Abidadama Keristani Hahine​​—⁠Dirava Idia Tomadiho Henia Hahine Hairaidia

“Hahine momo edia hereva namodia be koikoi bamona, bona edia hairaina be do ia ore haraga. To Lohiabada dekenai ia gari hahinena, be do idia matauraia.” ​—⁠AONEGA HEREVADIA 31:⁠30.

1. Iehova ena lalohadai hairai dekenai be edena dala ai tanobada taudia edia amo ia idau?

TANOBADA taudia be tauanina ena toana idia laloa bada, hahine dekenai nega momo unai idia laloa. To, Iehova be taunimanima edia lalona korikorina ia laloa bada, unai be emu mauri lagani ia bada ia lao neganai ia hedinarai gauna. (Aonega Herevadia 16:31) Unai dainai Baibel ese hahine ia sisiba henidia: “Umui ese kopina dekenai herahera gaudia, hegeregere kavabukavabu do umui atoa lasi. Emui huina danu sitaelo sitaelo bamona do umui karaia lasi. Bona dabua, edia toana namo herea momokani do umui atoa lasi. Inai gaudia be emui kopina edia murimuri kahanai sibona. To namona be emui hairai korikori be emui lalona dekenai ia noho. Herahera namodia, do idia dika diba lasi gaudia, hegeregere laloa manau, bona dagedage lasi, emui lalona dekenai do umui atoa. Idia edia hairai do ia noho hanaihanai, bona idia be namo bada herea Dirava ena vairanai.”​—⁠1 Petero 3:​3, 4.

2, 3. Aposetolo edia negai, hahine be edena dala ai sivarai namona ia bada gaukarana idia durua, bona unai be edena bamona idia perovetalaia?

² Baibel ese unai bamona kara namo idia hahedinaraia hahine momo ia gwauraidia. Iesu ena negai, idia haida be Iesu bona aposetolo taudia idia durudia. (Luka 8:​1-3) Gabeai, Keristani hahine be haroro goadagoada hahinedia ai idia lao; haida be orea idia hakaua Keristani tatau, hegeregere aposetolo Paulo, idia durudia bada; bona haida be heabidae karana idia hahedinaraia, edia ruma idia henia danu kongregesen heboudia karaia totona.

³ Iehova ese hahine be dala badana ai do ia gaukaralaidia ena ura hagugurua totona be Baibel ese ia perovetalaia vadaeni. Hegeregere, Ioela 2:​28, 29 ena peroveta herevana ia gwau tatau, hahine, matamata bona buruka be lauma helaga do idia abia bona Basileia ena sivarai namona harorolaia gaukarana do idia karaia. Unai peroveta herevana be Pentekoste 33 C.E. ai ia guguru matamaia. (Kara 2:​1-4, 16-18) Lauma helaga ese ia horoa hahinedia haida be hoa bada harihari gaudia idia abia, hegeregere peroveta gaukarana idia karaia. (Kara 21:​8, 9) Aposetolo edia negai, Keristani tomadiho ia bada ia lao haraga badina abidadama taihu momo, lauma dalanai tuari orea badana unai, idia haroro goadagoada. Oibe, lagani 60 C.E. bamona ai, aposetolo Paulo ia gwau, sivarai namona be “tanobada ibounai dekenai” idia harorolaia vadaeni.​—⁠Kolose 1:⁠23.

Edia Gari Lasi, Goada Bona Heabidae Kara Dainai Hanamoa Idia Abia

4. Dahaka badina namona dainai Paulo ese aposetolo edia negai Keristani kongregesen lalonai idia noho hahine haida ia hanamodia?

⁴ Aposetolo Paulo be hahine haida ese idia karaia haroro gaukarana ia laloa bada​—⁠hari inai negai Keristani naria taudia ese mai edia goada ida idia haroro hahinedia edia gaukara idia laloa bada hegeregerena. Paulo ese edia ladadia ia gwauraia hahine haida be “Trupena bona Truposa . . . Lohiabada totona idia hekwarahi bada” bona “lauegu turana lalokau Peresi . . . gaukara badana ia karaia vadaeni Lohiabada totona.” (Roma 16:12) Paulo ia gwau, Euodia bona Sunutuke “ese [ia] danu idia gaukara hebou Sivarai Namona totona.” (Filipi 4:​2, 3) Prisikila be ena adavana, Akwila danu Paulo ida idia gaukara hebou. Danu, ia bona Akwila be Paulo “totona kahirakahira idia mase.” Unai dainai Paulo ese inai ia torea: “Lau ese idia lau hanamoa bada, to lau sibona lasi, Iuda lasi ekalesia orea taudia ibounai danu.”​—⁠Roma 16:​3, 4; Kara 18:⁠2.

5, 6. Edena dala ai Prisikila be haheitalai namona ia hahedinaraia inai nega ena Keristani taihu totona?

⁵ Prisikila ena goada bona gari lasi karana be edeseni amo ia abia? Kara 18:​24-26 ese ita ia hadibaia. Ita itaia ia ese ena tau ia durua, bona hereva momokani maorona be haroro diba momo tauna, Apolo, dekenai idia hadibaia. Ia hedinarai goevagoeva, Prisikila be Dirava ena Hereva bona aposetolo edia hahediba hereva ia stadilaia namonamo hahinena. Unai dainai, ia ese kara namodia ia habadaia bona unai kara dainai ia be Dirava, ena tau, bona kongregesen ginigunana dekenai hairai bada gauna ai ia lao. Inai nega danu, idia gaukara goada Keristani taihu momo be Baibel idia stadilaia goevagoeva bona Iehova ese “kohu naria tauna mai ena kamonai” amo ia halasia lauma aniani idia abia be mai hairai bada.​—⁠Luka 12:⁠42.

⁶ Akwila bona Prisikila be heabidae taudia momokani. Paulo be Korinto dekenai idia danu ia noho bona edia palai turia bisinesi dekenai idia gaukara hebou. (Kara 18:​1-3) Unai tau bona hahine be Efeso dekenai idia lao bena gabeai Roma dekenai idia lao neganai, Keristani heabidae karana idia do hahedinaraia noho, bona edia ruma dekenai kongregesen heboudia idia karaia danu. (Kara 18:​18, 19; 1 Korinto 16:​8, 19) Unai hegeregerena, Numupa bona Maria, Ioane Mareko sinana, be edia ruma idia henia kongregesen heboudia karaia totona.​—⁠Kara 12:12; Kolose 4:⁠15.

Hairai Bada Gaudia Hari

7, 8. Hari Keristani hahine momo be dahaka helaga gaukara namona idia karaia, bona dahaka idia diba momokani?

⁷ Aposetolo edia negai bamona, hari Keristani hahinedia be gaukara badana idia karaia Dirava ena ura hagugurua gaukarana lalonai, haroro gaukara unai. Bona unai taihu ese gaukara namona idia karaia! Mani Gwen ena haheitalai ita laloa, ia be lagani 50 lalodiai mai abidadama ida Iehova ia hesiai henia ela bona ena mase lagani 2002 lalonai. Ena tau ia gwau: “Emai siti lalonai ibounai be Gwen ena haroro gaukara idia diba. Iena lalohadai be taunimanima ta ta be Iehova ena lalokau bona ena gwauhamata idia diba be namo. Aiemai headava maurina namona lalonai, Dirava, ena orea bona aiemai ruma bese dekenai ia hahedinaraia badinaia karana​—⁠danu, ai lalohisihisi neganai ai ia hagoadaia karana​—⁠ese lau bona emai natudia ia durua bada. Ia noho lasi dainai ai lalohisihisi bada.” Gwen bona ena tau be lagani 61 lalonai idia headava.

⁸ Keristani hahinedia, haneulato bona headava hahine tausen momo herea be painia bona misinari gaukara idia karaia noho, siti badadia ela bona hanua maragidia lalonai idia ese Basileia ena sivarai idia harorolaia bona edia tauanina durua gaudia sisina idia moalelaia. (Kara 1:⁠8) Iehova idia hesiai henia goadagoada totona, idia momo be sibodia edia ruma abia eiava natudia havaraia urana idia dadaraia. Taihu haida be edia tau, sekit bona distrik naria taudia, idia durudia, bona tausen momo be tanobada hegegemadai idia noho Betele rumadia dekenai idia gaukara. Oibe, sibodia edia ura idia dadaraia hahine be “bese ibounai edia kohu namodia,” idia ese Iehova ena ruma be hairai amo idia hahonua.​—⁠Hagai 2:⁠7.

9, 10. Ruma bese taudia haida ese Keristani adavadia bona sinadia totona dahaka hereva namodia idia gwauraia?

⁹ Oibe, Keristani hahine momo be mai edia ruma bese maduna idauidau, to idia ese Basileia gaudia idia atoa guna. (Mataio 6:33) Haneulato painia taihu ta ia gwau: “Egu sinana ena abidadama goadana bona haheitalai namona ese lau ia durua regula painia gaukara lau karaia totona. Ia be lauegu painia bamona namo hereana.” Taihu ta, mai ena natudia kekeni badadia ima be ena tau ese inai bamona ia gwauraia: “Emai ruma be hanaihanai ia goeva bona ena toana be namo. Bonnie ese ruma lalonai kohu momo ia atoa lasi, unai amo emai ruma bese be lauma gaudia idia tahua guna diba. Emai moni gaukaralaia dalana ia naria namonamo dainai, lau be lagani 32 lalodiai pat-taim gaukara lau karaia diba, unai amo egu ruma bese bona lauma gaudia dekenai nega bada lau henia diba. Egu adavana ese emai natudia ia hadibaia idia gaukara goada totona. Ia lau hanamoa sibona.” Hari, unai tau bona ena adavana be Iehova ena Witnes taudia edia hedikwota badana dekenai idia gaukara noho.

¹⁰ Headava tauna ta, ia bona adavana be mai edia natudia badadia, ese ena hahine ena sivarai ia torea, ia gwau: “Susan ena kara, lau ura henia bada gaudia be inai: Dirava bona taunimanima ia lalokau henidia bada, ena lalo-parara karana, haida edia hemami ia laloa karana bona ena kara maoromaoro karana. Ia laloa bada gauna be namona be Iehova dekenai iseda gau namodia ita henia​—⁠Dirava ia hesiai henia bona ena sina maduna ia huaia lalonai unai hakaua herevana be ia sibona ese ia badinaia.” Unai tau ena adavana ena heduru dainai, ia ese lauma dalanai hahenamo idauidau ia abia, hegeregere elda maduna, painia, sekit naria tauna durua gaukara, bona Hospital Liaison Committee gaukarana ia karaia diba. Edia tau dekenai, Keristani turadia dekenai bona mai anina bada gauna be Iehova dekenai, unai bamona hahine be hairai bada gaudia!​—⁠Aonega Herevadia 31:​28, 30.

Adavadia Lasi Hairai Bada Hahine

11. (a) Edena dala ai Iehova ia hahedinaraia abidadama hahinedia, hegeregere vabu ia laloa bada? (b) Keristani vabu bona adavadia lasi abidadama taihu be dahaka idia diba momokani?

¹¹ Iehova be nega momo ia hahedinaraia vabu taudia edia noho maurina ia laloa bada. (Deuteronomi 27:19; Salamo 68:5; Isaia 10:​1, 2) Iena kara be ia haidaua lasi. Ia ese vabu sibona ia lalodia bada lasi to adavadia lasi sina bona edia lalona idia hadaia do idia headava lasi eiava Keristani tauna namona ta idia do davaria lasi haneulato ia lalodia bada danu. (Malaki 3:6; Iamesi 1:27) Bema oi be mai abidadama ida Iehova oi hesiai henia noho haneulato ta, namona be oi diba momokani, Iehova matanai oi be mai emu hairai bada.

12. (a) Keristani taihu haida ese Iehova badinaia karana be edena bamona idia hahedinaraia? (b) Iseda taihu haida be dahaka hemami idia haheaukalaia noho?

¹² Iseda Keristani taihu ese Iehova ena sisiba “Keristani tauna sibona do ia adavaia” idia badinaia dainai idia do headava lasi edia haheitalai, mani ita laloa. (1 Korinto 7:39; Aonega Herevadia 3:⁠1) Dirava ena Hereva ese idia ia hagoadaia: “Lohiabada [Iehova] e, oi dekenai idia abidadama henia taudia, be oi ese unai taudia oi durua noho.” (2 Samuela 22:26) To, idia momo idia davaria headava lasi maurina idia noholaia be auka. Taihu ta ia gwau: “Egu lalona lau hadaia Keristani tauna sibona do lau adavaia, to lau itaia egu turadia be Keristani tatau namodia idia adavaia neganai, lau taitai momo.” Taihu ma ta ia gwau: “Lagani 25 lalodiai Iehova lau hesiai henia vadaeni. Egu ura be ia do lau badinaia noho, to sibona lau noho ena hemami dainai lau hebogahisi bada. Lau bamona taihu idia ura ma haida ese idia hagoadaia.” Unai Dirava idia badinaia taihu be edena bamona ita durudia diba?

13. (a) Iepeta ena natuna kekeni idia vadivadi henia taudia edia haheitalai amo dahaka ita dibaia? (b) Edena dala ma haida amo iseda kongregesen lalonai haneulato taihu ita lalodia bada karana ita hahedinaraia diba?

¹³ Dala ta be guna ia vara gauna ta amo ita itaia. Iepeta ena natuna kekeni be ia headava diba dalana ia rakatania neganai, taunimanima idia lalo-parara ia be sibona ena ura ia dadaraia unai. Ia hagoadaia totona dahaka idia karaia? “Lagani ta ta ibounai, Israela kekeni ese dina 4 lalonai, edia gabu idia rakatania, bona Iepeta, Gileada tauna, ena natuna kekeni totona idia taitai.” (Gunalaia Taudia 11:​30-40) Unai hegeregerena, ita ese Dirava ena taravatu idia badinaia goadagoada haneulato taihu be iseda kudouna ibounai ida ita hanamodia be namo.a Edena dala ma ta ai ita hahedinaraia diba idia ita lalodia? Iseda guriguri lalonai Iehova ita noia unai bamona abidadama taihu do ia hagoadaia edia hesiai gaukara idia karaia noho totona. Namona be ita hamaorodia Iehova bona Keristani kongregesen ibounai ese idia lalokau henidia bada bona idia karaia gaukara idia laloa bada.​—⁠Salamo 37:⁠28.

Adavadia Lasi Sina Idia Kwalimu Dalana

14, 15. (a) Dahaka dainai adavadia lasi Keristani sina ese heduru totona Iehova idia noia be namo? (b) Edena dala ai adavadia lasi sina be edia guriguri hegeregerena idia kara diba?

¹⁴ Adavadia be lasi Keristani hahinedia be hekwakwanai momo idia davaria danu. To, edia natudia be Baibel ena hakaua herevadia hegeregerena idia naria totona Iehova dekenai unai idia gurigurilaia diba. Momokani, bema oi be adavana lasi, tama eiava sina ena maduna ibounai be nega tamona oi huaia diba lasi. To, mai abidadama ida Iehova oi guriguri henia neganai, Ia ese oi do ia durua emu maduna idauidau oi huaia totona. Haheitalai ta be inai: Mani oi laloa oiemu daiutu be ruma latana ta ataiai momokani bona oi be aniani pasolo metaudia oi huaia bona oi ura oi daekau lao. Bema lifti ia noho, oi be mai hekwarahi ida vadavada dekenai oi raka daekau, a? Lasi! Unai hegeregerena, namo lasi lalona idia hametaua maduna be oi sibona oi huaia badina Iehova oi nanadaia diba oi ia durua totona. Oibe, ia dekenai oi lao totona oi ia boiria. Salamo 68:19 ia gwau: “Lohiabada do ita hanamoa. Ia ese dina ibounai iseda maduna metaudia ia huaia noho.” Unai hegeregerena, 1 Petero 5:7 ia gwau emu lalo-hekwarahi ibounai be Iehova ena imana dekenai do oi atoa, badina “ia ese [oi] ia naria noho.” Unai dainai hekwakwanai bona lalo-hekwarahi oi davaria neganai, “nega ibounai” emu guba Tamana dekenai emu lalo-hekwarahi oi gwauraia hedinarai.​—⁠1 Tesalonika 5:17; Salamo 18:6; 55:⁠22.

¹⁵ Hegeregere, bema oi be sina ta, sikuli dekenai emu natudia edia turadia edia lalo-ani eiava edia Dirava badinaia karana dekenai hahetoho idia davaria karadia oi laloa momo. (1 Korinto 15:33) Unai oi lalo-hekwarahilaia be mai badina. To oi gurigurilaidia danu be namo. Emu natudia be sikuli dekenai idia do lao lasi neganai, dina ena siri umui kikilaia murinai, unai gaudia umui gurigurilaia hebou be namo, ani? Mai emu kudouna ibounai ida, idia vara noho hekwakwanai oi gurigurilaia ese matamata taudia edia lalona do ia hamarerea. Gau badana be inai, mai haheauka ida oi hekwarahi emu natudia edia kudouna dekenai Dirava ena Hereva oi hadibaia lou lou neganai, oi be Iehova ena hahenamo oi noia unai. (Deuteronomi 6:​6, 7; Aonega Herevadia 22:⁠6) Laloa boio lasi, “Lohiabada ese, kara maoromaoro taudia ia naridia noho, bona edia guriguri ia kamonai henia noho.”​—⁠1 Petero 3:12; Filipi 4:​6, 7.

16, 17. (a) Mero ta be ena sinana ese ia hahedinaraia lalokauna be edena bamona ia gwauraia? (b) Unai sina ena lalohadai lauma gaudia dekenai ese edena bamona ena natudia ia durua?

¹⁶ Mani Olivia, ia be sina ta mai ena natuna 6, ena haheitalai ita laloa. Ena natuna ginigabena ia havaraia murinai, ena Witnes lasi adavana ese ia rakatania, to Dirava ena dala ai ena natudia ia hadibadia maduna ia huaia. Unai neganai Olivia ena natuna mero, Darren, ena mauri lagani be 5 sibona, hari ena mauri lagani be 31 bona ia be Keristani elda bona painia tauna ta. Olivia ena lalo-hekwarahi ia bada badina Darren be gorere badana ta ia davaria bona hari unai gorere ia do noho. Darren be ena maragi negadia ia laloa neganai, ia gwau: “Lau do laloatao egu hospital bedi dekenai lau helai bona Sinagu lau naria noho. Dina ibounai egu badinai ia helai bona lau dekenai Baibel ia duahia. Bena Basileia anena ‘Iehova e, Oi Ai Tanikiu Henia’ ia abia.b Unai nega amo ema bona hari, unai Basileia ane be egu ura bada anena.”

¹⁷ Olivia ese Iehova ia lalokau henia bona ia abidadama henia dainai ia be ia kwalimu adavana lasi sina ta. (Aonega Herevadia 3:​5, 6) Ena lalohadai maorona be ena natudia totona ia atoa tahua gaudia amo ia hedinarai. Darren ia gwau: “Emai sinana be nega ibounai ai ia hagoadaia ful-taim hesiai gaukara ai karaia totona. Unai dainai lau bona egu taihudia hani be ful-taim hesiai gaukara lalonai ai vareai. To, emai Sinana be ma haida dekenai unai ia heagilaia lasi. Lau hekwarahi ena kara namodia lau tohotohoa totona.” Momokani, natudia ibounai be Olivia ena natudia bamona do idia bada bona Dirava idia hesiai henia lasi. To, bema sina ta ia hekwarahi Baibel ena hakaua herevadia hegeregerena ia kara neganai, ia diba momokani Iehova ese do ia hakaua bona mai lalokau ida do ia durua.​—⁠Salamo 32:⁠8.

18. Edena dala ai ita hahedinaraia Iehova ese ia haginia Keristani kongregesen ita laloa bada?

¹⁸ Dirava ena heduru bada be Keristani kongregesen amo ia henia, hanaihanai ita abia lauma aniani ena program amo, iseda Keristani tadikaka taihu bona “harihari gaudia,” lauma dalanai idia lo tadikaka unai edia amo. (Efeso 4:⁠8) Mai edia abidadama elda taudia idia gaukara goada kongregesen lalonai ibounai idia hagoadaia totona, idia ese “tamana bona sinana lasi maragidia bona vabu be mai edia hisihisi” edia namo idia laloa bada. (Iamesi 1:27) Unai dainai Dirava ena taunimanima kahirakahira umui noho, oi sibona oi noho lasi.​—⁠Aonega Herevadia 18:1; Roma 14:⁠7.

Tau Kwara Dagina Henunai Noho Karana Ena Hairai

19. Dahaka dainai hahine be ena tau henunai ia noho be tau ese hahine ia hereaia karana ia hahedinaraia lasi, bona Baibel ese edena bamona unai ia hamomokania?

¹⁹ Iehova ese hahine ia havaraia tau ia bamoa totona. (Genese 2:18) Unai dainai, hahine be ena tau henunai ia noho ese tau be hahine ia hereaia lalohadaina ia hahedinaraia lasi. Lasi, to unai be hahine matauraia karana, unai dala amo Dirava ena ura hegeregerena ai hahine ese ena diba bona aonega ia gaukaralaia diba. Aonega Herevadia karoa 31 be guna Israela bese dekenai hahine namona ese ia karaia diba gaukara idauidau ia gwauraia. Ia ese dabu taudia ia durua, vine uma ia karaia, bona tano ia hoia. Oibe “iena adavana ese ia dekenai ia abidadama henia noho, bona unai tau ese ogogami . . . ia davaria lasi.”​—⁠Siri 11, 16, 20.

20. (a) Keristani hahinena be edena dala ai Dirava ese ia henia diba eiava harihari gaudia ia laloa be namo? (b) Eseta be edena bamona kara namodia ia hahedinaraia, bona unai dainai Iehova ese edena dala ai ia gaukaralaia?

²⁰ Dirava ia gari henia bona ia manau hahinena be mai hekokoroku ida sibona ia abia isi lasi eiava ena tau ia hanaia toho lasi. (Aonega Herevadia 16:18) Ia be tanobada gaudia dekenai sibona ena ura ia tahua lasi, to Dirava ese ia henia harihari gaudia ia gaukaralaia ma haida​—⁠ena ruma bese, Keristani turadia, dekena taudia, bona gau badana be Iehova ia hesiai henia totona. (Galatia 6:10; Tito 2:​3-5) Mani Baibel ese ia kikilaia Kwini Eseta ita laloa. Ena be ena toana be hairai, to ia be manau bona kamonai hahinena. (Eseta 2:​13, 15) Ia headava neganai, ena tau King Ahasuero ia matauraia bada, King ena adavana gunana Vasati bamona lasi. (Eseta 1:​10-12; 2:​16, 17) Danu, ena be ia be kwini​—⁠gau haida dekenai Eseta ese mai hemataurai ida ena kakana Modekai ena sisiba ia abia dae. To namo lasi oi laloa ia be goada lasi hahinena​—⁠lasi! Mai gari lasi ida ia ese, Hamana, mai ena siahu bada kara dika tauna ena palani Iuda taudia ia hamasedia ore totona ia gwauraia hedinarai. Iehova ese Eseta ia gaukaralaia ena taunimanima hamauria totona.​—⁠Eseta 3:​8–4:17; 7:​1-10; 9:⁠13.

21. Keristani hahinena be edena dala ai Iehova dekenai hairai bada gauna ai ia lao diba?

²¹ Ia hedinarai goevagoeva, guna bona hari, Dirava idia laloa hahinedia be Iehova bona ena tomadiho karana idia badinaia goadagoada. Unai dainai, Iehova matanai Ia idia gari henia hahinedia be hairai bada gaudia. Keristani taihu e, mani dala umui kehoa Iehova ese ena lauma helaga amo umui be “disi” namona ai do ia halaoa, “gaukara namodia ibounai” do umui karaia totona. (2 Timoteo 2:21; Roma 12:⁠2) Unai hairai bada tomadiho hahinedia dekenai, Dirava ena Hereva ia gwau: “Unai hahine do umui hanamoa, bona davana namona do umui henia. Taunimanima ibounai ese ia do idia matauraia be namo.” (Aonega Herevadia 31:31) Mani unai hereva be ia momokani umui ta ta dekenai.

[Footnotes]

Oi Laloatao, A?

• Iesu bona aposetolo edia negai, Keristani hahine haida ese edena dala ai idia hahedinaraia Iehova ena matanai idia be mai edia hairai bada?

• Dahaka kara amo iseda negai taihu momo be Dirava dekenai hairai bada gaudia ai idia lao?

• Edena dala ai Iehova ese adavana lasi sina bona haneulato taihu ia durudia?

• Edena dala ai hahine ta ia hahedinaraia ia be kwara dagina ia matauraia?

[Box on page 27]

LALOA DOBU TOTONA HAHEITALAI HAIDA

Oi ura Baibel lalonai abidadama hahine ma haida edia sivarai oi duahia, a? Bema oi ura, mani henunai ai torea siridia oi duahia. Ai torea hahine ta ta edia haheitalai oi laloa dobu neganai, edena hakaua herevadia be oi sibona emu mauri lalonai oi badinaia diba oi tahua be namo.​—⁠Roma 15:⁠4.

◆ Sara: Genese 12:​1, 5; 13:18a; 21:​9-​12; 1 Petero 3:​5, 6.

◆ Harihari bada Israela hahinedia: Esodo 35:​5, 22, 25, 26; 36:​3-7; Luka 21:​1-4.

◆ Debora: Gunalaia Taudia 4:1–​5:​31.

◆ Ruta: Ruta 1:​4, 5, 16, 17; 2:​2, 3, 11-​13; 4:​15.

◆ Suneme hahinena: 2 King Taudia 4:​8-​37.

◆ Kanana hahinena: Mataio 15:​22-​28.

◆ Mareta bona Maria: Mareko 14:​3-9; Luka 10:​38-​42; Ioane 11:​17-​29; 12:​1-8.

◆ Tabita: Kara 9:​36-​41.

◆ Filipi ena natuna kekeni hani: Kara 21:⁠9.

◆ Fibi: Roma 16:​1, 2.

[Picture on page 25]

Oi ese Dirava ena taravatu idia badinaia goada haneulato taihu dekenai hanamoa herevana oi gwauraia, a?

[Picture on page 26]

Natudia be sikuli dekenai idia do lao lasi neganai, dahaka gaudia umui gurigurilaia diba?