Gini Goada Bona Dirava Ena Ura Diba Namonamo

New World Translation Baibel Tanobada Ibounai Dekenai Taunimanima Milioni Momo ese Idia Moalelaia Bada

LAGANI 12, hua toi, bona dina 11 lalodiai idia haorea mai hekwarahi bada ida. To, March 13, 1960 ai, unai Baibel ena toretore ena kahana ginigabena idia hahanaia ore. Ladana idia gwauraia New World Translation of the Holy Scriptures.

Lagani ta murinai, Iehova ena Witnes taudia ese unai Baibel be buka tamona ai idia halasia. Lagani 1961 ai idia halasia gauna ena kopi ibounai be milioni ta idia printaia. Hari, idia printaia kopi ibounai edia namba be milioni handred ia hanaia vadaeni, unai dainai New World Translation be tanobada ibounai lalonai idia halasia Baibel ta. To, dahaka ese Witnes taudia edia lalona ia veria unai Baibel idia hegaegaelaia totona?

Dahaka Dainai Baibel Ma Ta Idia Hahanaia?

Iehova ena Witnes taudia ese lagani momo lalodiai English gado Baibel momo idia gaukaralaia, Revareva Helagadia edia hereva idia lalo-pararalaia bona harorolaia totona. Unai Baibel be mai edia namo idauidau, to nega momo tomadiho edia lalohadai bona Kerisendom ena hahediba herevadia idia hahedinaraia. (Mataio 15:⁠9) Unai dainai Iehova ena Witnes taudia idia lalo-parara namona be Baibel ta ese toretore helagadia ginigunadia edia hereva do ia hahedinaraia maoromaoro momokani.

Unai ia vara totona, October 1946 ai, Nathan H. Knorr, Iehova ena Witnes taudia edia Hakaua Oreana tauna ta, ese Baibel ta do idia hahanaia lalohadaina ia gwauraia. December 2, 1947 ai, New World Bible Translation Committee ese unai Baibel idia hegaegaelaia matamaia. Unai Baibel be toretore ginigunadia do ia badinaia momokani, vanegai idia davaria Baibel toretore gunadia amo idia dibaia gaudia do ia hahedinaraia, bona idia duahia taudia ese idia lalo-pararalaia gado ai do idia torea.

Lagani 1950 ai unai Baibel ena kahana ginigunana​​—⁠New World Translation of the Christian Greek Scriptures​​—⁠idia halasia neganai, ia hedinarai goevagoeva hahanaia taudia ese edia tahua gaudia idia hagugurua. Guna taunimanima ese idia lalo-pararalaia namonamo lasi Baibel siridia edia anina idia hedinarai goevagoeva. Hegeregere, taunimanima ese idia daradaralaia sirina, Mataio 5:3 ai, mani oi laloa: “Hekokoroku lasi momokani taudia be idia namo.” (Buka Helaga) Inai bamona idia hahanaia: “Idia diba lauma gaudia idia tahua be namo taudia idia moale.” Aposetolo Paulo ena hereva ta ia gwau “Dirava ena dala ita badinaia, be hunia gauna badana” (Buka Helaga) be unai Baibel ese ia hahanaia: “Inai Dirava badinaia karana ena hunia gauna helagana.” (1 Timoteo 3:16) Iena hereva ma ta “Hairai Diravana ena Sivarai Namona” (Buka Helaga) be unai Baibel ese ia hahanaia “moale Diravana ena sivarai namona mai hairaina.” (1 Timoteo 1:11) Ia hedinarai, New World Translation Baibel ese lalo-parara bada ia havaraia.

Diba bada taudia haida be idia hoa. Hegeregere, Baibel ia diba bada Britain tauna, Alexander Thomson, ia gwau New World Translation Baibel ese Greek gado ai idia vara noho eiava karaia noho gaudia idia hahedinaraia herevadia ia hahanaia maoromaoro. Haheitalai ta be inai: Efeso 5:25 ia gwau “Tatau e, emui adavadia umui lalokau henia noho.” Unuseniai inai sibona ia gwauraia lasi: “Tatau e, emui adavana do umui lalokau henia.” (Buka Helaga) Thomson ese New World Translation Baibel ia herevalaia neganai, ia gwau: “Toana be Baibel ma ta ese unai kahana maragimaragina ia hahedinaraia momo lasi bona ia goevagoeva lasi.”

New World Translation Baibel ena namo ma ta be Heberu bona Greek Revarevadia lalonai, Dirava ena ladana, Iehova, idia gaukaralaia. Momo ese idia gwauraia Taravatu Gunana dekenai Dirava ena ladana, Heberu gado ai, be kahirakahira nega 7,000 idia torea dainai, ia hedinarai goevagoeva iseda Havaraia Tauna ia ura ia idia tomadiho henia taudia be iena ladana do idia gaukaralaia bona ia do idia diba namonamo. (Esodo 34:​6, 7) New World Translation Baibel ese taunimanima milioni momo ia durua unai bamona idia karaia totona.

Gado Momo ai New World Translation Baibel Idia Halasia

English gado ai New World Translation Baibel idia halasia negana amo, Iehova ena Witnes taudia tanobada hegegemadai be idia ura edia gado dekenai unai Baibel idia abia danu​​—⁠bona badina namodia momo dainai. Tano haida ai, idia ese edia gado dekenai idia hahanaia Baibel idia abia be auka, badina unai Baibel idia halasia Bible Society taudia idia ura lasi edia Baibel be Iehova ena Witnes taudia ese idia abia. Danu, nega momo unai gado ai idia hahanaia Baibel ese mai anina bada hahediba herevadia idia hunia. Haheitalai ta be Europe ena saut kahana taudia edia gado ta ena Baibel lalonai Dirava ena ladana ia herevalaia kahana ta idia hunia, idia ese Iesu ena hereva “Oiemu ladana do ai hahelagaia” gabunai “Taunimanima ese oi do idia matauraia” idia torea.​​—⁠Mataio 6:⁠9.

Lagani 1961 amo, gado hahanaia taudia ese English gado New World Translation toretoredia be ma gado haida dekenai idia hahanaia matamaia. Lagani rua sibona murinai, ma gado 6 dekenai New World Translation of the Christian Greek Scriptures idia torea ore. Unai neganai, tanobada hegegemadai Witnes taudia hani hani amo toi toi ese unai Baibel be edia gado ai idia duahia diba. To, Iehova ena Witnes taudia ese taunimanima milioni momo dekenai unai Baibel ta idia henia diba totona, gaukara ma haida do idia karaia be namo.

Unai tahua gauna idia hagugurua totona, lagani 1989 ai Iehova ena Witnes taudia edia hedikwota dekenai Translation Services dipatmen idia haginia. Unai dipatmen ese gado hahanaia dalana ta idia havaraia, unai be Baibel herevadia stadilaia karana bona edia diba kompiuta dekenai idia hakapua. Unai dala idia gaukaralaia dainai, gado ma haida ai Keristani Greek Revarevadia be lagani tamona ai idia hahanaia diba bona Heberu Revarevadia be lagani rua ai idia hahanaia diba​—⁠to nega momo Baibel hahanaia gaukarana totona unai bamona nega be kwadogi momokani. Unai program idia havaraia negana amo, New World Translation Baibel be English gado amo ma gado 29 dekenai idia hahanaia bona taunimanima ibounai bilioni rua mai kahana ese idia herevalaia gadodia ai idia halasia. Hari ma gado 12 dekenai hahanaia gaukarana idia karaia. Guna amo ema bona hari, English gado New World Translation Baibel, ibounai eiava ena kahana ta, be gado 41 ai idia hahanaia vadaeni.

August 3, 1950 ai, New York City dekenai, Iehova ena Witnes taudia edia Theocracy’s Increase Hebouhebouna ai, New World Translation Baibel ena kahana ginigunana idia halasia ena nega amo ema bona hari, lagani 50 bamona idia hanaia vadaeni. Unai nega ai, Nathan H. Knorr ese hebouhebou taudia ia hagoadaia, ia gwau: “Inai Baibel umui abia. Umui duahia ore, unai be do umui moalelaia karana. Umui stadilaia, badina unai ese emu lalo-parara Dirava ena Hereva dekenai do ia habadaia. Ma haida dekenai umui henia.” Oi ai hagoadaia dina iboudiai Baibel oi duahia, badina be ena hereva ese oi ia durua diba ‘oi gini goada bona Dirava ena ura ibounai oi diba namonamo’ totona.​​—⁠Kolose 4:​12.

[Graph/Pictures on page 8, 9]

(For fully formatted text, see publication)

“Idia Halasidia Vadaeni New World Translation Baibel”

New World Translation be matamanai English gado ai idia halasia, bona hari unai Baibel ibounai eiava ena kahana be ma gado 41 ai idia halasia

Keristani Greek Revarevadia Baibel Ibounai

1950 1

1960-​69 6 5

1970-​79 4 2

1980-​89 2 2

1990-Hari 29 19