“Lau Dekenai Do Umui Mai, Lau Ese Laga-ani Do Lau Henia Umui Dekenai”
‘Dirava Ena Mamoe Orea Do Umui Naria Namonamo’
“Nega ibounai umui noho ai umui kamonai henia, bona Baibel ena hereva amo ai umui hagoadaia totona.”—Pamela.
“Ai ibounai totona umui karaia karadia dainai umui ai tanikiu henia. Unai ese ai ia hagoadaia bada.”—Robert.
PAMELA bona Robert be atai ai ia noho tanikiu herevadia be edia kongregesen ta ta ai idia noho elda taudia dekenai idia tore henia. Tanobada ibounai lalonai, Dirava ena hesiai taudia huanai ma haida danu be ‘mamoe orea idia naria’ taudia edia heduru bona henari karadia dainai idia tanikiu henia bada. (1 Petero 5:2) Momokani, Iehova ena taunimanima ese elda taudia be idia totona idia karaia gaudia momo bona idia karaia dalana idia moalelaia.
“Gaukara Do Umui Karaia Goadagoada”
Keristani elda taudia be maduna momo idia abia. (Luka 12:48) Kongregesen hebou totona hereva idia hegaegaelaia bona Dirava ena Basileia ena sivarai namona idia harorolaia. Edia maduna haida be edia abidadama tamona taudia dekenai mamoe vadivadi idia karaia. Elda taudia be edia nega idia henia heduru idia abia be namo taudia, hegeregere—burukadia bona ma haida—idia durua totona, bona unai idia karaia lalonai idia sibodia edia ruma bese edia namo lauma bona tauanina dalanai idia laloa danu. (Iobu 29:12-15; 1 Timoteo 3:4, 5; 5:8) Elda taudia haida be Kingdom Hall haginia gaukara idia durua. Ma haida be Hospital Liaison Committee eiava hospital dekenai idia noho gorere witnes taudia vadivadi henia grup lalonai idia noho. Bona idia momo ese hebouhebou dekenai volantia gaukara idia karaia. Oibe, elda taudia be ‘Lohiabada ena gaukara idia karaia goadagoada.’ (1 Korinto 15:58) Unai dainai idia gaukara goadagoada elda taudia be idia naria taudia ese idia laloa bada!—1 Tesalonika 5:12, 13.
Elda taudia ese nega ibounai edia Keristani tadikakadia edia ruma dekenai eiava ma gabu haida dekenai idia vadivadi henia unai amo lauma dalanai idia durudia be hagoadaia gauna. Thomas be tamana lasi ruma besena lalonai ia tubu daekau, ia gwau: “Bema elda taudia edia lalokau heduruna bona hagoadaia herevadia lau abia lasi, lau laloa hari lau be Iehova ena ful-taim hesiai tauna ta ai do lau lao lasi.” Tama eiava sina sibona ia noho ruma besedia lalonai idia tubu matamata taudia momo idia gwau elda taudia ese idia durudia dainai edia hetura karana Dirava ida idia habadaia.
Elda taudia idia karaia mamoe vadivadi gaukarana be kongregesen lalonai idia noho buruka taudia ese idia laloa bada danu. Edia mauri lagani be 85 misinari tauna bona ena adavana be elda taudia rua ese idia vadivadi henia murinai, idia gwau: “Ai umui vadivadi henia dainai umui ai tanikiu henia. Ai umui rakatania murinai, ai ese umui herevalaia siridia ai duahia lou. Ai ese emui hagoadaia herevadia do ai laloaboio diba lasi.” Ena mauri lagani be 70 vabu ta be elda taudia ia tore henia, ia gwau: “Lau be heduru totona Iehova dekenai lau guriguri, bona ia ese lauegu ruma dekenai umui tadikaka rua ia siaidia mai. Emui vadivadi be hahenamo Iehova amo!” Vanegai sibona emu kongregesen dekenai idia noho elda taudia ese oi idia vadivadi henia karana amo namo oi abia, a? Momokani ita ibounai ese edia hekwarahi, edia henari henunai idia noho mamoe oreana naria gaukarana, ita laloa bada!
Dirava Bona Keriso Idia Tohotohoa Mamoe Naria Taudia
Iehova be Mamoe Naria Tauna mai lalokauna. (Salamo 23:1-4; Ieremia 31:10; 1 Petero 2:25) Iesu Keriso danu be eda lauma gaudia ia henia noho Mamoe Naria Tauna namo hereana. Momokani, Baibel ese Iesu ia gwauraia “mamoe naria tauna namona,” bona “mamoe naria tauna badana.” (Ioane 10:11; Heberu 13:20; 1 Petero 5:4) Iesu be iena hahediba taudia ai idia ura lao taudia be edena bamona ia kara henidia? Ia ese idia dekenai inai lalokau boiboina ia henia, ia gwau: “Tauanina manokamanoka bona gaukara metau taudia ibounai, lau dekenai umui mai, lau ese laga-ani do lau henia umui dekenai.”—Mataio 11:28.
Unai hegeregerena hari danu elda taudia idia hekwarahi mamoe oreana idia hagoadaia bona idia gimaia totona. Unai tatau “be lai koua gabuna hegeregere do idia lao. Idia be guba bada ia toa neganai hunia gabudia namodia hegeregere. Idia be tano kaukau gabudia lalonai sinavai maragidia hegeregere. Idia be nadi badana ena kerukeru bamona, tano kaukau dekenai.” (Isaia 32:2) Unai bamona hebogahisi gimaia taudia ese laga-ani idia mailaia, mamoe oreana amo hemataurai idia abia, bona Dirava ena lalo-namo idia abia.—Filipi 2:29; 1 Timoteo 5:17.
Edia Adavadia ese Idia Durudia
Dirava ena taunimanima be Keristani elda taudia bona edia adavadia ese idia henia heduru mai lalokauna dainai idia tanikiu henidia bada. Unai bamona hahine ese durua idia henia dainai nega momo idia ura karaia gau haida idia reaia diba. Nega haida, edia adavadia be kongregesen ena gaukara haida idia karaia eiava mamoe vadivadi henia gaukarana idia karaia neganai, edia hahine be ruma dekenai idia noho. Nega haida, kongregesen dekenai hekwakwanai badadia haida idia vara dainai edia palani namodia haida idia haidaua. Michelle ia gwau: “To, lau itaia egu tau be hebou gaudia ia hegaegaelaia eiava mamoe vadivadi gaukarana dekenai ia bisi neganai, lau laloatao ia be Iehova ena hesiai gaukara ia karaia noho, bona lau hekwarahi ia lau durua totona.”
Cheryl danu be elda ta ia adavaia, ia gwau: “Lau diba tadikaka bona taihu kongregesen lalonai be elda taudia idia ura hereva henia, bona lau ura idia diba egu tau dekenai heduru totona edia ura negadia ai idia mai diba.” Michelle bona Cheryl bamona, edia tatau idia durua hahinedia, be mai edia ura ida edia ura gaudia haida idia dadaraia unai amo edia tatau be Dirava ena mamoe oreana idia naria diba. Elda taudia edia adavadia edia heduru karana dainai idia ita lalodia bada.
To, ia bisi elda tauna ese iena adavana bona natudia edia lauma dalana bona idia abia be namo gaudia haida dekenai, ia durudia be namo. Namona be headava elda tauna be “kerere ta lasi tauna, bona ia be adavana tamona tauna. Iena natuna be Iesu do idia abidadama henia, idia be lebulebu lasi, bona edia tamana bona sinana do idia kamonai henia.” (Tito 1:6) Dirava ese Baibel dekenai Keristani naria taudia totona ia gwauraia taravatudia hegeregerena, ena ruma bese taudia do idia naridia be namo.—1 Timoteo 3:1-7.
Ia bisi elda tauna ia durua hahinena be dava bada gauna bamona! Headava elda taudia be unai bamona idia laloa. Unai be Baibel ese ia gwauraia bamona: “Hahine [“namona”, NW ] do ia adavaia tauna ese, gau namona ia davaria inai.” (Aonega Herevadia 18:22) Unai bamona elda taudia ese edia hereva bona kara amo mai edia kudouna ibounai ida idia hahedinaraia edia adavadia idia laloa bada. Unai Keristani tatau bona edia adavadia be idia guriguri bona stadi hebou sibona lasi, to nega idia atoa inai bamona karadia hegeregere, kone dekenai idia raka, uda lalonai idia loaloa, eiava loaloa uma gabudia dekenai idia lao totona. Oibe, elda taudia ese mai lalokau ida edia adavadia idia naria karana amo moale idia davaria.—1 Petero 3:7.
Sibodia edia ura idia tahua lasi elda taudia, be Dirava ena mamoe oreana idia naria karana amo Iehova ena taunimanima be lauma dalanai idia hagoadaia momokani. Kongregesen dekenai idia be momokani “harihari gaudia,” bona hahenamo ta!—Efeso 4:8, 11-13.