Natuna ta ese Ena Tamana Ia Durua Dalana

JAMES, mauri lagani 30 ia hanaia tauna, England amo, be kwara gorerena bona autism gorere ia abia. To, lagani momo lalonai, iena sinana bona ena taihuna ida Iehova ena Witnes taudia edia hebou idia lao henia. Ena tamana ese idia abia dae herevadia ia ura henia bada lasi. Adorahi ta ai, hebou ena kahana ta ese Keriso ena mase laloatao hebouna ai turadia ita boiria dalana ia hahedinaraia, bona ia murinai, James be ena daiutu dekenai ia lao haraga. Iena sinana be mai lalo-hekwarahi ida ia murinai ia raka lao bona ia itaia ia be Gima Kohorona bona Awake! magasin gunadia ia itadia bona ia haria. Ia abia hidi magasin ena rau ginigabena ai Memorial ena boiboi herevana ia noho bona haraga herea ena tamana dekenai ia abia lao. Laulau dekenai ia poinia guna bena tamana dekenai ia poinia bona ia gwau “Oi!” Ena sina bona tama idia hoa bada bona idia raraia heheni, bena idia lalo-parara, James be Memorial dekenai ena tamana ia boiria. Iena tamana ia gwau reana do ia lao.

Memorial dinana ena adorahi ai, James be ena tamana ena dabua idia atoa daiutu dekenai ia lao, piripou ta ia abia hidi, ena tamana dekenai ia abia lao, bona kara ta amo ena tamana ia hadibaia namona be unai piripou ia hahedokilaia. To ena tamana ia gwau hebou dekenai do ia lao lasi. Unai dainai, James bona ena sinana sibona be Kingdom Hall dekenai idia lao.

Gabeai, James ena sinana ese hebou totona James ia hegaegaelaia toho neganai James ia ura lasi, ia ura ruma dekenai ena tamana ida ia noho. Bena Sunday daba ta ai, James ena sinana ese hebou totona James ia hegaegaelaia toho neganai ma James ia ura lasi. To sinana ia hoa bada badina James ena tamana be James dekenai ia lao bona ia gwau, “James, bema hari hebou dekenai lau lao, do oi lao danu, a?” James ena vairana ena toana be ia moale bada. Ena tamana ia rosia bona ia gwau, “Io!” bona idia toi be Kingdom Hall dekenai idia lao.

Unai dina amo James ena tamana be Sunday ena hebou ibounai ia lao henia, bona daudau lasi murinai ia gwau bema ia ura ia goada ia lao noho, hebou ma haida dekenai do ia lao danu be namo. (Heberu 10:​24, 25) Unai ia badinaia, bona hua rua murinai Baibel ia stadilaia matamaia bona hanaihanai ia karaia. Lauma dalanai ia goada haraga, ena mauri ia haidaua bena daudau lasi murinai Basileia harorolaia gaukarana ia karaia matamaia. Baibel ia stadilaia matamaia bena lagani ta murinai, ena mauri be Iehova dekenai ia gwauhamatalaia bona ranu bapatisona amo unai ia hahedinaraia. Hari, iena kongregesen ai ia be hesiai tauna ta. Bona hari ena ruma bese ibounai be mai lalo-tamona ida Iehova idia hesiai henia.