Duahia Taudia Edia Henanadai
Oi ubua animal be ia gorere bada eiava ia buruka dainai oi hamasea be maoro, a?
Taunimanima momo be animal idauidau idia ura henia bona idia moalelaia. Idia ubua animal bamona, idia naria animal haida be turana namona ai idia lao. Hegeregere, taunimanima momo idia diba sisia be edia naria taudia idia kamonai henia namonamo bona idia ura henia. Unai dainai, taunimanima ese unai bamona ubua animal idia ura henia karana ita lalo-pararalaia, bema lagani momo lalonai idia naria.
To, ubua animal be idia mauri daudau lasi. Sisia be lagani 10 ia lao 15 mai kahana lalonai idia mauri, reana pusikasi danu, edia toana hegeregerena. Ubua animal idia buruka neganai, gorere idia abia bona tauanina ena kahana ta ia dika ia lao, unai dainai edia naria taudia be animal ena matamata negana idia laloa lou dainai, idia lalohisihisi diba. Unai bamona animal be hisihisi bada idia abia dainai, idia hamasea be maoro, a?
Keristani tauna ia ura Dirava ena ura hegeregerena animal do ia kara henidia. Animal ita dagedage henia be Dirava ena ura hegeregerena lasi, badina iena Hereva ia gwau: “Kara maoromaoro tauna ese, iena boromakau [“animal,” NW] ia bogahisihisi henia noho.” (Aonega Herevadia 12:10) To, ia gwau lasi Dirava ese animal be taunimanima ia laloa hegeregerena ia laloa. Dirava ese taunimanima ia karaia neganai, ia hahedinaraia idia bona animal be idia idau. Hegeregere, taunimanima dekenai mauri hanaihanai ena helaro ia henia, to animal dekenai unai helaro ia henia lasi. (Roma 6:23; 2 Petero 2:12) Ia be Havaraia Tauna dainai, ia be mai ena maoro taunimanima bona animal edia hetura karana maorona ia gwauraia totona.
Genese 1:28 ese ita dekenai unai hetura karana ia gwauraia. Dirava ese taunimanima ginigunadia dekenai ia gwau: “Davara ena gwarume bona ataiai manudia, bona mauri gaudia, tanobada dekenai idia marere gaudia ibounai do umui biagua.” Unai hegeregerena, Salamo 8:6-8 ia gwau: “Gau ibounai be, taunimanima edia aena henunai, oi atodia vadaeni: Mamoe bona boromakau ibounai, uda boroma ibounai danu. Ataiai manudia, bona davara ena gwarume.”
Dirava ese ia hahedinaraia goevagoeva taunimanima ese animal be dala maorona ai idia gaukaralaia bona hamasea be maoro. Hegeregere, dabua totona edia tauanina idia gaukaralaia diba. Danu, Noa ena negai ia vara Abata murinai, Dirava ese gwaumaoro ia henia taunimanima ese animal ena vamu idia ania totona, guna ia henia ava aniani ida idia ania totona.—Genese 3:21; 4:4; 9:3.
Unai ese maoro ia henia lasi spot gadara dekenai animal idia alaia kava totona. Genese 10:9 ai, Baibel ese Nimiroda ia gwauraia “labana tauna mai goada.” To unai siri tamona ia gwau Iehova “ena vairanai [“ia dagedage,” NW].”
Unai dainai, ena be taunimanima ese animal idia biagua, to namona be unai siahu idia gaukaralaia kerere lasi to Dirava ena Hereva ena hakaua herevadia hegeregerena idia kara. Danu reana ubua animal ia buruka, dika bada ia davaria, eiava gorere dikana dainai hisihisi ia abia be namo lasi. Unai bamona ia vara neganai, unai be Keristani tauna ena maduna abia hidi ia karaia totona. Bema ia laloa ia ubua animal be do ia namo diba lasi dainai unai be hebogahisi karana hisihisi do ia abia lasi totona, reana ia ese unai animal ia hamasea.