‘Haheauka be Dabua Bamona Umui Atoa’
“Inai bamona karadia, dabua bamona do umui atoa: Bogahisihisi, . . . bona haheauka.”—KOLOSE 3:12.
1. Haheauka ia hahedinaraia tauna ena haheitalai namona oi gwauraia.
FRANCE ena sautwest kahanai ia noho tauna Régis be lagani 1952 ai bapatiso ia abia bona Iehova ena Witnes tauna ta ai ia lao. Lagani momo lalonai ena adavana ia hekwarahi bada, Régis ena hesiai gaukara Iehova dekenai ia koua totona. Ia ese Régis ena motabaik ena taea ia hadikaia Régis be hebou dekenai ia lao diba lasi totona, bona nega ta Régis be ruma ta ruma ta ai Baibel ena hereva ia harorolaia neganai, ia murinai ia raka bona Régis ese ruma taudia dekenai Basileia ena sivarai namona ia herevalaia neganai ia hevasehalaia. Ena be Régis ese unai bamona dagedage karana ia davaria, to haheauka ia hahedinaraia. Unai dala ai, Régis be haheitalai namona Keristani taudia ibounai dekenai, badina Iehova ia ura ia idia tomadiho henia taudia ibounai ese ma haida idia kara henia lalonai idia haheauka.
2. Greek gado herevana idia hahanaia “haheauka” ena anina korikorina be dahaka, bona unai hereva ese dahaka karadia ia hahedinaraia?
2 Greek gado herevana idia hahanaia “haheauka” ena anina korikorina be “ta ena kara ia biagua lalohadaina ena lata.” Buka Helaga ai unai hereva idia hahanaia neganai, nega 12 “haheauka” idia torea, nega ta “davana ia henia haraga lasi” idia torea, bona nega ta “ia naria noho, mai haheauka ida” idia torea. Heberu bona Greek gado herevadia ruaosi, idia hahanaia “haheauka,” ese naria karana, hemami biagua karana, bona badu haraga lasi karana idia hahedinaraia.
3. Edena dala ai Keristani taudia edia lalohadai haheauka dekenai be aposetolo taudia edia negai idia noho Greek taudia edia lalohadai amo ia idau?
3 Aposetolo taudia edia negai, Greek taudia idia laloa haheauka be kara namona ta lasi. Stoic aonega taudia ese nega ta unai hereva idia gaukaralaia lasi. Baibel ia diba bada tauna William Barclay ia gwau, haheauka be “Greek taudia idia laloa kara namodia amo ia idau momokani,” idia laloa kara namodia ta be “hadikaia hereva ta eiava hadikaia karana ta haheaukalaia lasi karana.” Ia gwau: “Greek taudia idia laloa davana henia totona ia hekwarahi tauna be tau badana. Keristani taudia idia laloa davana henia totona dala ia kehoa neganai danu, davana ia henia lasi tauna be tau badana.” Reana Greek taudia idia laloa haheauka be manoka ena toana, to inai gauna dekenai danu, “Dirava ena kavakava ese taunimanima edia aonega ia hereaia noho, bona Dirava ena manoka ese taunimanima edia goada ia hereaia noho.”—1 Korinto 1:25.
Keriso ese Haheauka Ia Hahedinaraia
4, 5. Iesu ia haheauka lalonai edena bamona haheitalai namona ia henia?
4 Keriso Iesu ena haheitalai haheauka karana dekenai be namo herea, Iehova sibona ena ese ia hereaia. Dagedage badana lalonai danu, Iesu ese haheauka bada ia hahedinaraia. Ia idia perovetalaia: “Idia dagedage henia, bona idia hisihisi henia, to ia ese iena uduna ia kehoa lasi. Mamoe ena natuna be, idia alaia gabuna dekenai idia hakaua lao bamona, o mamoe be huina utua taudia edia vairanai, regena ta ia karaia lasi bamona, ia ese hereva ta ia gwauraia lasi.”—Isaia 53:7.
5 Iesu be tanobada dekenai hesiai gaukara ia karaia negana ibounai lalonai, haheauka bada herea ia hahedinaraia! Ia ese ena inai taudia edia henanadai dikadia bona dagedage henia taudia edia hadikaia herevadia ia haheaukalaia. (Mataio 22:15-46; 1 Petero 2:23) Iena hahediba taudia ia haheauka henia, herevana idia amo daika be ia bada idia hepapahuahulaia loulou. (Mareko 9:33-37; 10:35-45; Luka 22:24-27) Bona Iesu idia samania hanuaboina ai, ia ese Petero bona Ioane ia hamaoroa ‘do idia naria’ to idia mahuta neganai, ia badu lasi to haheauka ia hahedinaraia!—Mataio 26:36-41.
6. Paulo ese Iesu ena haheauka dainai ia davaria namo be dahaka, bona unai amo dahaka ita diba?
6 Iesu ia mase bona ia toreisi lou murinai, haheauka ia hahedinaraia noho. Aposetolo Paulo ese unai ia laloa bada, badina guna ia be Keristani taudia dagedage henia tauna. Paulo ia gwau: “Inai lau gwauraia hereva be momokani herea, bona taunimanima ese idia [abia] dae bona hamomokania be namo: Keriso Iesu be tanobada dekenai ia mai, be kara dika taudia hamauria totona. Bona kara dika tau dikana momokani be lau inai. To Dirava ese lau ia bogahisihisi henia ena badina be inai: Keriso ia ura iena haheauka, be lau dekena amo do ia hedinaraia namonamo, taunimanima ibounai edia vairana dekenai. Vadaeni egu kara dika bada Keriso ese ia gwauatao, be idia itaia neganai, idia danu ia do idia abidadama henia, bona iena mauri hanaihanai do idia davaria.” (1 Timoteo 1:15, 16) Iseda mauri dala gunana be herevana, to bema Iesu ita abidadama henia, ita do ia haheauka henia—to momokani, ia ura ita ese ‘kara do ita karaia, eda lalona giroa hamomokania totona.’ (Kara 26:20; Roma 2:4) Keriso ena hereva Asia Minor dekenai idia noho kongregesen 7 totona idia hahedinaraia, ena be Keriso ia haheauka, to ia ura iseda kara ita hanamoa.—Apokalupo, karoa 2 bona 3.
Lauma Helaga ese Ia Havaraia Huahua Ta
7. Haheauka bona lauma helaga be edena dala ai idia gaukara hebou?
7 Paulo be Galatia taudia dekenai ia torea revarevana ena karoa 5 lalonai, tauanina ena kara be lauma helaga ese ia havaraia huahua ida ia hahegeregerea. (Galatia 5:19-23) Haheauka be Iehova ena kara ta dainai, unai kara be ia amo ia mai bona ia be ena lauma ese ia havaraia huahua ta. (Esodo 34:6, 7) Momokani, Paulo be lauma helaga ese ia havaraia huahua edia lista ia torea neganai, haheauka be namba 4, ma haida be “lalokau, moale, maino, . . . bogahisihisi, kara maoromaoro, abidadama momokani kara, manau, tauanina ena ura koua karana.” (Galatia 5:22, 23) Unai dainai, Dirava ena hesiai taudia ese iena kara, haheauka, idia hahedinaraia neganai, unai be lauma helaga ena heduru dainai ia vara.
8. Dahaka ese ita ia durua lauma helaga ena huahua iboudiai, haheauka danu, ita hahedinaraia totona?
8 To, Iehova ese iena lauma be ta dekenai ia doria lasi. Mai eda ura ida ena siahu henunai ita noho be namo. (2 Korinto 3:17; Efeso 4:30) Iseda kara ibounai lalonai lauma helaga ese ia havaraia huahua ita hahedinaraia neganai, ita ese dala ita kehoa lauma helaga be iseda mauri lalonai ia gaukara totona. Paulo ese tauanina ena kara bona lauma helaga ese ia havaraia huahua ia gwauraia murinai, ma ia gwau: “Lauma Helaga ese ita dekenai mauri ia henia vadaeni, unai dainai ia ese iseda mauri ia biagua be namo. Umui laloa kerere lasi, Dirava ita koia diba lasi. Bema tau ta aniani uhena ia hadoa, vadaeni unai bamona aniani sibona be do ia abia. Bema tauanina ena ura ia hadoa neganai, ia ese mase do ia abia. Bema Lauma ena gau ia hadoa neganai, ia ese mauri hanaihanai do ia abia.” (Galatia 5:25; 6:7, 8) Bema ita ura haheauka hahedinaraia lalonai ita kwalimu, gau badana be lauma helaga ese Keristani taudia lalonai ia havaraia huahua oredia ita hahedinaraia danu.
‘Lalokau be Davana Henia Ia Laloa Lasi’
9. Reana dahaka dainai Paulo ese Korinto taudia dekenai ia gwau ‘lalokau be davana henia ia laloa lasi’?
9 Paulo ese ia hahedinaraia lalokau bona haheauka idia gaukara hebou, badina ia gwau: “Lalokau be ia dekenai ia kara dika tauna davana ia laloa lasi.” (1 Korinto 13:4) Baibel ia diba bada tauna ta, Albert Barnes, ia laloa Korinto Keristani kongregesen lalonai idia vara hepapahuahu bona heai dainai Paulo ese unai ia gwauraia. (1 Korinto 1:11, 12) Barnes be ia gwau: “Iniseniai [haheauka totona] idia gaukaralaia herevana be haragaharaga karana amo ia idau: badu idia hahedinaraia hereva bona lalohadai, bona badu haraga karana amo ia idau. Ia hahedinaraia ta ese ia idia hadikaia, habadua, karadia ia HUAIA DAUDAU diba.” Lalokau bona haheauka ese Keristani kongregesen ena maino idia habadaia noho.
10. (a) Edena dala ai lalokau ese ita ia durua ita haheauka totona, bona unai dekenai aposetolo Paulo ena sisiba be dahaka? (b) Baibel ia diba bada tauna ese Dirava ia hahedinaraia davana laloa lasi bona hebogahisi karadia be edena bamona ia herevalaia? (Futnout itaia.)
10 ‘Lalokau be davana henia ia laloa lasi, mai ena hebogahisi, sibona ena gau ia tahua lasi, ia badu haraga lasi.’ Unai dainai, dala momo ai, lalokau ese ita ia durua ita haheauka totona.a (1 Korinto 13:4, 5) Lalokau dainai ita haheauka heheni bona ita laloatao ita ibounai be goevadae lasi taudia bona mai eda kerere. Ita ia durua ma haida edia hemami ita laloa bona edia kerere ita gwauatao totona. Aposetolo Paulo ese ita ia hagoadaia, ia gwau: “Nega ibounai do umui manau, do umui manada, bona do umui haheauka. Bema haida ese metau umui dekenai idia henia neganai, idia do umui lalokau henia noho. Lauma Helaga ese umui dekenai laloa tamona ia henia vadaeni, iena maino dekena amo. Inai maino be varo bamona umui ia guia hebou, orea tamona. Vadaeni do umui naria namonamo, inai maino do umui dogoatao noho.”—Efeso 4:1-3.
11. Dahaka dainai Keristani taudia idia noho hebou neganai idia haheauka heheni be gau badana?
11 Keristani taudia idia noho hebou neganai, hegeregere kongregesen ai, Betele ai, misinari rumadia ai, konstraksen ai, eiava idia karaia sikuli idauidau ai, idia haheauka heheni dainai, maino bona moale idia davaria. Edia kara, ura gaudia, idia tubu daladia, kara namo hahedinaraia daladia, bona goeva daladia danu, idia idauidau dainai, nega haida badu ia vara diba. Unai be ruma bese lalodiai ia vara diba danu. Badu haraga lasi karana be gau badana. (Aonega Herevadia 14:29; 15:18; 19:11) Idia ibounai ese haheauka—dika lalonai gini goada bona nega namona naria noho karana—idia hahedinaraia be gau badana.—Roma 15:1-6.
Haheauka ese Ita Ia Durua Ita Gini Goada Totona
12. Dahaka dainai hekwakwanai idia vara neganai ita haheauka be gau badana?
12 Haheauka ese ita ia durua, toana be do idia noho daudau eiava hanamoa dalana be lasi badu idia havaraia karadia lalonai ita gini goada totona. Matamanai ita herevalaia tauna Régis dekenai unai be momokani. Lagani momo lalonai, Régis ena adavana ese ena hesiai gaukara Iehova dekenai ia dagedage henia. To, nega ta Régis dekenai ia mai bona mai taitai ida ia gwau: “Lau diba ia be hereva momokani. Mani lau oi durua. Lau ura Baibel stadi lau abia.” Gabeai bapatiso ia abia bona Witnes taihuna ai ia lao. Régis ia gwau: “Unai ese ia hamomokania Iehova ese unai hekwarahi, haheauka, bona gini goada laganidia ia hanamoa.” Iena haheauka dainai davana namona ia abia.
13. Dahaka ese Paulo ia durua ia gini goada totona, bona ita gini goada totona ena haheitalai be edena bamona ita ia durua diba?
13 Aposetolo taudia edia negai, Paulo ena haheauka be haheitalai namo herea. (2 Korinto 6:3-10; 1 Timoteo 1:16) Paulo ena mauri ena dokona lalonai, iena turana matamata Timoteo ia sisiba henia neganai, ia gwau Keristani taudia ibounai ese hahetoho do idia davaria. Paulo ese ia sibona dekenai idia vara gaudia ia gwauraia bona ta be ia gini goada totona mai anina bada Keristani karadia ia gwauraia. Ia gwau: “Oi ese lauegu hadibaia hereva oi badinaia vadaeni. Bona lauegu kara, lauegu ura namodia, lauegu abidadama, lauegu haheauka, lauegu lalokau, inai ibounai oi itaia vadaeni. Oi itaia danu, metau ibounai lalonai lau goada noho. Oi diba danu, dagedage bona hisihisi momo ese lau idia hadikaia, Antioka dekenai, Ikonio dekenai, bona Lusitera dekenai. Dagedage idauidau edia hisihisi lau abia, to Lohiabada ese idia ibounai dekena amo lau ia hamauria. Oibe, Keriso Iesu danu idia hakapua dainai, Dirava badinaia idia ura taudia ibounai ese dagedage ena hisihisi do idia abia.” (2 Timoteo 3:10-12; Kara 13:49-51; 14:19-22) Do ita gini goada totona ita ibounai ese abidadama, lalokau, bona haheauka ita hahedinaraia be gau badana.
Haheauka be Dabua Bamona Oi Atoa
14. Paulo ese Dirava ia hahedinaraia karadia, haheauka karana bamona, be dahaka ida ia hahegeregerea, bona Kolose Keristani taudia dekenai edena sisiba ia henia?
14 Aposetolo Paulo ia gwau haheauka bona Dirava ia hahedinaraia kara ma haida be dabua bamona bona Keristani tauna ese “mauri gunana” ena kara ia kokia murinai ia atoa be namo. (Kolose 3:5-10) Ia gwau: “Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: Bogahisihisi, durua, manau, manada bona haheauka. Bema tau ta ese iena bamona tauna ia maumauraia, ia kara dika henia dainai, namona be unai dika do ia gwauatao. Lohiabada ese umui emui dika ia gwauatao, vadaeni unai bamona do umui karaia danu. To unai kara ibounai ia hereaia kara be lalokau. Do umui lalokau henia, vadaeni do umui noho hebou namo herea, mai laloa tamona danu.”—Kolose 3:12-14.
15. Keristani taudia ese haheauka bona Dirava ia hahedinaraia karadia ma haida be ‘dabua bamona idia atoa’ neganai dahaka ia vara?
15 Kongregesen taudia ese hebogahisi, kara namo, manau, manada, haheauka, bona lalokau be “dabua bamona” idia atoa dainai, hekwakwanai idia hanaia diba bona lalo-tamona ai Iehova ena hesiai gaukara idia karaia hebou. Keristani naria taudia idia haheauka be gau badana. Reana nega haida Keristani tauna ma ta idia sisiba henia be mai badina, to dala idauidau ai unai idia karaia diba. Paulo ese Timoteo ia tore henia neganai dala namona ia hahedinaraia, ia gwau: “Taunimanima do oi sisiba henia, . . . oi hagoadaia, bona idia do oi hadibaia, mai oiemu haheauka danu.” (2 Timoteo 4:2) Oibe, hanaihanai mai haheauka, hemataurai, bona kara namo ida Iehova ena mamoe idia kara henia be namo.—Mataio 7:12; 11:28; Kara 20:28, 29; Roma 12:10.
Taunimanima Ibounai Ita Haheauka Henidia
16. Taunimanima ibounai ita haheauka henidia neganai dahaka ia vara diba?
16 Iehova ese taunimanima ia haheauka henidia dainai, maduna ita abia taunimanima ibounai ita haheauka henidia. (1 Tesalonika 5:14, NW ) Unai ena anina be Witnes lasi ruma bese taudia, dekena taudia, gaukara turadia, bona sikuli turadia ita haheauka henidia. Witnes taudia inai henia kava karadia momo idia ore badina Witnes taudia ese, nega haida lagani momo lalonai, gaukara eiava sikuli ai ta hahemaraia hevaseha herevadia idia gwauraia bona dagedage karadia idia karaia taunimanima idia haheauka henidia. (Kolose 4:5, 6) Aposetolo Petero ia gwau: “Dirava idia diba lasi taudia edia vairanai, kara namodia do umui karaia. Momokani, hari idia ese umui idia gwauraia kerere noho. To bema emui kara namodia idia itaia neganai, idia ese Dirava do idia hanamoa, Keriso do ia giroa mai dinana dekenai.”—1 Petero 2:12.
17. Edena dala ai ita ese Iehova ena lalokau bona haheauka ita tohotohoa diba, bona dahaka dainai unai ita karaia be gau badana?
17 Iehova ena haheauka dainai taunimanima milioni momo ese hahemauri do idia abia. (2 Petero 3:9, 15) Bema ita ese Iehova ena lalokau bona haheauka ita tohotohoa, mai haheauka ida Dirava ena Basileia ena sivarai namona ita harorolaia noho bona ma haida ita hadibaia Keriso ena Basileia ena siahu henunai do idia noho be namo. (Mataio 28:18-20; Mareko 13:10) Bema haroro gaukara ita hadokoa, ia be hegeregere ita ura Iehova ese haheauka ia hahedinaraia negana ita hakwadogia bona unai haheauka ena badina, taunimanima idia helalo-kerehai, ita lalo-pararalaia namonamo lasi.—Roma 2:4.
18. Paulo ese Kolose taudia totona dahaka ia gurigurilaia?
18 Paulo ese Kolose Keristani taudia, Asia Minor dekenai, ia torea henia, ia gwau: “Unai dainai emui sivarai ai kamonai dinana ia mai bona harihari, guriguri umui dainai ai ruaosi ese ai hadokoa lasi. Dirava ai noia, ia ese iena ura dalana umui dekenai do ia hadibaia, bona Lauma Helaga ena diba bona diari umui dekenai do ia henia. Vadaeni Lohiabada ena ura hegeregerena do umui noho, bona nega ibounai umui ese ia do umui hamoalea. Emui mauri ese kara namodia edia anina do idia havaraia, bona Dirava ena diba bona diari ese umui do idia hatubua daekau. Ai ruaosi ai noinoi danu, Dirava ese umui do ia hagoadaia, vadaeni iena siahu dekena amo, metau ibounai lalonai do umui gini goada, mai haheauka danu. Bona emui hisihisi lalonai, mai moale danu do umui noho.”—Kolose 1:9-11.
19, 20. (a) Dahaka ese ita ia durua bena ita dekenai Iehova ese haheauka ia hahedinaraia noho karana be hahetoho lasi? (b) Ita haheauka neganai dahaka namo ia vara?
19 Iehova ese haheauka ia hahedinaraia noho be ita dekenai hahetoho lasi bema ‘Dirava ena ura ita diba,’ unai ura be “taunimanima ibounai ese mauri do idia davaria, bona hereva momokani do idia diba.” (1 Timoteo 2:4) ‘Kara namodia edia anina do ita havaraia’ bona “Basileia ena Sivarai Namona” ita harorolaia lalonai unai anina ia bada. (Mataio 24:14) Bema mai kamonai ida unai ita karaia noho, Iehova ese ita “do ia hagoadaia,” bona do ita hegeregere ‘ita gini goada mai haheauka bona moale danu.’ Unai ita karaia neganai, ‘Iehova ena ura hegeregerena ita noho,’ bona maino ita abia badina ita diba ‘nega ibounai ia ita hamoalea.’
20 Namona be ita diba momokani Iehova ia haheauka be aonega karana. Ia dainai hahemauri do ita abia bona iseda haroro bona hadibaia herevadia idia kamonai taudia ese hahemauri do idia abia danu. (1 Timoteo 4:16) Lauma helaga ese ia havaraia huahua—lalokau, hebogahisi, kara namo, manau, bona sibona eda ura biagua karana—ita hahedinaraia karana ese ita idia durua mai moale ida ita haheauka totona. Do ita hegeregere momokani iseda ruma bese taudia bona kongregesen lalonai iseda tadikaka bona taihu ida maino ai ita noho. Haheauka ese ita ia durua danu, iseda gaukara turadia bona sikuli turadia dekenai davana ita henia lasi totona. Bona ita haheauka be mai ena badina, kara dika taudia ita hamauria bona haheauka Diravana, Iehova, ita hanamoa.
[Footnote]
a Baibel ia diba bada tauna Gordon D. Fee ese Paulo ena hereva ‘lalokau be davana henia ia laloa lasi bona mai hebogahisi’ ia herevalaia neganai, ia gwau: “Paulo ena lalohadai lalonai, idia [davana henia lasi bona hebogahisi] ese Dirava be taunimanima dekenai ia hahedinaraia lalohadai rua idia laulaulaia (Rom. 2:4 itaia). Kahana ta ai, ia hedinarai Dirava be mai lalokau ida ia haheauka, badina taunimanima idia gwau-edeede neganai iena badu ia koua; kahana ta ai, iena kara namo be ena hebogahisi karadia tausen momo lalonai ia hedinarai. Unai dainai Paulo ese lalokau ia herevalaia neganai Dirava ena kara rua ia gwauraia guna, Dirava be Keriso amo ia hahedinaraia iena hahemaoro idia abia be maoro taudia ia kara henia neganai ena hemami ia biagua bona ia hebogahisi henidia.”
Anina Oi Gwauraia Diba, A?
• Edena daladia ai Keriso ese haheauka karana dekenai haheitalai namona ia hahedinaraia?
• Dahaka ese ita ia durua haheauka ita hahedinaraia totona?
• Edena dala ai haheauka ese ruma besedia, idia noho hebou Keristani taudia, bona elda taudia ia durua?
• Haheauka ita hahedinaraia neganai ita bona ma haida dekenai dahaka namo do ia vara?
[Picture on page 15]
Hahetoho badadia lalonai danu, Iesu ese ena hahediba taudia ia haheauka henia
[Picture on page 16]
Keristani naria taudia idia hagoadaia edia tadikaka idia kara henia lalonai haheauka idia hahedinaraia
[Picture on page 17]
Bema Iehova ena lalokau bona haheauka ita tohotohoa, sivarai namona ita harorolaia noho
[Picture on page 18]
Paulo ia guriguri Keristani taudia do ‘idia haheauka bona idia moale’