Iehova ese Ita Ia Naria, Mamoe Naria Tauna Bamona

“Lohiabada ese lau ia naria noho, mamoe naria tauna . . . bamona. Unai dainai gau ta do lau dabu lasi.”​​—⁠SALAMO 23:⁠1.

1-3. Dahaka dainai Davida ese Iehova be mamoe naria tauna ida ia hahegeregerea?

BEMA oi ese Iehova ena kara, iena taunimanima ia naria dalana oi herevalaia, dahaka do oi gwau? Iehova be mai lalokau ida iena hesiai taudia ia naria dalana be edena kara ida oi hahegeregerea diba? Lagani 3,000 gunanai, King Davida ese Iehova ena kara ia gwauraia hedinarai namo herea bona ia ese Iehova ena kara be mamoe naria tauna ena kara ida ia hahegeregerea. Guna, Davida be mero matamata neganai, ia ese mamoe naria tauna ena gaukara ia karaia.

² Unai dainai mamoe naria dalana ia diba. Ia diba bema mamoe ita naria lasi, idia boio diba bona henaoa taudia ese do idia henaoa eiava dagedage animal ese do idia hamasea diba. (1 Samuela 17:​34-36) Bema mamoe naria tauna namona be lasi, mamoe be aniani momo gabuna do idia davaria lasi. Davida ese hora momo lalonai mamoe ia hakaua, gimaia bona ubua negadia ia laloa lou neganai, ia moale.

³ Unai dainai, Davida ese Iehova ena kara ia herevalaia neganai, mamoe naria tauna ena kara ia laloa. Davida ese Salamo 23 ia torea matamaia neganai, inai bamona ia hereva: “Lohiabada ese lau ia naria noho, mamoe naria tauna ese, iena mamoe ia naria bamona. Unai dainai gau ta do lau dabu lasi.” Mani ita itaia dahaka dainai unai hereva be maoro. Salamo 23 do ita tahua, bona ita itaia edena dala ai Iehova ese iena taunimanima ia naria dalana be mamoe naria tauna ese iena mamoe ia naria dalana ida ia hegeregere.​—⁠1 Petero 2:⁠25.

Haheitalai Namona

4, 5. Mamoe edia kara be edena bamona?

⁴ Baibel ese Iehova ena dagi ladadia momo ia gwauraia, to “Mamoe Naria Tauna” ena dagi ese ena hebogahisi karana ia hahedinaraia. (Salamo 80:⁠1) Gau rua ese ita do ia durua Iehova be Mamoe naria tauna bamona ita lalopararalaia totona. Ginigunana be mamoe edia kara, bona iharuana be mamoe naria tauna ena maduna bona ena kara do ita dibaia.

⁵ Baibel ese mamoe edia kara ia herevalaia momo, ia gwau idia be mamoe naria tauna ena kara namo idia ura henia (2 Samuela 12:⁠3), idia dagedage lasi (Isaia 53:⁠7), bona sibodia idia gimaia diba lasi. (Mika 5:⁠8) Lagani haida lalonai mamoe ia naria tauna ta ia gwau: “Mamoe be sibodia idia naria diba lasi. Idia be animal ma haida bamona lasi, naria tauna ese nega ibounai idia do ia naria namonamo be gau badana.” Mamoe idia mauri totona, mamoe naria tauna ese mai hebogahisi ida ia naridia be namo.​—⁠Esekiela 34:⁠5.

6. Mamoe naria tauna ese dina ta lalonai ia karaia gaukarana be dahaka?

⁶ Idaunegai, mamoe naria tauna ese dina ta lalonai ia karaia gaukarana be dahaka? Diksenari ta ia gwau: “Daba maragi ai, mamoe naria tauna do ia raka guna bona iena mamoe serina ia hakaua lao edia aniani gabuna dekenai. Unuseniai, do ia naridia, bema mamoe ta ia itaia lasi bona unai mamoe be mamoe serina amo ia raka oho, mamoe naria tauna do ia hekwarahi bada unai mamoe ia tahua totona, ela bona ia davaria bona abia giroa lou. . . . Hanuaboi ai, edia noho gabuna dekenai ia hakaudia lao bona edia ruma ena iduara dekenai idia vareai lalonai, idia ta ta ia duahia bona ia sekea ibounai idia noho eiava lasi. . . . Nega momo, hanuaboi ai henaohenao taudia bona dagedage animal amo ia naridia danu.”a

7. Edena nega ai, mamoe naria tauna ese lalokau bona haheauka ia hahedinaraia?

⁷ Nega haida mai lalokau bona haheauka ida, mamoe naria tauna ese idia rogorogo mamoe hahine bona mamoe natuna ia naria. (Genese 33:13) Buka ta ia gwau: “Nega momo mamoe hahine be gabu daudauna, hegeregere ororo dorina dekenai do ia mara. Unai nega ai, mamoe hahine ena goada ia ore dainai, naria tauna ese ia do ia durua bona naria ela bona ia mara, bena mamoe natuna do ia rosia bona mamoe serina dekenai ia abia lao. Mamoe natuna ia vara murinai, ia raka diba lasi dainai dina haida lalonai, mamoe naria tauna ese iena ataiai dabuana amo do ia kumia bona ia rosia.” (Isaia 40:​10, 11) Oibe, namona be mamoe naria tauna be lalokau bona boga-auka tauna.

8. Dahaka dainai Davida ese Iehova ia abidadama henia?

⁸ “Lohiabada ese lau ia naria noho, mamoe naria tauna ese, iena mamoe ia naria bamona”​—⁠unai hereva ese iseda guba Tamana ena kara ia gwauraia namo herea. Salamo 23 ita duahia neganai, Iehova be mamoe naria tauna bamona mai boga-auka bona lalokau ida ita ia naria dalana do ita itaia. Siri 1 ia hahedinaraia Davida ia diba momokani, Dirava ese ena mamoe ia naridia namonamo dainai, ‘gau ta dekenai do idia dabu lasi.’ Siri haida lalonai, Davida ese Iehova ia abidadama henia ena badina toi ia herevalaia. Idia be: Iehova be iena mamoe ia hakaua, ia gimaia, bona ia ubua. Mani unai gaudia ta ta ita herevalaia.

“Lau Ia Hakaua”

9. Davida be edena gabu ia gwauraia, bona edena bamona mamoe be unai gabu dekenai idia lao diba?

⁹ Gau ginigunana be Iehova ese iena taunimanima ia hakaua. Davida ia gwau: “Rei namona gabuna dekenai lau ia hakaua, unuseni lau laga-ani totona. Ranu namona gabuna dekenai danu, ia ese lau ia hakaua noho. Lauegu lauma be ia ese ia hagoadaia lou. Kara maoromaoro daladia dekenai, ia ese lau ia hakaua noho, iena gwauhamata hegeregerena.” (Salamo 23:​2, 3) Unai siri lalonai Davida ia gwau mamoe serina be rei momo bona ranu gabuna dekenai mai maino danu idia hekure. Unai ese ia hahedinaraia mamoe be idia moale, idia bogakunu bona idia gari lasi. To, mamoe be sibodia unai bamona maino gabuna ta do idia davaria lasi. Edia mamoe naria tauna ese unai “rei namona gabuna” dekenai do ia hakaudia lao.

10. Dirava ia diba ita be hegeregere dahaka ita karaia totona?

¹⁰ Hari inai negai, Iehova ese edena bamona ita ia hakaua? Dala ta be iena haheitalai amo. Baibel ese ita ia hagoadaia ‘Dirava ena kara bamona do ita karaia be namo.’ (Efeso 5:⁠1) Unai hereva ena anina be Dirava ena hebogahisi, dika gwauatao karana bona lalokau karana do ita tohotohoa. (Efeso 4:32; 5:⁠2) Oibe, Iehova be unai kara namodia ia haheitalaia tauna hereadaena. Vadaeni, Ia ese ita ia noia iena kara ita tohotohoa totona be auka, a? Lasi. Unai sisiba amo ita itaia, Iehova ia diba, ita be Iena kara ita tohotohoa diba. To, edena bamona unai ita karaia diba? Dirava ena toana hegeregerena ita ia karaia dainai, ita be Ia ita tomadiho henia bona kara maoromaoro ita badinaia diba. (Genese 1:26) Momokani, ena be ita be goevadae lasi taudia, to Iehova ia diba iena kara ita tohotohoa diba. Bema unai bamona ita karaia, unai “gabu namona” dekenai ita do ia hakaua lao. Bona ena be inai tanobada be dagedage amo ia honu, to Dirava be ‘dika dekenai amo ita do ia gimaia noho,’ bona ita dekenai ia moale dainai, maino do ita davaria.​—⁠Salamo 4:8; 29:⁠11.

11. Iehova ese iena mamoe ia hakaua neganai, dahaka ia laloa bada, bona edena bamona unai ia hahedinaraia?

¹¹ Iehova ese mai lalokau bona haheauka ida ita ia hakaua. Mamoe naria tauna be iena mamoe ia laloa dainai, “edia goada hegeregerena” ai ia hakaudia. (Genese 33:14) Unai hegeregerena, Iehova ese iena mamoe be “edia goada hegeregerena” ai ia hakaudia danu. Dirava be iseda diba bona goada ia laloa. Ia ese ita ia hakaua karana ia haidaua diba, bona ita karaia diba lasi gaudia totona ia hereva lasi. Ia ura gauna be iseda kudouna ibounai ida ia do ita hesiai henia. (Kolose 3:23) To, edena bamona bema ita buruka dainai, guna ita haroro bamona be hari ita karaia diba lasi? Eiava edena bamona bema oi gorere bona unai ese oi ia koua? Vadaeni, aonega karana be mai emu kudouna ibounai ida Iehova oi hesiai henia. Iseda goada be idauidau, unai dainai mai eda kudouna ibounai ida Iehova ita hesiai henia ena anina be, ita ta ta eda goada hegeregerena ai Ia do ita hesiai henia. Herevana, dahaka hekwakwanai ese iseda dala ia koua, Iehova be iseda kudouna ibounai ida ia ita tomadiho henia karana ia abia dae.​—⁠Mareko 12:​29, 30.

12. Mose ena Taravatu ese edena bamona ia hahedinaraia, Iehova be ena mamoe “edia goada hegeregerena” ai ia hakaudia?

¹² Iehova be iena mamoe “edia goada hegeregerena” ai ia hakaudia ena haheitalai ita lalopararalaia totona, Mose ena Taravatu hegeregerena idia karaia boubou gaudia idauidau mani ita laloa. Iehova ia ura idia mailaia boubou gaudia namodia be mai edia kudouna ibounai ida do idia henia. To, danu unai boubou gauna be boubou henia tauna dekenai ia hegeregere gauna sibona do ia henia. Taravatu ia gwau: “Bema tau ta be moni lasi dainai mamoe o nanigosi ia hoia diba lasi neganai, ia ese Lohiabada dekenai manu edia ladana kerea rua, o pune rua do ia mailaia.” Bema tau ta be pune rua ia mailaia diba lasi, vadaeni “paraoa” ia mailaia diba. (Levitiko 5:​7, 11) Unai ese ia hahedinaraia Dirava be boubou ia henia tauna amo gau momo ia noia lasi. Vadaeni, ita diba Dirava ese ena kara ia haidaua diba lasi, unai dainai iseda goada hegeregerena ita henia gauna do ia abia dae. (Malaki 3:⁠6) Unai hebogahisi Mamoe Naria Tauna ese ita ia hakaua be moale gauna!

“Dika ta Dekenai Do Lau Gari Lasi, Badina be, Lohiabada E, Oi be Lau Danu”

13. Salamo 23:4 ena hereva be dahaka, bona dahaka dainai Davida be unai bamona ia hereva?

¹³ Davida ese Dirava ia abidadama henia ena badina iharuana ia hahedinaraia: Iehova be iena mamoe ia gimaia. Davida ia gwau: “Oibe, lau be mase ena dibura koura gabuna, dekenai do lau raka lao, to dika ta dekenai do lau gari lasi, badina be, Lohiabada e, oi be lau danu oi noho. Oiemu mamoe hakaua itotohi, bona oiemu botaia auna ese, lau idia gimaia noho.” (Salamo 23:⁠4) Davida ese unai ia gwauraia neganai, toana be, Iehova be ia kahirakahira ia raka bona idia ruaosi idia herevahereva. Oibe, Davida be hekwakwanai ia davaria neganai, Dirava ese ia durua negadia ia herevalaia. Hegeregere, Saulo ia ura Davida ia alaia neganai, Davida be koura momo lalodiai ia hunia. To Davida ia gari lasi, badina ia mamia Dirava be ia ida ia noho, bona ena “hakaua itotohi” ia dogoatao hegaegae Davida ia hakaua totona. Davida ia diba Iehova ese ia gimaia dainai, ia gari lasi bona Iehova kahirakahira ia lao.b

14. Baibel ese Iehova ena gimaia karana be edena bamona ia gwauraia, to dahaka danu ita laloatao be namo?

¹⁴ Hari inai negai, Iehova ese ena mamoe be edena bamona ia gimadia? Baibel ia gwau, demoni eiava tau ta, be ia hegeregere lasi tanobada ai Iehova ena mamoe taudia ia hadikaia ore totona. Iehova ese ena taunimanima do ia gimaia. (Isaia 54:17; 2 Petero 2:⁠9) To, Iehova ese dika ibounai amo ita do ia gimaia lasi. Vaia, taunimanima ese idia davaria hekwakwanai ita davaria bona Keristani momokani taudia ese idia davaria dagedage karadia do ita davaria danu. (2 Timoteo 3:12; Iamesi 1:⁠2) Bona nega haida, reana “dibura koura gabuna” dekenai ita raka bamona. Hegeregere, dagedage eiava gorere badana ta dainai, kahirakahira iseda mauri ita haboioa. Eiava iseda lalokau tauna ta be ia gorere bada herea eiava ia mase. Unai lalohisihisi bona dibura negadia ai, iseda Naria Tauna be ita ida ia raka, bona ia ese ita ia gimaia. To, edena bamona unai ia karaia?

15, 16. (a) Edena dala ai Iehova ese ita ia durua ita davaria hekwakwanai ita haheaukalaia totona? (b) Haheitalai ta mani oi gwauraia.

¹⁵ Iehova ia gwau lasi hoa karadia do ia karaia ita ia gimaia totona.c To, inai ita diba momokani: Herevana dahaka hekwakwanai ita davaria, do ita hanaia diba, badina Iehova ese ita do ia durua. Ia ese aonega do ia henia “dibagani idauidau” ita haheaukalaia totona. (Iamesi 1:​2-5) Mamoe naria tauna ese ena hakaua itotohi ia gaukaralaia dagedage animal ia luludia sibona lasi, to danu ia gaukaralaia, ena mamoe be dala maorona ai ia doria lao totona. Reana, Iehova ese tadikaka ta ia gaukaralaia ita ia durua totona. Hegeregere, unai tadikaka ese Baibel amo ita ia durua bona unai amo iseda hekwakwanai ita hamaoromaoroa diba. Danu, Iehova ese ita dekenai goada ia henia ita haheauka totona. (Filipi 4:13) Iena lauma helaga ese “siahu badana” ia henia ita dekenai, Satani ena hedibagani ita haheaukalaia totona. (1 Korinto 10:13; 2 Korinto 4:⁠7) Oibe, Iehova be ia noho hegaegae ita ia durua totona​—⁠unai ese oi ia hagoadaia, a?

¹⁶ Oibe, herevana edena dibura koura gabuna ai ita vareai, unai gabu dekenai ita sibona ita raka lasi. Ena be nega haida unai ita lalopararalaia haraga lasi, to iseda Naria Tauna be ita ida ia raka bona ita ia durua noho. Mani inai ekspiriens ita laloa: Doketa ese elda tauna ia hamaoroa ena harana dekenai tiuma ta ia tubu noho. Unai elda ia gwau: “Unai hereva lau kamonai neganai, lau laloa reana Iehova be lau dekenai ia badu eiava lau ia lalokau henia lasi. To, Iehova lau rakatania lasi. Lasi, egu lalohekwarahi be ia dekenai lau gurigurilaia. Bona Iehova ese lau ia durua​—⁠nega momo tadikaka taihu amo lau ia hagoadaia. Idia momo be guna idia gorere bada danu bona edia haheauka karana ese lau ia hagoadaia. Edia hereva namodia amo lau itaia egu lalohekwarahi be vaia taunimanima ese idia laloa momo gaudia. Tadikaka taihu edia heduru bona hebogahisi karadia amo lau diba, Iehova be lau dekenai ia badu lasi. Oibe, lauegu gorere do lau haheaukalaia noho bona lau diba lasi dahaka do ia vara. To, lau diba momokani, Iehova be lau ida ia noho bona ia ese lau do ia durua inai gorere lau haheaukalaia totona.”

“Lauegu Aniani be Oi ese Oi Abia Hegaegae”

17. Salamo 23:5 ese Iehova be edena bamona ia gwauraia, bona dahaka dainai ia be mamoe naria tauna danu ia hegeregere?

¹⁷ Davida ese iena Naria Tauna ia abidadama henia ena badina ihatoina ia gwauraia: Iehova be iena mamoe ia ubua, bona aniani momo ia henidia. Davida ia gwau: “Lauegu aniani be oi ese oi abia hegaegae noho, lau idia dagedage henia taudia edia vairana dekenai. Oiemu aria dekenai lau oi abia dae, mai mataurai danu. Lauegu kapusi be oi ese oi hahonua noho.” (Salamo 23:⁠5) Inai siri lalonai, Davida ese iena Naria Tauna be aniani bona inuinu gaudia momo ia henia heabidae tauna bamona ia gwauraia. Unai haheitalai rua, mamoe naria tauna namona bona heabidae tauna namona edia anina be hegeregere. Badina, mamoe naria tauna namona be rei bona ranu gabuna ia davaria diba, unai amo iena mamoe serina be ‘gau ta dekenai do idia dabu lasi.’​—⁠Salamo 23:​1, 2.

18. Dahaka ese ia hahedinaraia Iehova be heabidae tauna namona?

¹⁸ Iseda Naria Tauna be heabidae tauna namona, a? Oibe! Hari ita moalelaia lauma aniani be momo herea, ena toana be idauidau bona ena mamina be namo herea. Iehova be “hesiai tauna mai ena kamonai, bona mai ena kara maoromaoro” amo heduru bukadia idauidau ia henia, bona kongrigeisen heboudia, hebouhebou maragidia bona badadia dekenai program namodia ia hegaegaelaia. Unai gaudia ibounai dainai lauma dalanai ita boga kunu. (Mataio 24:​45-47) Oibe, lauma dalanai ita hitolo diba lasi. “Hesiai tauna mai ena kamonai, bona mai ena kara maoromaoro” ese Baibel bona Baibel stadilaia buka momo ia halasidia, bona hari unai buka be gado 413 bamona ai idia printaia. Iehova ese inai lauma aniani be dala idauidau ai ia hegaegaelaia​—⁠“rata,” unai be Baibel ena hahediba hereva badadia bona “aniani korikori” be lauma hereva dobudia. (Heberu 5:​11-14) Unai dainai, hekwakwanai ita davaria eiava abia hidi ta ita ura karaia neganai, ita ia durua herevana ta ita davaria diba. Bema unai lauma aniani be lasi, madi ita be dala lasi, ani? Oibe, iseda Naria Tauna be heabidae tauna namo hereana!​—⁠Isaia 25:6; 65:⁠13.

“Lohiabada Ena Ruma Dekenai Do Lau Noho”

19, 20. (a) Salamo 23:6 ai Davida ese edena dala ai iena abidadama ia gwauraia, bona iseda hemami be unai bamona, a? (b) Hereva gabena ai dahaka do ita herevalaia?

¹⁹ Davida ese ena Naria Tauna bona heabidae tauna ena kara ia lalohadailaia murinai, ia gwau: “Momokani, oiemu kara namo bona bogahisihisi, be lau dekenai do idia noho, egu mauri dinadia ibounai lalonai. Bona Lohiabada ena Ruma dekenai do lau noho, ela bona hanaihanai.” (Salamo 23:⁠6) Iehova ese guna Davida ia naria namo herea dainai, mai ena lalona ibounai ida ia tanikiu henia, bona nega vaira ai do idia vara gaudia dainai, ia abidadama henia. Davida, guna mamoe ia naria tauna, be ia gari lasi, badina ia diba bema Iehova, iena Naria Tauna badinai ia noho, hegeregere iena Ruma dekenai ia noho bamona, Iehova ese mai lalokau ida ia do ia naria.

²⁰ Salamo 23 dekenai idia noho hereva namodia dainai ita moale bada! Davida be haheitalai namona ia gaukaralaia Iehova ese iena mamoe ia hakaua, gimaia bona ubua dalana ia gwauraia totona. Davida ese ia torea hereva namodia be Baibel lalonai ita duahia diba dainai, ita diba momokani Iehova be iseda Naria Tauna. Momokani, Iehova badinai ita noho neganai, ia be mai ena lalokau Mamoe Naria Tauna bamona ita do ia naria “ela bona hanaihanai.” To, ita, iena mamoe taudia, be mai iseda maduna danu​—⁠Iehova, iseda Naria Tauna badana ida do ita raka noho. Edena bamona unai do ita karaia be stadi hereva gabena lalonai do ita herevalaia.

[Footnotes]

Oi Laloatao, A?

• Dahaka dainai Davida ese Iehova be mamoe naria tauna bamona ia herevalaia be haheitalai namona?

• Iehova be edena dala ai mai laloparara ida ita ia hakaua?

• Edena dala ai Iehova ese ita ia durua hekwakwanai ita haheaukalaia totona?

• Dahaka ese ia hahedinaraia Iehova be heabidae tauna namona?

[Picture on page 20]

Mamoe naria tauna bamona, Iehova ese iena mamoe ia hakaudia