‘Sivarai Namona be Tanobada Ibounai Dekenai Do Idia Harorolaia’
“Lauegu ladana do umui gwauraia hedinarai . . . ia lao bona tanobada ena kahana ibounai.”—KARA 1:8.
1. Edena negai bona edeseniai hahediba taudia ese Mataio 24:14 ai ia noho peroveta herevana idia kamonai guna?
ITA MOMO be Iesu ena hereva Mataio 24:14 lalonai ita diba namonamo dainai, iseda lalona amo ita gwauraia diba. Bona unai be peroveta herevana namo hereana ta! Mani oi laloa, hahediba taudia be nega ginigunana unai idia kamonai neganai, dahaka idia laloa. Unai be lagani 33 C.E. Hahediba taudia be lagani toi bamona Iesu ida idia noho vadaeni, bona ia danu Ierusalema dekenai idia lao. Idia ese Iesu ena hoa karadia idia itaia bona ena hahediba herevadia idia kamonai. Ena be Iesu ese ia hadibaia hereva momokani idia moalelaia, to idia diba danu momo be unai idia moalelaia lasi. Iesu idia inai henia taudia be ladana bada dagedage taudia.
2. Hahediba taudia be dahaka hahetoho do idia davaria?
2 Olive Ororona ai, Iesu ena hahediba taudia foa be ia ida idia helai, bona ia ese do idia davaria dika bona hahetoho ia herevalaia neganai, idia kamonai namonamo. Guna, Iesu ese idia ia hamaoroa ia do idia hamasea. (Mataio 16:21) To hari ia hahedinaraia namonamo idia danu be do idia dagedage henidia. Iesu ia gwau: “Umui emui mase totona hereva do idia atoa, do idia hadikaia umui, do idia alaia mase umui. Lauegu ladana dainai bese ibounai ese umui do idia badu henia.” Unai sibona lasi. Peroveta koikoi taudia ese taunimanima momo do idia hakaua kerere. Ma haida be edia abidadama do idia rakatania, ta ta do idia samania heheni bona do idia inai heheni. Bona Dirava bona ena Hereva dekenai “taunimanima momo” edia lalokau do ia keru.—Mataio 24:9-12.
3. Dahaka dainai Iesu ena hereva Mataio 24:14 dekenai be hoa gauna?
3 Iesu ena hahediba taudia dekenai do idia vara gaudia ia herevalaia murinai ia gwauraia gauna ese edia lalona ia hagoadaia. Ia gwau: “Basileia ena Sivarai Namona be tanobada ibounai dekenai do idia harorolaia. Vadaeni unai murinai, dokona be do ia ginidae.” (Mataio 24:14) Oibe, Iesu ese Israela dekenai ia hamatamaia gaukarana—“hereva momokani gwauraia hedinarai” totona—be do idia karaia noho ela bona tanobada ibounai dekenai. (Ioane 18:37) Unai peroveta herevana be hoa gauna! Badina bese ibounai dekenai unai gaukara ita harorolaia be mai ena hekwarahi, bona unai gaukara ita karaia neganai ‘bese ibounai ese ita do idia badu henia,’ unai dainai ita gwau diba ia be hoa gauna. Unai gaukara badana ia guguru neganai, unai ese Iehova ena siahu ia abia isi sibona lasi, to ena lalokau, hebogahisi, bona haheauka do ia hahedinaraia. Danu, nega ia henia ena hesiai taudia be edia abidadama bona badinaia karana idia hahedinaraia totona.
4. Daidia be Iesu ese ia hadibaia haroro gaukara idia karaia totona, bona dahaka hagoadaia hereva ia henia?
4 Iesu ena hahediba taudia idia diba Iesu ese idia dekenai gaukara badana ta ia henia. Iesu be guba dekenai ia do daekau lasi neganai, idia ia hamaoroa: “Umui be dohore siahu umui abia, Lauma Helaga umui dekenai ia diho neganai, bona lauegu ladana do umui gwauraia hedinarai Ierusalema dekenai, Iudea ibounai, Samaria ena kahana ibounai, do ia lao bona tanobada ena kahana ibounai.” (Kara 1:8) Oibe, daudau lasi ma haida be idia do idia bamoa. To, hahediba taudia be momo lasi. Unai dainai Dirava ena lauma helaga ena siahu bada ese idia do ia durua karana idia dibaia neganai, unai ese idia ia hagoadaia momokani unai gaukara idia hagugurua totona!
5. Haroro gaukara dekenai, hahediba taudia be dahaka idia diba lasi?
5 Hahediba taudia idia diba sivarai namona do idia harorolaia bona taunimanima be hahediba taudia ai do idia halaoa. (Mataio 28:19, 20) To idia diba lasi unai gaukara ena bada be edena bamona, bona idia diba lasi dokona be edena negai do ia ginidae. Ita danu ita diba lasi. Unai be Iehova sibona ia diba. (Mataio 24:36) Haroro gaukara be do ita karaia noho ela bona Iehova ia laloa ia hegeregere neganai, Ia ese inai tanobada dikana do ia haorea momokani. Unai nega ai Keristani taudia do idia diba haroro gaukara be Iehova ena ura hegeregerena idia karaia vadaeni. Unai hahediba taudia ginigunadia be idia diba lasi unai gaukara be hari inai negai do ita karaia noho.
Aposetolo Edia Negai Idia Karaia Haroro Gaukara
6. Pentekoste 33 C.E. ai bona unai murinai dahaka ia vara?
6 Aposetolo edia negai, Basileia harorolaia gaukara bona hahediba taudia halaoa gaukara ese anina namona ia havaraia. Pentekoste 33 C.E. ai, Ierusalema dekenai, hahediba taudia 120 bamona be ruma ta ena atai daiutuna ta lalonai idia noho. Dirava ena lauma helaga be edia latanai ia diho, aposetolo Petero ese unai hoa karana ia harorolaia, bona taunimanima 3,000 bamona be abidadama taudia ai idia lao bona bapatiso idia abia. Unai be gaukara ena matamana sibona. Ena be dubu gunalaia taudia idia ura sivarai namona harorolaia gaukara idia koua, to “Lohiabada ese mauri ia henia taudia, be abidadama taudia edia orea lalonai ia haboua.” Daudau lasi, “abidadama taudia ibounai be 5000 bamona.” Unai murinai, “Lohiabada idia abidadama henia taudia momo herea, tatau bona hahine idia dekenai idia haboua lao.”—Kara 2:1-4, 8, 14, 41, 47; 4:4; 5:14.
7. Dahaka dainai Korenelio be ena kara ia haidaua karana be mai anina bada?
7 Lagani 36 C.E. ai, mai anina bada gauna ta ia vara—idau bese tauna Korenelio be ena kara ia haidaua bona ia bapatiso. Iehova ese aposetolo Petero be Dirava gari henia tauna Korenelio dekenai ia hakaua lao neganai, unai ese ia hahedinaraia Iesu ena hahegani, bese ibounai be hahediba taudia ai idia halaoa haheganina, be tano idauidau ai idia noho Iuda taudia sibona totona lasi. (Kara 10:44, 45) Haroro gaukara idia hakaua taudia be dahaka idia karaia? Iudea dekenai idia noho aposetolo taudia bona tau badadia idia kamonai sivarai namona be idau bese taudia dekenai do idia abia lao neganai, Dirava idia hanamoa. (Kara 11:1, 18) Unai nega ai, haroro gaukara idia karaia noho dainai Iuda taudia momo idia vareai. Lagani haida murinai, reana 58 C.E. bamona ai, idau bese abidadama taudia sibona lasi, to “Iuda taudia momo herea ese Iesu idia abidadama henia” danu.—Kara 21:20.
8. Edena dala ai sivarai namona ese taunimanima ta ta ia durua?
8 Ena be aposetolo edia negai taunimanima momo be Keristani taudia ai idia lao, to unai taudia ta ta ita laloa be namo. Idia kamonai Baibel ena sivarai be mai ena siahu. (Heberu 4:12) Sivarai namona idia abia dae taudia edia mauri ia haidaua momokani. Taunimanima ta ta be edia mauri idia haidaua, mauri matamata idia atoa, bona Dirava kahirakahira idia lao. (Efeso 4:22, 23) Hari inai nega danu be unai bamona. Bona sivarai namona idia abia dae taudia be mauri hanaihanai ena helaro namona idia abia.—Ioane 3:16.
Dirava ida Idia Gaukara Hebou Taudia
9. Keristani taudia idia laloparara edia maduna be dahaka bona unai be hahenamo ta?
9 Taunimanima momo be abidadama taudia ai idia lao dainai, Keristani taudia ginigunadia idia gwau lasi unai be edia goada dainai ia vara. Lasi, to idia laloparara lauma helaga ese idia ia durua unai gaukara idia karaia totona. (Roma 15:13, 19) Oibe, Iehova ena heduru dainai namba ia bada daekau. To, unai Keristani taudia be mai edia maduna Dirava ida do idia gaukara hebou totona, bona unai be hahenamo ta. (1 Korinto 3:6-9) Unai dainai, Iesu ena hahegani hegeregerena, idia abia gaukara idia karaia goadagoada.—Luka 13:24.
10. Keristani taudia ginigunadia haida be dahaka idia karaia bese ibounai dekenai idia haroro totona?
10 Paulo be ‘Iuda lasi taudia totona aposetolo gaukara ia karaia’ dainai, tano bona davara dekenai kilomita tausen momo ia laolao, bona Asia ena Roma provinsi bona Greek dekenai, kongrigeisen momo ia haginia. (Roma 11:13) Roma bona reana Sipania dekenai ia lao danu. Unai nega ai, Dirava ese aposetolo Petero ia abia hidi ‘Iuda taudia dekenai ia haroro’ totona, bona Babulonia dekenai ia lao, badina unuseniai Iuda taudia momo idia noho. (Galatia 2:7-9; 1 Petero 5:13) Lohiabada ena gaukara idia goadalaia hahine haida be Trupena bona Truposa. Idia gwau hahine ta ladana Peresi be “gaukara bada ia karaia vadaeni Lohiabada totona.”—Roma 16:12.
11. Iehova ese edena dala ai hahediba taudia edia hekwarahi ia hanamoa?
11 Iehova ese unai gaukara goadagoada taudia bona ma haida edia hekwarahi ia hanamoa. Iesu be bese ibounai dekenai sivarai namona harorolaia gaukara ia perovetalaia, bena lagani 30 idia hanaia murinai Paulo ia gwau “Sivarai Namona” be “tanobada ibounai dekenai ai harorolaia vadaeni.” (Kolose 1:23) Unai nega ai dokona ia ginidae, a? Oibe. Lagani 70 C.E. ai, Roma tuari taudia ese Ierusalema bona ena dubu idia hadikaia neganai, Iuda taudia edia nega ena dokona ia ginidae. To, Iehova ia hahedinaraia haroro gaukara badana ta do idia karaia guna, bena Satani ena tanobada do ia haorea momokani.
Hari Inai Nega Ena Haroro Gaukara
12. Edena dala ai Baibel Stiuden taudia ginigunadia ese haroro gaukara ena hahegani idia lalopararalaia?
12 Lagani 1900 do lasi neganai, hereva momokani negea karana be ia bada, to gabeai tomadiho goevana idia haginia lou. Baibel Stiuden taudia, unai negai Iehova ena Witnes taudia idia gaukaralaia ladana, be tanobada ibounai dekenai do idia karaia hahediba gaukara ena hahegani idia lalopararalaia. (Mataio 28:19, 20) Lagani 1914 ai, haroro gaukara idia karaia goadagoada taudia ibounai be 5,100, bona sivarai namona be tano 68 bamona dekenai ia lao vadaeni. To unai negai Baibel Stiuden taudia ginigunadia be Mataio 24:14 ena anina idia lalopararalaia lasi. Badina lagani 1900 do lasi neganai, Baibel orea ese gado idauidau dekenai Baibel idia hahanaia bona idia printaia bona tanobada ibounai dekenai idia hariharilaia. Unai dainai, lagani 1900 murinai, Baibel stiuden taudia idia laloa tanobada ibounai dekenai sivarai namona idia harorolaia vadaeni.
13, 14. Lagani 1928 ena Gima Kohorona ese Dirava ena ura dekenai, dahaka laloparara matamata ia hahedinaraia?
13 Gabeai, Iehova be ena taunimanima dekenai ena ura ia hahedinaraia. (Aonega Herevadia 4:18) December 1, 1928, ena Gima Kohorona ia gwau: “Ita gwau diba Baibel be tano momo dekenai idia hariharilaia dainai, unai ese basileia ena sivarai harorolaia gaukara ia hagugurua, a? Lasi! Ena be Baibel be tano ibounai dekenai idia hariharilaia vadaeni, to Dirava ena witnes orea maragi be buka haida idia printaia be namo Dirava ena ura idia gwauraia hedinarai, bona Baibel idia abia vadaeni taudia idia vadivadi henia totona. Badina bema unai idia karaia lasi, taunimanima do idia diba lasi Mesia Basileiana be ia gini vadaeni.”
14 Unai Gima Kohorona ma ia gwau: “Lagani 1920 ai, . . . Baibel Stiuden taudia be Iesu ena peroveta herevana Mataio 24:14 ai, idia lalopararalaia namonamo. Bena idia diba unai sivarai be tanobada ena bese ibounai dekenai do idia harorolaia. Unai sivarai be gabeai do ia mai basileiana ena sivarai lasi, to hari ia lohia vadaeni Mesia Pavapavana ena sivarai.”
15. Lagani 1920 amo, haroro gaukara be edena bamona ia bada ia lao?
15 Lagani 1920 ai ia noho “witnes orea maragina” be ia bada ia lao. Lagani haida murinai, “mamoe idaudia” edia hutuma bada herea taudia idia hedinarai bona idia haboua matamaia. (Apokalupo 7:9; Ioane 10:16) Hari, taunimanima 6,613,829 be tano 235 ai sivarai namona idia harorolaia noho. Unai peroveta herevana ia guguru momokani! Guna “Basileia ena sivarai namona” harorolaia gaukara be unai bamona idia karaia lasi. Bona hari tanobada ai Iehova ena abidadama hesiai taudia be momo herea momokani, guna bamona lasi.
16. Hesiai lagani gunana ai dahaka ita hagugurua? (Rau 27-30 itaia.)
16 Lagani 2005 ena hesiai lagani lalonai, Iehova ena Witnes taudia momo herea be idia bisi bada. Hora bilioni ta mai kahana idia haorea unai sivarai namona be tano 235 ai idia harorolaia totona. Lou henia milioni momo bona Baibel stadi milioni momo idia karaia. Unai gaukara be Iehova ena Witnes taudia ese idia karaia noho, edia nega bona kohu idia gaukaralaia Dirava ena Hereva be ma haida dekenai idia harorolaia totona. (Mataio 10:8) Iehova be iena lauma helaga amo iena hesiai taudia ia hasiahua Iena ura idia hagugurua totona.—Sekaraia 4:6.
Haroro Gaukara Lalonai Idia Gaukara Goada
17. Edena dala ai Iehova ena taunimanima be Iesu ena hereva sivarai namona harorolaia totona idia badinaia noho?
17 Ena be kahirakahira lagani 2000 idia hanaia vadaeni Iesu ia gwau sivarai namona do idia harorolaia, to Dirava ena taunimanima be unai gaukara idia karaia goadagoada noho bona idia hesiku lasi. Ita diba bema ita hekwarahi kara namo ita karaia totona, ita ese Iehova ena lalokau, hebogahisi, bona haheauka ita hahedinaraia. Ita danu ita ura lasi ta ia mase to ita ura taunimanima idia helalo-kerehai bona Dirava kahirakahira idia lao. (2 Korinto 5:18-20; 2 Petero 3:9) Iehova ena Witnes taudia be Dirava amo siahu idia abia dainai, tanobada ibounai dekenai sivarai namona idia do harorolaia noho. (Roma 12:11) Unai dainai, gabu ibounai dekenai taunimanima be hereva momokani bona Iehova ena hakaua dalana idia badinaia. Haheitalai haida mani ita laloa.
18, 19. Sivarai namona idia abia dae bona edia mauri idia haidaua taudia haida edia ekspiriens oi gwauraia.
18 Charles be biru tauna ta Kenya ena west kahana dekenai. Lagani 1998 ai, ia ese kuku ena metau kilogram 8,000 ia hoihoilaia dainai, setifiket ta ia abia, unai setifiket ia hahedinaraia ia be kuku birulaia tauna badana. Unai nega ai, Baibel ia stadilaia matamaia. Gabeai ia laloparara, kuku hoihoilaia gaukara be Iesu ena hahegani, oiemu dekena tauna do oi lalokau henia, ida ia hegeregere lasi. (Mataio 22:39) Unai dainai ia gwau ia be kuku hoihoilaia tauna namona lasi, to ia be ala-ala tauna, bona gabeai poisini muramura amo kuku ena ava ibounai ia hamasea. Lauma dalanai ia goada ia lao, ena mauri ia gwauhamatalaia bona bapatiso ia abia, gabeai regula painia ia karaia bona hesiai tauna ta ai ia lao.
19 Ita daradara lasi Iehova ese sivarai namona harorolaia gaukarana amo bese ibounai ia hamarerea noho, unai amo kohu namodia, taunimanima unai, idia vareai noho. (Hagai 2:7) Pedro, Portugal dekenai ia noho, ena mauri lagani be 13 neganai, tomadiho sikulina ta dekenai ia lao. Ia ura misinari tauna ai ia lao bona Baibel ia hadibaia. To, daudau lasi unai sikuli ia rakatania badina klasrum dekenai Baibel idia herevalaia momo lasi. Lagani 6 murinai, ia be Lisbon ena iunivesiti ta dekenai ia sikuli. Unai negai ia be ena anti, Iehova ena Witnes hahinena ta, ida ia noho bona ena anti ese Pedro ia hagoadaia Baibel ia stadilaia totona. Unai nega ai, Pedro ia diba lasi Dirava ia noho eiava lasi, bona ia daradara bema Baibel stadi ia karaia diba. Ena sikuli profesa dekenai ena daradara gauna ia hadibaia. Bona unai profesa ia gwau, sikuli ese ia hadibaia lalohadai badana ta be inai, bema ta be mai ena lalohadai rua bona abia hidi ia karaia diba lasi, ia ese sibona ena mauri ia hadikaia diba. Vadaeni, Pedro ena lalona ia hadaia Baibel stadi ia abia dae totona. Bona vanegai sibona ia bapatiso bona hari ia be mai ena Baibel stadi haida.
20. Dahaka dainai sivarai namona be tanobada ibounai dekenai ita harorolaia dainai, ita moale?
20 Ita do diba lasi inai haroro gaukara do ita karaia ena bada be edena bamona, bona dokona do ia ginidae dina bona hora danu ita diba lasi. To ita diba gauna be kahirakahira do ia ginidae. Ita moale badina sivarai namona harorolaia gaukara be tanobada ibounai dekenai idia harorolaia noho, bona unai ese ia hahedinaraia Dirava ena Basileia ese tanobada ena gavamani do ia kokia negana be kahirakahira. (Daniela 2:44) Lagani ta ta ai, taunimanima milioni momo dekenai sivarai namona idia harorolaia, bona unai ese Iehova Dirava ia hanamoa. Namona be iseda lalona ita hadaia Dirava ita abidadama henia noho bona tanobada hegegemadai iseda tadikaka ida haroro gaukarana ita karaia noho. Unai bamona ita karaia neganai, ita bona iseda hereva idia kamonai taudia be mauri do ita abia.—1 Timoteo 4:16.
Oi Laloatao, A?
• Dahaka dainai Mataio 24:14 ena peroveta herevana be hoa gauna?
• Keristani taudia ginigunadia edia haroro gaukara be edena bamona idia karaia, bona dahaka anina ia havaraia?
• Bese ibounai dekenai sivarai namona harorolaia ena hahegani be Baibel Stiuden taudia ese edena bamona idia lalopararalaia?
• Hesiai laganina gunana ai Iehova ena taunimanima edia hesiai gaukara ita laloa neganai, dahaka ese oi ia hagoadaia?
[Chart on page 27-30]
IEHOVA ENA WITNES TAUDIA EDIA HESIAI LAGANINA 2005 ENA RIPOTI
(See bound volume)
[Map/Pictures on page 25]
Paulo be tano bona davara dekenai kilomita tausen momo ia laolao sivarai namona ia harorolaia totona
[Picture on page 24]
Iehova ese Petero ia hakaua lao Korenelio bona ena ruma bese dekenai ia haroro totona