Dala Namona ai Hereva Eiava Kara Dalana Dibaia

PEGGY ia itaia ena natuna mero ese ena tadina maragina ia hereva auka henia. Ia nanadaia: “Oi laloa emu tadina be dala namona ai oi hereva henia, a? Itaia ia lalohisihisi bada!” Dahaka dainai unai bamona ia hereva? Ia ura ena natuna mero dekenai dala namona ai ma haida hereva eiava kara henidia bona edia hemami laloa bada karana ia hadibaia.

Aposetolo Paulo ese ena bamona, mero matamatana Timoteo, ia hagoadaia “taunimanima ibounai dekenai do ia bogahisihisi henia.” Unai amo, Timoteo ese ma haida edia hemami do ia hadikaia lasi. (2 Timoteo 2:​24) Dala namona ai hereva eiava kara be dahaka? Edena bamona unai kara oi hanamoa diba? Bona edena bamona ma haida oi durua diba unai kara idia habadaia totona?

Dala Namona ai Hereva Eiava Kara be Dahaka?

Diksenari ta ese dala namona ai hereva eiava kara ena anina be inai bamona ia herevalaia, “ia vara gauna ta oi lalo-pararalaia bena hebogahisi dalanai kara ta oi karaia eiava hereva maorona oi gwauraia karana.” Dala namona ai ia hereva tauna ese taunimanima ma haida edia hemami ia laloa bona ia diba edena bamona ena hereva eiava kara ese idia do ia hahisia. To unai ita karaia dalana ita diba sibona be anina lasi; iseda ura momokani be ma haida ita hahisia lasi.

Baibel lalonai Elisaia ena hesiai tauna Gehasi, dala namona ai ia kara lasi tauna, ena sivarai ita davaria. Ena imana dekenai natuna mero ia mase Suneme hahinena ia lao Elisaia ena heduru ia tahua. Ia nanadaia bema gau ibounai be namo neganai, ia gwau: “Gau ibounai be namo.” To peroveta tauna ia lao henia neganai, “Gehasi ia raka vaira, hahine do [ia] doria lao totona.” To, Elisaia ia gwau: “Oi koua lasi, badina be iena lalona be ia hisihisi bada noho.”​​—⁠2 King Taudia 4:​17-​20, 25-​27.

Dahaka dainai Gehasi be ia kara haraga bona ia kara namo lasi? Momokani, ia nanadaia neganai hahine be ena hemami ia hahedinaraia lasi. To, taunimanima momo edia hemami be taunimanima iboudiai dekenai idia hahedinaraia kava lasi. To, reana dala haida ai ena hemami ia itaia diba. Elisaia ese ia itaia, to Gehasi be ia itaia lasi, eiava ia itaia to ia dadaraia. Unai be taunimanima ese nega momo dala namona ai idia kara lasi karana ia haheitalaia. Bema tau ta be ena gaukara sibona ia laloa bada, iena gaukara taudia edia namo do ia laloa lasi diba. Ia be basi taria tauna bamona, nega korikori ai do ia ginidae ia laloa bada dainai, pasendia udaia totona ia stopu lasi.

Gehasi ena kara ita dadaraia totona, namona be ita hekwarahi hebogahisi dalanai taunimanima ita hereva henia, badina edia hemami ita diba lasi. Namona be hanaihanai ita gima ta ena hemami ia hahedinaraia toana ita itaia diba totona bona hebogahisi dalanai ita hereva eiava kara henia. Edena bamona emu diba unai dekenai oi hanamoa diba?

Haida Edia Hemami Lalo-Pararalaia Dalana

Iesu be taunimanima edia hemami ia lalo-pararalaia namonamo tauna bona ia diba edena dala ai mai hebogahisi ida do ia kara henidia. Nega ta ia be Simona, Farisea tauna ta, ena ruma dekenai ia aniani neganai, “hanua ena hahine ta, ariara hahine” be ia dekenai ia lao. Unuseniai danu, unai hahine be ia hereva momo lasi, to ena kara amo gau momo ia dibaia. “Nadi kavabuna ta ia abia lao, unai kavabu lalonai be dehoro mai bonana namo herea. Ia lao, Iesu ena murina dekenai ia gini, iena aena badibadinai, bona ia tai, bona iena matana ranu dekena amo Iesu ena aena ia hapariparia, vadaeni iena huina dekena amo ia dahua kaukau. Vadaeni Iesu ena aena ia kisi henia, bona dehoro ia bubua ena aena dekenai.” Iesu ese ena kara ena anina ia lalo-pararalaia. Bona ena be Simona be hereva ta ia gwauraia lasi, to Iesu be ena lalona dekenai ia laloa gauna ia diba, ia laloa: “Inai tau bema ia peroveta tauna, do ia diba inai ia dekenai ia kamokau hahinena be ariara hahinena.”​​—⁠Luka 7:​37-​39.

Ia vara diba hekwakwanai mani oi laloa, bema Iesu ese unai hahine ia doria siri eiava bema Simona dekenai ia gwau: “Aonega lasi tauna! Oi itaia lasi ia be ia helalo-kerehai, a?” To, Iesu be dala namona ai Simona dekenai, tau ta ese ia amo abitorehai badana bona abitorehai maragina idia abia taudia ia gwaudiatao parabolena ia gwauraia. Iesu ese ia nanadaia, “idia ruaosi huanai be daika ese heniatorehai tauna do ia lalokau henia bada?” Iesu ese Simona ia badu henia lasi, to haere maorona ia henia dainai ia hanamoa. Bena dala namona ai Simona ia durua unai hahine ena hemami momokanina idia hahedinaraia toana bona ena helalo-kerehai toana momo ia lalo-pararalaia totona. Iesu be mai hebogahisi ida hahine dekenai ia hahedinaraia ena hemami ia lalo-pararalaia. Ia hamaoroa ena kara dika ia gwauatao bona gabeai ia gwau: “Oiemu abidadama ese ia hamauria oi. Mai maino danu oi lao.” Unai hereva be dala maorona ai ia gwauraia dainai, hahine ena kara maorona badinaia urana ia hagoadaia! (Luka 7:​40-​50) Dala namona ai taunimanima ia hereva eiava kara henia dalana dekenai Iesu ia kwalimu badina ia ese taunimanima edia hemami ia lalo-pararalaia bona mai hebogahisi ida ia kara.

Iesu ese Simona ia durua hegeregerena, ita danu be ma haida ita durua diba, idia gwauraia lasi hemami ita lalo-pararalaia totona. Keristani hesiai gaukarana lalonai nega haida hesiai gaukara idia manadalaia taudia ese matamata taudia dekenai unai idia hadibaia diba. Sivarai namona idia harorolaia murinai, idia davaria taudia edia hemami ia hahedinaraia toana idia herevalaia diba. Idia davaria tauna be ia hemarai, ia daradara, ia badu, eiava ia bisi, a? Unai ruma tauna be edena dala namona ai oi durua diba? Elda taudia ese dala namona ai idia hereva eiava kara lasi dainai idia badu heheni tadikaka bona taihu idia durua diba danu. Idia ta ta oi durua ta ta edia hemami idia lalo-pararalaia totona. Mamina ia abia ia idia gwau henia, dadaraia, eiava lalo-pararalaia namonamo lasi, a? Edena dala ai ena hemami be hebogahisi karana ese ia hanamoa diba?

Namona be tama sina ese edia natudia idia durua hebogahisi idia hahedinaraia totona, badina unai ese idia do ia veria dala namona ai ma haida idia hereva eiava kara henia totona. Matamanai ita kikilaia sivaraina lalonai, Peggy ena natuna mero be ena tadina ena lalohisihisi toana​—⁠vairana ia kakakaka, bona matana be ranu amo idia honu​—⁠ia itaia neganai ena tadina ese ia mamia hisihisina ia lalo-pararalaia. Ena sinana ia ura do ia karaia hegeregerena, unai mero ia hebogahisi henia bona lalona ia hadaia ena kara do ia haidaua. Peggy ena memero rua be idia maragi neganai idia dibaia karana idia gaukaralaia namonamo bona lagani haida murinai Keristani kongregesen lalonai hahediba taudia halaoa gaukara bona mamoe naria taudia namodia ai idia lao.

Lalo-Parara Oi Hahedinaraia

Dala namona ai oi hereva eiava kara be mai anina bada bema ta oi maumauraia. Ia oi hahemaraia diba. Hanamoa herevana oi gwauraia guna be namo. Oi hereva dika henia lasi, to hekwakwanai hanamoa dalana sibona oi laloa. Edena bamona ena kara ese oiemu lalona ia hahisia bona oi ura do ia haidaua kara oi gwauraia. Bena oi hegaegae oi kamonai totona. Reana oi ese ena hereva oi lalo-pararalaia namonamo lasi.

Taunimanima idia ura edia lalohadai oi abia dae ena be idia ida oi lalo-tamona lasi. Iesu be dala namona ai ia hereva, unai amo ia hahedinaraia Mareta ena lalo-hekwarahi ia lalo-pararalaia. Ia gwau: “Mareta e, Mareta e, gau momo totona oi laloa momo bona oi hekwarahi.” (Luka 10:41) Unai hegeregerena, bema tau ta be hekwakwanai haida ia gwauraia neganai, namo lasi ia gwauraia ore lasi lalonai haraga momokani oi ura oi hamaoromaoroa. Dala namona ai oi hahedinaraia oi lalo-pararalaia be, oi sibona emu hereva amo ena hekwakwanai oi herevalaia lou. Unai be emu lalo-parara oi hahedinaraia dalana namona.

Dahaka Oi Hereva Lasi Oi Dibaia

Kwini Eseta ia ura ena adavana ia nanadaia Hamana ena Iuda taudia ibounai hadikaia ore palanina ia hadokoa totona neganai, gau ibounai ia hegaegaelaia namonamo unai amo ena adavana ena lalona be do ia namo. Unai nega sibona ai unai mai anina bada herevana ia gwauraia diba. To ita itaia ia be gau ta ia herevalaia lasi bona unai kara amo gau ta ita dibaia danu. Dala namona ai ena adavana ena kara unai palani dikana lalonai ia herevalaia lasi.​​—⁠Eseta 5:​1-8; 7:​1, 2; 8:⁠5.

Unai hegeregerena, Keristani taihu ta ena abidadama lasi adavana oi vadivadi henia neganai, ia dekenai Baibel oi hahedinaraia haraga lasi, to dala namona ai oi nanadaia diba dahaka gaudia ia ura henia, ani? Bema ita diba lasi tauna ta be Kingdom Hall dekenai ia mai bona ena dabua be ia goeva lasi eiava ta be nega daudau hebou ia mai lasi bena ia hedinarai, namona be ita welkam henia to ena dabua eiava hebou ia mai lasi karana ita herevalaia lasi. Bona oi itaia kamonai matamata tauna be mai ena lalohadai kererena ta neganai, namo lasi unai nega korikorina ai oi hamaoromaoroa. (Ioane 16:12) Dala namona ai hereva eiava kara ena anina be, ita herevalaia lasi gauna ita diba be namo.

Lalona Ia Hanamoa Herevana

Dala namona ai oi hereva karana ese oi do ia durua ma haida ida hetura karana oi moalelaia totona, ena be ta ese emu kara ia lalo-pararalaia namonamo lasi bona ia lalo-dika bona ia badu. Hegeregere, Eparaima tatau be Gideona dekenai “idia badu momokani,” to ena haere namona lalonai ia vara momokani gauna bona Eparaima tatau ese idia karaia gauna ia gwauraia hedinarai. Unai be dala namona badina edia lalo-hisihisi ena badina ia lalo-pararalaia, bona ena manau karana ese edia lalona ia hanamoa.​​—⁠Gunalaia Taudia 8:​1-3; Aonega Herevadia 16:⁠24.

Namona be nega ibounai inai oi laloa, do oi gwauraia herevana dekenai haida edia hemami be edena bamona. Bema oi hekwarahi dala namona ai oi hereva eiava kara totona, unai ese oi do ia durua Aonega Herevadia 15:23 ese ia gwauraia moalena oi mamia totona, ia gwau: “Iena haere maorona ese tau ta do ia hamoalea, bona ena nega korikori dekenai, hereva namona ta ia gwauraia, be namo bada!”

[Picture on page 31]

Tama sina ese edia natudia dekenai ma haida laloa bada karana idia hadibaia diba

[Picture on page 31]

Idia manada Keristani haroro taudia ese matamata taudia dekenai hereva namonamo karana idia hadibaia diba