Dagedage Tanobadana ai Hebogahisi Hahedinaraia
“Taunimanima edia lalona dekenai, ita ura henia bada kara, be bogahisihisi.”—AONEGA HEREVADIA 19:22.
1. Dahaka dainai hebogahisi ita hahedinaraia be reana ia auka?
OI LALOA oi be hebogahisi tauna, a? Bema oibe, reana emu mauri hari inai tanobada dekenai ia auka. Oibe, Baibel ia gwau hebogahisi be lauma ena huahua ta, to dahaka dainai sibona idia gwauraia Keristani tanodia lalonai danu hebogahisi ita hahedinaraia be auka? (Galatia 5:22) Hereva gunana ai ita herevalaia bamona, ena haere ena kahana be aposetolo Ioane ena hereva lalonai ita davaria diba—tanobada ibounai be hebogahisi lasi lauma tauna ta, Satani Diabolo, ese ia gunalaia. (1 Ioane 5:19) Iesu Keriso ia gwau Satani be “tanobada ena lohia.” (Ioane 14:30) Unai dainai, inai tanobada ese ena gwau-edeede lohia tauna ena kara ia tohotohoa, bona ena kara be dika herea.—Efeso 2:2.
2. Dahaka gaudia ese iseda hebogahisi karana idia koua diba?
2 Ma haida ese ita idia kara dika henia neganai, iseda mauri idia hadikaia. Reana idia badu momo dekena taudia, eiava ita diba lasi taudia, eiava nega haida idia laloa namonamo lasi turadia bona ruma bese taudia ese hebogahisi lasi karana idia hahedinaraia. Idia hemataurai lasi, idia boiboi badabada bona idia hereva dika heheni taudia huanai ita noho dainai, nega momo ita lalohisihisi. Ma haida be idia hebogahisi lasi dainai, ita badu diba bona reana ita ura hebogahisi lasi karana ita hahedinaraia danu. Unai ese lauma bona tauanina dalanai iseda goada ia hadikaia diba.—Roma 12:17.
3. Dahaka lalo-hekwarahi gaudia badadia dainai taunimanima ese hebogahisi idia hahedinaraia be auka?
3 Danu, tanobada ai idia vara gaudia ese lalo-hekwarahi idia havaraia dainai, reana hebogahisi ita hahedinaraia be auka. Hegeregere, terorist karadia bona bese idauidau ese idia gaukaralaia muramura eiava niuklia tuari gaudia dainai, taunimanima ibounai idia lalo-hekwarahi. Danu, taunimanima milioni momo idia ogogami momokani, edia aniani, noho gabuna, dabua bona medikol gaudia be sisina sibona. Iseda mauri ia auka bona ita hanamoa diba lasi neganai, hebogahisi ita hahedinaraia be auka.
4. Haida be ma haida dekenai hebogahisi hahedinaraia karana idia laloa neganai, edena bamona idia laloa kerere diba?
4 Ta ia gwau diba hebogahisi ia hahedinaraia be gau badana lasi bona reana ia be manoka ena toana ta. Ma haida be ena hemami idia laloa lasi neganai, reana do ia laloa idia ese dala maorona ai ia idia kara henia lasi. (Salamo 73:2-9) To, Baibel be ita ia hadibaia, ia gwau: “Mai manau danu ia haere tauna, ese badu ia koua noho, to hereva auka ese badu ia havaraia noho.” (Aonega Herevadia 15:1) Manau bona hebogahisi be lauma ena huahua rua bona edia anina be kahirakahira idia hegeregere, idia ese ita idia durua mauri aukana lalonai ita haheauka totona.
5. Edena gabu haida ai hebogahisi ita hahedinaraia be namo?
5 Ita Keristani taudia dekenai Dirava ena lauma helaga ena huahua hahedinaraia karana be mai anina bada dainai, unai huahua ta—hebogahisi—ita hahedinaraia diba daladia ita laloa be namo. Dagedage tanobadana ai hebogahisi ita hahedinaraia diba, a? Bema oibe, edena dala haida ai hebogahisi ita hahedinaraia diba, unai amo lalo-hekwarahi negadiai Satani ena lalo-ani karadia do ita koua diba? Namona be ruma bese lalonai, gaukara gabunai, sikuli gabunai, dekena taudia ida, haroro gaukara ai bona tadikaka bona taihu dekenai hebogahisi hahedinaraia daladia ita laloa.
Ruma Bese Lalonai Hebogahisi Hahedinaraia
6. Dahaka dainai ruma bese lalonai hebogahisi be gau badana, bona edena dala ai ita hahedinaraia diba?
6 Iehova ena hahenamo ita abia bona ita ia hakaua totona lauma ena huahua ita hahedinaraia goadagoada be gau badana. (Efeso 4:32) Ruma bese taudia idia hebogahisi heheni be namo ena badina mani ita laloa. Gau badana be tau bona hahine ese dina iboudiai idia ta ta bona natudia dekenai hebogahisi idia hahedinaraia. (Efeso 5:28-33; 6:1, 2) Unai bamona hebogahisi karana be ruma bese taudia edia hereva heheni dalana ai ia hedinarai be gau badana, natudia ese edia tama sina idia matauraia bona tama sina ese dala namona ai natudia idia kara namo henia. Ma ta oi hanamoa haraga, to oi gwauraia dika haraga lasi.
7, 8. (a) Ruma bese lalonai hebogahisi momokanina ita hahedinaraia totona dahaka kara haida ita dadaraia be namo? (b) Edena dala ai herevahereva namonamo karana ese ruma bese goadana ia havaraia? (c) Edena dala ai emu ruma bese lalonai hebogahisi oi hahedinaraia diba?
7 Iseda ruma bese taudia ita hebogahisi henia ena anina be aposetolo Paulo ena sisiba ita badinaia, ia gwau: “Inai gaudia umui negea momokani: Badu, dagedage, laloa dika. Hereva dika bona hereva mirodia do umui gwauraia lasi.” Dina iboudiai Keristani ruma bese taudia be mai hemataurai ida idia herevahereva be namo. Dahaka dainai? Badina ruma bese ia goada noho totona herevahereva namonamo karana be mai anina bada. Gau ta dainai ita lalo-tamona lasi neganai, namona be unai hekwakwanai ita hamaoromaoroa toho, to hepapahuahu lalonai ta do ita halusia toho lasi. Idia moale ruma bese taudia be mai momokani ida hebogahisi bona ma haida laloa bada karana idia hahedinaraia.—Kolose 3:8, 12-14.
8 Hebogahisi be kara namona bona ita ia hagoadaia ma haida ita kara namo henia totona. Unai dainai, ruma bese taudia ma haida durua dalana ita tahua, edia namo ita laloa bada bona edia ura hegeregerena idia ita durua toho. Ruma bese taudia ta ta bona idia ibounai idia gaukara goada be gau badana, ruma bese ia hanamoa hebogahisina idia hahedinaraia totona. Unai amo, Dirava ena hanamoa do idia abia sibona lasi, to kongregesen lalonai bona idia noho gabuna ai, idia ese hebogahisi Diravana, Iehova, do idia hanamoa.—1 Petero 2:12.
Gaukara Gabunai Hebogahisi Hahedinaraia
9, 10. Gaukara gabuna ai idia vara diba hekwakwanai haida, bona hebogahisi dalanai hanaia daladia oi gwauraia.
9 Keristani tauna ese dina ta ta ai ena gaukara turadia dekenai hebogahisi ia hahedinaraia be reana ia auka. Gaukara taudia huanai ta hereaia karana ia noho dainai, gaukara turana ta ese koikoi dalanai gaukara biaguna ena vairanai ma ta ena ladana ia hadikaia, unai ese ta ena gaukara ia hadikaia diba. (Hadibaia Tauna 4:4) Unai negadia ai, hebogahisi oi hahedinaraia be auka. To, namona be Iehova ena hesiai tauna ia laloatao nega momo hebogahisi karana be kara maorona dainai, ia hekwarahi noho kara auka taudia edia kara ia haidaua totona. Unai ita karaia totona idia ita laloa bada karana ese ita do ia durua diba. Bema emu gaukara turana eiava ena ruma bese lalonai ta ia gorere neganai, reana ia oi laloa bada karana oi hahedinaraia diba. Eiava edia noho dalana totona oi henanadai henia ese ena kara ia haidaua diba. Oibe, bema mai dalana Keristani taudia ese lalo-tamona bona maino idia hahedinaraia be gau badana. Nega haida hebogahisi herevana ese ia vara gauna ia durua diba.
10 Nega ma haida ai, reana gaukara biaguna ia ura gaukara taudia ibounai ese iena lalohadai idia abia dae bona bese abia isi karana ta eiava Baibel ena taravatu ia utua dina hanamoa karana ta lalonai do idia vareai. Bema Keristani tauna be ena lalomamina dainai unai kara lalonai ia vareai diba lasi, reana hepapahuahu ia vara diba. Reana unai ia vara neganai, gaukara biaguna ia ura karaia gauna ena dika ibounai ia herevalaia be aonega karana lasi. Oibe, Keristani tauna ena hahediba herevadia idia abia dae lasi taudia idia laloa unai kara lalonai idia vareai be maoro. (1 Petero 2:21-23) Oi be unai kara lalonai oi vareai lasi ena badina be reana dala namona ai oi gwauraia diba. Edia hemataurai lasi herevadia be hemataurai lasi herevadia amo oi haloua lasi. Keristani tauna ese Roma 12:18 ena sisiba namona ia badinaia be namo, ia gwau: “Maino karaia daladia umui tahua dala idauidau ibounai dekenai, taunimanima danu mai maino danu do umui noho totona.”
Sikuli Gabunai Hebogahisi Hahedinaraia
11. Matamata taudia be edia sikuli turadia dekenai hebogahisi idia ura hahedinaraia neganai, edena bamona hekwakwanai idia davaria?
11 Matamata taudia be sikuli turadia dekenai hebogahisi idia hahedinaraia be ia auka. Nega momo matamata taudia idia ura edia sikuli turadia edia lalo-namo idia abia. Memero haida be tau badadia bamona idia kara, badina idia ura sikuli turadia ma haida edia lalo-namo idia abia, unai dainai nega haida sikuli dekenai ma haida idia hagaria. (Mataio 20:25) Matamata taudia ma haida idia ura sikuli dekenai idia abia diba, spot gadara eiava kara ma haida dekenai edia kwalimu karana idia heagilaia. Edia diba idia hekokorokulaia lalonai, nega momo sikuli turadia dekenai hebogahisi lasi karana idia hahedinaraia bona idia laloa unai bamona kara amo ma haida idia hereaia. Namona be Keristani mero eiava kekeni ia naria namonamo, unai taudia edia kara do ia tohotohoa lasi totona. (Mataio 20:26, 27) Aposetolo Paulo ia gwau “lalokau be ia dekenai ia kara dika tauna davana ia laloa lasi. Lalokau be mai ena bogahisihisi” bona “lalokau be ia heagi lasi, bona ia hekokoroku lasi.” Unai dainai, Keristani tauna ena maduna be hebogahisi lasi karana idia hahedinaraia taudia edia haheitalai dikana ia tohotohoa lasi, to iena sikuli turadia ia kara henia dalana dekenai Baibel ena sisiba ia badinaia.—1 Korinto 13:4.
12. (a) Dahaka dainai matamata taudia ese hebogahisi dalanai edia tisa taudia idia kara henia be reana ia auka? (b) Hebogahisi lasi karadia karaia totona edia lalona idia veria neganai, matamata taudia ese daika amo heduru idia tahua be namo?
12 Namona be matamata taudia ese hebogahisi dalanai edia tisa taudia idia kara henia. Stiuden taudia momo ese tisa taudia habadua karana idia moalelaia. Idia laloa sikuli ena taravatu idia utua karana amo edia tisa idia matauraia lasi neganai, edia aonega be bada. Hagaria karadia amo, reana ma haida idia veria unai kara lalonai idia vareai totona. Keristani matamata tauna be unai kara lalonai ia vareai lasi neganai, reana do idia kirikirilaia eiava do idia kara dika henia. Keristani matamata tauna be ena sikuli laganina ibounai lalonai unai kara ia haheaukalaia ese ena hebogahisi hahedinaraia karana ia tohoa. To namona be oi laloaboio lasi, Iehova oi badinaia noho be gau badana. Namona be oi diba unai nega aukadia lalonai ena lauma amo oi do ia hagoadaia.—Salamo 37:28.
Dekena Taudia Dekenai Hebogahisi Hahedinaraia
13-15. Dahaka ese dekena taudia dekenai hebogahisi hahedinaraia karana ia koua toho, bona edena dala ai unai hekwakwanai ita hanaia diba?
13 Herevana oi be sibona emu ruma ai, ruma badana ta ai, eiava ma gabu ta ai oi noho, dekena taudia dekenai hebogahisi bona edia namo tahua karadia hahedinaraia daladia oi laloa bada diba. Bona ita gwau lou, nega haida unai be auka.
14 Edena bamona bema emu dekena taudia ese emu bese, iduhu, eiava tomadiho dainai oi idia lalo-dika henia kava? Edena bamona bema nega haida oi idia matauraia lasi eiava oi idia dadaraia momokani? Oi be Iehova ena hesiai tauna dainai, dala idauidau ai hebogahisi hahedinaraia karana ese namo bada do ia havaraia. Do ia hedinarai dala namona ai oi be idau, Iehova—hebogahisi ena haheitalai hereadaena—oi hanamoa momokani unai. Oi diba lasi, reana emu hebogahisi karana dainai emu dekena tauna ese ena kara do ia haidaua. Reana Iehova hanamoa tauna ai ia lao diba.—1 Petero 2:12.
15 Edena dala ai hebogahisi oi hahedinaraia diba? Dala ta be, ruma bese lalonai iboudiai ese lauma ena huahua idia hahedinaraia. Dekena taudia ese reana unai idia itaia diba. Reana nega haida, emu dekena tauna dekenai kara namona ta oi karaia diba. Laloaboio lasi, hebogahisi ena anina be ma haida edia namo oi tahua karana.—1 Petero 3:8-12.
Haroro Gaukara ai Hebogahisi Hahedinaraia
16, 17. (a) Dahaka dainai haroro gaukara lalonai hebogahisi ita hahedinaraia be gau badana? (b) Dala idauidau ai ita haroro neganai, hebogahisi be edena bamona ita hahedinaraia diba?
16 Taunimanima be edia ruma ai, gaukara gabudiai bona taunimanima idia noho gabudia ai ita davaria toho lalonai, namona be iseda Keristani haroro gaukara be mai hebogahisi ida ita karaia. Namona be ita laloatao, ita be Iehova, hanaihanai hebogahisi ia hahedinaraia Diravana, ena hesiai taudia.—Esodo 34:6.
17 Emu haroro gaukara ai hebogahisi oi hahedinaraia noho lalonai, dahaka oi karaia danu be namo? Hegeregere, dala haroro dekenai taunimanima oi hereva henia neganai, oi hereva daudau lasi bona ena namo laloa bada karana amo hebogahisi oi hahedinaraia diba. Nega momo raka daladia dekenai taunimanima momo idia raka, unai dainai edia dala oi koua lasi totona oi naria namonamo be namo. Danu, bisinesi teritori ai oi haroro neganai, hebogahisi dalana be hereva momo oi gwauraia lasi, badina hoihoi taudia ese kastoma idia durua be namo.
18. Haroro gaukara ai, edena dala ai laloa namonamo karana ese ita ia durua hebogahisi ita hahedinaraia totona?
18 Ruma-ta-ruma-ta haroro gaukarana ai, oi laloa namonamo. Oi noho daudau lasi bema ia be medu negana. Oi itaia diba edena nega ruma tauna ia ura oi lao eiava ia badu sisina badina oi do noho, a? Reana emu gabu ai, Iehova ena Witnes taudia be nega momo taunimanima idia vadivadi henia. Bema unai bamona, idia oi laloa bada, bona hanaihanai hebogahisi oi hahedinaraia. (Aonega Herevadia 17:14) Bema ruma tauna ia ura lasi oi lao dinana ai ia kamonai, unai oi abia dae toho. Oi laloatao, emu Keristani tadikaka eiava taihu ta be reana dina haida murinai unai ruma do ia vadivadi henia. Bema hemataurai lasi tauna ta oi davaria, namona be oi hekwarahi bada hebogahisi oi hahedinaraia totona. Emu gado regena oi habadaia lasi eiava emu vairana oi hadikaia lasi, to mai manau ida ia oi hereva henia. Hebogahisi Keristani tauna ia ura lasi ruma tauna ida ia hepapahuahu. (Mataio 10:11-14) Reana nega ta unai tauna ese hereva momokani do ia kamonai henia.
Kongregesen Heboudia ai Hebogahisi Hahedinaraia
19, 20. Dahaka dainai kongregesen lalonai hebogahisi be mai anina bada, bona edena dala ai ita hahedinaraia diba?
19 Danu iseda tadikaka dekenai hebogahisi ita hahedinaraia be gau badana. (Heberu 13:1) Ita be tanobada ibounai tadikaka oreana ena kahana dainai, ita hebogahisi heheni be mai anina bada.
20 Bema kongregesen ta, rua, eiava haida be Kingdom Hall tamona idia gaukaralaia, gau badana be kongregesen ma haida taudia umui hebogahisi henia bona mai hemataurai ida umui kara henidia. Hebou negadia, hagoevaia karadia bona hanamoa karadia umui hegaegaelaia lalonai, kara helulu karana ese gaukara hebou karana ia havaraia lasi. Ena be gau haida dekenai emui lalohadai be idauidau, to hebogahisi umui hahedinaraia. Unai dala ai hebogahisi do ia kwalimu bona Iehova ese ma haida edia namo umui tahua karana do ia hanamoa.
Hebogahisi Oi Hahedinaraia Noho
21, 22. Kolose 3:12 ena hereva hegeregerena, namona be iseda lalona ita hadaia dahaka ita karaia totona?
21 Hebogahisi be mai ena siahu iseda mauri ibounai lalonai. Unai dainai, iseda Keristani kara lalonai unai kara ita hahedinaraia goadagoada be namo. Ma haida oi hebogahisi henia be emu kara korikorina ai oi halaoa.
22 Namona be dina ta ta ai ita ta ta huanai hebogahisi ita hahedinaraia bona unai dala ai ita ta ta ese aposetolo Paulo ena sisiba ita badinaia, ia gwau: “Umui be Dirava ena taudia, ia ese umui ia lalokau henia, bona umui ia abia hidi, iena. Unai dainai inai bamona karadia, dabua bamona do umui atoa: Bogahisihisi, durua, manau, manada bona haheauka.”—Kolose 3:12.
Oi Laloatao, A?
• Edena gaudia dainai Keristani tauna ese hebogahisi ia hahedinaraia be auka?
• Dahaka dainai ta ese ena ruma bese lalonai hebogahisi ia hahedinaraia be gau badana?
• Edena gaudia dainai sikuli ai, gaukara gabuna ai bona dekena taudia dekenai hebogahisi hahedinaraia karana be reana ia auka?
• Keristani taudia ese edia haroro gaukara lalonai hebogahisi idia hahedinaraia diba daladia haida gwauraia.
[Picture on page 9]
Gaukara turana eiava ena ruma bese lalonai ta ia gorere neganai, hebogahisi oi hahedinaraia diba
[Picture on page 10]
Ruma bese taudia ibounai ese hebogahisi idia hahedinaraia neganai, lalo-tamona bona gaukara hebou karana idia habadaia
[Picture on page 11]
Heduru ia abia be namo dekena tauna dekenai durua ita henia be hebogahisi karana ta
[Picture on page 12]
Ena be hebogahisi idia hahedinaraia noho taudia idia kirikirilaia, to Iehova ese idia ia durua