Koikoi Karadia Dekenai Naria Namonamo
“Naria namonamo: sedira ta ia noho, ia ese . . . anina lasi koikoi herevadia amo iena vamu bamona umui do ia abia lao.”—KOLOSE 2:8, NW.
1-3. (a) Dahaka haheitalai ese idia hahedinaraia taunimanima idauidau idia koikoi? (b) Tanobada dekenai koikoi karadia ita hoalaia lasi ena badina be dahaka?
“UMUI hida be klaient ta ese ia do koia lasi?” Lagani haida gunanai, taravatu ia hadibaia profesa tauna ta be tahua gaukarana ta ia karaia neganai, unai henanadai ia henia. Dahaka haere ia abia? Ia gwau: “Loea taudia tausen momo amo loea tamona sibona ia gwau, klaient ta ese ia do koia lasi.” Dahaka dainai? “Unai loea be vanegai sibona kampani badana ta ai gaukara ia hamatamaia, bona klaient ta ia do hereva henia lasi.” Madi, unai sivarai ese ia hahedinaraia goevagoeva, hari inai tanobada dekenai koikoi karadia be bada herea.
2 Koikoi karadia be idauidau, bona hari taunimanima idauidau idia koikoi. Unai haheitalai momo be nius halasia oreadia ese idia ripotilaia—politikol taudia ese edia kara idia hunia toho, akaun naria taudia bona loea taudia ese bisinesi ena moni idia habadaia koikoi, bisinesi taudia ese kastoma taudia idia koia, haida ese insurens kampani idia koia, bona kara ma haida. Ma danu, tomadiho taudia idia koikoi. Dubu gunalaia taudia oreana be hahediba koikoidia, hegeregere souli ia mase diba lasi, hel lahina bona toi tamona hahediba herevadia amo taunimanima hutuma idia hakaua kerere.—2 Timoteo 4:3, 4.
3 Unai koikoi karadia ibounai dainai ita hoa be namo, a? Lasi. Baibel ese “nega ena dokona” ia herevalaia neganai, ia gwau: “Kara dika taudia bona koikoi taudia ese edia kara dika bona edia koikoi do idia habadaia. Idia ese tau haida do idia koia, bona ma tau haida ese idia danu do idia koia.” (2 Timoteo 3:1, 13) Ita be Keristani taudia dainai, namona be hereva momokani amo ita idia hakaua siri diba lalohadaidia dekenai ita naria namonamo. To henanadai rua idia vara: Dahaka dainai hari koikoi karadia be bada herea, bona edena dala ai koikoi karadia dekenai ita naria namonamo diba?
Dahaka Dainai Hari Koikoi Karadia be Bada Herea?
4. Inai tanobada dekenai koikoi karadia be bada herea ena badina be Baibel ese edena bamona ia hahedinaraia goevagoeva?
4 Inai tanobada dekenai koikoi karadia be bada herea ena badina be Baibel ese ia hahedinaraia goevagoeva. Aposetolo Ioane ia gwau: “Satani ese tanobada taudia ibounai ia gunalaia noho.” (1 Ioane 5:19) Iesu ese Satani be inai bamona ia herevalaia: “Hereva momokani be ia badinaia lasi, badina iena lalona dekenai hereva momokani be lasi. Ia be hereva koikoi ia gwauraia, iena kara momokani be unai, badina ia be koikoi tauna, bona ia be koikoi ibounai edia tamana.” Unai dainai, taunimanima be inai tanobada lohiana ena lalohadai bona koikoi karadia idia hahedinaraia neganai, ita hoa lasi, ani?—Ioane 8:44; 14:30; Efeso 2:1-3.
5. Inai dokona negana ai, Satani be edena bamona ena koikoi karadia ia habadaia noho, bona ia ura bada daidia ia koia?
5 Inai dokona negana lalonai, Satani ia gaukara goadagoada. Ia be tanobada dekenai idia negea diho. Ia diba iena nega be ia kwadogi, bona ia “badu dikadika.” Iena lalona ia hadaia taunimanima momo herea ia hadikaia totona, unai dainai “tanobada taudia ibounai ia koia noho.” (Apokalupo 12:9, 12) Satani be nega ta ta sibona ai taunimanima ia koia lasi. To, hanaihanai ia gaukara goada taunimanima ia hakaua kerere totona.a Ia ese koikoi daladia idauidau ia gaukaralaia, abidadama lasi taudia edia lalona ia hadiburaia bona Dirava ena amo ia hakaudia siri totona. (2 Korinto 4:4) Unai koikoi tauna badana ia ura bada “lauma bona momokani” ai Dirava idia tomadiho henia taudia ia ania ore. (Ioane 4:24; 1 Petero 5:8) To ita laloaboio lasi, Satani ia gwau: ‘Dirava ena amo taunimanima ibounai lau hakaua siri diba.’ (Iobu 1:9-12) Namona be Satani ena “koikoi karadia” haida bona idia amo ita naria namonamo diba daladia ita itaia.—Efeso 6:11.
Aposteit Taudia Edia Koikoi Karadia Dekenai Ita Naria Namonamo
6, 7. (a) Aposteit taudia be dahaka idia gwau? (b) Edena bamona Baibel ese aposteit taudia edia ura gauna ia hahedinaraia goevagoeva?
6 Satani ese nega daudau lalonai aposteit taudia ia gaukaralaia Dirava ena hesiai taudia edia lalona ia veria totona. (Mataio 13:36-39) Aposteit taudia idia gwau Iehova idia tomadiho henia bona Baibel idia abidadama henia, to idia ese Iehova ena tanobada oreana idia dadaraia. Idia haida ese “Babulonia badana,” tanobada ena tomadiho koikoi ibounai, amo idia mai Dirava hadikaia hahediba herevadia idia abia dae lou. (Apokalupo 17:5; 2 Petero 2:19-22) Baibel toretore taudia be Dirava ese ia hasiahudia dainai, hereva aukadia amo aposteit taudia edia ura bona dala idauidau idia gwauraia hedinarai.
7 Aposteit taudia edia ura gauna be dahaka? Idia momo ese edia tomadiho, reana guna idia laloa tomadiho momokani unai, idia rakatania sibona lasi. To, nega momo idia ura ma haida idia hakaua siri danu. Aposteit taudia momo be sibodia edia diba tahua taudia idia halaoa lasi, to idia ura “diba tahua taudia [Keriso ena diba tahua taudia unai] do idia hakaua kerere.” (Kara 20:29, 30) Aposetolo Paulo ese hadibaia taudia koikoidia ia herevalaia neganai, inai karaharaga sisibana ia gwauraia: “Naria namonamo: sedira ta ia noho, ia ese . . . iena vamu bamona umui do ia abia lao.” (Kolose 2:8, NW ) Unai sisiba ese ia hahedinaraia, aposteit taudia momo be unai bamona idia karaia toho, ani? Henaohenao tauna ta ese famili ta lalonai ia noho namonamo tauna ta ia henaoa hegeregerena, aposteit taudia ese idia edia hereva do idia abia dae taudia kongregesen dekenai idia koia, mamoe oreana amo idia hakaudia siri totona.
8. Aposteit taudia ese edena dala idauidau idia gaukaralaia edia ura gauna idia hagugurua totona?
8 Aposteit taudia ese edena dala idauidau idia gaukaralaia edia ura gauna idia hagugurua totona? Nega momo hereva momokani idia hagagevaia, hereva momokani ena kahana sibona idia gwauraia, bona hereva koikoi idia halasia. Iesu ia diba iena murinai idia raka taudia be taunimanima ese do idia hereva dika henidia “mai koikoi danu.” (Mataio 5:11) Unai bamona dagedage taudia ese hereva koikoi do idia gwauraia, badina idia ura ma haida idia koia. Aposetolo Petero ia gwau, aposteit taudia be “sivarai koikoi” do idia gaukaralaia, “koikoi daladia” do idia habadaia bona “Buka Helaga ena hereva haida edia anina [do] idia gwauraia kerere,” sibona edia ura gauna hagugurua totona. (2 Petero 2:3, 13; 3:16) Aposteit taudia haida idia kwalimu, badina edia “hereva koikoi dekena amo, haida edia abidadama ia manoka vadaeni.”—2 Timoteo 2:18.
9, 10. (a) Edena dala ai aposteit taudia edia koikoi karadia dekenai ita naria namonamo diba? (b) Bema Iehova ena ura lalo-pararalaia dalana dekenai gau haida idia hamaoromaoroa noho, dahaka dainai ita lalo-hekwarahi lasi be namo?
9 Edena dala ai aposteit taudia edia koikoi karadia dekenai ita naria namonamo diba? Namona be Dirava ena Hereva ena sisiba ita badinaia, ia gwau: “Ekalesia orea idia hapararaia taudia bona taunimanima haida edia abidadama idia hadikaia taudia do umui naria namonamo. Ai ese umui dekenai ai henia vadaeni hadibaia hereva idia ura hamakohia gwauraia. Idia dekena amo do umui raka siri.” (Roma 16:17) Aposteit taudia edia hereva idauidau—herevana edia uduna amo idia herevalaia, idia printaia gaudia eiava Internet ai—ita dadaraia neganai, ‘idia dekena amo do ita raka siri’ unai. Dahaka dainai unai bamona ita karaia diba? Ginigunana be, Dirava ena Hereva ese ita ia hakaua dainai unai bamona ita karaia diba, bona ita abia dae Iehova be hanaihanai iseda namo ia laloa bada.—Isaia 48:17, 18.
10 Iharuana be, ita dekenai mai anina bada hereva momokani ia hadibaia oreana ita lalokau henia, badina be Babulonia Badana amo ita ia hapararaia. Ma danu, ita diba Dirava ena ura ibounai be ita diba goevagoeva lasi; idia hanaia laganidia lalonai iseda lalo-parara gau haida dekenai be idia hamaoromaoroa. Kamonai Keristani taudia be mai moale ida Iehova idia naria noho, ena ura ibounai ia hahedinaraia totona. (Aonega Herevadia 4:18) To hari, namona be Iehova ese mai moale ida ia gaukaralaia oreana ita rakatania lasi, badina unai orea ia hanamoa noho karadia be ita itaia goevagoeva.—Kara 6:7; 1 Korinto 3:6.
Sibona Ita Koia Karana Dekenai Ita Naria Namonamo
11. Dahaka dainai goevadae lasi taudia be sibodia idia koia diba?
11 Satani ese goevadae lasi taudia edia manoka karana ta—sibona ita koia karana—ia gaukaralaia idia ia tohoa totona. Ieremia 17:9 ia gwau: “Taunimanima edia kudouna be mai koikoi bada, bona mai dika rohoroho danu.” Bona Iamesi ia gwau: “To dibagani ena badina korikori be, tau ta sibona ena ura dainai, kara dika ta ese ia veria noho, bona ia koia noho.” (Iamesi 1:14) Ura dikadia ese eda kudouna ia koia neganai, do ita laloa dika gaudia be namo bona dika ta do ita davaria lasi. Unai be lalohadai koikoina, badina dika ia karaia tauna be dika bada ia davaria.—Roma 8:6.
12. Edena dala idauidau ai sibona ita koia karana ena tarapu lalonai ita moru diba?
12 Sibona ita koia karana ena tarapu lalonai ita moru diba. Iseda kudouna be mai koikoi bada dainai, reana ita laloa eda manoka karana ta be dika momokani lasi, eiava kara dika badana ta ita karaia neganai ekskius idauidau ita gwauraia. (1 Samuela 15:13-15, 20, 21) Danu, reana eda kudouna be dala do ia tahua, ia maoro lasi karana ia gwauraia maoro totona. Hegeregere, moale karadia mani oi laloa. Moale karadia haida be namo bona moale idia havaraia. To, inai tanobada ena moale karadia idauidau—muvi, televisen program haida bona Internet dekenai—be dika herea bona matabodaga karadia amo ia honu. Bema ita laloa moale karadia dikadia ita itaia diba bona kerere ta do ia vara lasi, ita be sibona ita koia unai. Haida idia gwau: “Unai ese egu lalona ena mamina ia hadikaia lasi dainai, unai ena dika be dahaka?” To unai bamona taudia be ‘sibona idia koia noho.’—Iamesi 1:22.
13, 14. (a) Edena haheitalai Baibel lalonai ese ia hahedinaraia eda lalona ena mamina be nega ibounai ita abidadama henia diba lasi? (b) Edena bamona sibona ita koia daladia dekenai ita naria namonamo diba?
13 Edena bamona sibona ita koia daladia dekenai ita naria namonamo diba? Gau badana be ita laloatao, taunimanima edia lalona ena mamina be nega ibounai ita abidadama henia diba lasi. Aposetolo Paulo mani ita laloa. Keristani tauna ta ai ia do lao lasi neganai, ia ese Keriso ena murinai idia raka taudia ia dagedage henia. (Kara 9:1, 2) Unai negai, reana iena lalona ena mamina ese ia samania lasi. Ia hedinarai goevagoeva, ia ese ena lalona ena mamina be ia hadibaia namonamo lasi. Paulo ia gwau: “Badina be abidadama lau do diba lasi, bona egu kara ena dika lau do diba lasi dainai.” (1 Timoteo 1:13) Unai dainai, bema moale karadia haida ita itaia to eda lalona ena mamina ese ita ia samania lasi, ita gwau lasi ita abia hidi dalana be maoro. To Dirava ena Hereva amo lalona ena mamina ita hadibaia namonamo neganai, unai sibona ese ita ia hakaua namonamo diba.
14 Sibona ita koia lasi totona, heduru herevadia haida ita laloatao be namo. Mai guriguri ida sibona emu kara oi tahua. (Salamo 26:2; 2 Korinto 13:5) Mai momokani ida sibona emu kara oi tahua karana ese oi do ia hadibaia, emu lalohadai eiava kara haida oi haidaua be namo. Ma haida oi kamonai henia. (Iamesi 1:19) Nega momo ita sibona eda kara ita tahua neganai, reana kerere ta ita davaria lasi, unai dainai aonega dalana be idia lo Keristani tadikaka edia hereva ita kamonai henia be namo. Bema dala ta oi abia hidi eiava emu kara haida be maoro lasi lo tadikaka edia matana dekenai, reana oi sibona oi nanadaia, ‘Unai bamona lau karaia badina egu lalona ena mamina lau hadibaia namonamo lasi eiava egu kudouna be lau ia koia noho, a?’ Hanaihanai Baibel bona Baibel idia herevalaia bukadia oi stadilaia. (Salamo 1:2) Unai bamona oi karaia neganai, emu lalohadai, kara, bona hemami be Dirava ena hakaua herevadia danu do idia hegeregere.
Satani Ena Koikoi Karadia Dekenai Ita Naria Namonamo
15, 16. (a) Satani be ita ia koia totona, dahaka koikoi daladia ia gaukaralaia? (b) Edena dala ai unai bamona koikoi daladia ita dadaraia diba?
15 Satani be ita ia koia totona koikoi karadia idauidau ia gaukaralaia. Ia ura ita ia koia bena do ita abia dae kohu bona moni tahua karana ese moale ia havaraia, to nega momo unai be momokani lasi. (Hadibaia Tauna 5:10-12) Ia ura ita abia dae inai tanobada dikana be do ia noho hanaihanai, ena be idia vara gaudia ese idia hamomokania ita be “nega ena dokona dekenai” ita noho. (2 Timoteo 3:1-5) Satani ia ura ita abia dae matabodaga maurina be dika lasi, ena be nega momo moale karadia idia tahua taudia be edia kara dainai dika bada idia davaria. (Galatia 6:7) Edena dala ai unai bamona koikoi karadia ita dadaraia diba?
16 Baibel dekenai idia noho haheitalaidia amo namo ita abia. Baibel lalonai, Satani ese ia koia taudia edia sivarai idia noho. Idia ese kohu idia ura henia bada, edia nega ai idia vara gaudia idia laloa lasi, eiava matabodaga karadia idia karaia—unai ibounai dainai dika bada idia davaria. (Mataio 19:16-22; 24:36-42; Luka 16:14; 1 Korinto 10:8-11) Hari idia noho taudia edia haheitalai amo gau haida ita dibaia. Madi, nega haida Keristani taudia haida ese karaharaga lalohadaina idia haboioa bona idia laloa Dirava idia hesiai henia dainai, gau namona ta idia reaia noho. Moale maurina badinaia totona, hereva momokani idia rakatania. To, unai bamona taudia be “dedidedi gabudia dekenai” idia gini, badina idia karaia noho kara dikadia dainai gabeai dika do idia davaria. (Salamo 73:18, 19) Ma haida edia kerere amo gau ta ita dibaia be namo, unai be aonega dalana.—Aonega Herevadia 22:3.
17. Dahaka dainai Satani be mai koikoi ida ia gwau, Iehova ese ita ia lalokau henia lasi eiava laloa bada lasi?
17 Satani be koikoi dalana ma ta ia gaukaralaia—ia gwau Iehova be ita ia lalokau henia lasi eiava laloa bada lasi. Lagani tausen momo lalonai, Satani be goevadae lasi taudia edia kara ia stadilaia. Ia diba momokani, lalo-manoka ese eda lauma dalana ia hamanokaia diba. (Aonega Herevadia 24:10) Unai dainai ia gwau Dirava ena matana ai ita be anina lasi. Bema ita “moru” bona ita abia dae Iehova be ita ia laloa lasi, reana Iehova badinaia karana do ita rakatania. (2 Korinto 4:9) Koikoi Tauna badana ena ura be unai! Vadaeni, Satani ena koikoi herevadia ese ita idia koia lasi totona, dahaka ita karaia be namo?
18. Baibel ese Iehova ena lalokau ita dekenai be edena bamona ia herevalaia?
18 Dirava ena lalokau karana ita dekenai be Baibel ese ia herevalaia, unai ita lalohadailaia be namo. Dirava ena Hereva ese lalona veria laulau herevadia haida ia gaukaralaia, unai amo ita ia hadibaia Iehova be ita ia laloa bada bona ita ta ta ia lalokau henia. Ia ese emu mata ranudia be “kavabu dekenai” ia udaia, anina be Ia oi badinaia goadagoada noho totona oi hadihoa mata ranudia ia itaia bona ia laloatao. (Salamo 56:8) Oi “lalohisihisi” neganai, unai Ia diba bona oi kahirakahira ia noho. (Salamo 34:18) Oi ia diba namonamo, bona “emui kwarana huina ibounai be Dirava ese ia duahia haorea momokani.” (Mataio 10:29-31) To unai ibounai ia hereaia gauna be, Dirava ese oi totona “iena Natuna tamona sibona” ia henia. (Ioane 3:16; Galatia 2:20) Nega haida, oi abia dae diba lasi unai bamona siri be oi totona idia torea. To, namona be Iehova ena hereva ita abia dae. Ia ura ita abia dae, ia ese ita be orea ta bamona ia lalokau henia sibona lasi, to ita ta ta ia lalokau henia danu.
19, 20. (a) Satani be mai koikoi ida ia gwau Iehova be ita ia lalokau henia lasi, to dahaka dainai unai ita dibaia bona dadaraia be gau badana? (b) Sekit naria tauna ta ese lalo-metau taudia be edena bamona ia durudia?
19 Koikoi daladia oi dibaia bona dadaraia. Bema oi diba ta be ia koikoi noho, ena koikoi karadia dekenai do oi naria namonamo. Unai hegeregerena, Satani ia ura oi abia dae Iehova be oi ia lalokau henia lasi, unai ita diba ese ita do ia durua bada. Gima Kohorona ta ese Satani ena koikoi daladia idauidau ia sisibalaia, bona Keristani taihu ta be unai ia duahia murinai, ia gwau: “Lau lalo-parara lasi Satani be egu hemami ia gaukaralaia lau ia hamanokaia totona. Unai lau diba neganai, unai ese lau ia hagoadaia unai hemami dikana lau tuari henia totona.”
20 South America ena tano ta dekenai sekit naria tauna ta ena ekspiriens mani oi laloa. Idia lalo-metau tadikakadia dekenai mamoe vadivadi gaukarana ia karaia neganai, nega momo idia ia nanadaia, ‘Toi Tamona oi abia dae, a?’ Nega momo lalo-metau tauna ia haere, ‘Lasi vaitani,’ ia diba unai be Satani ena koikoi herevana ta. Bena sekit naria tauna ia henanadai, ‘Hel lahina oi abia dae, a?’ Ma idia haere, ‘Lasi vaitani!’ Bena sekit naria tauna ese idia ia hamaoroa, Satani ena koikoi herevana ma ta danu ia noho bona nega momo taunimanima ese unai idia itaia lasi. Idia ia noia Draw Close to Jehovah bukana,b rau 249, paragraf 21 idia kehoa totona, unuseniai inai koikoi herevana, Iehova ese ita ta ta ia lalokau henia lasi, ia hahedinaraia. Unai sekit naria tauna ese lalo-metau taudia ia durua Satani ena koikoi dalana idia dibaia bona dadaraia karana amo, anina namona ia havaraia.
Koikoi Karadia Dekenai Oi Naria Namonamo
21, 22. Dahaka dainai Satani ena koikoi daladia ibounai ita diba, bona namona be iseda lalona ita hadaia dahaka ita karaia totona?
21 Inai nega dokona ena dina gabedia lalonai, Satani be ena koikoi karadia do ia habadaia noho. Iehova ita tanikiu henia, badina ia ese ita dekenai Satani ena koikoi daladia ibounai ia hadibaia. Baibel bona “hesiai tauna mai ena kamonai, bona mai ena kara maoromaoro” oreana ese idia halasia Baibel idia herevalaia bukadia ese Satani ena koikoi karadia idia hahedinaraia goevagoeva. (Mataio 24:45) Ita idia hadibaia guna dainai, ita hegaegae unai koikoi karadia ita hanaidia totona.—2 Korinto 2:11.
22 Vadaeni, namona be aposteit taudia edia hereva koikoidia dekenai ita naria namonamo. Iseda lalona ita hadaia sibona ita koia karana ena tarapu hehunina ita dadaraia totona. Bona Satani ena koikoi daladia ibounai ita dibaia bona dadaraia. Unai bamona ita karaia neganai, “kara momokani” bona koikoi ia inai henia Diravana ida iseda hetura karana do ita gimaia.—Salamo 31:5; Aonega Herevadia 3:32.
[Footnotes]
a Buka ta ese Apokalupo 12:9 dekenai inai hereva, “ia koia noho,” be inai bamona ia herevalaia, “ena anina be unai kara ia hadokoa lasi bona ia manadalaia karana ai ia lao.”
b Iehova ena Witnes taudia ese idia halasia.
Oi Laloatao, A?
• Dahaka dainai hari inai tanobada lalonai koikoi karadia be bada herea?
• Edena dala ai aposteit taudia edia koikoi karadia dekenai ita naria namonamo diba?
• Edena dala ai sibona ita koia karadia dekenai ita naria namonamo diba?
• Edena bamona Satani ena koikoi herevadia ita dadaraia diba?
[Picture on page 15]
Moale karadia dekenai sibona oi koia lasi
[Pictures on page 16]
Sibona oi koia lasi totona, mai guriguri ida sibona emu kara oi tahua, ma haida oi kamonai henia, bona hanaihanai Dirava ena Hereva oi stadilaia