Iehova be Oi Karaia Gaudia Ia Laloa, A?

UNAI henanadai be edena bamona do oi haerelaia? Momo do idia gwau: ‘Lau laloa Dirava ese Mose, Gideona, bona Davida ese idia karaia gaudia ia laloa, to lau laloa reana lau karaia gaudia ta be Dirava ese ia laloa bada lasi. Lau be Mose, Gideona, eiava Davida bamona lasi.’

Momokani, Baibel negadiai idia noho abidadama tatau haida ese edia abidadama ia hahedinaraia hoa karadia idia karaia. Idia ese ‘basileia momo idia tuari henia, bona idia kwalimu, laiona edia uduna idia koua, lahi siahu badadia momokani idia habodoa, bona tuari kaia dekena amo idia heau mauri.’ (Heberu 11:​33, 34) To, ma haida be kara maragidia amo edia abidadama idia hahedinaraia, bona Baibel ese ita ia hadibaia Dirava ese edia abidadama karadia ia laloa danu. Unai hahedinaraia totona, mani Baibel lalonai mamoe naria tauna ta, peroveta tauna ta, bona vabu ta edia sivarai ita laloa.

Mamoe Naria Tauna ta ese Boubou Gauna Ia Henia

Adamu bona Heva edia natuna mero iharuana, Abela, dekenai dahaka oi laloatao? Reana do oi laloatao ia be ena abidadama dainai ia mase, ita momo ese unai ita davaria lasi. To Dirava ese badina ma ta dainai Abela ia laloa.

Dina ta, Abela be ena mamoe namodia haida ia abia bona Dirava dekenai boubou gauna ia henia. Reana hari inai negai ita laloa ia henia boubou gauna be gau maragina sibona, to Dirava ese unai boubou gauna ia laloa bona ia abia dae. To, unai sibona lasi. Kahirakahira lagani 4,000 murinai, Iehova ese ena lauma helaga amo aposetolo Paulo ia hasiahua unai sivarai be Heberu bukana lalonai ia torea totona. Lagani momo murinai, Dirava ese unai boubou gauna maragina ia laloaboio lasi!​​—⁠Heberu 6:10; 11:⁠4.

Abela ese dahaka do ia bouboulaia be edena bamona ia abia hidi? Baibel ese ia gwauraia lasi, to reana unai boubou gauna ia lalohadailaia namonamo. Ia be mamoe naria tauna dainai, ena mamoe haida ia bouboulaia be hoa gauna lasi. To mani oi itaia, ia ese “digara gaudia” ia henia. (Genese 4:⁠4) Danu, reana Eden umana lalonai Iehova ese gaigai dekenai ia gwauraia herevadia ia laloa loulou, ia gwau: “Lau ese badu oi bona hahine ihuanai do lau atoa bona oiemu garana bona iena garana ihuanai. Ia ese emu kwarana do ia haberoa bona oi ese iena aena geduna do oi haberoa.” (Genese 3:​15, NW; Apokalupo 12:⁠9) Ena be unai “hahine” bona ena “garana” ese idia laulaulaia gaudia ia diba lasi, to reana Abela ia lalo-parara hahine ena garana ena ‘aena geduna haberoa karana’ amo rara do ia bubua. Ia diba ia mauri noho animal be gau ma ta ese ia hereaia diba lasi. Mai anina bada gauna be inai, ia henia gauna be boubou gauna maorona momokani.

Abela hegeregerena, hari inai negai Keristani taudia ese Dirava dekenai boubou gaudia idia henia. Idia ese vara guna mamoe idia bouboulaia lasi, to “hahenamo herevadia boubouna be Dirava do [idia] henia, ena ladana idia gwauraia hedinarai bibinadia edia huahua be unai.” (Heberu 13:​15, NW ) Ma haida dekenai iseda abidadama ita gwauraia hedinarai neganai, iseda udu bibinadia ese Dirava ena ladana idia hanamoa.

Oi ura emu boubou gauna oi hanamoa, a? Vadaeni, namona be emu teritori dekenai idia noho taudia durua daladia oi laloa namonamo. Dahaka gaudia idia laloa momo? Edia ura gaudia be dahaka? Edena Baibel herevana ese edia lalona do ia veria? Oi haroro negadia ta ta ai, taunimanima dekenai oi herevalaia gaudia oi laloa, emu haroro herevana oi hanamoa totona. Bona Iehova oi herevalaia neganai, mai emu lalo-goada ida kudouna amo oi hereva. Namona be emu boubou gauna be “hahenamo herevadia” momokani.

Peroveta Tauna ese Kamonai Lasi Dekena Taudia Ia Haroro Henidia

Hari peroveta tauna Enoka mani oi laloa. Reana ia sibona be Iehova Dirava ena witnes tauna ta. Enoka bamona, emu ruma bese lalonai oi sibona be mai abidadama ida Iehova oi hesiai henia noho, a? Emu klas ai eiava emu gaukara gabuna ai oi sibona ese Baibel ena hakaua herevadia oi badinaia, a? Bema oibe, reana hahetoho do oi davaria. Emu turadia, varavara, klas turadia, eiava gaukara turadia ese oi idia doria diba Dirava ena taravatu oi utua totona. Reana idia gwau: “Oi karaia gauna be ta do ia diba lasi. Ta do ai hamaoroa lasi.” Reana idia hereva goada idia gwau Baibel ena kara maoromaoro taravatudia badinaia totona oi lalo-hekwarahi be kavakava karana, badina Dirava be oi karaia gaudia ia laloa lasi. Emu lalohadai bona kara be edia amo ia idau karana idia ura lasi dainai, Baibel ena taravatu oi utua totona, emu lalona idia veria totona gau idauidau do idia karaia.

Momokani, unai bamona lalo-ani herevadia oi dadaraia totona be mai ena hekwarahi, to oi karaia diba. Enoka oi laloa, ia be Adamu murinai ia vara tauna namba 7. (Iuda 14) Enoka ia vara neganai, taunimanima momo ese hemarai lasi karadia idia karaia noho. Edia hereva be mai hemataurai lasi, bona edia kara be “dika.” (Iuda 15) Edia kara be hari inai nega taudia edia kara bamona.

Enoka be edena dala ai ia haheauka? Hari inai negai, ita dekenai unai henanadai ena haere be mai anina bada. Ena be tanobada ai, taunimanima huanai Enoka sibona ese Iehova ia tomadiho henia, to ia be sibona ia noho lasi. Enoka be Dirava ida ia raka.​​—⁠Genese 5:⁠22.

Enoka ena mauri lalonai Dirava hamoalea karana ia laloa bada. Ia diba Dirava ida ia raka totona namona be kara goeva bona kara maoromaoro ia hahedinaraia, to unai sibona be hegeregere lasi. Iehova ia ura do ia haroro. (Iuda 14, 15) Taunimanima do ia hadibaia edia kara dika be Dirava ese ia itaia. Enoka be lagani 300 mai kahana bamona Dirava ida ia raka​​—⁠unai be ita ese ita haheaukalaia noho negana ia hanaia. Dirava ida ia raka ela bona ia mase.​​—⁠Genese 5:​23, 24.

Enoka bamona, ita danu iseda gaukara be haroro gaukara. (Mataio 24:14) Ruma-ta-ruma-ta ai ita haroro sibona lasi, to namona be iseda varavara, bisinesi ita karaia hebou taudia, bona sikuli turadia dekenai sivarai namona ita harorolaia danu. To, nega haida ita gari dainai ita haroro lasi. Oi be unai bamona, a? Oi lalohisihisi lasi. Keristani ginigunadia oi tohotohoa, bona Dirava oi noia oi dekenai goada do ia henia. Laloaboio lasi, Dirava ida oi raka noho lalonai, oi be sibona oi noho lasi.

Vabu ta ese Aniani Ia Hegaegaelaia

Mani oi laloa, ena ladana ita diba lasi vabuna ta be aniani sisina ia hegaegaelaia dainai, hahenamo rua ia abia! Ia be Israela hahinena lasi, to idau tano hahinena ta bona lagani 900 B.C.E. bamona ai, Sarepata hanuana dekenai ia noho. Medu bona aniani lasi negana ia ore gwauraia neganai, unai vabu ena aniani be kahirakahira ia ore. Edia aniani ginigabena hegaegaelaia totona, paraoa bona oela sisina sibona ia noho.

Unai nega ai, vadivadi tauna ta ia ginidae. Ia be Dirava ena peroveta tauna Elia, bona unai vabu ia noia ena aniani sisina be ia ida do ia haria. Edia aniani be sisina sibona, ia bona ena natuna mero totona, bona gau ta ia noho lasi vadivadi tauna dekenai ia henia totona. To Elia ese Iehova ena hereva amo ia hagoadaia, bema ena aniani sisina be ia ida ia haria, ia bona ena natuna mero be do idia hitolo lasi. Ia be idau tano vabu hahinena, to ena abidadama dainai ia diba momokani Israela ena Dirava ese ia do ia durua. To, Elia ena hereva ia abia dae, bona Iehova ese ia hanamoa. “Lohiabada ese Elia dekena amo ia gwauhamata hegeregere, unai paraoa be mereki dekenai ia ore lasi, bona unai olive dehoro be kapusi dekenai ia ore lasi.” Unai hahine bona ena natuna mero be mai edia aniani ela bona hitolo negana ia ore.​​—⁠1 King Taudia 17:​8-16.

To, unai vabu be hahenamo ma ta ia abia. Unai hoa karana murinai, ena lalokau natuna ia gorere bona ia mase. Elia ese ia hebogahisi henia, bona Iehova ia noia unai mero do ia hatorea isi lou. (1 King Taudia 17:​17-24) Unai be hoa gauna matamatana. Guna mase amo ta ia toreisi lou sivaraina be lasi! Iehova be unai idau tano vabu do ia hebogahisi henia lou, a? Oibe. Iehova ese Elia dekenai siahu ia henia unai mero do ia hatorea isi lou totona. Gabeai Iesu be unai vabu ese ia abia hahenamo ia herevalaia, ia gwau: “Vabu momo herea Israela dekenai idia noho . . . to Dirava ese Elia ia siaia lao . . . Sarepata, Sidono ena kahana hanua, ena vabu ta dekenai.”​​—⁠Luka 4:​25, 26.

Hari inai negai, taga tanodia dekenai danu moni ena hekwakwanai momo idia vara. Kampani badadia momo ese edia gaukara taudia be gaukara amo idia hadokodia, ena be lagani momo unai kampani dekenai gaukara namona idia karaia. Unai bamona hekwakwanai ia vara neganai, reana Keristani tauna ta be nega bada do ia henia gaukara dekenai badina ia laloa unai amo kampani ese do idia hadokoa lasi. Bema unai bamona ia karaia, ia be nega lasi hebou ia lao henia, haroro gaukara ia karaia, bona ena ruma bese be hemami bona lauma dalanai heduru ia henia totona. To ia laloa, herevana dahaka ia vara, unai moni gaukara ia dogoatao noho be namo.

Keristani tauna be unai bamona moni ena hekwakwanai aukana ia davaria neganai, ia be mai ena badina unai ia lalo-hekwarahilaia totona. Hari inai negai moni gaukara ita davaria be auka. Ita momo ita ura lasi ita be taga taudia ai ita lao, to Sarepata ena vabu bamona, ita ura tauanina durua gaudia ita abia. To aposetolo Paulo ese ita ia hadibaia lou, Dirava ena hereva do ita laloatao, ia gwau: “Lau ese umui do lau negea lasi, bona umui do lau rakatania lasi Lasi bona lasi momokani.” Mai eda abidadama ida ita gwau diba: “Lohiabada be lauegu durua Tauna, lau be lau gari diba lasi. Taunimanima edena bamona lau do idia hadikaia diba?” (Heberu 13:​5, 6) Paulo be unai gwauhamata ia abidadama henia momokani, bona nega ibounai Iehova ese ia naria. Dirava be ita dekenai unai bamona do ia karaia bema ia ita rakatania lasi.

Reana ita laloa Mose, Gideona, bona Davida idia karaia kara badadia ita karaia diba lasi, to edia abidadama ita tohotohoa diba. Bona Abela, Enoka, bona Sarepata ena vabu hahinena ese idia karaia kara maragina ita laloatao diba. Iehova be iseda abidadama karadia ibounai ia laloa​​—⁠maragidia danu. Dirava ia gari henia stiuden be ena sikuli turadia amo drag ia dadaraia, eiava Keristani ta ese ena gaukara gabuna ai matabodaga karana ia dadaraia, eiava ia buruka vadaeni witnes ta be ia hesiku eiava gorere to hebou dekenai ia lao neganai, Iehova ese unai ibounai ia itaia. Bona ia moale!​​—⁠Aonega Herevadia 27:⁠11.

Haida ese Idia Karaia Gaudia Oi Laloa, A?

Oibe, Iehova be ita karaia gaudia ia laloa. Unai dainai, Dirava ena kara ita tohotohoa, bona ma haida ese idia karaia gaudia ita laloa be namo. (Efeso 5:⁠1) Oiemu Keristani tadikaka ese idia davaria hekwarahi kongregesen hebou dekenai idia lao totona, eiava haroro totona, bona dina ta ta ai idia karaia gaudia idia karaia totona, edia hekwarahi oi laloa be namo.

Bena, oiemu tadikaka oi hadibaia idia karaia gaudia oi laloa bada. Edia hekwarahi oi laloa dainai do idia moale, bona oi gwauraia herevana ese edia lalona do ia hagoadaia diba, bona do idia diba Iehova ese idia karaia gaudia ia laloa danu.