Duahia Taudia Edia Henanadai
Kota dekenai Keristani tauna ta be Baibel latanai ena imana ia atoa bona gwauhamata ia karaia hereva momokani do ia gwauraia neganai, Baibel ena hakaua herevadia ese unai kara ia gwauraia maoro, a?
Unai dala dekenai, taunimanima ta ta ese sibodia edia abia hidi idia karaia be namo. (Galatia 6:5) To, ta ese kota lalonai hereva momokani gwauraia totona gwauhamata ia karaia, be Baibel ese ia taravatua lasi.
Gwauhamata idia karaia karana be gabu momo dekenai idia karaia karana ta. Hegeregere, idaunegai, Greek taudia be gwauhamata idia karaia lalonai, edia imana idia abia isi guba dekenai eiava boubou patana latanai edia imana idia atoa. Roma tauna ta ese gwauhamata ia karaia neganai, iena imana dekenai nadi ta ia dogoatao bona gwauhamata ia karaia: “Bema lau diba to lau hereva koikoi, Jupiter [dirava ta] be siti bona hanua aukana ia hamauria lalonai, mani Jupiter ese lauegu mauri amo gau namodia ibounai ia kokia, inai nadi lau negea bamona.”—John McClintock bona James Strong, ese idia torea bukana, Cyclopedia of Biblical, Theological, and Ecclesiastical Literature, Volume VII, rau 260.
Unai bamona kara ese ia hahedinaraia taunimanima edia lalohadai be Dirava ia noho, ia be taunimanima ia itaia tauna bona ia dekenai edia gaukara ibounai do idia gwauraia hedinarai. Idaunegai amo ema bona hari, Iehova idia tomadiho henia taudia momokanidia idia lalo-parara Iehova ia diba idia be dahaka idia gwauraia bona idia karaia. (Aonega Herevadia 5:21; 15:3) Dirava ena vairanai gwauhamata idia karaia, eiava ia be idia ia itaia bamona. Hegeregere Boasi, Davida, Solomona, bona Sedekaia ese idia karaia bamona. (Ruta 3:13; 2 Samuela 3:35; 1 King Taudia 2:23, 24; Ieremia 38:16) Dirava momokanina idia tomadiho henia taudia ese danu ma haida dekenai maoro idia henia idia be gwauhamata idia karaia neganai idia do idia itaia totona. Aberahamo bona Iesu Keriso dekenai unai be ia vara momokani.—Genese 21:22-24; Mataio 26:63, 64.
Iehova ena vairanai ta ese gwauhamata ia karaia neganai, nega haida edia imana idia gaukaralaia. Aberamo (Aberahamo) ese Sodoma ena king ia hamaoroa: “Lau ese Lohiabada, Ataiai Momokani Dirava, guba bona tanobada ia karaia Diravana ena vairanai [“egu imana lau abia isi,” NW ] hari lau gwauhamata metau henia.” (Genese 14:22) Peroveta tauna Daniela ia hereva henia aneruna ese “iena imana ruaosi ia abia isi momokani, guba dekenai ia duduia bamona, bona Noho Hanaihanai Dirava ena ladana dekenai ia gwauhamata.” (Daniela 12:7) Danu, laulau dalanai Dirava ese gwauhamata ia karaia neganai, ena imana ia abia isi.—Deuteronomi 32:40; Isaia 62:8.
Baibel ese gwauhamata karaia karana ia taravatua lasi. To, Keristani tauna ta ese hanaihanai gwauhamata ia karaia lasi ena hereva ibounai ia hamomokania totona. Iesu ia gwau: “Unai dainai inai bamona oiemu hereva do oi gwauraia, ‘Oibe’ sibona, o ‘Lasi’ sibona.” (Mataio 5:33-37) Hahediba tauna Iamesi ese unai bamona hereva ia gwauraia danu. Ia gwau “umui gwauhamata lasi” neganai, ia ese anina lasi gwauhamata karaia karana ia sisibalaia. (Iamesi 5:12) Iesu bona Iamesi idia gwau lasi kota lalonai hereva momokani ita gwauraia totona gwauhamata ita karaia be ia kerere.
To, edena bamona bema kota lalonai Keristani tauna ta idia hamaoroa hereva momokani ia gwauraia totona do ia gwauhamata? Reana ia laloa unai bamona gwauhamata ia karaia diba. Bema unai bamona ia karaia lasi, reana ia koikoi lasi totona gwaumaoro idia henia gwauhamata herevana ma ta ia gwauraia totona.—Galatia 1:20.
Kota ena taravatu be gwauhamata idia karaia totona imana idia abia isi eiava Baibel latanai imana idia atoa neganai, reana Keristani tauna ese sibona ena lalona ia hadaia unai do ia badinaia eiava lasi. Reana Baibel lalonai gwauhamata idia karaia neganai, imana idia abia isi ena sivarai ia laloa. Keristani tauna ta dekenai, gwauhamata ia karaia totona ena imana ia abia isi eiava Baibel latanai ia atoa be anina bada gauna lasi, to Dirava ena vairanai hereva momokani ia gwauraia be mai anina bada momokani. Unai bamona gwauhamata karaia karana be mai anina bada gauna momokanina. Bema Keristani tauna ta ia laloa unai bamona negadiai idia henia henanadai ia haerelaia diba, vadaeni namona be ia laloatao gwauhamata ia karaia dainai namona be hereva momokani ia gwauraia, badina Keristani tauna ia ura nega ibounai hereva momokani sibona ia gwauraia.