Tama Sina E, Umui Ura Emui Natudia be Edena Bamona Vaira Negana Do Idia Abia?
‘Ulato bona uhau taudia ese Lohiabada ena ladana do idia hanamoa bada!’—SALAMO 148:12, 13.
1. Tama sina be edia natudia totona dahaka idia lalohekwarahilaia?
TAMA sina momo be edia natudia edia vaira negana idia lalohekwarahilaia, ani? Beibi ia vara negana ai—eiava ia do vara lasi neganai danu—tama sina be unai natuna ena namo idia lalohekwarahilaia. Do ia gorere, eiava? Do ia vara namonamo? Ia tubu daekau lalonai, tama sina ese gau ma haida idia lalohekwarahilaia. Vaia, tama sina idia ura edia natudia be mauri namona idia abia.—1 Samuela 1:11, 27, 28; Salamo 127:3-5.
2. Dahaka dainai tama sina momo idia ura edia natudia idia bada neganai, mauri namona idia moalelaia?
2 Hari inai tanobada ai, tama sina idia hekwarahi bada edia natudia ese mauri namona idia abia totona. Tama sina momo be tuari, politikol heiriheiri, moni ena hekwakwanai, tauanina bona hemami hadikaia karana, bona unai bamona gaudia ma haida idia mamia vadaeni. Unai dainai, idia ura lasi edia natudia be unai bamona metau idia davaria. Taga tanodia ai, tama sina idia itaia edia turadia eiava varavara edia natudia be dagi bada gaukaradia idia abia bona toana be mauri namona idia moalelaia. Unai dainai, idia laloa idia gaukara goada be namo, unai amo edia natudia idia bada neganai, idia danu be mauri namona do idia moalelaia.—Hadibaia Tauna 3:13.
Mauri Namona Abia Hidi
3. Keristani taudia be dahaka idia karaia vadaeni?
3 Keristani taudia be Iesu Keriso murinai idia raka taudia dainai, edia mauri be Iehova dekenai idia henia. Iesu ena hereva idia laloa bada, ia gwau: “Tau ta bema ia ura lauegu murina dekenai do ia mai, ia ese sibona dekenai do ia laloa lasi, dina ibounai iena satauro do ia abia isi, lauegu murina dekenai do ia raka.” (Luka 9:23; 14:27) Oibe, Keristani tauna be sibona ena ura gaudia do ia dadaraia. Unai ena anina be iena mauri lalonai do ia dabu momokani bona do ia lalohisihisi bada, a? Lasi! To, mauri namona do ia moalelaia, badina Iesu ena hereva ia badinaia, ia gwau: “Henia kara ena moale be bada, abia kara ena moale be maragi.”—Kara 20:35.
4. Iesu ese ia murinai idia raka taudia ia hagoadaia dahaka idia tahua totona?
4 Iesu ena negai idia noho taudia edia mauri be auka momokani. Mauri durua gaudia abia totona idia hekwarahi sibona lasi, to Roma taudia edia taravatu aukadia idia haheaukalaia bona tomadiho gunalaia taudia ese idia hametaudia danu. (Mataio 23:2-4) To, Iesu ena hereva idia kamonai taudia momo be idia tahua gaudia—edia moni gaukara danu—idia rakatania bona Iesu murinai idia raka. (Mataio 4:18-22; 9:9; Kolose 4:14) Hahediba taudia be unai bamona idia karaia neganai, edia vaira negana idia laloa maragi, a? Mani Iesu ena hereva ita laloa, ia gwau: “Ruma, o iena tadikakana, o iena taihuna, o iena tamana, o iena sinana, o iena adavana, o iena natuna, o tano, lau totona ia rakatanidia tauna ese unai do ia abia lou, ma momo herea momokani danu. Bona mauri hanaihanai danu do ia abia.” (Mataio 19:29) Iesu ese ia murinai idia raka taudia ia hamaoroa, edia guba Tamana be edia dabu gaudia ia diba. Unai dainai, idia ia hagoadaia: “Umui ese Dirava ena Basileia bona iena kara maoromaoro do umui tahua guna, vadaeni unai gau ibounai danu umui dekenai dohore ia henia.”—Mataio 6:31-33.
5. Iesu ia gwau Dirava ese ena hesiai taudia do ia naria, to tama sina haida ese unai hereva be edena bamona idia laloa?
5 Hari danu be idau lasi. Iehova be iseda dabu gaudia ia diba, bona edia mauri lalonai Basileia idia tahua guna taudia—ful-taim hesiai taudia danu—idia diba Iehova ese idia do ia naria. (Malaki 3:6, 16; 1 Petero 5:7) To tama sina haida ese unai hereva idia daradaralaia. Idia ura edia natudia be Iehova ena hesiai gaukara dekenai idia goada idia lao, reana ful-taim hesiai gaukara idia karaia. To hari inai negai, moni ena hekwakwanai bona gaukara davaria dalana be auka dainai, tama sina idia laloa edia natudia be edukeisen namona idia abia guna be namo. Unai amo gabeai do idia hegeregere gaukara namona idia davaria totona. Unai bamona tama sina idia ura edia natudia be sikuli badana dekenai idia lao.
Vaira Nega Totona Hegaegae
6. Inai stadi lalonai, inai hereva “sikuli badana” ena anina be dahaka?
6 Tano ta ta ai, sikuli ena hahediba daladia be idauidau. Hegeregere United States ai, natudia be lagani 12 lalonai idia sikuli diba. Unai murinai bema stiuden ia ura, vadaeni iunivesiti dekenai lagani 4 eiava ma haida ia sikuli diba, digri ia abia totona. Unai murinai, kosi ma haida ia karaia diba, hegeregere doketa, loea, eiava ensinia gaukara ena kosi. Inai stadi lalonai, inai hereva “sikuli badana” ena anina be iunivesiti ai idia abia edukeisen ai herevalaia. To, teknikol bona vokeisenel sikuli danu idia noho, bona unuseniai stiuden taudia be nega kwadogi lalonai kosi ta idia karaia, unai amo gaukara ta hegeregere kapenta eiava mekaniki ena setifiket idia abia diba.
7. Stiuden taudia be haisikuli dekenai dahaka metau idia davaria?
7 Hari inai negai, sekenderi sikuli bona haisikuli ese stiuden taudia idia hahegaegaea sikuli badana dekenai idia lao totona. Hegeregere, haisikuli momo ai idia hadibaia sabjek ese stiuden ia durudia lasi moni gaukara idia davaria totona, to koledi eiava iunivesiti dekenai idia lao totona. Hari inai negai, stiuden momo be edia tisa, sisiba taudia, bona turadia ese idia doria iunivesiti dekenai idia lao totona, unai amo digri idia abia bena dagi bada gaukaradia idia karaia diba.
8. Keristani tama sina ese dahaka idia karaia be namo?
8 Vadaeni, Keristani tama sina be dahaka idia karaia be namo? Momokani, idia ura edia natudia idia sikuli namonamo bona diba idia abia, unai amo vaira nega ai sibodia idia naria diba. (Aonega Herevadia 22:29) To, idia ura edia natudia be kohu bona moni bada haboua lalohadaina idia abia, a? Edia hereva eiava kara amo edia natudia idia hagoadaia dahaka idia tahua totona? Tama sina haida idia gaukara goadagoada moni idia haboua totona, unai amo nega ia ginidae neganai, edia natudia be sikuli badana dekenai idia siaia diba. Ma haida be unai bamona idia karaia totona moni bada idia abiatorehai. Namona be tama sina ese sikuli ena davana sibona lasi, to gau ma haida danu idia laloa namonamo. Hari inai negai, sikuli badana ena davana be hida, bona ena dika be dahaka?—Luka 14:28-33.
Sikuli Badana Ena Davana Bona Ena Dika
9. Hari inai negai, sikuli badana ena davana be hida?
9 Inai hereva, davana, ita laloa neganai gau ta hoia totona ita negea monina ita laloa. Tano haida ai, sikuli badana dekenai idia lao stiuden be sikuli ena davana idia karaia lasi, badina gavamani ese edia sikuli davana ia karaia. To gabu momo dekenai, sikuli badana ena davana be ia bada daekau noho. Magasin ta (New York Times) ia gwau: “Guna, taunimanima idia laloa sikuli badana be dala ia kehoa gaukara ta ita karaia totona. To hari, unai sikuli be taga taudia bona ogogami taudia ia hapararaia.” Anina be, taga bona ladana bada taudia sibona ese edia natudia be sikuli badana dekenai idia siaia lao, unai amo edia natudia danu be inai tanobada ena taga bona ladana bada taudia ai idia lao. To, Keristani taudia idia ura edia natudia danu be unai bamona taudia ai idia lao be namo, a?—Filipi 3:7, 8; Iamesi 4:4.
10. Sikuli badana dekenai idia lao stiuden taudia edia maduna be dahaka?
10 Ena be gavamani ese sikuli badana dekenai idia lao stiuden edia sikuli davana ia karaia, to stiuden taudia be mai edia maduna danu. Hegeregere, magasin ta (The Wall Street Journal) ia gwau: “Asia ena Sautist tanona ta dekenai, gavamani sikuli ese aonega stiuden taudia idia doria sikuli badana dekenai idia lao totona.” Idia be hegeregere England dekenai ia noho Oxford bona Cambridge iunivesiti, bona United States dekenai idia noho ladana bada sikuli ma haida. Dahaka dainai gavamani be unai bamona ia karaia? Unai magasin ia gwau, “unai ese edia tano ena kohu bona moni do ia habadaia.” Ena be stiuden taudia be sikuli ena davana idia henia lasi, to gabeai edia mauri ibounai do idia gaukaralaia edia tanobada idia durua totona. Tanobada taudia momo be unai bamona mauri dalana idia tahua. To Keristani tama sina idia ura edia natudia be unai bamona mauri dalana idia tahua, a?—Ioane 15:19; 1 Ioane 2:15-17.
11. Iunivesiti stiuden taudia huanai inuinu kekero bona matabodaga karana be edena bamona?
11 Danu, sikuli gabunai idia vara gaudia ita laloa be namo. Taunimanima momo idia diba iunivesiti dekenai kara dika idauidau idia vara, hegeregere drag bona kekero muramura gaukaralaia kerere karana, sihari kava, eksam pepadia idia spai, stiuden ma haida idia hahisia, bona unai bamona kara ma haida. Mani kekero muramura gaukaralaia kerere karana ita laloa. Magasin ta (New Scientist) ese inuinu karana ia herevalaia neganai, ia gwau: “[United States ai, iunivesiti stiuden taudia] 44 pesen bamona be wiki rua rua murinai nega tamona idia inuinu.” Matamata taudia Australia, Britain, Russia bona gabu ma haida dekenai be unai bamona idia karaia danu. Hari inai negai, stiuden taudia be matabodaga karadia idia herevalaia neganai, idia ese inai hereva “hanuaboi tamona” idia gaukaralaia. Magasin ta (Newsweek) ia gwau, “mero bona kekeni be hanuaboi tamona lalonai matabodaga karadia idia karaia, hegeregere idia kisi sibona lasi, to idia mahuta hebou danu, herevana turana karaia lalohadaina idia abia lasi.” Ripoti momo ese idia hahedinaraia, stiuden 60 pesen ia lao 80 pesen be unai matabodaga karadia idia karaia. Diba bada hahinena ta ia gwau, “bema oi be unuseniai oi sikuli, unai bamona kara do oi karaia.”—1 Korinto 5:11; 6:9, 10.
12. Iunivesiti stiuden be dahaka gaudia idia lalohekwarahilaia?
12 Unai sibona lasi to stiuden taudia be edia sikuli gaukara bona eksam dainai idia lalohekwarahi danu. Momokani, stiuden ese edia eksam dekenai maka namona idia abia totona, idia stadi bona edia houmwok idia karaia be namo. Reana ma haida be sikuli idia lao henia lalonai, pat-taim moni gaukara idia karaia. Unai gaudia dekenai edia nega bona goada bada idia henia. To, lauma gaudia be edena bamona? Lalohekwarahi ia bada neganai, edena do idia rakatania? Basileia do idia atoa guna eiava do idia laloa maragi? (Mataio 6:33) Baibel ese Keristani taudia ia hagoadaia: “Umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.” (Efeso 5:15, 16) Madi, haida ese edia abidadama idia rakatania, badina gau haida dekenai edia nega bona goada bada idia henia bona iunivesiti dekenai kara dika lalonai idia vareai.
13. Keristani tama sina ese edena henanadai idia laloa be namo?
13 Matabodaga, kara dikadia, bona laloani karadia be iunivesiti sibona dekenai idia vara lasi. To, matamata taudia momo idia laloa unai bamona kara idauidau be edukeisen ena kahana ta, bona idia laloa unai be kerere lasi. Bema Keristani tama sina idia diba iunivesiti ai unai bamona gaudia idia vara, to edia natudia be unuseniai idia sikuli ela bona lagani 4 bona ma haida, unai be namo, eiava? (Aonega Herevadia 22:3; 2 Timoteo 2:22) Iunivesiti ese idia do ia durua dainai, unuseniai idia vara dika idauidau idia laloa maragi be namo, a? Bona iunivesiti ai natudia idia hadibaia edia mauri lalonai dahaka do idia atoa guna?a (Filipi 1:10; 1 Tesalonika 5:21) Namona be tama sina ese unai henanadai idia laloa, bona gabu ma ta dekenai edia natudia be sikuli totona idia siaia lao ena dika danu idia laloa bada.
Sikuli Ma Haida
14, 15. (a) Herevana taunimanima momo edia lalohadai be idauidau, to Baibel ese edena bamona sisiba ia henia? (b) Matamata taudia be idia sibodia dekenai dahaka henanadai idia henia be namo?
14 Hari inai negai taunimanima momo idia laloa, bema matamata taudia be iunivesiti dekenai idia lao, mauri namona do idia abia. Keristani taudia ese Baibel ena sisiba idia badinaia: “Inai tanobada taudia edia kara bamona do umui karaia lasi, to Dirava ese emui lalona do ia hagiroa, vadaeni do umui matamata, bona idau momokani. Unai dekena amo Dirava ena ura be do umui diba momokani. Do umui diba edena kara be namo, edena kara Dirava ia ura henia, bona edena kara be goeva momokani.” (Roma 12:2) Inai nega kwadogina lalonai, Dirava ia ura iena taunimanima—matamata bona burukadia—be dahaka idia karaia? Paulo ese Timoteo ia hagoadaia: “Nega ibounai do oi laloa maoromaoro. Hisihisi lalonai do oi haheauka. Sivarai Namona harorolaia gaukara do oi karaia, bona Dirava ena hesiai tauna ena dagi karadia ibounai do oi karaia namonamo.” Hari, unai hereva be mai anina bada ita ibounai dekenai.—2 Timoteo 4:5.
15 Inai tanobada ena kohu momo haboua lalohadaina ita abia, to gau badana be “ita laloa maoromaoro”—lauma dalanai ita goada noho. Bema oi be mero eiava kekeni matamata ta, oi sibona oi nanadaia: ‘Lau gaukara goadagoada Dirava ena “hesiai tauna ena dagi karadia ibounai” lau karaia totona, a? Dahaka palani lau karaia hesiai gaukara lau “karaia namonamo” totona? Egu lalona lau hadaia vadaeni ful-taim hesiai gaukara do lau karaia, a?’ Unai be henanadai badadia, badina hari oi itaia matamata taudia ma haida be sibodia edia namo idia laloa, tanobada ena “gau namo herea” idia tahua, bona idia laloa unai gaudia dainai vaira negana namona do idia abia. (Ieremia 45:5) Unai dainai, Keristani tama sina ese natuna be ena maragi negana amo lauma gaudia idia hadibaia be aonega karana.—Aonega Herevadia 22:6; Hadibaia Tauna 12:1; 2 Timoteo 3:14, 15.
16. Edena dala ai Keristani tama sina ese lauma dalanai edia natudia idia durua diba?
16 Ruma bese ta lalonai, sina ta be lagani momo ful-taim hesiai gaukara ia karaia, bona iena natuna memero be toi. Natuna mero badana, ia gwau: “Emai sinana ia ura ai be taunimanima namodia ai bamoa. Unai dainai, sikuli turadia ai bamoa lasi, to kongrigeisen lalonai idia goada tadikaka sibona ai bamodia. Danu, hanaihanai emai sinana ese ful-taim hesiai gaukara idia karaia taudia—misinari, loaloa naria taudia, Betele, bona painia taudia—be emai ruma dekenai ia boiridia mai. Edia sivarai ai kamonai bona edia moale ai itaia neganai, unai ese emai lalona ia veria ful-taim hesiai gaukara ai karaia totona.” Moale gauna be, hari unai memero toi be ful-taim hesiai gaukara idia karaia noho—ta be Betele dekenai, ta be Hesiai Gaukara Hadibaia Sikulina dekenai ia lao vadaeni, bona ta be ia painia noho!
17. Tama sina ese edena dala ai edia natudia idia durudia diba, sikuli ena kosi eiava gaukara idia abia hidi totona? (Rau 29 ai ia noho maua itaia.)
17 Tama sina ese lauma dalanai edia natudia idia naria sibona lasi, to danu, namona be edia natuna idia durua haraga sikuli ena kosi bona moni gaukara dekenai abia hidi maorona idia karaia totona. Hari Betele dekenai ia noho tau matamatana ta, ia gwau: “Egu tama sina be idia do headava lasi neganai bona idia headava murinai painia gaukara idia karaia. Bona idia hekwarahi ruma bese taudia be painia urana idia hahedinaraia totona. Sikuli kosi ta eiava abia hidi ma haida ai karaia gwauraia neganai, nega momo ai idia hagoadaia pat-taim moni gaukara ai karaia be namo, unai amo ai painia diba.” Namona be tama sina bona natudia idia abia hidi kosi ese natudia ia durua iunivesiti dekenai idia lao totona lasi, to Dirava ena hesiai gaukara idia karaia totona.b
18. Matamata taudia ese edena gaukara idauidau idia laloa be namo?
18 Ripoti haida ese idia hahedinaraia, kampani momo be iunivesiti taudia idia tahua lasi, to gaukara idia diba momo taudia idia tahua. Magasin ta (USA Today) ena ripoti ia gwau, “lagani 20 eiava 30 murinai, gaukara taudia 70 pesen be digri idia abia taudia lasi, to vokeisenel eiava teknikol sikuli amo setifiket idia abia taudia.” Unai bamona sikuli dekenai kosi kwadogidia idia henia, hegeregere opesi gaukara, mekaniki, kompiuta hanamoa gaukara, plama, huina utua, bona gaukara ma haida. Unai be gaukara namodia, a? Oibe! Reana haida be unai gaukara idia laloa maragi, to Iehova ena hesiai taudia dekenai unai be gaukara namodia, badina unai amo heduru idia abia diba.—2 Tesalonika 3:8.
19. Dahaka gaukara ese moale korikori ia mailaia?
19 Baibel ia gwau: “Ulato bona uhau, buruka taudia, bona natuna maragidia danu, namona be idia ibounai ese, Lohiabada ena ladana do idia hanamoa bada! Iena ladana badana ese, taunimanima ibounai edia ladana badana ia hereaia noho.” (Salamo 148:12, 13) Bema Iehova ena ful-taim hesiai gaukara be tanobada ena dagi bada gaukaradia ida ita hahegeregerea, ita diba ful-taim hesiai gaukara ese moale korikori ia mailaia. Namona be Baibel ena hagoadaia herevana ita laloa bada, ia gwau: “Lohiabada ena hanamoa sibona ese, kohu momo oi dekenai ia henia noho, bona unai kohu danu, ese lalohisihisi sisina oi dekenai do ia henia lasi.”—Aonega Herevadia 10:22.
[Footnotes]
a Haida idia laloa Dirava ena hadibaia dalana ese iunivesiti ena hadibaia dalana ia hanaia. Edia ekspiriens be Gima Kohorona, February 1, 1983, rau 13-17; The Watchtower, April 15, 1979, rau 5-10; Awake!, June 8, 1978, rau 15; bona August 8, 1974, rau 3-7 dekenai itaia.
b Awake!, October 8, 1998, “In Search of a Secure Life,” rau 4-6, bona May 8, 1989, “What Career Should I Choose?” rau 12-14 itaia.
Oi Gwauraia Hedinarai Diba, A?
• Vaira negana namona totona, Keristani taudia ese dahaka idia abidadama henia be namo?
• Keristani tama sina ese edia natudia edia vaira negana idia laloa neganai, dahaka idia lalohekwarahilaia?
• Tama sina bona natudia ese sikuli badana idia lalohadailaia neganai, dahaka idia laloa danu be namo?
• Edena dala ai tama sina ese edia natudia idia durua diba Iehova idia hesiai henia totona?
[Box on page 29]
Sikuli Badana Ena Namo be Dahaka?
Iunivesiti dekenai idia lao taudia idia ura digri idia abia, unai amo dagi bada gaukaradia idia karaia diba. America gavamani ena ripoti idauidau ese idia hahedinaraia, iunivesiti dekenai idia lao taudia 25 pesen bamona be lagani 6 lalonai digri idia abia. To idia ese gaukara namona idia abia, a? Vanegai sibona idia karaia tahua karana ena ripoti mani ita itaia.
“Bema ta be Havard eiava Duke [iunivesiti] dekenai ia lao, unai ese ia hahedinaraia lasi ia be maoromaoro dagi bada gaukarana ta do ia abia. . . . Kampani momo be gaukara idia diba momo taudia idia tahua. Ena be kampani biagudia be ta ena digri idia laloa, to idia tahua gauna be inai: Unai tauna be gaukara ia karaia diba eiava lasi.”—Newsweek, November 1, 1999.
“Hari, gaukara ta oi diba namonamo be namo, guna bamona lasi . . . , to unai gaukara karaia totona, haisikuli dekenai oi abia dibana—matematik, duahiduahi, bona toretore dekenai—be hegeregere . . . , to iunivesiti dekenai oi abia dibana lasi. . . . Stiuden taudia be gaukara namona idia abia totona, iunivesiti dekenai idia lao be anina lasi, haisikuli amo idia abia diba be hegeregere.”—American Educator, Spring 2004.
“Iunivesiti momo be edia stiuden idia hegaegaelaia lasi edia kosi idia haorea murinai gaukara idia davaria totona. Vokeisenel sikuli . . . be momo ese idia ura henia. Lagani 1996 ia lao 2000 ai, unai sikuli dekenai idia lao taudia be 48 pesen amo ia bada daekau. . . . Iunivesiti diploma abia totona moni bona nega bada do oi halusia, to unai ese oi do ia durua momokani lasi.”—Time, January 24, 2005.
“America ena gavamani dipatmen ta (Labour) ena 2005 ripotina ese ia hahedinaraia, iunivesiti dekenai lagani 4 idia sikuli bena idia raka-lasi taudia toi toi amo, ta ta idia abia gaukarana be edia digri ida ia hegeregere lasi.”—The Futurist, July/August 2000.
“Unai ibounai dainai, hadibaia taudia momo ese hari negai sikuli badana ena namo idia daradaralaia. Ripoti ta (Futurist) ia gwau, “taunimanima dekenai ai hadibaia gaudia ese vaira neganai idia do ia durua lasi.” To Baibel ese Dirava ia gwauraia dalana mani ita laloa: “Lau inai Lohiabada, emui Dirava. Emui namo habadaia dalana, be umui dekenai lau hadibaia noho. Emui raka dalana namona dekenai umui lau hakaua noho. Egu oda hereva bema umui kamonai henia neganai, emui noho be do ia namo, mai maino danu, sinavai hegeregerena, bona emui kara maoromaoro be goada, davara ena hurehure bamona.”—Isaia 48:17, 18.
[Picture on page 26]
Edia mauri lalonai idia tahua gaudia idia rakatania bona Iesu idia badinaia
[Picture on page 31]
Keristani tama sina ese natuna ena maragi negana amo lauma gaudia idia hadibaia be aonega karana