Iehova Ena Dala Dibaia

“Oiemu palani be lau dekenai . . . do oi hadibaia. Unai neganai oi do lau diba.”​—ESODO 33:13.

1, 2. (a) Mose ia itaia Aigupito tauna ta ese Heberu tauna ta ia kara dika henia neganai, dahaka dainai Aigupito tauna ia alaia mase? (b) Mose be ia hegeregere Iehova ena hesiai gaukara ia karaia totona, dahaka ia dibaia be namo?

MOSE be Farao ena ruma bese lalonai ia tubu daekau, bona Aigupito ena lohia taudia edia aonega be ia dekenai idia hadibaia. To, Mose ia diba ia be Aigupito tauna lasi. Ia diba iena tama sina be Heberu taudia. Iena mauri lagani be 40 neganai, ena tadikaka, Israela taudia ia itadia totona ia lao. Ia itaia Aigupito tauna ta ese Heberu tauna ta ia kara dika henia neganai, Mose ese ena tadikaka ia durua. Aigupito tauna ia alaia mase. Mose be Iehova ena taunimanima edia kahanai ia gini bona ia laloa Iehova ese ia gaukaralaia Israela taudia ia ruhaia totona. (Kara 7:​21-​25; Heberu 11:24, 25) Mose ese ia karaia gauna idia diba neganai, Aigupito ena lohia taudia ese Mose idia gwauraia gwau-edeede tauna, bona idia ura ia idia alaia dainai ia heau boio. (Esodo 2:​11-​15) Bema Dirava ese Mose do ia gaukaralaia, namona be Mose ese Iehova ena dala ia diba goevagoeva. Mose do ia ura unai diba ia abia, a?​—Salamo 25:9.

² Lagani 40 lalonai, Mose be idau gabu dekenai ia noho bona mamoe ia naria. Mose be ena Heberu varavara ese ia idia matauraia lasi dainai ia badu lasi, bona ena be gabu idauna ai ia noho Dirava ia badinaia. Herevana lagani momo idia hanaia, bona taunimanima ese ia karaia karana idia abia dae lasi, to Mose ese Iehova ena hadibaia dalana ia badinaia noho. Mose be sibona ena kara ia herevalaia lasi, to Dirava ena lauma helaga ena siahu amo, gabeai ia gwau: “Mose be tanobada taudia ibounai edia huanai ia sibona be manau herea.” (Numera 12:3) Iehova ese dala idauidau ai Mose ia gaukaralaia. Ita danu, bema manau ita hahedinaraia, Iehova ese ita do ia hanamoa.​—Sepanaia 2:⁠3.

Gaukara ta Ia Abia

3, 4. (a) Iehova be Mose dekenai dahaka gaukara ia henia? (b) Mose be dahaka heduru ia abia?

³ Dina ta Iehova ena aneru ta ese Sinai Ororona kahirakahira ai Mose ia hereva henia. Mose ia hamaoroa: “Momokani, lauegu bese taudia edia hisihisi Aigupito dekenai lau itaia vadaeni. Edia biagudia ese hekwarahi idia henidia noho dainai idia taitai, be lau kamonai vadaeni, badina be edia hisihisi lau diba vadaeni. Lau diho mai inai, Aigupito taudia edia imana dekena amo do lau hamauridia totona. Unai tano dekena amo dohore lau hakaudia, ia lao bona tano namo herea dekenai. Tano badana dekenai dohore idia ginidae. Unai tano be aniani namodia gabuna.” (Esodo 3:​2, 7, 8) Dirava ia ura Mose ese unai gaukara do ia karaia, to namona be Iehova ena dala hegeregerena ai do ia karaia.

⁴ Iehova ena aneru ma ia gwau: “Oi mai, dohore lau siaia oi Farao dekenai, lauegu bese taudia Israela be Aigupito dekena amo dohore oi hakaudia siri totona.” Mose ia daradara. Ia laloa ia be hegeregere lasi, bona bema sibona dekenai ia tabekau do ia hegeregere lasi. To, Iehova ese Mose ia hamaoroa: “Momokani, dohore lau durua oi.” (Esodo 3:​10-​12) Iehova ese Mose ia hasiahua dainai hoa karadia ia karaia, unai ese idia hamomokania ia be Dirava ese ia siaia. Mose ena kakana, Arona, ese Mose ia bamoa bona ena hereva gwauraia tauna ai ia lao. Iehova ese ia hadibadia dahaka do idia gwauraia bona karaia. (Esodo 4:​1-​17) Mose be mai kamonai ida unai gaukara do ia hagugurua, a?

5. Dahaka dainai Israela taudia edia kara ese Mose ia hahekwakwanaia?

⁵ Matamanai, Israela ena tau badadia ese Mose bona Arona edia hereva idia abia dae. (Esodo 4:​29-​31) To daudau lasi murinai, “Israela gaukara naria taudia” ese Mose bona ena kakana idia samania badina Farao bona ena hesiai taudia vairanai edia ‘ladana idia hadikaia.’ (Esodo 5:​19-​21; 6:​9) Israela taudia be Aigupito idia rakatania neganai, idia itaia Aigupito taudia edia kariota be idia murinai idia mai dainai idia gari bada. Mose dekenai idia badu badina edia heau gabuna be lasi, edia vairanai be Davara Kakakakana bona edia murinai be tuari kariota idia mai. Bema unai neganai oi noho, dahaka do oi karaia? Ena be Israela taudia be bouti lasi, to Iehova ena oda hegeregerena Mose ese taunimanima ia hamaorodia unai gabu do idia rakatania. Bena Dirava ese Davara Kakakakana ena ranu ia hapararaia, tano ia kaukau, bena Israela taudia idia raka hanai diba.​—Esodo 14:​1-​22.

Hahemauri Ia Hereaia Gauna

6. Iehova be Mose dekenai gaukara ia henia neganai, ia hahedinaraia dahaka be mai anina bada?

⁶ Iehova be Mose dekenai gaukara ia henia neganai, ia hahedinaraia Dirava ena ladana be mai anina bada. Unai ladana bona unai ladana ia abia Tauna idia matauraia be gau badana. Mose ese Dirava ena ladana totona idia henanadai neganai, Iehova ia gwau: “Dahaka ai lau sibona lau halaoa be do lau halaoa.” Danu, Mose ese Israela taudia do ia hamaoroa: “Lohiabada, [“Iehova,” Buka Helağa] umui emui sene taudia edia Dirava, Aberahamo ena Dirava, Isako ena Dirava, Iakobo ena Dirava ese ia siaia lau umui dekenai.” Iehova ma ia gwau: “Lau egu ladana be inai, ia lao hanaihanai, gabeai ia mai nega ibounai lalonai inai bamona lauegu ladana dohore umui gwauraia.” (Esodo 3:​13-​15; NW) Hari inai negai danu, tanobada hegegemadai Dirava ena hesiai taudia idia diba Dirava ena ladana be, Iehova.​—Isaia 12:​4, 5; 43:10-​12.

7. Ena be Farao ia hekokoroku, Dirava ese Mose ia hagoadaia dahaka ia karaia totona?

⁷ Mose bona Arona be Farao vairanai idia hedinarai neganai, edia sivarai be Iehova ena ladanai idia gwauraia. To, Farao be mai hekokoroku ida ia gwau: “Lohiabada [“Iehova,” Buka Helağa] be daika? Badina be dahaka iena hereva dohore lau kamonai? Israela taudia lauegu imana dekena amo dohore lau negea, badina be dahaka? Lohiabada [“Iehova,” Buka Helağa] be lau diba lasi, Israela taudia danu lauegu imana dekena amo dohore lau negea lasi momokani.” (Esodo 5:​1, 2) Farao ia hahedinaraia ia be laloauka bona koikoi tauna, to Iehova ese Mose ia hagoadaia ia dekenai ena hereva do idia gwauraia loulou. (Esodo 7:​14-​16, 20-​23; 8:​1, 2, 20) Mose ia itaia Farao be ia badu vadaeni. Bema ia hereva henia lou, gau namona ta do ia vara, a? Israela taudia idia ura bada ta ese idia ia hamauria. Farao ese ena lalona ia haidaua lasi. Bema oi be Mose, dahaka do oi karaia?

8. Iehova ese Farao ia kara henia dalana amo dahaka namo ia vara, bona edena bamona iseda mauri ia haidaua?

⁸ Mose ese Farao dekenai ma ia hereva lou: “Lohiabada, [“Iehova,” Buka Helağa] ai Heberu taudia aiemai Dirava, inai bamona ia hereva, ia gwau: ‘Lauegu orea taudia oiemu imana dekena amo dohore oi negea, dohore idia tomadiho lau dekenai.’ ” Danu Dirava ia gwau: “Lauegu imana ena siahu momokani dekena amo gorere bema lau henia umui dekenai, dohore umui mase ore diba. To inai totona oi dekenai mauri lau henia vadaeni: Lauegu siahu dohore oi itaia, vadaeni tanobada taudia ibounai ese lauegu ladana dohore idia matauraia totona.” (Esodo 9:​13-​16) Laloauka tauna Farao dekenai do ia karaia karana amo Iehova ese ena siahu ia haheitalaia bona unai be sisiba bamona ia idia kamonai henia lasi taudia dekenai. Idia ta be Satani Diabolo, Iesu ese gabeai ia gwauraia “tanobada ena lohia.” (Ioane 14:30; Roma 9:​17-​24) Peroveta herevadia hegeregerena, Iehova ena ladana be tanobada hegegemadai idia gwauraia. Iehova ia haheauka dainai, Israela taudia bona tomadiho totona Israela taudia idia bamoa idau bese taudia hutuma ia hamauridia. (Esodo 9:​20, 21; 12:​37, 38) Unai nega amo, Iehova ena ladana gwauraia hedinarai karana ese tomadiho momokani idia abia dae taudia milioni momo dekenai namo ia havaraia.

Gwau-Edeede Taudia

9. Edena dala ai Mose ena bese taudia ese Iehova idia matauraia lasi?

⁹ Heberu taudia be Dirava ena ladana idia diba. Mose be idia ia hereva henia neganai unai ladana ia gaukaralaia, to idia ese unai ladana ia abia Tauna idia matauraia lasi. Iehova ese hoa dalanai Israela taudia be Aigupito amo ia ruhaia bena daudau lasi murinai, ranu namona idia davaria haraga lasi neganai, dahaka ia vara? Mose dekenai idia maumau. Gabeai aniani totona idia maumau. Mose ese idia ia sisiba henia idia be ia bona Arona dekenai idia maumau lasi, to Iehova dekenai idia maumau. (Esodo 15:22-24; 16:​2-​12) Sinai Ororona ai, Iehova ese Israela taudia dekenai Taravatu ia henia bona hoa karadia danu ia hahedinaraia. To, Israela taudia idia gwau-edeede dainai golo boromakau natuna ta idia karaia bona idia tomadiho henia bona idia gwau unai be ‘aria ta Lohiabada do idia hanamoa totona.’​—Esodo 32:​1-9.

10. Dahaka dainai Mose ena noinoi Esodo 33:13 dekenai be mai anina hari inai nega ena kongrigeisen naria taudia dekenai?

¹⁰ Iehova ese ia gwauraia gwau-edeede taudia be Mose ese edena dala ai do ia kara henidia? Mose ese Iehova ia noia: “Bema oi ura henia lau, lau ura oiemu palani be lau dekenai mani do oi hadibaia. Unai neganai oi do lau diba, bona oiemu ura be nega ibounai do lau karaia.” (Esodo 33:13) Hari inai negai, Keristani kongrigeisen naria taudia ese idia naria Iehova ena Witnes taudia be idia manau momokani. To, idia danu inai guriguri idia gwauraia: “Lohiabada e, oiemu kara lau dekenai do oi hadibaia. Oiemu dala lau dekenai do oi hedinaraia.” (Salamo 25:4) Kongrigeisen naria taudia be Iehova ena kara idia diba dainai, idia ese Iehova ena Hereva bona Iehova ena kara hegeregerena ai, hekwakwanai idauidau idia hanamoa.

Iehova Ia Ura Ena Taunimanima ese Do Idia Karaia Gaudia

11. Iehova ese Mose dekenai dahaka hakaua herevadia ia henia, bona dahaka dainai idia ita laloa bada?

¹¹ Sinai Ororona dekenai Iehova ese ia ura ena taunimanima do idia karaia gaudia ia gwauraia hedinarai. Gabeai Mose be nadi palakapalaka rua dekenai idia torea Taravatu Ten ia abia. Ororo amo ia diho neganai, ia itaia Israela taudia ese boromakau natuna idia tomadiho henia noho bona mai badu ida nadi ia negedia diho bena idia makohia maragimaragi. Iehova be Mose ese ia utua nadi dekenai Taravatu Ten ma ia torea lou. (Esodo 32:19; 34:1) Inai taravatu be nega ginigunana ai ia torea taravatudia amo idia idau lasi. Mose ese unai taravatu do ia badinaia be namo. Danu, Dirava ese Mose dekenai ena kara ia hahedinaraia, unai amo Mose be Dirava ena ladanai ia hereva dainai, do ia diba edena bamona kara ia hahedinaraia be namo. Keristani taudia be Mose ena Taravatu henunai idia noho lasi, to Iehova ese Mose dekenai ia gwauraia hakaua herevadia momo idia do idau lasi bona idia be mai anina bada Iehova idia tomadiho henia taudia ibounai dekenai. (Roma 6:​14; 13:​8-​10) Idia haida mani ita itaia.

12. Israela taudia ese Iehova sibona tomadiho henia karana be edena dala ai idia laloa?

¹² Iehova sibona tomadiho henia. Israela besena idia kamonai, Iehova ia gwau ia ura ia sibona idia tomadiho henia. (Esodo 20:​2-5) Iehova be Dirava momokanina, ena hamomokania gaudia momo be Israela taudia ese idia itaia. (Deuteronomi 4:​33-​35) Herevana bese haida be dahaka idia karaia, to Iehova ia hahedinaraia goevagoeva ia ura lasi ena taunimanima ese kaivakuku idia tomadiho henia eiava meamea karadia idia karaia. Namo lasi oda ta dainai ia idia tomadiho henia. Namona be idia ibounai ese Iehova do idia lalokau henia mai edia kudouna, lauma bona goada ibounai ida. (Deuteronomi 6:​5, 6) Anina be unai do idia hahedinaraia edia hereva bona kara​—oibe, edia mauri ibounai lalonai. (Levitiko 20:27; 24:15, 16; 26:1) Iesu Keriso ia hahedinaraia goevagoeva danu Iehova ia ura ia sibona do ita tomadiho henia.​—Mareko 12:28-​30; Luka 4:⁠8.

13. Dahaka dainai Israela taudia ese Dirava ena taravatu sibona idia badinaia be namo, bona dahaka ese ita ia hagoadaia ia ita kamonai henia totona? (Hadibaia Tauna 12:13)

¹³ Iehova ena taravatu sibona badinaia. Israela taudia idia laloatao lou be namo, idia be Iehova ida gwauhamata idia karaia neganai, idia gwauhamata ia sibona do idia badinaia. Edia ura hegeregerena gau idauidau idia karaia diba, to Iehova ese taravatu ia atoa gaudia dekenai idia badinaia be gau badana. Bema unai bamona idia karaia do idia hahedinaraia Dirava idia lalokau henia bona idia bona edia natudia ia durua badina Iehova ena taravatu ibounai be edia namo totona.​—Esodo 19:​5-8; Deuteronomi 5:​27-​33; 11:​22, 23.

14. Edena dala ai Dirava ese Israela taudia dekenai ia hahedinaraia lauma gaudia idia atoa guna be gau badana?

¹⁴ Lauma gaudia atoa guna. Namo lasi Israela taudia ese tauanina durua gaudia idia laloa bada bona nega idia atoa lasi lauma gaudia totona. Namo lasi Israela taudia ese edia mauri lalonai anina lasi gaudia idia tahua. Iehova be pura ta ta iboudiai, dina ta ia abia hidi bona ia gwauraia helaga. Unai dina idia gaukaralaia Dirava momokanina idia tomadiho henia sibona totona. (Esodo 35:​1-3; Numera 15:32-​36) Lagani ta ta ai, dina ta idia abia hidi hebou helagadia idia karaia totona. (Levitiko 23:​4-​44) Unai be nega namona Iehova ena kara badadia idia herevalaia, ena ura idia laloa lou bona ena kara namo dainai idia tanikiu henia totona. Iehova dekenai edia badinaia karana idia hahedinaraia neganai, edia Dirava gari henia karana bona lalokau do ia goada bona unai ese idia do ia durua ena dala dekenai idia raka totona. (Deuteronomi 10:12, 13) Hari inai negai Iehova ena hesiai taudia be unai hakaua herevadia amo namo idia davaria.​—Heberu 10:​24, 25.

Iehova Ena Kara Ita Lalopararalaia Bona Ura Henia

15. (a) Dahaka dainai Iehova ena kara ia ura henia karana ese Mose ia durua? (b) Edena henanadai haida ese ita do idia durua Iehova ena kara ta ta ita laloa dobu totona?

¹⁵ Danu, Mose ese Israela taudia ia kara henia neganai, Iehova ena kara ia ura henia karana ese ia do ia durua. Esodo 34:​5-7 ia gwau Dirava be Mose ena vairanai ia hanaia bona ia gwau: “Lau be Lohiabada. Lau Lohiabada be bogahisihisi bona hariharibada Diravana. Lau be badu dekenai lau haraga lasi, to bogahisihisi bona lalokau dekenai lau be haraga. Taunimanima momo herea dekenai lau bogahisihisi henia noho, bona kara dika, bona kara kerere idauidau lau gwauatao noho. To kerere momokani taudia do lau panisia. Bona tamadia edia kara dika davana be edia natudia dekenai do lau henia, bona edia tubudia dekenai do lau henia, ia lao bona uru toi o uru hani idia ore.” Nega oi atoa unai hereva oi laloa dobu totona. Sibona oi nanadaia: ‘Unai kara ta ta edia anina be dahaka? Edena dala ai Iehova ese ia hahedinaraia? Edena dala ai Keristani naria taudia ese unai kara idia hahedinaraia diba? Edena dala ai ita ta ta eda kara ia hanamoa diba?’ Mani haheitalai haida ita laloa.

16. Edena dala ai iseda laloparara Dirava ena hebogahisi dekenai ita habadaia diba, bona dahaka dainai unai bamona ita karaia be mai anina bada?

¹⁶ Iehova be “bogahisihisi bona hariharibada Diravana.”a Do oi itaia, nega haida Iehova be panisi ia hamaragia, bona hebogahisi bada ia hahedinaraia. Unai ese Dirava ia veria kara ta ia karaia totona, unai amo ena taunimanima dekenai namo ia mailaia. Unai hamomokania gauna be, Israela taudia be Gwauhamata Tanona idia lao henia neganai, Iehova ese tauanina bona lauma dalanai idia ia naria. (Deuteronomi 1:​30-​33; 8:4) Kerere idia karaia neganai, Iehova be mai hebogahisi ida edia dika ia gwauatao. Iena idaunega besena dekenai hebogahisi ia hahedinaraia. Unai dainai, hari inai negai ena hesiai taudia ese ta ta idia hebogahisi henia be namo!​—Mataio 9:​13; 18:​21-​35.

17. Edena dala ai Iehova ena hariharibada lalopararalaia karana ese tomadiho momokani ia hanamoa?

¹⁷ Iehova ena hebogahisi be hariharibada karana ida idia gwauraia hebou. “Hariharibada” karana ena anina be edena bamona oi gwauraia diba? Baibel ese ia hahedinaraia Iehova ena hariharibada karana anina be iena orea lalonai idia noho ogogami taudia ia lalodia danu. (Esodo 22:26, 27) Tano haida dekenai, idau bese taudia, bona ma haida be reana idia ogogami. Iehova ese ena taunimanima ia hadibaia idau bese taudia do idia laloa bona idia hebogahisi henia neganai, idia ia hamaoroa lou Aigupito ai, idia danu be idau bese taudia bamona idia noho. (Deuteronomi 24:​17-​22) Hari inai negai, ita Dirava ena taunimanima be edena bamona? Hariharibada karana ita hahedinaraia neganai, unai ese ita ia hatamonaia bona ma haida ia veria Iehova idia tomadiho henia totona.​—Kara 10:34, 35; Apokalupo 7:​9, 10.

18. Iehova ese Israela taudia dekenai idau bese taudia edia kara ia taravatua karana amo dahaka ita dibaia?

¹⁸ To, namo lasi Israela taudia ese idau bese taudia idia hebogahisi henia dainai, Iehova lalokau henia bona iena kara maoromaoro taravatudia badinaia karana idia dadaraia. Unai dainai, Israela taudia ia hadibaia idia kahirakahira idia noho besedia edia kara, tomadiho bona matabodaga mauri dalana do idia karaia lasi. (Esodo 34:11-​16; Deuteronomi 7:​1-4) Unai be mai anina ita dekenai danu. Namona be iseda Dirava, Iehova, bamona ita helaga.​—1 Petero 1:​15, 16.

19. Iehova ena taunimanima ese ena lalohadai kara kerere dekenai idia lalopararalaia karana ese edena dala ai idia ia gimaia?

¹⁹ Mose ese Iehova ena dala ia lalopararalaia totona, Iehova ia hahedinaraia goevagoeva ena be kara dika ia abia dae lasi, to ia badu haraga lasi. Nega ia henia taunimanima ese ena ura idia dibaia bona idia badinaia totona. Ta ia helalo-kerehai neganai, Iehova ese ena kara dika ia gwauatao, to ia karaia kara dika dainai idia vara davana dikana be ia koua lasi. Mose ia hamaoroa Israela taudia ese idia karaia karana dainai, uru gabedia dekenai namo eiava dika ia vara diba. Iehova ena taunimanima ese ena kara idia ura henia dainai, unai ese idia ia gimaia bona sibodia edia kerere amo idia vara dika be idia gwauraia lasi Iehova ena kerere eiava idia gwau lasi Iehova be kara ta ia karaia haraga lasi dainai dika ia vara.

20. Dahaka ese ita do ia durua, iseda tadikaka bona haroro gaukara lalonai ita davaria taudia ita kara namo henidia totona? (Salamo 86:11)

²⁰ Bema oi ura emu diba Iehova bona ena dala dekenai oi habadaia, Baibel oi duahia neganai, hanaihanai hetahu karana oi karaia bona oi laloa dobu be namo. Iehova ena kara idauidau oi tahua namonamo. Mai guriguri ida oi laloa edena bamona Dirava oi tohotohoa diba bona emu mauri be ena ura hegeregerena oi gaukaralaia diba. Unai ese oi do ia durua hahetoho do oi dadaraia, dala maorona ai tadikaka do oi kara henidia, bona ma haida oi durua iseda Dirava hairaina idia dibaia bona lalokau henia totona.

[Footnote]

Dahaka Oi Dibaia?

• Dahaka dainai Mose ese manau ia hahedinaraia be gau badana, bona dahaka dainai ita dekenai unai be mai anina bada?

• Farao vairanai Iehova ena hereva gwauraia loulou karana ese dahaka namo ia havaraia?

• Mose ese edena hakaua hereva badadia ia dibaia bona ita danu ita badinaia be namo?

• Edena dala ai Iehova ena kara idauidau ita lalopararalaia namonamo diba?

[Picture on page 11]

Mose be mai kamonai ida Iehova ena hereva be Farao dekenai ia gwauraia

[Picture on page 13]

Iehova ese ena ura be Mose dekenai ia hahedinaraia

[Picture on page 14, 15]

Iehova ena kara idauidau laloa dobu