudia bona mai anina bada herevadia ma haida ia gwauraia lasi. Klaas ia gwauraia hereva tamona sibona be: “Gau ta do lau gwauraia lasi. . . . Egu tadikaka do lau hadikaia lasi.” Nega toi ipidi amo idia hagaria. To Gestapo taudia idia hesiku, bona Klaas be dibura ma ta dekenai idia siaia lao. Ena tadikaka edia ladadia ia henia lasi.

Iseda varavara korikorina​​—⁠iseda adavana​—⁠dekenai badinaia karana do ita hahedinaraia, a? Iehova ese ena gwauhamata Israela besena ida ia badinaia hegeregerena, ita ese iseda headava gwauhamatana ita badinaia, a? Emu maduna emu adavana dekenai oi badinaia sibona lasi, to namona be oi gaukara goada, ia ida emu hetura karana oi hagoadaia totona. Namona be gau haida oi karaia emu headava ia goada totona. Nega umui atoa umui noho hebou totona, mai momokani ida umui herevahereva namonamo hebou, umui durua bona hagoadaia heheni, umui kamonai heheni, umui kiri hebou, umui tai hebou, umui gadara hebou, umui gaukara hebou emui tahua gaudia umui davaria totona, umui ta ta umui hamoalea, turadia ai umui lao. Namona be umui naria namonamo lalokau hemami be ma haida totona ia vara garina. Ena be ia maoro bona namo headava murimurinai ma haida oi hetura henia totona, to emu lalokau hemami be emu adavana sibona totona. Tau ta be oi bona emu adavana huanai ia mai be namo lasi.​​—⁠Aonega Herevadia 5:​15-​20.

Namona be emu Witnes turadia bona ruma bese taudia dekenai badinaia karana oi hahedinaraia. Lagani idia hanaia lalonai, idia oi laloaboio lasi. Oi tore henidia, telefon amo oi ringi henidia, eiava idia oi vadivadi henia. Herevana emu mauri lalonai emu noho be edena bamona, idia dekenai lalohisihisi oi havaraia lasi. Namona be oiemu kara dainai mai moale ida do idia gwau oi idia diba eiava idia be oiemu varavara. Idia dekenai badinaia karana oi hahedinaraia karana amo, kara maoromaoro do oi goadalaia bona unai ese oi do ia hagoadaia.​​—⁠Eseta 4:​6-​16.

Oibe, badinaia karana momokanina ena anina be kara namodia do ita karaia, hetura karana namodia ita gimaia totona. Namona be oi hekwarahi Iehova ena hebogahisi mai lalokauna oi haloua totona. Keristani kongregesen, emu adavana, ruma bese taudia, bona turadia oi kara henidia neganai, Iehova ese ia hahedinaraia badinaia karana oi tohotohoa. Mai kamonai ida emu dekena taudia dekenai Iehova ena kara namodia oi gwauraia. Salamo torea tauna ese unai ia gwauraia maoro, ia gwau: “Lohiabada e, oiemu lalokau bada dainai ane do lau abia nega ibounai. Lau ese oiemu maoromaoro bona momokani do lau gwauraia hanaihanai.” (Salamo 89:⁠1) Ita ura unai bamona Dirava kahirakahira ita lao, ani? Momokani, “iena lalokau bona bogahisihisi, be do idia noho ela bona hanaihanai.”​​—⁠Salamo 100:⁠5.

[Picture on page 23]

A. H. Macmillan