Iehova Ena Kudouna Idia Hamoalea Hahinedia

“Lohiabada ese oiemu davana do ia henia, oiemu kara hegeregerena. . . . Ia ese davana namona oi dekenai do ia henia.”—RUTA 2:⁠12.

1, 2. Edena dala ai Baibel lalonai Iehova ena kudouna idia hamoalea hahinedia edia sivarai ita laloa ese ita idia durua?

DIRAVA idia gari henia dainai hahine rua ese Farao ena hereva idia kamonai lasi. Ena be ena mauri ia haboioa diba, to abidadama dainai ariara hahinena ta be Israela ena spai taudia rua ia naridia. Hekwakwanai ta lalonai laloa maoro bona manau karana ese hahine ta ia durua taunimanima momo ia hamauridia bona Iehova ena horoa tauna be rara bubua karana amo ia koua. Vabu ta mai ena natuna mero be Iehova Dirava ia abidadama henia bona ena heabidae karana dainai ena aniani orena be Dirava ena peroveta tauna ia henia. Unai be Baibel ese ia gwauraidia Iehova ena kudouna idia hamoalea hahine haida edia sivarai.

² Iehova ena kara bona ena hahenamo unai bamona hahine dekenai ese ia hahedinaraia, herevana tau eiava hahine, Iehova idia hamoalea gaudia be lauma huahua ena kara namodia. Inai tanobada ai, taunimanima be tauanina ena toana eiava kohu idia laloa bada dainai, lauma gaudia atoa guna karana be auka. To, unai idia hanaia diba badina hari inai negai Dirava idia gari henia hahine milioni momo be Dirava ena taunimanima edia kahana badana. Unai bamona Keristani hahine be Baibel ese ia gwauraia Dirava gari henia hahinedia mai edia abidadama, laloa maoro, heabidae karadia bona kara namodia ma haida idia tohotohoa. Oibe, Keristani tatau danu idia ura unai idau negai hahine edia kara namodia, idia tohotohoa. Matamanai ita gwauraia hahine edia kara ita tohotohoa namonamo totona, mani Baibel lalonai edia sivarai ma haida ita tahua.—Roma 15:4; Iamesi 4:⁠8.

Farao Idia Kamonai Henia Lasi Hahine

3, 4. (a) Dahaka dainai Sipora bona Pua ese Farao ena oda herevana, Israela beibi mero matamatadia ibounai do idia hamasea, idia kamonai lasi? (b) Mara hahinedia idia durua hahine rua edia goada bona Dirava gari henia karana dainai, Iehova ese edena bamona ia hanamodia?

³ Tanobada Tuarina Iharuana murinai, Nuremberg, Germany ena kota dekenai taunimanima momo herea idia alaia mase taudia momo idia gwau idia be oda herevana idia badinaia dainai unai kara dika idia karaia bona idia kerere lasi. Vadaeni, mani unai taudia be guna Aigupito ena Farao, ena ladana ita diba lasi tauna, ena lohia aukana negana lalonai idia noho Israela hahine rua, mara neganai hahine idia durudia hahine, Sipora bona Pua ida, mani ita hahegeregeredia. Heberu taudia idia momo daekau garina, Farao ese unai hahine rua ia oda henidia idia vara Heberu beibi mero matamatadia ibounai do idia hamasea. Unai oda dikana idia abia neganai unai hahine be edena bamona idia kara? “Aigupito ena king ena hereva idia badinaia lasi, edia natuna memero idia vara neganai, idia hamauria.” Dahaka dainai unai hahine be taunimanima ta idia gari henia lasi? Badina idia be “Dirava dekenai idia gari.”—Esodo 1:​15, 17; Genese 9:⁠6.

⁴ Oibe, unai mara hahine durua hahinedia be Iehova dekenai heduru totona idia heau lao, bona Ia be “edia kesi” ai ia lao bona Farao ena badu amo ia gimadia. (2 Samuela 22:31; Esodo 1:​18-20) To Iehova ena hahenamo be unuseniai ia doko lasi. Sipora bona Pua dekenai bese ia henidia. Danu ia hanamodia dalana ta be edia ladana bona idia karaia karana be ena Hereva lalonai ia torea gabeai uru ese idia duahia totona, to unai Farao ena ladana be ta ese ia laloatao lasi.—Esodo 1:21; 1 Samuela 2:30b; Aonega Herevadia 10:⁠7.

5. Inai negai Keristani hahine momo be edena dala ai Sipora bona Pua edia kara hegeregerena idia kara, bona Iehova ese edena bamona do ia hanamodia?

⁵ Inai negai, Sipora bona Pua bamona hahine idia noho, a? Oibe! Lagani ta ta ai, “king ena oda” ese ia taravatua tanodia momo lalonai, hahine tausen momo be mai gari lasi ida Baibel ena hahemauri herevana idia harorolaia, ena be unai idia karaia dainai edia ura kwalimu eiava mauri idia haboioa diba. (Heberu 11:23; Kara 5:​28, 29) Dirava bona dekena taudia idia lalokau henidia dainai, unai boga-auka hahinedia be ma haida dekenai Dirava ena Basileia ena sivarai namona idia harorolaia gaukarana be tau ta ese ia koua diba lasi. Unai dainai, Keristani hahine momo be dagedage idia davaria. (Mareko 12:​30, 31; 13:​9-13) Sipora bona Pua ia kara henidia hegeregerena, Iehova ese inai bamona boga-auka hahine namodia edia kara ia laloa bada, bona bema mai abidadama ida idia haheauka ela bona dokona, ena lalokau idia dekenai ia hahedinaraia totona edia ladana be “mauri buka” lalonai do ia torea.—Filipi 4:3; Mataio 24:⁠13.

Guna Ariara Hahinena Ta ese Iehova Ena Kudouna Ia Hamoalea

6, 7. (a) Rahaba be dahaka ia diba Iehova bona ena taunimanima dekenai, bona unai diba dainai dahaka ia karaia? (b) Dirava ena Hereva ese Rahaba be edena bamona ia hanamoa?

⁶ Lagani 1473 B.C.E. ai, Kanana hanuana Ieriko dekenai, ariara hahinena ta ladana Rahaba ia noho. Rahaba be diba momo hahinena. Israela spai taudia rua be ena ruma dekenai idia komu totona idia lao neganai, idia dekenai Israela taudia be Aigupito amo idia heau mauri sivaraina ia gwauraia goevagoeva diba, ena be unai kara be lagani 40 gunanai ia vara! Vanegai sibona Israela ese Amoro edia king Sihona bona Oga idia halusia tuarina ena sivarai ia diba danu. Mani oi itaia, unai ia diba dainai dahaka ia karaia. Spai taudia dekenai ia gwau: “Lau diba Lohiabada ese inai tano umui dekenai ia henia vadaeni. . . . Badina Lohiabada emui Dirava be guba dekenai ia noho, bona inai tanobada dekenai ia noho danu.” (Iosua 2:​1, 9-11) Oibe, Rahaba be Iehova bona Israela taudia totona ia karaia karadia ia dibaia neganai, ena kudouna ia hamarerea bona unai ese ia veria Iehova ia abidadama henia totona.—Roma 10:⁠10.

⁷ Rahaba ena abidadama ese ia veria kara ta ia karaia totona. Ia ese Israela ena spai taudia rua edia “gaukara ia durua” bona Israela besena ese Ieriko ia tuari henia neganai, edia roho mauri herevadia ia badinaia. (Heberu 11:31; Iosua 2:​18-21) Ita daradara lasi Rahaba ena abidadama karadia ese Iehova ena kudouna ia hamoalea, badina Keristani hahediba tauna Iamesi ia hasiahua, Keristani taudia ese idia tohotohoa totona, Rahaba ladana be Aberahamo, Dirava ena turana, badinai ia torea. Iamesi ia gwau: “Unai bamona danu, ariara hahine Rahaba be iena kara dainai Dirava ena vairanai ia maoromaoro. Badina be ia ese Israela ena hesiai taudia iena ruma dekenai ia abidia dae, bona dala idauna dekena amo ia siaidia lao, vadaeni idia heau mauri.”—Iamesi 2:⁠25.

8. Rahaba ena abidadama bona kamonai karana dainai Iehova ese edena bamona ia hanamoa?

⁸ Iehova ese Rahaba be dala momo ai ia hanamoa. Dala ta be, hoa dalanai ia bona ena ruma dekenai idia heau lao taudia—“iena tamana ena famili taudia, bona iena varavara ibounai” ia hamauridia. Bena gwaumaoro ia henidia idia be “Israela dekenai idia noho” bona bese korikori hegeregerena idia kara henidia. (Iosua 2:13; 6:​22-25; Levitiko 19:​33, 34) To unai sibona lasi. Iehova ese Rahaba ia hanamoa bona Iesu Keriso ena tubuna hahinena ta ai ia halaoa danu. Guna kaivakuku ia tomadiho henia Kanana hahinena dekenai, unai be hebogahisi mai lalokauna badana!a​—Salamo 130:​3, 4.

9. Iehova ena lalohadai Rahaba bona aposetolo edia negai idia noho Keristani hahinedia dekenai ese hari idia noho hahine haida be edena bamona ia durua diba?

⁹ Rahaba bamona, Keristani hahine haida, aposetolo edia nega amo ema bona hari be Dirava idia hamoalea totona, matabodaga maurina idia rakatania. (1 Korinto 6:​9-11) Idia haida idia tubu daekau gabudia be guna Kanana hanua bamona tanodia, unuseniai matabodaga karadia be bada bona taunimanima idia laloa unai be kerere lasi. To, Baibel amo diba maoromaorona idia abia murinai, abidadama ese ia veridia edia kara idia haidaua totona. (Roma 10:17) Unai dainai, ita hereva diba unai bamona hahine be “Dirava idia gwauraia edia Dirava, bona Dirava be idia dainai ia hemarai lasi.” (Heberu 11:16) Unai be hahenamo badana!

Ena Laloa Maoromaoro Karana Dainai Hahenamo Ia Abia

10, 11. Nabala bona Davida huanai dahaka ia vara dainai, Abigaila ese dahaka ia karaia?

¹⁰ Idaunegai idia noho abidadama hahine momo ese dala idaudia ai laloa maoromaoro karana idia hahedinaraia, unai amo Iehova ena taunimanima dekenai idia be dava bada gaudia. Unai bamona hahine ta be Abigaila, taga bona tano momo Israela tauna, Nabala ena adavana. Abigaila ena laloa maoromaoro karana ese momo ia hamauria bona Davida, Israela ena king ai do ia lao tauna be rara bubua karana amo ia koua. Samuela Ginigunana karoa 25 ai Abigaila ena sivarai ita duahia diba.

¹¹ Unai sivarai ena matamanai, Davida bona ena tatau be Nabala ena mamoe seridia kahirakahira ai edia kamepa idia karaia. Hebogahisi dainai edia Israela varavara Nabala ena mamoe be dina bona hanuaboi ai idia gimaia, davana lasi. Davida bona ena tatau edia aniani ia ore ia lao neganai, tatau matamata 10 ia siaidia lao Nabala dekenai aniani totona do idia noinoi. Unai be nega namona Nabala ese Davida do ia tanikiu henia bona Iehova ena horoa tauna do ia hanamoa. To Nabala ese unai ia karaia lasi. Mai badu ida, Davida ia gwauraia dika bona unai tatau matamata be imana kavakava ia siaidia lou. Davida ese unai ia kamonai neganai, tatau 400 mai edia tuari kohu ida ia haboua bona tuari totona ia lao. Abigaila ia kamonai ena tau be unai bamona ia karaia neganai, mai aonega ida ia karaharaga bona Davida lalona hamainoa totona aniani bada herea ia siaia. Bena ia danu Davida dekenai ia lao.—Siri 2-20.

12, 13. (a) Abigaila be edena dala ai laloa maoromaoro karana ia hahedinaraia bona Iehova bona ena horoa tauna ia badinaia? (b) Abigaila be ruma dekenai ia giroa lou neganai, dahaka ia karaia bona dahaka ia vara?

¹² Abigaila ese Davida ia hedavari henia neganai, mai manau ida hebogahisi totona ia noia dalana ese ia hahedinaraia ia be Iehova ena horoa tauna ia matauraia bada. Ia gwau: “Lau diba Lohiabada ese king tauna oi do ia haginia, bona oiemu tubuna taudia danu. Badina be tuari ta Lohiabada ia ura karaia neganai, ia ese oi ia siaia noho, ia dainai unai tuari do oi tuari karaia totona” bona ia hahedinaraia Israela ena king dagina be Davida dekenai do ia henia. (Siri 28-30) Danu, Abigaila be gari lasi karana ia hahedinaraia badina Davida ia hamaoroa bema ena badu ia biagua lasi bona Nabala ia tuari henia, taunimanima edia rara dekenai do ia kerere diba. (Siri 26, 31) Abigaila ena manau, hemataurai bada bona laloa maoromaoro karana dainai Davida ena lalona ia kehoa. Ia gwau: “Lohiabada, Israela ena Dirava lau hanamoa noho inai! Badina be hari dina ia ese oi ia siaia vadaeni, bona ita ruaosi ita hedavari inai. Oiemu laloa maoro dainai Dirava lau tanikiu henia! Bona oi danu lau tanikiu henia, badina hari dina lau ese ala-ala do lau karaia, . . . to oi ese inai bamona laloa oi hadokoa.”—Siri 32, 33.

¹³ Ruma dekenai ia giroa lou neganai, gari lasi ida Abigaila ia ura ena tau ia hadibaia Davida dekenai harihari gaudia ia henia. To, ia itaia ena tau be ia “kekero dika herea.” Unai dainai ia naria ela bona lalona ia maoro bena ia hamaoroa. Nabala be dahaka ia karaia? Ia hoa bada dainai ena tauanina ia mase bamona. Dina 10 murinai Dirava ese ia hamasea. Davida ese Nabala ena mase sivaraina ia kamonai neganai, Abigaila ia noia ia adavaia totona, badina ia ura henia bona ia matauraia bada. Abigaila ese Davida ena hereva ia abia dae.—Siri 34-42.

Abigaila Bamona Oi Kara Diba, A?

14. Abigaila ese ia hahedinaraia karadia lalonai, edena kara ita ura ita habadaia?

¹⁴ Abigaila ena kara lalonai, umui itaia kara ta be—umui, tatau bona hahine danu—emui mauri lalonai umui ura umui habadaia, a? Reana oi ura hekwakwanai idia vara neganai mai hemataurai bona laloa maoromaoro ida oi kara. Eiava taunimanima idia hepapahuahu lalonai oi ura mai manau bona laloa maoromaoro ida oi hereva. Bema oibe, namona be Iehova dekenai unai oi gurigurilaia. Iehova ia gwauhamata ‘ia noinoi neganai ia abidadama sibona’ tauna dekenai, aonega, laloa kehoa bona laloa maoromaoro do ia henia.—Iamesi 1:​5, 6; Aonega Herevadia 2:​1-6, 10, 11.

15. Edena bamona noho maurina ai, Keristani hahinedia ese Abigaila ena kara do idia tohotohoa be mai anina bada?

¹⁵ Unai bamona kara be mai anina bada taihu ta dekenai, bema ena adavana be Witnes lasi bona Baibel ena hakaua herevadia ia laloa lasi tauna. Reana ia inuinu kekero momo. Iseda ura be unai bamona taudia ese edia kara do idia haidaua. Momo ese idia karaia vadaeni bona nega momo unai ia vara badina edia hahine be lalo-manau, hemataurai bada bona kara namodia idia hahedinaraia.—1 Petero 3:​1, 2, 4.

16. Herevana ruma ai mauri be edena bamona, Keristani taihu ese edena dala ai ia hahedinaraia diba ena hetura karana Iehova ida ia laloa bada?

¹⁶ Herevana ruma ai dahaka hekwakwanai oi haheaukalaia noho, namona be oi laloaboio lasi, Iehova ese hanaihanai oi do ia durua. (1 Petero 3:12) Unai dainai lauma dalanai oi goada noho totona oi hekwarahi. Aonega bona lalo-manau totona oi guriguri. Oibe, Baibel stadilaia hanaihanai karana, guriguri, laloa dobu, bona Keristani turadia ida oi hebamo karana amo Iehova kahirakahira dekenai oi lao. Abigaila ena lalokau Dirava bona ena horoa hesiai tauna totona be ena tau ena lauma gaudia laloa maragi karana ese ia biagua lasi. Kara maoromaoro hakaua herevadia ese Abigaila ena kara idia biagua. Herevana ena tau be Dirava ia hesiai henia tauna namona ta, Keristani hahinena ia diba danu lauma dalanai ia goada totona, ia sibona do ia hekwarahi be namo. Momokani, Baibel ese tau dekenai lauma dalanai bona tauanina dalanai ena hahine do ia naria ena maduna ia henia, to mai anina bada gauna be hahine sibona ese ‘mai gari bona mai heudeheude danu ena hahemauri do ia tahua noho.’—Filipi 2:12; 1 Timoteo 5:⁠8.

“Peroveta Tauna Ena Davana” Ia Abia

17, 18. (a) Sarepata ena vabu be ena abidadama dekenai, dahaka hahetoho idauna ia davaria? (b) Elia ia noinoi neganai unai vabu be dahaka ia karaia, bona ena kara dainai Iehova ese edena bamona ia hanamoa?

¹⁷ Peroveta tauna Elia ena nega ai Iehova ese ogogami vabu ta ia naria dalana ese ia hahedinaraia, tomadiho momokanina idia durua totona edia goada bona kohu idia henia taudia ia lalodia bada. Elia ena nega ai medu be nega daudau ia diho lasi dainai, momo idia hitolo bada. Sarepata dekenai ia noho vabu mai ena natuna mero danu idia hitolo. Edia aniani orena momokani ia noho lalonai, vadivadi tauna ta ia ginidae—peroveta tauna Elia. Ia karaia noinoi dainai ita hoa. Ena be ia diba idia dabu momokani, to ia noia ena paraoa bona dehoro orena amo “beredi maragina ta” ia totona do ia gabua. To ma ia gwau: “Badina be Lohiabada, Israela ena Dirava, be inai bamona ia hereva, ia gwau, ‘Paraoa, mereki dekenai ia noho gauna be do ia ore lasi, bona olive dehoro, kapusi dekenai ia noho gauna danu be do ia ore lasi, ela bona Lohiabada ese medu be tanobada dekenai do ia hadihoa dinana.’ ”—1 King Taudia 17:​8-14.

¹⁸ Dahaka oi karaia bema ia ese oi ia noia? Sarepata ena vabu ia itaia Elia be Iehova ena peroveta tauna neganai, “Elia ena hereva hegeregere ia karaia.” Iena heabidae karana dainai Iehova be dahaka ia karaia? Unai doe negana lalonai Iehova ese hoa dalanai, vabu, ena natuna bona Elia totona aniani ia henia. (1 King Taudia 17:​15, 16) Oibe, ena be Sarepata ena vabu be Israela hahinena lasi, Iehova ese “peroveta tauna ena davana” ia henia. (Mataio 10:41) Dirava ena Natuna ese ena hanua Nasareta ena abidadama lasi taudia vairanai unai vabu ia hanamoa danu.—Luka 4:​24-26.

19. Keristani hahinedia hari be edena dala ai Sarepata ena vabu ena kara idia hahedinaraia, bona Iehova be dahaka ia laloa unai hahine dekenai?

¹⁹ Hari, Keristani hahine momo ese Sarepata ena vabu ena kara idia hahedinaraia. Hegeregere, ma haida idia laloa bada Keristani taihu—idia momo be ogogami bona edia ruma bese idia naria danu⁠—be wiki ta ta ai, sekit bona distrik naria taudia bona edia hahine idia abia dae. Ma haida be ful-taim hesiai taudia idia boiridia idia aniani hebou totona, dabu taudia idia durudia, eiava dala ma haida ai Basileia ena gaukara durua totona edia goada bona kohu idia henia. (Luka 21:⁠4) Iehova ese edia boubou gaudia ia laloa bada, a? Oibe! “Dirava ena kara be gagevagageva lasi, ia be maoromaoro momokani. Unai dainai ia ese emui kara namodia do ia laloaboio lasi. Umui ese Dirava umui lalokau henia. Inai lalokau ese laloa namodia umui dekenai ia havaraia, vadaeni umui ese Dirava ena taudia umui durua vadaeni, bona do umui durua noho danu.”—Heberu 6:⁠10.

20. Hereva gabena ai dahaka do ita stadilaia?

²⁰ Iesu ena negai, Dirava idia gari henia hahinedia haida be Iesu bona aposetolo taudia durua gaukarana idia moalelaia. Stadi herevana gabena ai, unai hahine be edena dala ai Iehova ena kudouna idia hamoalea do ita kikilaia, bona hari inai negai mai edia kudouna ibounai ida, nega dikadia ai danu, Iehova idia hesiai henia hahinedia edia haheitalai do ita stadilaia.

[Footnote]

Riviu

• Inai hahine ese edena dala ai Iehova ena kudouna idia hamoalea?

• Sipora bona Pua

• Rahaba

• Abigaila

• Sarepata ena vabu

• Unai hahine edia haheitalai ita laloa dobu ese edena bamona ita ta ta idia durua diba? Haheitalai gwauraia.

[Pictures on page 19]

Mai edia abidadama hahine momo be “king ena oda” idia dadaraia bona Dirava idia hesiai henia noho

[Picture on page 20]

Dahaka dainai Rahaba be mai ena abidadama hahinena ena haheitalai namona?

[Picture on page 20]

Edena kara, Abigaila ese ia hahedinaraia karadia unai, oi ura do oi tohotohoa?

[Picture on page 22]

Keristani hahine momo hari be Sarepata ena vabu ena kara idia hahedinaraia