“Hereva Momokani Laumana” Oi Abia Vadaeni, A?
“Tamana . . . ese Durua Tauna ta do ia henia umui dekenai, umui dekenai do ia noho hanaihanai, hereva momokani Laumana unai.”—IOANE 14:16, 17.
1. Edia hora ginigabedia lalodiai, Iesu bona ena hahediba taudia be atai daiutuna dekenai idia hebou neganai, edena mai anina bada herevadia ia henia?
“LOHIABADA e, edeseni do oi lao?” Edia hora ginigabedia lalonai, Iesu bona ena aposetolo taudia be Ierusalema ena atai daiutuna dekenai idia hebou neganai, ia dekenai idia henia henanadai ta be unai. (Ioane 13:36) Unai hebou ia heau noho lalonai, Iesu ese idia ia hamaoroa idia do ia rakatania bona iena Tamana dekenai do ia giroa lao. (Ioane 14:28; 16:28) Tauanina dalanai idia danu do ia noho lasi dainai, idia do ia hadibaia lasi bona edia henanadai do ia haerelaia diba lasi. To idia ia hagoadaia, ia gwau: “Vadaeni lau ese Tamana do lau noia, ia ese Durua Tauna ta do ia henia umui dekenai, umui dekenai do ia noho hanaihanai.”—Ioane 14:16.
2. Iesu ese ena hahediba taudia ia gwauhamata henia, ia lao murinai dahaka do ia siaia?
2 Iesu ese unai durua tauna ia gwauraia hedinarai bona ena hahediba taudia do ia durua dalana ia gwauraia. Idia ia hamaoroa: “Gunaguna neganai, inai gaudia lau hamaoroa lasi umui dekenai, badina be unai neganai lau be umui danu ita noho. To harihari do lau lao, lau ia siaia Diravana dekenai . . . Umui dekenai durua totona do lau rakatania umui, badina be umui bema lau rakatania lasi, Durua Tauna be umui dekenai do ia mai lasi, to do lau lao, vadaeni ia do lau siaia umui dekenai. To Hereva Momokani Laumana do ia mai, vadaeni ia ese hereva momokani ibounai dekenai umui do ia hakaua.”—Ioane 16:4, 5, 7, 13.
3. (a) Keristani ginigunadia ese edena negai ‘hereva momokani laumana’ idia abia? (b) Edena mai anina dalana ai lauma be edia ‘durua tauna’ ai ia lao?
3 Unai gwauhamata be Pentekoste 33 C.E. ai ia guguru, aposetolo Petero ese unai ia hamomokania, ia gwau: “Inai Iesu be Dirava ese ia hatorea isi vadaeni, ai ibounai be ai itaia, bona ai diba vadaeni. Ia be Dirava ese ia abia daekau vadaeni, iena imana idibana kahana dekenai. Bona ia ese Tamana ia gwauhamata henia gauna, Lauma Helaga ia abia, bona ia bubua diho vadaeni. Harihari unai Lauma ena siahu umui itaia, bona umui kamonai danu.” (Kara 2:32, 33) Gabeai do ita itaia, Pentekoste ai lauma helaga be Keristani ginigunadia latanai ia bubua neganai, gau momo ia karaia idia totona. Iesu ena gwauhamata be ‘hereva momokani laumana’ ese Iesu ia herevalaia gaudia ibounai edia “lalona dekenai do ia hedinaraia lou.” (Ioane 14:26) Idia do ia durua Iesu ena haroro gaukara bona hadibaia herevadia, iena hereva ta ta danu, do idia laloatao bena do idia torea diba. Lagani 100 C.E. be kahirakahira neganai, buruka tauna aposetolo Ioane ia durua bada, Evanelia bukana ia torea totona. Iesu ese iena mase ena Memorial hebouna ia haginia dalana bona unai neganai ia henia sisiba namona edia sivarai idia noho.—Ioane, karoa 13-17.
4. ‘Hereva momokani laumana’ be edena bamona horoa Keristani taudia ginigunadia ia durua?
4 Iesu ena gwauhamata ma ta unai Keristani taudia ginigunadia dekenai be lauma ese ‘gau ibounai do ia hadibaia idia dekenai’ bona ‘hereva momokani ibounai dekenai idia do ia hakaua.’ Lauma ese idia do ia durua Baibel ena dobu gaudia idia lalo-pararalaia, bona idia do ia gimaia edia lalohadai, edia lalo-parara, bona palani dekenai do idia lalo-tamona noho totona. (1 Korinto 2:10; Efeso 4:3) Lauma helaga ese unai Keristani taudia ginigunadia ia hagoadaia bena idia be “Hesiai tauna mai ena kamonai, bona mai ena kara maoromaoro” oreana ai idia kara, nega korikori ai horoa taudia ta ta dekenai lauma “aniani ia henia.”—Mataio 24:45.
Lauma ese Idia Ia Hadibaia
5. (a) Nisan 14, 33 C.E., hanuaboina ai, Iesu ese ena hahediba taudia dekenai edena helaro matamatana ia hahedinaraia? (b) Lauma helaga be edena dala ai Iesu ena gwauhamata ia hagugurua?
5 Nisan 14, 33 C.E. hanuaboina ai, Iesu ese iena hahediba taudia dekenai ia gwau gabeai idia do ia abia dae bona ia bona iena Tamana ida guba dekenai do idia noho. Idia ia hamaoroa: “Egu Tamana ena ruma dekenai noho gabudia be momo herea, bema inai be lasi, be do lau hamaoroa umui dekenai. Badina lau be do lau lao, gabu ta do lau karaia hegaegae umui emui. Bona lau lao, emui gabu ta do lau karaia hegaegae murinai, lau be do lau giroa mai, lau dekenai do lau abia dae umui, vadaeni lau noho gabuna dekenai be umui danu unuseni do umui noho.” (Ioane 13:36; 14:2, 3) Iena Basileia lalonai ia danu do idia lohia. (Luka 22:28-30) Unai guba helarona idia abia totona, ‘lauma helaga dekena amo idia vara lou’ bona Dirava ena lauma natudia ai idia lao, bena Dirava ese idia ia horoa Iesu ida king bona hahelaga taudia edia gaukara do idia karaia guba dekenai.—Ioane 3:5-8; 2 Korinto 1:21, 22; Tito 3:5-7; 1 Petero 1:3, 4; Apokalupo 20:6.
6. (a) Guba maurina totona boiria karana be edena negai ia matamaia bona unai helaro idia abia taudia edia namba be hida? (b) Guba helarona idia abia taudia ese dahaka gaudia dekenai idia bapatiso?
6 Pentekoste 33 C.E. ai, “guba maurina totona ia boiria” karana be ia matamaia, bona lagani 1935 bamona ai ia ore. (Heberu 3:1, NW ) Lauma Israela taudia ai idia lao totona, lauma helaga ese ia horoa taudia edia namba be 144,000, bona “taunimanima ibounai edia huanai dekena amo Dirava ese idia ia hoia.” (Apokalupo 7:4; 14:1-4) Idia ese Keriso ena lauma tauanina, iena kongregesen, bona iena mase dekenai idia bapatiso. (Roma 6:3; 1 Korinto 12:12, 13, 27; Efeso 1:22, 23) Ranu dekenai bapatiso idia abia bona lauma helaga ese idia ia horoa murinai, Dirava do idia badinaia ela bona idia mase.—Roma 6:4, 5.
7. Dahaka dainai horoa Keristani taudia sibona ese Memorial hebouna ai paraoa idia ania bona uaina idia inua?
7 Idia be lauma Israela taudia dainai, unai horoa Keristani taudia be Iehova bona “Dirava ena Israela momokani orea taudia” idia karaia gwauhamata lalonai idia noho. (Galatia 6:16; Ieremia 31:31-34) Keriso ia bubua rarana ese unai gwauhamata matamatana ia hamomokania. Iesu ese ena mase ena Memorial hebouna ia hamatamaia neganai, unai ia herevalaia. Luka ia gwau: “Vadaeni paraoa ia abia, ia hanamoa, ia makohia, ia henia idia dekenai, ia gwau, ‘Lauegu tauanina be inai, umui totona ia henia vadaeni. Inai bamona do umui karaia, lau dekenai do umui laloa totona.’ Idia ania ore, vadaeni ia ese kapusi ma ia abia, ia gwau, ‘Inai kapusi be maino karaia gwauhamata matamatana lauegu rarana dekenai, umui totona do ia bubua.’ ” (Luka 22:19, 20) Tanobada dekenai idia do noho 144,000 taudia, orena taudia, be Keriso ena mase ena Memorial hebouna dekenai mai maoro ida paraoa idia ania bona uaina idia inua.
8. Edena dala ai horoa taudia idia diba Dirava ese guba maurina totona idia ia boiria?
8 Edena dala ai horoa taudia idia diba Dirava ese guba maurina totona idia ia boiria? Lauma helaga ese idia ia hadibaia, unai dainai idia daradara lasi. Aposetolo tauna Paulo ese unai bamona taudia dekenai ia gwau: “Dirava ena Lauma ese ia hakaua taudia be Dirava ena natuna. . . . Dirava ena Lauma, bona iseda lauma danu idia hereva hebou, idia gwauraia, ita be Dirava ena natuna. Bema ita be Dirava ena natuna neganai, ita ese Dirava ena bese taudia do idia abia hanamoa gaudia be ita danu do ita abia, bona Dirava ese Keriso ia henia hanamoa gaudia do ita abia danu. Badina bema Keriso danu ita hisihisi nega tamona, be ia danu iena hairaina do ita abia nega tamona.” (Roma 8:14-17) Lauma helaga ia henia hemami ia goada herea, unai dainai bema idia daradara Dirava ese guba maurina totona idia ia boiria, ena anina be idia ia boiria lasi, bona unai murinai Memorial dekenai paraoa do idia ania lasi bona uaina do idia inua lasi be namo.
Lauma Bona Mamoe Idaudia
9. Evanelia bukadia bona Apokalupo bukana ese edena orea rua idia gwauraia?
9 Lauma Israela lalonai idia noho Keristani taudia edia namba be maragi dainai, Iesu ia gwau idia be “orea maragi.” Idia be gwauhamata matamatana ena “magu lalonai” idia noho, to Iesu ia gwau ta ese ia duahia diba lasi “mamoe idaudia” do ia haboua danu. (Luka 12:32; Ioane 10:16) Nega dokona lalonai idia haboua mamoe idaudia taudia be “hutuma bada herea” bona hisihisi badana amo do idia roho mauri, bona edia helaro be paradaiso tanobadana dekenai do idia noho hanaihanai. To, lagani 100 C.E. be kahirakahira neganai, Ioane ia abia matahanai ese hutuma bada herea taudia bona lauma Israela taudia 144,000 edia idau ia hahedinaraia. (Apokalupo 7:4, 9, 14) Mamoe idaudia ese lauma helaga idia abia danu, a? Bema idia abia edena dala ai edia mauri ia haidaua?
10. Edena dala ai mamoe idaudia be “Tamana, Natuna, bona Lauma Helaga” edia ladanai bapatiso idia abia?
10 Lauma helaga be mai anina gaukara ia karaia mamoe idaudia edia mauri lalonai. Iehova dekenai edia gwauhamata idia hagugurua dalana be bapatiso idia abia “Tamana, Natuna, bona Lauma Helaga ena ladanai.” (Mataio 28:19) Iehova ena lohia siahuna ena maoro idia abia dae, Keriso be edia King bona Mauri Hoia Lou Tauna, bona edia mauri lalonai Dirava ena lauma helaga, o gaukara siahuna, idia badinaia. Dina ta ta ai, edia mauri lalonai idia hekwarahi lauma ena huahua, “lalokau, moale, maino, haheauka, bogahisihisi, kara maoromaoro, abidadama momokani kara, manau, tauanina ena ura koua karana” idia habadaia totona.—Galatia 5:22, 23.
11, 12. (a) Horoa taudia be edena dala idauna ai idia helaga vadaeni? (b) Edena kara dainai mamoe idaudia idia goeva bona idia helaga?
11 Mamoe idaudia ese Dirava ena Hereva bona lauma helaga edia siahu idia koua lasi, to idia ia hagoevaia, eiava hahelagaia, be gau badana. Horoa taudia be dala idauna ai idia helaga vadaeni, idia be Keriso ena headava matamata kekeni ai idia lao dainai idia ia gwauraia maoromaoro bona helaga. (Ioane 17:17; 1 Korinto 6:11; Efeso 5:23-27) Peroveta tauna Daniela ese idia ia gwauraia “Ataiai Momokani Dirava ena helaga taudia” bona taunimanima ena natuna, Keriso Iesu iena siahu henunai ia noho Basileia do idia abia. (Daniela 7:13, 14, 18, 27) Guna, Mose bona Arona amo, Iehova be Israela besena dekenai ia gwau: “Lau be Lohiabada, umui emui Dirava, unai dainai do umui helaga, badina lau be helaga.”—Levitiko 11:44.
12 Inai hereva “hahelagaia” ena anina badana be “hahelagaia karana eiava dalana ta, gau ma haida amo hapararaia, Iehova Dirava ena gaukara eiava ia totona atoa siri; ia helaga, ia goeva.” Lagani 1938 ai, Gima Kohorona ia gwau namona be Iehonadaba taudia, eiava mamoe idaudia taudia, “idia diba tanobada dekenai do idia noho hutuma bada herea taudia ta ta ese gwauhamata ia karaia bona ia helaga be gau badana.” Apokalupo bukana ena matahanai lalonai hutuma bada herea taudia ia gwauraia, ia gwau “edia dabua idia huria vadaeni Mamoe ena Natuna ena rarana lalonai, vadaeni edia dabua be kurokuro bona goeva momokani” bona “dina bona hanuaboi” idia ese Iehova “ena hesiai gaukara idia karaia noho, iena dubu helaga lalonai.” (Apokalupo 7:9, 14, 15) Lauma helaga ena heduru amo, mamoe idaudia idia hekwarahi bada do idia helaga, Iehova ena taravatu hegeregerena.—2 Korinto 7:1.
Keriso Ena Tadikaka Kara Namo Henia
13, 14. (a) Iesu ena mamoe bona nanigosi parabole hegeregerena, mamoe be hahemauri idia davaria totona, dahaka be mai anina? (b) Inai nega dokona lalonai, mamoe idaudia be edena dala ai Keriso ena tadikaka idia durua?
13 Iesu ese “tanobada dokona” peroveta herevana lalonai ia noho mamoe bona nanigosi parabole amo, mamoe idaudia bona seri maragi taudia edia hetura karana namona ia hahedinaraia. Unai parabole lalonai, Keriso ia hahedinaraia goevagoeva mamoe idaudia edia kara Keriso ena “tadikaka,” horoa taudia dekenai, be mai anina hahemauri idia abia totona. Ia gwau: “Vadaeni Lohiabada ese iena idiba kahana taudia dekenai do ia hamaoroa, do ia gwau, ‘Umui mai, egu Tamana ese ia hanamoa taudia e, Basileia umui abia, tanobada ia karaia neganai, ia ese ia karaia hegaegae umui emui.’ . . . ‘Umui lau hamaoroa momokani, inai lauegu tadikakana ogogami herea taudia dekenai unai bamona umui karaia neganai, be lau dekenai umui karaia vadaeni danu.’ ”—Mataio 24:3; 25:31-34, 40.
14 Inai hereva “unai bamona umui karaia” ese iseda durua karadia mai lalokauna Keriso ena lauma horoa tadikaka dekenai idia herevalaia. Satani ena tanobada ese idia ia diba lasi, bona idia haida be dibura lalonai ia negea. Nega haida aniani, dabua, bona gorere hanamoa daladia idia davaria lasi. (Mataio 25:35, 36) Inai nega dokona lalonai, lagani 1914 amo ema bona hari, horoa taudia momo ese unai bamona hekwakwanai idia davaria. To Iehova ena Witnes taudia edia histori ia hahedinaraia, lauma helaga ese edia bamodia mai edia kamonai, mamoe idaudia, ia hagoadaia dainai horoa taudia idia durua.
15, 16. (a) Mamoe idaudia ese Keriso ena tadikaka tanobada dekenai idia durua, edena gaukara idia hagugurua totona? (b) Horoa taudia be edena dala ai mamoe idaudia taudia idia tanikiu henia?
15 Inai nega dokona ai, Keriso ena horoa tadikaka tanobada ai ese ‘sivarai namona be tanobada ibounai dekenai do idia harorolaia’ gaukarana idia abia Dirava amo, bona mamoe idaudia ese idia durudia bada unai gaukara idia hagugurua totona. (Mataio 24:14; Ioane 14:12) Tanobada dekenai horoa taudia edia namba ia maragi ia lao, to mamoe idaudia edia namba ia bada ia lao, bona hari milioni momo idia noho. Idia tausen momo be ful-taim haroro gaukara karaia taudia—painia bona misinari—bona “tanobada ena kahana ibounai” lalonai Basileia ena sivarai namona idia harorolaia. (Kara 1:8) Ma haida be haroro gaukara idia karaia edia goada hegeregerena, bona mai moale ida edia moni amo unai mai anina bada gaukarana idia durua.
16 Keriso ena horoa tadikakadia ese edia bamodia, mamoe idaudia taudia, edia heduru idia laloa bada! Lagani 1986 ai, hesiai tauna oreana ese Worldwide Security Under the “Prince of Peace” bukana idia halasia, edia hemami ia hahedinaraia namonamo. Ia gwau: “Tanobada Tuarina Iharuana negana amo, Iesu ena ‘tanobada ena dokona negana’ lalonai do ia vara peroveta herevana ia guguru, ‘hutuma bada herea’ ‘mamoe idaudia’ taudia idia karaia gaukara badana dainai. . . . Unai dainai tanobada ibounai amo bese bona gado idauidau ‘hutuma bada herea’ taudia ai tanikiu henia bada herea, [Iesu] ena peroveta herevana Mataio 24:14 ai ena hagugurua gaukarana badana idia karaia dainai!”
“Ita be Lasi Neganai Idia be Do Idia Goevadae Lasi”
17. Edena dala ai horoa taudia “be lasi neganai,” tanobada ai do idia toreisi lou abidadama taudia gunadia “be do idia goevadae lasi”?
17 Aposetolo Paulo be horoa tauna, bona Keriso ia do vara lasi neganai idia mauri abidadama tatau bona hahine ia herevalaia, ia gwau: “Inai taunimanima namodia ese Dirava idia abidadama henia, bona ladana namo herea idia abia. To Dirava ena gwauhamata gaudia be idia do davaria lasi, dohore.” Bena ia gwau: “Badina be Dirava ese ita [horoa taudia] totona gau namona ta ia itaia guna, unai amo ita be lasi neganai idia be do idia goevadae lasi.” (Heberu 11:35, 39, 40; NW ) Ena anina be Lagani 1000 Lohia Negana ai, guba dekenai, Keriso bona ena horoa tadikakadia 144,000 ese king bona hahelaga gaukara do idia karaia bona Keriso ena mauri davalaia boubouna ia havaraia namo be tanobada taudia dekenai do idia henia. Unai amo mamoe idaudia edia tauanina bona lalona do idia goevadae.—Apokalupo 22:1, 2.
18. (a) Baibel ese mamoe idaudia taudia ia durua dahaka idia laloa bada totona? (b) Mamoe idaudia be “Dirava ena natudia do ia hahedinaraidia” negana idia naria noho lalonai, dahaka idia naria noho danu?
18 Unai gaudia ibounai dainai, mamoe idaudia ese Keristani Greek Revarevadia lalonai Iesu bona ena horoa tadikaka edia mai anina gaukara, Iehova ena ura hagugurua totona, idia herevalaia momo ena badina idia laloa bada be namo. Mamoe idaudia be Aramagedono bona Lagani 1000 Lohia Negana lalonai “Dirava ena natudia do ia hahedinaraidia” negana idia naria noho lalonai, idia laloa dala idauidau ai horoa hesiai oreana idia durua be hahenamo ta. “Kara dika ena igui amo do ia ruhadia bona Dirava ena natudia edia ura kwalimu hereadaena do idia abia” negana idia naria noho danu.—Roma 8:19-21, NW.
Memorial Dekenai Idia Lalo-Tamona
19. ‘Hereva momokani laumana’ ese dahaka ia karaia horoa taudia bona edia bamodia totona, bona edena dala ai March 28 ai do idia lalo-tamona momokani?
19 Nisan 14, 33 C.E. ai, Iesu ena guriguri dokona lalonai ia gwau: “Lau noinoi . . . lau ura idia ibounai be do idia tamona, oi be lauegu lalona dekenai oi noho, bona lau be oiemu lalona dekenai lau noho hegeregerena, idia danu iseda lalona dekenai do idia noho. Unai dekena amo tanobada ese do ia abia dae, oi ese lau oi siaia.” (Ioane 17:20, 21) Dirava ena lalokau dainai, iena Natuna ia siaia, iena mauri ia henia horoa taudia bona tanobada ena kamonai taudia hamauria totona. (1 Ioane 2:2) ‘Hereva momokani laumana’ ese Keriso ena tadikaka bona edia bamodia ia hatamonaia. March 28 ai, dina ia diho murinai, unai orea rua do idia hebou Keriso ena mase laloatao totona, bona Iehova ese iena lalokau Natuna, Keriso Iesu, ena boubou amo ia karaia gaudia ibounai do idia laloa lou danu. Unai mai anina hebouna ai idia noho dainai edia lalo-tamona karana do ia hagoadaia bona edia lalona do idia hadaia lou Dirava ena ura do idia karaia noho, unai amo idia hahedinaraia idia moale Iehova ia lalokau henia taudia huanai idia noho.
Riviu
• Dirava be edena negai Keristani taudia ginigunadia dekenai ‘hereva momokani laumana’ ia siaia, bona edena dala ai ia be ‘durua tauna’?
• Edena dala ai horoa taudia idia diba Dirava ese guba maurina totona idia ia boiria?
• Dirava ena lauma be edena dala idauidau ai mamoe idaudia dekenai ia gaukara?
• Mamoe idaudia taudia be edena dala ai Keriso ena tadikaka idia kara namo henia, bona dahaka dainai horoa taudia idia noho lasi neganai, idia be do idia goevadae lasi?
[Picture on page 21]
Pentekoste 33 C.E. ai, hahediba taudia latanai ‘hereva momokani laumana’ ia bubua
[Pictures on page 23]
Mamoe idaudia ese Keriso ena tadikaka idia kara namo henia bona idia durua dalana be Dirava ia henia haroro gaukarana idia karaia idia danu