Lalohadai Tamona Idia Abia Lasi Tadikakadia
TAMA SINA idia abia hidi daladia ese edia natudia idia hanamoa eiava idia hadikaia diba. Eden umana ia noho neganai unai be momokani, bona hari ia momokani danu. Adamu bona Heva edia gwau-edeede karana ese dala badana ai taunimanima ibounai edia mauri dalana ia haidaua. (Genese 2:15, 16; 3:1-6; Roma 5:12) To, bema ita ura iseda Havaraia Tauna ida hetura karana namona ita havaraia, dala ia noho. Kaino bona Abela edia sivarai ese unai ia hahedinaraia, taunimanima edia histori lalonai idia be tadikaka ginigunadia.
Dirava ese Adamu bona Heva be Eden amo ia lulua murinai ia hereva henidia ena sivarai ta be Baibel lalonai ia noho lasi. To, Iehova be edia natudia memero ia hereva henia. Ita gwau diba Kaino bona Abela be edia tama sina amo ia vara karana idia dibaia. Idia itaia “Kerubi aneru ia haginidia, uma gabu gimaia totona. Bona lahi kaia danu ia atoa. Unai kaia be ia giroagiroa kahana ibounai dekenai. Inai aneru bona kaia ese mauri auna dekenai lao dalana ia koua momokani.” (Genese 3:24) Unai tatau idia itaia diba Dirava ena hereva be momokani, badina edia mauri lalonai gaukara auka amo varahu bona hisihisi idia mamia.—Genese 3:16, 19.
Reana Kaino bona Abela be Iehova ena hereva gaigai dekenai idia diba, ia gwau: “Bona lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:15, NW ) Kaino bona Abela be Iehova dekenai idia dibaia vadaeni gaudia ese idia do ia durua ena lalo-namo idia abia totona.
Kaino bona Abela be Iehova ena peroveta herevana bona ia be Durua Bada Tauna mai lalokauna idia laloa neganai, idia ura Dirava ena lalo-namo idia tahua. To unai ura do idia habadaia noho, a? Dirava tomadiho henia urana do idia badinaia bona lauma dalanai do idia goada idia lao ela bona ia idia abidadama henia momokani, a?—Mataio 5:3.
Boubou Gaudia Idia Henia
Gabeai, Kaino bona Abela be Dirava dekenai boubou gaudia idia henia. Kaino ese uma ena aniani ia bouboulaia, bona Abela ese ena mamoe, vara guna gaudia ia bouboulaia. (Genese 4:3, 4) Unai neganai, reana unai tatau edia mauri lagani be 100 bamona, badina Adamu ena mauri lagani be 130 neganai, ena mero, Seta, ia vara.—Genese 4:25; 5:3.
Kaino bona Abela edia boubou gaudia idia hahedinaraia idia lalo-parara idia be kara dika taudia bona idia ura Dirava ena lalo-namo idia abia. Reana idia ese Iehova ena gwauhamata gaigai bona hahine ena Garana dekenai idia laloa danu. Kaino bona Abela be Iehova ena lalo-namo idia abia totona, nega ena bada bona edia hekwarahi ena sivarai be Baibel lalonai ia noho lasi. To boubou idia henia neganai, Dirava ena kara idia dekenai ese idia ta ta edia lalohadai ia hahedinaraia.
Diba bada taudia haida idia gwau Heva ia laloa Kaino be gaigai do ia hamasea “garana,” badina Kaino ia vara neganai ia gwau: “Lohiabada ena durua dekenai mero ta lau abia vadaeni.” (Genese 4:1) Bema Kaino ese unai ia abia dae, ia kerere momokani. To, Abela be mai abidadama ida ena boubou ia henia. Unai dainai, “Abela ese Dirava ia abidadama henia, bona boubou gauna Dirava dekenai ia henia. Dirava ese Abela ena boubou gauna ia ura henia, to Kaino ena boubou gauna ia ura henia lasi.”—Heberu 11:4.
Abela be mai ena lalo-parara lauma dalanai bona Kaino ena lalo-parara lauma dalanai be lasi, to unai sibona lasi. Edia lalohadai idia idau danu. Unai dainai, “Lohiabada ese Abela ena harihari gauna dekenai ia moale, to Kaino, mai ena boubou gauna ia abia dae lasi.” Reana Kaino be ia henia boubouna ia lalohadailaia namonamo lasi, bona ia henia to mai ura ibounai ida ia karaia lasi. To Dirava be tomadiho karana sibona ia ura lasi. Kaino be kudouna dikana ia abia bona Iehova ia diba ia be lalohadai kererena ia abia. Dirava ese ena boubou ia dadaraia neganai, Kaino ena lalohadai korikorina ia hedinarai. Ena kara ia hamaoromaoroa lasi, to “Kaino be ia badu maragi lasi, bona badu dainai iena vairana ia metau.” (Genese 4:5) Iena vairana ese ena lalohadai bona ura dikadia ia hahedinaraia.
Sisiba Bona Kara
Dirava be Kaino ena lalohadai ia diba dainai, ia sisiba henia, ia gwau: “Badina be dahaka oi badu noho? Badina dahaka oiemu vairana ia metau noho? Bema kara namo oi karaia vadaeni, be oiemu boubou do lau abia dae. To dika oi karaia vadaeni dainai, kara dika be oiemu iduara dekenai ia naria noho, oi do ia hadikaia totona. Kara dika be ia ura biagua oi, to oi ese do oi halusia be namo.”—Genese 4:6, 7.
Unai sivarai ese ita dekenai gau ta ia hadibaia. Momokani, kara dika be iduara dekenai ia naria noho, ita ia abia haraga totona. To, Dirava be ita dekenai ura kwalimu ia henia, bona kara maorona karaia dalana ita abia hidi diba. Iehova be Kaino ia noia “kara namo oi karaia,” to Ia doria lasi ena kara ia haidaua totona. Kaino be sibona ena dala ia abia hidi.
Lauma helaga amo ia vara sivaraina ma ia gwau: “Kaino ese iena tadina Abela dekenai ia hereva, ia gwau, ‘Uma gabu dekenai ita raka namo.’ Ruaosi idia noho uma gabu neganai, Kaino ese iena tadina Abela dekenai ia heatu, ia alaia mase.” (Genese 4:8) Unai amo Kaino be gwau-edeede, hebogahisi lasi ala-ala tauna ta ai ia lao. Iehova ese ia nanadaia: “Oiemu tadina Abela be edeseni?” To unai neganai sori toana ta ia hahedinaraia lasi. Kaino be mai lalo-auka bona hekokoroku ida ia haere, ia gwau: “Lau diba lasi. Be, lau be egu tadina ena naria tauna, a?” (Genese 4:9) Unai koikoi bona maduna dadaraia karana ese Kaino ena hebogahisi lasi karana ia hahedinaraia.
Iehova ese Kaino ia gwauraia dika bona Eden kahirakahira gabuna amo ia lulua. Iehova ese tano ia gwauraia dika, bona Kaino ese unai do ia mamia momokani, tano dekenai uma namona do ia havaraia diba lasi. Ia be tanobada dekenai ruma lasi bona loa kava tauna ta ai do ia lao. Kaino be ena kerere davana ena metau ia maumauraia amo ia hahedinaraia iena tadina ia alaia dainai ta ese ia do idia alaia ia lalo-hekwarahilaia, to helalo-kerehai momokani toana ia hahedinaraia lasi. Iehova be “maka ta” Kaino totona ia atoa—hegeregere ia ese taravatu ta ia atoa bona haida ese do idia itaia bona unai kara davana haloua totona do idia alaia lasi.—Genese 4:10-15.
Bena Kaino be “Lohiabada dekena amo ia raka siri, bona tano ta ladana Loa Kava, Eden ena dina ia daekau kahana dekenai ia noho.” (Genese 4:16) Kaino be ena taihuna ta eiava ena tadina ta ena natuna kekeni ta ia adavaia, hanua ta ia haginia, bona unai hanua be ena natuna roboana, Enoka, ena ladana ia atoa. Kaino ena tubuna Lameka be dagedage tauna ai ia lao danu bona ena tubuna tau bamona Dirava ia badinaia lasi. To Kaino ena bese taudia ibounai be Noa ena negai ia vara Abata lalonai idia mase.—Genese 4:17-24.
Ita Ia Hadibaia Gaudia
Kaino bona Abela edia sivarai amo gau haida ita dibaia diba. Aposetolo Ioane be Keristani taudia ia hagoadaia idia lalokau heheni be namo, “Kaino ena kara bamona do [idia] karaia lasi, ia be Satani ena tau, bona ia ese iena tadina Abela ia alaia mase.” Kaino ena “kara be kerere, to iena tadina ena kara be maoromaoro.” Ioane ma ia gwau: “Iena tadikakana ia badu henia noho tauna be ala-ala tauna. Umui diba mauri hanaihanai be ala-ala tauna lalonai ia noho lasi.” Oibe, iseda Keristani tadikaka ita kara henia dalana be mai anina bada iseda hetura karana Iehova ida bona iseda vaira negana ai do ia vara gaudia dekenai. Bema iseda abidadama tamona taudia haida ita inai henia, Dirava ena lalo-namo do ita abia noho lasi.—1 Ioane 3:11-15; 4:20.
Kaino bona Abela be ruma bese tamona ai idia tubu, to Kaino be Dirava ia abidadama henia lasi. Momokani, ia ese Diabolo, idaunegai ‘alaia tauna bona koikoi ibounai ena tamana,’ ena lalohadai ia hahedinaraia. (Ioane 8:44) Kaino ena kara ese ia hahedinaraia ita ibounai be do ita badinaia dalana ita abia hidi diba, kara dika dalana idia abia hidi taudia be Dirava amo idia siri, bona Iehova be helalo-kerehai lasi taudia do ia hahemaoro henia.
To, Abela be Iehova ia abidadama henia. Momokani, “boubou gauna Dirava dekenai ia henia. Dirava ese Abela ena boubou gauna ia ura henia, to Kaino ena boubou gauna ia ura henia lasi. Abela ese Dirava dekenai ia abidadama henia, unai dainai Dirava ese kara maoromaoro tauna ia gwauraia.” Ena be Baibel lalonai Abela ena hereva ta ia noho lasi, to ena abidadama goadana amo ia “hereva” noho bamona.—Heberu 11:4.
Abela be Dirava idia badinaia taudia momo herea amo ia be tau ginigunana. Iehova ese iena rara, “tano dekena amo ia boiboi noho” gauna, be ia laloaboio lasi. (Genese 4:10; Luka 11:48-51) Bema iseda abidadama be Abela ena bamona, ita danu be Iehova ida nega daudau do ia noho hetura karana namona do ita abia diba.
[Box on page 22]
BIRU TAUNA BONA MAMOE NARIA TAUNA
Tano biru henia bona animal naria gaukarana be Dirava ese Adamu dekenai ia henia gaukara ginigunadia haida. (Genese 1:28; 2:15; 3:23) Ena natuna Kaino be biru gaukarana ia karaia, bona Abela be mamoe naria tauna ai ia lao. (Genese 4:2) Ela bona Abata ia vara, taunimanima edia aniani be au ena huahua bona uma aniani, unai dainai mamoe idia naria ena badina be dahaka?—Genese 1:29; 9:3, 4.
Unai mamoe idia hutuma idia lao totona, taunimanima ese idia naria be namo. Abela ena gaukara ia hahedinaraia taunimanima edia histori ia matamaia neganai, taunimanima be animal haida idia ubua bona idia naria. Baibel ia gwau lasi bema taunimanima ginigunadia ese animal edia rata idia gaukaralaia aniani totona, to uma aniani idia ania taudia be mamoe ena huina idia gaukaralaia diba. Bona mamoe idia mase neganai, edia kopina be mai anina bada gaukarana totona idia gaukaralaia. Hegeregere, Iehova be Adamu bona Heva dekenai dabua ia henidia totona, “boromakau edia kopina” ia henidia.—Genese 3:21.
To, toana be guna Kaino bona Abela idia gaukara hebou. Idia ese ruma bese taudia idia durua totona dabua bona aniani idia havaraia.
[Picture on page 23]
Kaino ena “kara be kerere, to iena tadina ena kara be maoromaoro”