Duahia Taudia Edia Henanadai
Dahaka dainai Heberu 2:14 (NW) ese Satani ia gwauraia “mase ia havaraia tauna”?
Paulo ena hereva ena anina be Satani be, ia sibona eiava ena hesiai taudia amo taunimanima edia mase ia havaraia diba. Unai hereva hegeregerena, Iesu ese Satani ia gwauraia “hamatamaia nega dekena amo ia be alaia tauna.”—Ioane 8:44.
Heberu 2:14 ese lalohadai kererena do ia havaraia diba badina Baibel haida idia gwau, Satani be “mase ena siahu” ia dogoatao eiava “mase ia biagua.” (King James Version; Revised Standard; New International Version; Jerusalem Bible) Inai bamona hereva dainai toana be Satani be mai ena siahu, daika ia ura ia hamasea be ia hamasea diba. To, ia hedinarai goevagoeva unai be momokani lasi. Bema unai bamona neganai, Iehova idia tomadiho henia taudia ibounai be inai tanobada amo idaunegai ia hadikaia ore vadaeni.—Genese 3:15.
Inai Greek gado herevana “kraʹtos tou tha·naʹtou” ena anina be “mase ia biagua.” Baibel ma haida bona New World Translation ese idia hahanaia neganai “mase ia havaraia” idia torea. Inai hereva tou tha·naʹtou ena anina be “mase.” Kraʹtos ena anina be “siahu eiava goada.” Theological Dictionary of the New Testament bukana hegeregerena, ia hahedinaraia “siahu eiava goada ia herevalaia, to kara ia gwauraia lasi.” Unai dainai, Heberu 2:14 lalonai, Paulo ia hahedinaraia Satani be mase ena siahu ibounai ia dogoatao lasi. To, Paulo ese Satani be mase ia havaraia diba karana sibona ia gwauraia.
Edena dala amo Satani ese “mase ia havaraia”? Iobu bukana lalonai, kara idauna ta ena sivarai ita duahia diba. Unai sivarai ia gwau, Satani ese lai gubana ta ia gaukaralaia Iobu ena natudia dekenai “mase ia havaraia” totona. To, mani oi itaia, Satani be unai ia karaia diba badina Dirava ese ia koua lasi. Dirava ese gwaumaoro ia henia badina mai anina bada herevana ta idia hepapahuahulaia. (Iobu 1:12, 18, 19) To momokani, Satani sibona ese Iobu ia hamasea diba lasi. Iehova ese gwaumaoro ia henia lasi. (Iobu 2:6) Inai ese ia hahedinaraia, ena be nega ta ta ai, Satani ese abidadama taudia dekenai mase ia havaraia, to namo lasi ena ura hegeregerena ai eda mauri ia hakwadogia diba dainai, ia do ita gari henia.
Satani ese danu taunimanima ia gaukaralaidia mase ia havaraia totona. Unai dainai, Keristani taudia momo be edia abidadama dainai idia mase vadaeni. Haida be badu taudia ese idia hamasedia eiava gavamani taudia eiava kara gageva diadi taudia edia oda herevadia amo idia hamasedia.—Apokalupo 2:13.
Ma danu, Satani be nega haida taunimanima edia manoka gaudia ia gaukaralaia mase ia havaraia totona. Israela taudia edia nega lalonai, peroveta tauna Balama ese Moaba taudia ia sisiba henidia Israela taudia do idia koidia bona Iehova do idia kamonai henia lasi. (Numera 31:16) Unai kara dainai Israela taudia 23,000 idia mase. (Numera 25:9; 1 Korinto 10:8) Hari, haida be hegeregere Satani ena koikoi karadia bona sihari kava karadia eiava Dirava ia ura lasi karadia lalonai idia moru. (Efeso 6:11) Momokani, unai bamona taudia ese edia mauri be haraga herea idia haboioa lasi. To, mauri hanaihanai abia dalana idia haboioa, unai dala amo Satani ese edia mase dalana ia havaraia.
Ena be ita diba Satani ese ita ia hadikaia diba, to ia ita gari henia be badina lasi. Paulo ia gwau Satani be mase ia biagua tauna neganai, ia gwau danu Iesu ia mase badina “mase ia biagua tauna, Satani ena siahu ia hadikaia ore. . . . Bona unai dala dekena amo ia ese mase dekenai idia gari taudia edia gari ia haorea. Oibe, unai mase ena gari ese ia guidia taudia edia gari ia haorea.” (Heberu 2:14, 15) Oibe, Iesu ese mauri davalaia boubouna ia henia bona ia idia abidadama henia taudia be kara dika bona mase ena igui hesiai amo ia ruhadia.—2 Timoteo 1:10.
Momokani, Satani ese mase ia havaraia diba herevana be hereva badana, to ita diba momokani Iehova be Satani bona ia gaukaralaia taudia ese idia havaraia dika do ia haorea diba. Iehova ese ita ia hagoadaia ia toreisi lou tauna, Iesu ese “Satani ena kara dika do ia haorea momokani.” (1 Ioane 3:8) Iehova ena siahu amo, Iesu ese mase taudia do ia hatoredia isi lou bona mase do ia haorea momokani. (Ioane 5:28, 29) Dokonai, Iesu ese Satani be guri dobu masemasena lalonai do ia negea karana amo, Satani ena siahu ena hetoana do ia hahedinaraia. Satani be do ia ore momokani.—Apokalupo 20:1-10.