Iehova Ena Hesiai Taudia be mai Edia Helaro Korikorina
“Israela taudia, idia do mauri noho taudia be bese idauidau edia huanai do idia noho, Lohiabada ese ia siaia hanuaboi ena paripari namona bamona. . . . Dirava dekena amo durua do idia abia, taunimanima dekena amo lasi.”—MIKA 5:7.
1. Edena dala ai lauma Israela taudia be taunimanima hagoadaia taudia?
IEHOVA be medu bona hanuaboi ena paripari Karaia Tauna badana. Medu eiava hanuaboi ena paripari totona taunimanima dekenai ita tabekau be anina lasi. Peroveta tauna Mika ia gwau: “Israela taudia, idia do mauri noho taudia be bese idauidau edia huanai do idia noho, Lohiabada ese ia siaia hanuaboi ena paripari namona bamona. Israela taudia ese tanobada taudia do idia hanamoa, medu ese rei ia hanamoa bamona. Bona inai Israela taudia ese Dirava dekena amo durua do idia abia, taunimanima dekena amo lasi.” (Mika 5:7) “Israela taudia, idia do mauri noho taudia” be daidia? Idia be lauma Israela taudia, “Dirava ena Israela” orena taudia unai. (Galatia 6:16) “Bese idauidau” dekenai idia be “Lohiabada ese ia siaia hanuaboi ena paripari namona bamona” bona “medu ese rei ia hanamoa bamona.” Oibe, hari inai negai tanobada ai idia noho horoa Keristani taudia be taunimanima hagoadaia taudia, Dirava amo. Idia be Basileia harorolaia taudia dainai, Iehova ese idia ia gaukaralaia taunimanima dekenai helaro korikorina ena sivarai idia hadibaia totona.
2. Ena be inai tanobada dikana ai ita noho, to dahaka dainai ita be mai eda helaro korikorina?
2 Inai tanobada dekenai helaro korikorina ia noho lasi dainai, ita hoa lasi be namo. Politikol heiriheiri, kara dikadia, taravatu utua karadia, moni ena hekwarahi, terorist karadia, tuari—ita diba Satani Diabolo ese ia biagua tanobadana ai unai bamona gaudia do idia vara. (1 Ioane 5:19) Momo be vaira negana dainai idia gari. To, ita be Iehova ita tomadiho henia taudia dainai, ita gari lasi badina ita be mai eda helaro namona nega vaira totona. Unai be helaro korikorina badina ia be Dirava ena Hereva amo. Ita ese Iehova bona iena Hereva ita abidadama henia, badina ia gwauraia gaudia ibounai be nega ibounai idia guguru.
3. (a) Dahaka dainai Iehova ia ura Israela bona Iuda besedia ia panisia? (b) Hari inai negai, dahaka dainai Mika ena hereva be mai anina bada?
3 Dirava ese Mika amo ia henia peroveta herevadia ese ita ia hagoadaia Iehova ena ladana dekenai ita raka totona bona helaro korikorina ena badina ia henia. Lagani 800 B.C.E. ai, Mika ia peroveta neganai, Dirava ena gwauhamata besena be bese rua dekenai idia parara—Israela bona Iuda—bona unai bese rua ese Dirava ena gwauhamata idia laloa lasi. Unai dainai, kara dikadia idia karaia, tomadiho momokani idia negea, bona kohu idia tahua goadagoada. Unai dainai, Iehova ese idia ia hadibaia idia do ia panisia. Momokani, Dirava ena sisiba be Mika ena negai idia noho taudia dekenai ia gwauraia. To, hari inai nega be Mika ena nega hegeregerena dainai, hari iena hereva be mai anina bada danu. Mika bukana ena karoa seven edia hereva haida ita herevalaia neganai, do ita itaia hari inai negai iena hereva be mai anina bada.
Mika Bukana ese Ia Hahedinaraia Gauna
4. Mika karoa 1 ia lao 3 lalonai dahaka sivarai ia noho?
4 Namona be Mika bukana ena sivarai ita laloa sisina. Karoa 1 ai, Iehova ese Israela bona Iuda edia dagedage karadia ia hahedinaraia. Unai kara dainai Israela do idia hadikaia ore bona Iuda ia abia panisi be Ierusalema do ia abia danu. Karoa 2 ese ia hahedinaraia, kohu bada bona siahu taudia ese manoka taudia bona sibona idia durua diba lasi taudia idia hahisia. To, Dirava ena gwauhamata ta ia noho danu. Dirava ese ena taunimanima do ia haboua bona lalo-tamona ai do idia noho. Karoa 3 ese Iehova ena hereva bese gunalaia taudia bona peroveta taudia dikadia dekenai ia gwauraia. Gunalaia taudia ese kota idia hagagevaia, bona peroveta taudia be koikoi herevadia idia gwauraia. To, lauma helaga ese Mika ia hasiahua, Iehova ese do ia karaia kota karana ia harorolaia totona.
5. Karoa 4 bona 5 edia hereva badana be dahaka?
5 Karoa 4 ese nega gabedia ia perovetalaia, ia gwau bese idauidau taudia be Iehova ena dubu ena ororo badana dekenai do idia mai, ia ese idia ia hadibaia totona. Unai ia do vara lasi neganai, Iuda be Babulonia dekenai do idia abia lao, to Iehova ese do ia hamauria. Karoa 5 ese ia hahedinaraia, Mesia be Iuda ena hanua Betelehema dekenai do ia vara. Iena taunimanima do ia gunalaia bona dagedage besedia amo idia do ia ruhaia.
6, 7. Mika karoa 6 bona 7 edia peroveta herevadia be dahaka idia herevalaia?
6 Mika karoa 6 ena hereva be Iehova ese kota dekenai ena taunimanima ia samania bamona. Ia be dahaka ia karaia dainai iena taunimanima idia gwau-edeede? Gau ta lasi. Ia ura idia karaia gaudia be idia auka lasi. Ia ura ia idia tomadiho henia taudia be ia ida idia raka hebou neganai kara maoromaoro, lalokau, bona manau idia hahedinaraia. To Israela bona Iuda be unai idia karaia lasi, gwau-edeede dalana idia badinaia bona unai ena davana do idia abia.
7 Mika ena peroveta herevana ena karoa ginigabena ai, ena negai idia noho taudia ia gwauraia dika badina idia gwau-edeede. To, ia lalo-manoka lasi badina iena lalona ia hadaia, Iehova ‘do ia naria noho.’ (Mika 7:7) Unai buka ena dokona dekenai ia hahedinaraia momokani Iehova ese iena taunimanima do ia hebogahisi henia. Histori ena sivarai ese ia hahedinaraia unai helaro ia guguru. Lagani 537 B.C.E. ai, Iehova ese ena taunimanima ia matahakani henia murinai, mai ena hebogahisi ida unai bese ena orena taudia be edia tano dekenai ia atoa lou.
8. Mika ena buka be edena bamona do oi herevalaia?
8 Iehova ese Mika amo diba namo hereana ia halasia! Inai Dirava ena lauma amo ia vara bukana ese ia idia badinaia lasi taudia, sibodia idia gwau ia idia tomadiho henia taudia unai, ia kara henia dalana ia hahedinaraia. Hari idia vara gaudia ia perovetalaia. Bona Dirava ese sisiba ia henia edena bamona inai nega dikana lalonai ita kara be namo, unai amo iseda helaro do ia goada.
Siahu Ibounai Lohiabadana Iehova Ia Hereva
9. Mika 1:2 ena hereva hegeregerena, Iehova be dahaka do ia karaia?
9 Hari Mika bukana ena hereva haida ita tahua namonamo. Mika 1:2 dekenai, ia gwau: “Bese ibounai taudia e, do umui kamonai. Tanobada dekenai umui noho taudia e, Dirava ena hereva do umui kamonai. Lohiabada Dirava ese umui do ia samania. Kamonai! Lohiabada be iena dubu helaga, guba dekena amo ia hereva noho.” Bema oi be Mika ena negai oi noho, unai hereva ese emu lalona do ia veria. Momokani, iseda lalona ia veria badina Iehova be iena dubu helagana amo Israela bona Iuda sibona lasi, to taunimanima ibounai ia hereva henia. Mika ena negai, taunimanima ese nega daudau lalonai Siahu Ibounai Lohiabadana Iehova idia laloa lasi. To nega sisina murinai, unai do ia idau. Iehova ese ena lalona ia hadaia, kara ta do ia karaia.
10. Dahaka dainai Mika 1:2 ena hereva ita dekenai be mai anina bada?
10 Hari danu be unai bamona. Apokalupo 14:18-20 ese ia hahedinaraia Iehova be ena dubu helagana amo ia hereva noho. Daudau lasi, ia ese kara ta do ia karaia, bona gau badadia do idia vara dainai taunimanima do idia hoa. Unai nega ai, “tanobada ena vain huahua” dikana be Iehova ena badu dikadika ena uaina moia gabuna dekenai do ia negea, Satani ena tanobada dikana do ia hadikaia ore.
11. Mika 1:3, 4 ena hereva ena anina be dahaka?
11 Iehova ese do ia karaia gauna mani oi kamonai. Mika 1:3, 4 ia gwau: “Lohiabada be iena gabu helagana dekena amo do ia diho mai. Ia be ororo edia ataiai dekenai do ia raka. Unai neganai ororo be Lohiabada ena henunai do idia veve, . . . digara be lahi lalonai ia veve bamona. . . . Idia be ranu ese ataiai gabuna, dekena amo ia bubua diho lao bamona.” Iehova ese guba ia rakatania bona Gwauhamata Tanona ena ororo gabudia dekenai do ia raka, a? Lasi. Unai ia karaia be badina lasi. Ia ese tanobada do ia laloa, iena ura ia hagugurua totona. Danu, ia gwauraia gaudia be tano korikorina dekenai lasi to taunimanima dekenai do idia vara. Iehova ese unai kara ia karaia neganai, kamonai lasi taudia ese dika do idia davaria—digara be lahi dekenai ia veve bamona ororo do idia veve bona taora gabudia be tano mareremarere ese kahana rua dekenai ia hapararaia bamona.
12, 13. Petero Iharuana 3:10-12 ena hereva bamona, dahaka ese iseda helaro ia hagoadaia?
12 Reana Mika 1:3, 4 ena hereva dainai, Dirava ena lauma amo ia vara peroveta herevana ta ita laloa, ia hahedinaraia inai tanobada dekenai dika do ia vara. Petero Iharuana 3:10 ai, aposetolo Petero ia gwau: “Lohiabada ena Dina be do ia ginidae, henaoa tauna ia ginidae bamona. Unai Dina dekenai, guba be nega tamona do ia ore, mai regena bada danu. . . . Tanobada danu, bona ia lalonai noho gaudia ibounai, be lahi bada ese do ia araia ore.” Mika ena peroveta herevana hegeregerena, Petero be guba bona tanobada korikori ia herevalaia lasi. Idia be inai Dirava ia dadaraia tanobadana ese do ia davaria hisihisi badana idia herevalaia.
13 Herevana unai dika do ia vara, to Keristani taudia be Mika bamona, vaira negana idia laloa diba mai lalo-goada ida. Edena bamona? Petero ena revareva ena siri gabedia edia sisiba idia badinaia karana amo. Aposetolo tauna ia gwau: “Umui be edena bamona do umui noho? Umui emui kara ibounai do idia helaga be namo, bona Dirava do umui badinaia namonamo. Ma Dirava ena Dina do umui naria noho.” (2 Petero 3:11, 12) Iseda helaro vaira negana totona do ia guguru, bema hari kamonai kudouna ita abia bona iseda kara ia helaga bona iseda mauri lalonai Dirava ita badinaia. Iseda helaro ia goada totona, namona be ita laloaboio lasi Iehova ena dina be do ia mai momokani.
14. Dahaka dainai Israela bona Iuda taudia be panisi idia abia be namo?
14 Iehova ese ena idaunegai besena do ia panisia ena badina ia hahedinaraia. Mika 1:5 ia gwau: “Inai bamona kara be do idia vara, badina be Israela taudia ese Dirava dekenai idia kara dika, bona idia dagedage henia vadaeni. Israela ena dagedage be daika ena kerere? Kerere be hanua badana, Samaria ena! Bona Iuda taudia ese dirava koikoidia dekenai idia tomadiho, be daika ena kerere? Kerere be hanua badana, Ierusalema ena!” Israela bona Iuda be Iehova ena hebogahisi dainai idia mauri noho. To, ia idia gwau-edeede henia, bona unai gwau-edeede be edia hanua badadia, Samaria bona Ierusalema, dekenai ia vara danu.
Kara Dika Ia Bada Ia Lao
15, 16. Mika ena negai idia noho taudia be dahaka kara dika dekenai idia kerere?
15 Mika ena negai idia noho taudia edia kara dika be Mika 2:1, 2 ese ia hahedinaraia namonamo, ia gwau: “Palani dikadia umui laloa noho taudia e, dika bada herea momokani do umui davaria! Umui be hanuaboi neganai . . . kara dikadia do umui karaia dalana umui laloa noho. Bona dabai umui toreisi, unai kara be umui karaia momokani, badina dala umui davaria vadaeni. Bema tau ta ena uma umui ura henia, umui dogoatao sibona! Bona bema tau ta ena ruma umui ura henia, inai danu umui dogoatao sibona. Umui ese koikoi dekena amo taunimanima edia ruma, bona edia bese ena kohu umui henaoa noho.”
16 Mataganigani taudia be hanuaboi ai idia mahuta lasi to palani idia karaia, edia dekena taudia edia uma bona ruma idia abia totona. Daba dekenai, edia palani idia badinaia totona idia lao haraga. Bema Iehova ena gwauhamata idia laloatao, unai bamona kara dikadia do idia karaia lasi. Mose ena Taravatu ia gwau ogogami taudia idia naria be namo. Unai Taravatu henunai, bese ta ese ena tano do idia haboioa vaitani lasi. To, unai mataganigani taudia ese taravatu idia laloa lasi. Idia ese Levitiko 19:18 ena hereva idia laloa lasi, ia gwau: “Emui badibadinai tauna do umui lalokau henia, umui sibona umui lalokau henia hegeregerena.”
17. Dahaka ia vara diba bema sibona idia gwauraia Dirava idia hesiai taudia be edia mauri ai kohu idia tahua guna?
17 Unai ese ia hahedinaraia dahaka ia vara diba, bema sibona idia gwauraia Dirava ena hesiai taudia ese lauma gaudia idia tahua lasi to kohu idia tahua guna. Paulo ese ena nega ena Keristani taudia ia sisiba henia, ia gwau: “To kohu momo idia ura henia taudia be dibagani dekenai idia moru diba. Bona boroma be tarapu dekenai ia moru bamona, ura dikadia bona ura kavakava ese unai kohu ura henia taudia do idia koia, bona hadikaia.” (1 Timoteo 6:9) Ta ese ena mauri lalonai moni haboua karana be ena tahua gauna ginigunana ai ia halaoa neganai, anina be ia ese dirava koikoina—Mammon, eiava Kohu—ia tomadiho henia. Unai dirava koikoina ese vaira negana totona helaro korikorina ia henia lasi.—Mataio 6:24, futnout, NW.
18. Mika ena negai, kohu idia tahua goadagoada taudia dekenai dahaka do ia vara?
18 Mika ena negai, momo be dala aukana amo idia davaria, kohu dekenai idia tabekau be kavakava karana. Mika 2:4 hegeregerena, Iehova ia gwau: “Unai nega dikana ia vara neganai, taunimanima ese emui sivarai do idia gwauraia loaloa mai kirikiri danu. Taitai ane do idia abia koikoi, inai bamona: ‘Ai be ai dika momokani vadaeni! Lohiabada ese aiemai tano ia abia vadaeni. Bona idau bese taudia, idia ese ai idia guia taudia, dekenai aiemai tano ia henia.’ ” Oibe, unai ruma bona uma idia henaoa taudia ese sibona edia bese ena tano do idia haboioa. Tano idauna dekenai do idia siaia lao, bona edia kohu be “idau bese taudia” ese do idia abia. Vaira negana namona ena helaro ia boio.
19, 20. Iehova dekenai idia tabekau Iuda taudia dekenai dahaka ia vara?
19 To, Iehova dekenai idia tabekau taudia edia helaro do ia boio lasi. Iehova ese Aberahamo bona Davida ida ia karaia gwauhamatana ia badinaia, bona Mika bamona taudia, Ia idia lalokau henia bona edia tano taudia edia kara kerere dainai idia lalohisihisi taudia, Ia hebogahisi henidia. Dirava ese ia abia hidi negana ai, kara maoromaoro taudia do ia hanamoa lou.
20 Lagani 537 B.C.E. ai, Babulonia ia moru bona Iuda orena taudia be edia tano dekenai idia giroa lou neganai, unai ia vara. Unai nega ai, Mika 2:12 ena hereva be nega ginigunana ia guguru. Iehova ia gwau: “Umui Israela taudia, do mauri noho taudia be do lau haboua. Lau ese umui do lau haboua, mamoe naria tauna ese iena mamoe edia magu lalonai ia haboudia lou bamona. Bona Israela ena tano be taunimanima dekenai do ia honu lou, tano ta mai ena mamoe momo bamona.” Iehova be lalokau Diravana! Iena taunimanima ia matahakani henia murinai, orena taudia do idia giroa bona edia tubudia dekenai ia henia tanona ai ia do idia tomadiho henia dalana ia kehoa.
Iseda Nega ida Ia Hegeregere Momokani
21. Hari inai negai bona Mika ena negai idia vara gaudia be edena dala ai idia hegeregere?
21 Mika ena karoa ginigunadia rua ita herevalaia neganai, oi itaia hari inai nega be Mika ena nega bamona, a? Unai nega hegeregerena, hari inai negai momo idia gwau Dirava idia hesiai henia. To, Iuda bona Israela bamona, idia parara bona idia tuari heheni. Kerisendom ai, kohu bada taudia momo ese ogogami taudia idia hahisia. Tomadiho gunalaia taudia momo ese Baibel ia gwauraia dika karadia idauidau idia abia dae. Ita hoa lasi Kerisendom bona “Babulonia Badana,” tanobada ena tomadiho koikoi basileiana unai, be daudau lasi murinai do ia hadikaia ore! (Apokalupo 18:1-5) To, Mika ena nega hegeregerena, Iehova ena kamonai hesiai taudia be tanobada dekenai do idia noho.
22. Edena orea rua be Dirava ena Basileia dekenai edia abidadama idia atoa?
22 Lagani 1919 ai, horoa Keristani taudia mai edia kamonai be Kerisendom amo idia siri momokani bona bese iboudiai dekenai Basileia ena sivarai namona idia harorolaia matamaia. (Mataio 24:14) Matamanai, idia ese lauma Israela taudia edia orena taudia idia tahua. Bena, “mamoe idaudia” idia haboua matamaia, bona unai orea rua be ‘orea tamona’ ai idia lao bona edia ‘naria tauna danu ia tamona.’ (Ioane 10:16) Ena be Iehova idia tomadiho henia taudia mai edia kamonai be hari tano 234 ai Dirava idia hesiai henia, to idia lalo-tamona momokani. Hari, magu be ‘taunimanima amo ia honu.’ Edia helaro be inai tanobada dikana dekenai lasi, to Dirava ena Basileia dekenai idia atoa, bona kahirakahira unai Basileia ese tanobada dekenai paradaiso do ia havaraia lou.
23. Dahaka dainai oi diba momokani emu helaro be momokani?
23 New World Translation Baibel ai Mika karoa 2 ena siri ginigabena ia gwau: “Edia king be edia vairanai do ia lao, bona Iehova ese idia ia gunalaia.” Emu lalona dekenai oi sibona oi itaia diba, unai kwalimu ena raka lalonai emu King, Iesu Keriso, murinai oi raka bona Iehova ese umui ia gunalaia, a? Bema oibe, oi diba momokani do ita kwalimu bona emu helaro be momokani. Mika ena peroveta herevadia ma haida ita stadilaia neganai, unai do ia hedinarai goevagoeva.
Edena Bamona Do Oi Haere?
• Mika ena negai, dahaka dainai Iehova ese ena lalona ia hadaia Iuda bona Israela taudia ia panisia totona?
• Dahaka ia vara diba bema sibona idia gwauraia Dirava idia hesiai henia taudia, be edia mauri lalonai kohu idia tahua guna?
• Mika karoa 1 bona 2 ita herevalaia murinai, dahaka dainai oi diba momokani emu helaro be momokani?
[Picture on page 3]
Mika ena peroveta herevadia ese lauma dalanai ita idia hagoadaia diba
[Pictures on page 4]
Lagani 537 B.C.E. ai idia noho Iuda orena taudia bamona, lauma Israela taudia bona edia bamodia ese tomadiho momokani idia abia isi