Iehova ese Manau Taudia Dekenai Ena Hairai Ia Hahedinaraia
“Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.”—AONEGA HEREVADIA 22:4.
1, 2. (a) Edena dala ai Kara bukana ese ia hahedinaraia Stefano be “abidadama bada bona Lauma Helaga dekenai ia honu tauna”? (b) Dahaka ese ia hamomokania Stefano be manau tauna?
STEFANO be “abidadama bada bona Lauma Helaga dekenai ia honu tauna.” Ia be “siahu dekenai ia honu” danu. Ia be Iesu ena hahediba taudia ginigunadia ta dainai, taunimanima vairanai toa bona hoa kara badadia ia karaia. Nega ta, tatau haida be ia danu idia hepapahuahu, “to idia be hegeregere lasi Stefano idia koua, badina be ia hereva neganai, Lauma Helaga ese aonega bada ia henia.” (Kara 6:5, 8-10) Ia hedinarai goevagoeva Stefano be Dirava ena Hereva ia stadilaia namonamo tauna, bona iena negai idia noho Iuda tomadiho gunalaia taudia vairanai mai aonega ida Dirava ena Hereva ia hamomokania. Iena hereva Kara karoa 7 ai, ese ia hahedinaraia Dirava ena ura do ia guguru dalana ia laloa bada.
2 Unai tomadiho gunalaia taudia idia laloa edia dagi bona diba ese ma haida edia ia hereaia, to Stefano be idau, ia be manau ia hahedinaraia. (Mataio 23:2-7; Ioane 7:49) Ena be Baibel ia diba namonamo, to mai moale ida “aniani haria gaukara” ia karaia, unai amo aposetolo taudia ese “guriguri bona haroro” gaukara idia karaia diba. Tadikaka huanai Stefano be mai ena ladana namona dainai, aniani haria gaukarana totona tatau namodia seven idia abia hidi neganai, ia idia abia hidi danu. Mai manau ida unai gaukara ia abia dae.—Kara 6:1-6.
3. Dirava ese edena hariharibada karana ta ia hahedinaraia bona Stefano ese ia itaia?
3 Iehova ese Stefano ena manau karana, lauma gaudia laloa bada karana bona Dirava badinaia karana ia itaia. Kaunsolo lalonai, Stefano be dagedage Iuda gunalaia taudia dekenai ia haroro neganai, ena inai henia taudia ese idia itaia “iena vairana be aneru ta ena vairana hegeregerena.” (Kara 6:15) Iena vairana be Dirava ena gwaukau tauna ta bamona, hairai Diravana, Iehova amo ia mai maino ia hahedinaraia. Stefano be mai gari lasi ida kaunsolo taudia ia haroro henia murinai, ia ese hoa dalana ai Dirava ena hariharibada ia itaia. “Stefano be Lauma Helaga dekenai ia honu, bona iena matana dekenai guba ia itaia noho, Dirava ena hairaina ia itaia, bona Iesu danu, Dirava ena idiba kahana dekenai ia gini noho.” (Kara 7:55) Unai hoa gauna ese Stefano dekenai ia hamomokania, Iesu be Dirava ena Natuna bona Mesia. Unai ese manau tauna Stefano ia hagoadaia bona ia hahedinaraia Iehova ese ia lalo-namo henia.
4. Iehova be daidia dekenai ena hairai ia hahedinaraia?
4 Stefano ia abia matahanaina ese ia hahedinaraia, Iehova ese ena hairai bona ena ura be Dirava gari henia manau taudia bona ena hetura karana idia laloa bada taudia dekenai ia hahedinaraia. Baibel ia gwau: “Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.” (Aonega Herevadia 22:4) Unai dainai, manau korikorina ena anina, unai mai anina bada karana ita habadaia dalana, bona eda mauri ibounai lalonai unai kara ita hahedinaraia daladia ita lalo-pararalaia be gau badana.
Manau—Dirava Ena Kara Ta
5, 6. (a) Manau karana ena anina be dahaka? (b) Edena dala ai Iehova ese manau ia hahedinaraia? (c) Iehova ia hahedinaraia manau be edena bamona ita laloa be namo?
5 Reana haida idia hoa badina Iehova, atai herea momokani ia noho bona hairai herea Diravana, be manau karana ia haheitalaia tauna hereadaena. King Davida be Iehova dekenai ia gwau: “Oiemu hahemauri kesina be lau dekenai oi henia vadaeni; oiemu imana idibana ese lau ia dogoatao vadaeni, oiemu manau ese lau ia habadaia vadaeni.” (Salamo 18:35, Buka Helağa) Davida ese Iehova ena “manau” karana ia herevalaia neganai, Heberu herevana ta ia gaukaralaia, ena anina badana be “igo diho.” Inai hereva “manau” sibona lasi, to hereva ma haida idia abia danu , hegeregere “lalo-manau” bona “hamanaua.” Iehova be goevadae lasi tauna Davida ia kara namo henia bona Ia abia hidi king ai ia halaoa totona sibona ia atoa diho neganai, manau ia hahedinaraia. Salamo 18 (NW ) ena ataiai herevana ese ia hahedinaraia bamona, Iehova ese Davida ia gimaia bona durua, “ena inai taudia ibounai edia imana amo bona Saulo ena imana amo” ia ruhaia totona. Bona Davida ia diba, ia king negana lalonai ia abia goada bona hairai ibounai ena badina be Iehova ese mai manau ida ia kara henia. Davida be unai ia diba dainai ia manau.
6 Ita be edena bamona? Iehova be ita dekenai hereva momokani ia hadibaia, bona reana ena orea amo hesiai gaukara ena hahenamo haida ia henia, eiava reana dala ta ai ena ura hagugurua totona ita ia gaukaralaia. Unai ibounai be edena bamona ita laloa be namo? Ita manau be namo, ani? Sibona ita abia isi lasi, badina unai ese dika do ia havaraia, to Iehova ena manau karana dainai ia do ita tanikiu henia be namo, ani?—Aonega Herevadia 16:18; 29:23.
7, 8. (a) Iehova ese Manase ia kara henia neganai, edena dala ai Ena manau ia hahedinaraia? (b) Edena dala ai Iehova bona Manase ese ita dekenai manau karana ena haheitalai idia hahedinaraia?
7 Iehova ese goevadae lasi taudia ia kara henia dalana amo manau ia hahedinaraia sibona lasi, to danu ia ura ogogami taudia dekenai hebogahisi ia hahedinaraia, bona ia ese manau taudia ia abia isi noho. (Salamo 113:4-7) Hegeregere, Iuda ena King Manase oi laloa. Ia ese tomadiho koikoi habadaia totona ia abia king dagina ena hahenamo ia gaukaralaia kerere bona “Lohiabada ena vairanai ia kara dika bada, bona ia ese Lohiabada ia habadua.” (2 Sivarai 33:6) Gabeai, Manase be Asuria ena king ese ena terona amo ia kokia neganai, Iehova ese ia koua lasi, unai dala amo Manase ia panisia. Dibura rumana lalonai, Manase “ia manau lao, bona ia ese Lohiabada, iena Dirava ia tahua, bona durua totona ia noinoi henia,” unai dainai Ierusalema ai Iehova ese Manase dekenai terona ia henia lou, bona “ia diba vadaeni Lohiabada be Dirava” momokanina. (2 Sivarai 33:11-13) Oibe, Manase ena manau karana ese Iehova ia hamoalea dainai, ena kara dika ia gwauatao bona ia dekenai king dagina ia henia lou, unai amo Iehova ese manau ia hahedinaraia.
8 Iehova be mai ena ura ida dika ia gwauatao bona Manase ena helalo-kerehai karana ese manau karana dekenai mai anina bada gaudia ita ia hadibaia. Namona be ita laloatao noho ita idia hahisia taudia ita kara henia dalana bona ita kara dika neganai ita hahedinaraia kara hegeregerena Iehova ese ita ia kara henia. Bema mai ura ida ma haida edia kerere ita gwauatao bona mai manau ida iseda kerere ita gwauraia hedinarai, Iehova ese ita do ia hebogahisi henia diba.—Mataio 5:23, 24; 6:12.
Dirava Ena Hairai be Manau Taudia Dekenai Ia Hahedinaraia
9. Manau be manoka ena toana ta, a? Gwauraia hedinarai.
9 To, namo lasi ita laloa manau bona unai bamona kara ma haida be manoka ena toana eiava kara kerere abia dae karana. Buka Helaga ese ia hahedinaraia bamona, Iehova ia manau, to mai kara maoromaoro ida ena badu bona ena siahu badana ia hahedinaraia danu bema unai ia karaia be maoro. Iehova ia manau dainai, manau taudia ia lalo-namo henia, to hekokoroku taudia amo ia daudau. (Salamo 138:6, Buka Helağa) Edena dala ai Iehova ese ena manau hesiai taudia ia lalo-namo henia?
10. Korinto Ginigunana 2:6-10 ese ia hahedinaraia bamona, Iehova ese manau taudia dekenai dahaka ia hahedinaraia?
10 Iehova be ena nega korikori ai bona ia abia hidi hereva halasia dalana amo, manau taudia dekenai ena ura hagugurua daladia ia hahedinaraia. Unai dala namodia be mai hekokoroku ida taunimanima edia aonega idia tabekau henia bona idia badinaia taudia amo ia hunia. (1 Korinto 2:6-10) To manau taudia, Iehova ena ura dekenai lalo-parara idia abia taudia unai, edia lalona ia veria Iehova idia hanamoa totona, badina Iehova ena hairai bada idia abia dae.
11. Aposetolo edia negai, edena dala ai haida ese manau idia hahedinaraia lasi, bona unai dainai dahaka dika idia davaria?
11 Aposetolo edia negai, taunimanima momo, sibona idia gwauraia Keristani taudia haida danu ese manau idia hahedinaraia lasi. Aposetolo Paulo ese idia dekenai Dirava ena ura gaudia ia hahedinaraia karana ese idia ia hahekwakwanaia. Paulo be ‘Iuda lasi taudia totona aposetolo gaukara ia karaia,’ to unai ia karaia iena bese, edukeisen, mauri laganina, eiava lagani momo lalonai kara namodia ia karaia dainai lasi. (Roma 11:13) Nega momo, tauanina gaudia idia laloa taudia idia laloa unai gaudia dainai Iehova ese ta ia gaukaralaia be namo. (1 Korinto 1:26-29; 3:1; Kolose 2:18) To, Iehova ese Paulo ia abia hidi, Iena hebogahisi mai lalokauna bona kara maoromaoro urana hegeregerena. (1 Korinto 15:8-10) Paulo ese ia gwauraia “aposetolo taudia namo herea,” bona ia idia inai henia taudia ma haida danu, ese Paulo bona Baibel ia herevalaia dalana idia abia dae lasi. Idia manau lasi dainai, Iehova ese ena ura ia hagugurua daladia dekenai diba bona lalo-parara idia abia lasi. Namona be Iehova ese iena ura hagugurua totona ia abia hidi taudia ita laloa bada bona ita gwauraia dika lasi.—2 Korinto 11:4-6.
12. Edena dala ai Mose ena haheitalai ese ia hahedinaraia Iehova be manau taudia ia lalo-namo henia?
12 To, Baibel lalonai haheitalai momo ese idia hahedinaraia manau taudia ese Dirava ena hairai idia itaia. Mose, “tanobada taudia ibounai edia huanai ia sibona be manau herea” tauna, ese Dirava ena hairai ia itaia bona Ia ida ia hetura namonamo. (Numera 12:3) Havaraia tauna ese unai manau tauna ia lalo-namo henia, ia be lagani 40 lalonai mamoe naria gaukarana ia karaia, toana be unai lagani bada be Arabian Peninsula dekenai ia noho. (Esodo 6:12, 30) Iehova ese Mose ia durua dainai, Israela taudia edia gwaukau bona hakaua tauna ai ia lao. Dirava ida ia herevahereva danu. Matahanai amo, Iehova ena “toana korikori” ia itaia. (Numera 12:7, 8; Esodo 24:10, 11) Unai manau hesiai tauna bona Dirava ena gwaukau tauna idia abia dae taudia ese hahenamo idia abia danu. Unai hegeregerena, ita ese hahenamo do ita abia danu, bema Mose ia hereaia peroveta tauna, Iesu, bona ia abia hidi “hesiai tauna mai ena kamonai, bona mai ena kara maoromaoro” ita abia dae.—Mataio 24:45, 46; Kara 3:22.
13. Idaunegai edena dala ai Iehova ena hairai be idia manau mamoe naria taudia dekenai ia hahedinaraia?
13 Daidia dekenai Iehova ena “diaridiari” ia hedinarai bona aneru ese ‘Hamauria Tauna, Keriso’ ena vara sivarai namona ia gwauraia? Hekokoroku tomadiho gunalaia taudia eiava dagi bada taudia dekenai lasi, to “uda dekenai idia noho, hanuaboi neganai edia mamoe orea idia naria noho” manau taudia dekenai ia hedinarai. (Luka 2:8-11) Taunimanima ese unai taudia edia diba bona gaukara idia laloa bada lasi. To, Iehova ese idia ia laloa bona Mesia ia vara sivaraina be idia dekenai ia hadibaia guna. Oibe, Iehova ese manau bona Dirava gari henia taudia dekenai ena hairai ia hahedinaraia.
14. Dirava ese manau taudia dekenai dahaka hahenamo ia henia?
14 Unai haheitalai ese ita dekenai dahaka idia hadibaia? Idia hahedinaraia Iehova ese manau taudia ia lalo-namo henia bona ena ura dekenai diba bona lalo-parara ia henidia. Taunimanima ese reana idia laloa idia hegeregere lasi taudia ia abia hidi bona idia ia gaukaralaia, iena ura hairaina be ma haida dekenai idia hahedinaraia totona. Namona be unai ese ita ia hagoadaia Iehova, iena peroveta Herevana bona iena orea amo heduru ita abia noho totona. Ita diba momokani Iehova ese ena ura hairaina hagugurua daladia be iena manau hesiai taudia dekenai do ia hadibaia noho. Peroveta tauna Amosa ia gwau: “Kara ibounai Lohiabada Dirava ia ura karaia gwauraia neganai, ia ese iena hesiai taudia, peroveta taudia ia hamaorodia guna.”—Amosa 3:7.
Manau Karana Habadaia Bona Dirava Ena Lalo-Namo Moalelaia
15. Dahaka dainai ita manau noho be gau badana, bona Israela ena King Saulo dekenai edena bamona unai ia hedinarai?
15 Dirava ese ita ia lalo-namo henia hanaihanai totona, ita manau noho be gau badana. Ita gwau lasi ta ia manau dainai, unai kara be hanaihanai do ia hahedinaraia. Ta ese manau karana ia rakatania bona hekokoroku karana ia hahedinaraia diba, unai amo dika ia havaraia. Saulo, Israela ena king ginigunana ai ia lao tauna, be unai bamona ia karaia. Ia idia abia hidi neganai, ‘ia manau bamona.’ (1 Samuela 15:17) To, lagani rua sibona ia lohia murinai, mai hekokoroku ida ia kara. Iehova ena dala, unai be peroveta tauna Samuela amo boubou gaudia henia dalana, ia dadaraia bona ia sibona ese ia karaia boubouna dainai ekskius idauidau ia gwauraia. (1 Samuela 13:1, 8-14; Buka Helağa) Unai murinai gau ma haida ia karaia, unai ese ena manau lasi karana idia hahedinaraia goevagoeva. Unai dainai Dirava ena lauma bona ena lalo-namo ia haboioa bona dala dikana ai ia mase. (1 Samuela 15:3-19, 26; 28:6; 31:4) Unai amo ita dibaia gauna ia hedinarai goevagoeva: Namona be ita manau noho bona ita hekwarahi sibona abia isi karana ita dadaraia totona, bona Iehova ena lalo-namo ita abia totona hekokoroku karadia ita dadaraia.
16. Edena dala ai iseda hetura karana Iehova bona iseda dekena taudia ida ita laloa karana ese ita ia durua diba manau karana ita habadaia totona?
16 Manau be Dirava ese ia hahedinaraia karana ta bona ita habadaia be namo. (Kolose 3:10, 12) Ia be iseda lalona amo ia vara karana ta—ita sibona bona ma haida ita laloa dalana—unai dainai ita hahedinaraia totona ita hekwarahi be namo. Iseda hetura karana Iehova bona iseda dekena taudia ida ita lalohadailaia neganai, unai ese ita ia durua diba ita manau totona. Dirava ena matanai, goevadae lasi taudia ibounai be nega sisina ia tubu bena ia kakoro rei bamona. Taunimanima be uma dekenai idia noho kwadi bamona. (Isaia 40:6, 7, 22; Buka Helağa) Rei ta ena lata ese rei ma haida edia lata ia hanaia neganai, ia hekokoroku be mai badina, a? Kwadi ta ena roho dalana ese kwadi ma haida edia ia hanaia sisina neganai, ena diba ia heagilaia be mai badina, a? Unai be lalohadai kavakavana. Unai dainai, aposetolo Paulo ese ena Keristani tadikaka ia hadibaia lou: “Edena bamona oi be hekokoroku momo? Oi davaria gaudia ibounai be Dirava ese oi dekenai ia henia vadaeni, ani? Oibe, Dirava ese inai gau oi dekenai ia henia, harihari gaudia bamona. Unai dainai, badina dahaka oi hekokoroku, inai gau sibona oiemu goada dekena amo oi abia bamona?” (1 Korinto 4:7) Unai bamona Baibel siridia ita laloa karana ese ita ia durua diba, manau karana ita habadaia bona hahedinaraia totona.
17. Dahaka ese peroveta tauna Daniela ia durua manau karana ia habadaia totona, bona dahaka ese ita ia durua diba unai bamona ita karaia totona?
17 Heberu peroveta tauna Daniela idia gwauraia “Dirava ia lalokau henia bada” tauna, badina ia sibona ia “hamanaua.” (Daniela 10:11, 12) Dahaka ese Daniela ia durua, manau karana ia habadaia totona? Gau ginigunana be, ia ese Iehova ia tabekau henia momokani, hanaihanai guriguri amo ia hereva henia. (Daniela 6:10, 11) Ma danu, Daniela ese badina maorona dainai Dirava ena Hereva ia stadilaia goadagoada, unai ese ia durua dainai Dirava ena ura hairaina ia itaia namonamo. Ia ese sibona ena kerere ia gwauraia hedinarai danu, ena bese taudia edia kerere sibona lasi. Bona ia ura momokani Dirava ena kara maoromaoro ia abia isi, sibona ena lasi. (Daniela 9:2, 5, 7) Daniela ena haheitalai namona amo diba ita abia bona iseda mauri ibounai lalonai manau karana ita habadaia bona ita hahedinaraia diba, a?
18. Hari manau idia hahedinaraia taudia ese do idia abia hahenamo be dahaka?
18 Aonega Herevadia 22:4 ia gwau: “Lohiabada do oi gari henia, bona do oi manau. Inai bamona oi karaia neganai, kohu, bona matauraia, bona mauri do oi davaria.” Oibe, Iehova ese manau taudia ia lalo-namo henia, bona unai dainai hairai bona mauri idia abia. Salamo torea tauna Asapa be Dirava ena hesiai gaukara ia rakatania gwauraia, to Iehova ese ena laloa dalana ia hamaoromaoroa murinai, mai manau ida ia gwau: “Oiemu sisiba amo lau do oi hakaua, bona gabeai hairai dekenai lau do oi hakaua danu.” (Salamo 73:24, NW ) Hari be edena bamona? Manau idia hahedinaraia taudia ese edena hairai do idia abia? Iehova ida hetura karana namona idia moalelaia sibona lasi, to King Davida ese Dirava ena lauma amo ia torea herevana ena guguru negana do idia itaia diba, ia gwau: “Manau taudia ese noho gabuna tano do idia abia, do idia helai namonamo, mai moale bona mai maino danu.” Unai be vaira negana hairaina momokani!—Salamo 37:11.
Oi Laloatao, A?
• Edena dala ai manau tauna Stefano be haheitalai namona Iehova ese Ena hairai ia hahedinaraia totona?
• Edena dala haida ai Iehova Dirava ese manau ia hahedinaraia?
• Edena haheitalai haida ese idia hahedinaraia Iehova ese manau taudia dekenai ena hairai ia hahedinaraia?
• Edena dala ai Daniela ena haheitalai ese ita ia durua diba manau karana ita habadaia totona?
[Box on page 21]
Ia Goada to Ia Manau
Lagani 1919 ai Cedar Point, Ohio, U.S.A. dekenai, Baibel Student taudia (hari idia gwauraia Iehova ena Witnes taudia) ese idia karaia hebouhebou dekenai, mauri lagani 50 tauna J. F. Rutherford, unai neganai gaukara ia naria, be mai moale ida hebouhebou taudia edia kohu ia huaia bona edia daiutu dekenai ia hakaudia lao. Hebouhebou ena dina ginigabena ai, helai taudia 7,000 be inai hereva amo ia hagoadadia, ia gwau: “Umui be king edia King bona lohia edia Lohia ena gwaukau taudia, taunimanima dekenai . . . iseda Lohiabada ena Basileia hereadaena umui harorolaia.” Tadikaka Rutherford be lalo-goada tauna, ia abia dae hereva momokanina be mai siahu ida ia gwauraia, to danu Dirava vairanai ia manau momokani, nega momo Betele dekenai daba ai dina ena siri idia herevalaia neganai ia henia gurigurina amo unai ia hedinarai.
[Picture on page 18]
Stefano, Baibel ia diba namonamo tauna, be mai manau ida aniani ia haria
[Picture on page 19]
Manase ena manau karana ese Iehova ia hamoalea
[Picture on page 21]
Dahaka ese Daniela be “Dirava ia lalokau henia bada” tauna ai ia halaoa?