Moale Karadia Maorodia ese Ita Idia Hagoadaia
“Umui aniani o umui inuinu, o dahaka dahaka umui karaia neganai, inai gau ibounai do umui karaia Dirava hanamoa totona.”—1 KORINTO 10:31.
1, 2. Dahaka dainai ita gwau diba moale karadia be “Dirava ena harihari gauna” ta, to Baibel be dahaka sisiba ia henia?
VAIA, ita taunimanima ita ura moale karadia ita karaia. Iseda moale Diravana, Iehova, ia ura iseda mauri ita moalelaia dainai, gau momo ia henia ita moale totona. (1 Timoteo 1:11, NW; 6:17) Aonega King Solomona ia gwau: “Lau diba taunimanima edia dala namona tamona be inai: Do idia moale, bona idia edia mauri dina ibounai lalonai, kara namodia do idia karaia. Ita ibounai ese iseda gaukara ena anina do ita moalelaia, do ita aniani bona inuinu. Inai be Dirava ena harihari gauna.”—Hadibaia Tauna 3:12, 13.
2 Iseda ruma bese eiava tura namodia ida, unai bamona ita laga-ani hebou bona ita karaia gaukara namodia ita laloa neganai, moale ita davaria. Ita gwau diba unai be “Dirava ena harihari gauna.” To, namo lasi ita laloa, iseda Havaraia Tauna ese gau namodia momo ia henia dainai, nega bada be moale karadia idauidau dekenai do ita haorea. Lasi, Baibel ese inuinu kekero, aniani momo, bona lebulebu karadia ia taravatua, bona ia gwau unai gaudia idia karaia “taudia ta lasi be Dirava ena Basileia do idia davaria diba.”—1 Korinto 6:9, 10; Aonega Herevadia 23:20, 21; 1 Petero 4:1-4.
3. Dahaka ese ita do ia durua lauma dalanai ita noga noho, bona Iehova ena dina badana ita naria noho totona?
3 Inai dina gabedia lalonai, Keristani taudia be inai tanobada dikana ena kara idia dadaraia bona mai aonega ida idia noho be namo. (Ioane 17:15, 16) Peroveta herevadia hegeregerena, hari inai nega ena taunimanima be “lebulebu karadia idauidau do idia ura henia bada,” unai dainai kahirakahira do ia vara “hisihisi bada herea” ena toana idauidau idia “laloa lasi.” (2 Timoteo 3:4, 5; Mataio 24:21, 37-39) Iesu ese iena murinai idia raka taudia ia sisiba henia: “Do umui naria namonamo, aniani bona kekero muramura bona tanobada ena laloa metau momo gaudia ese emui lalona do idia guia garina, vadaeni Lohiabada ena Dina do ia mai haraga, umui hegaegae lasi garina.” (Luka 21:34, 35) Ita be tanobada taudia edia kara ita tohotohoa lasi, to ita be Dirava ena hesiai taudia dainai, ita ura Iesu ena sisiba herevana ita badinaia, bona Iehova ‘ita naria noho.’ Lauma dalanai ita noga noho, bona do ita hekwarahi Iehova ena dina badana ita laloatao noho totona.—Sepanaia 3:8; Luka 21:36.
4. (a) Dahaka dainai moale karadia namodia ita davaria be auka? (b) Efeso 5:15, 16 dekenai dahaka sisiba ia noho bona ita badinaia be namo?
4 Tanobada ena ura dikadia dadaraia be auka, badina Diabolo ese lalona veria dalanai unai gaudia ia hahedinaraia bona ita idia hamorua haraga diba. Moale karadia namodia ita davaria be ia auka, badina tanobada ena moale karadia momo be “tauanina ena ura dikadia” hauraia totona idia karaia. (1 Petero 2:11) Moale kara dikadia be murimuri sibona dekenai lasi, to ruma lalonai idia vareai diba danu, hegeregere buka, TV, Internet bona vidio gaudia amo. Unai dainai, Baibel ena aonega herevana Keristani taudia dekenai be: “Umui emui kara do umui naria namonamo. Aonega taudia bamona do umui noho, kavakava taudia bamona lasi. Harihari emui nega namona ia noho Dirava ena kara do umui karaia totona. Emui nega do umui haorea kava lasi, badina hari nega be nega dikana.” (Efeso 5:15, 16) Oibe, moale kara dikadia ese iseda lalona idia veria bona Iehova ida iseda hetura karana ia hadikaia bena ita mase diba, to bema unai ataiai sisiba ita badinaia momokani neganai, unai dika do ita dadaraia!—Iamesi 1:14, 15.
5. Edena kara amo laga-ani momokani ita abia diba?
5 Keristani taudia be edia gaukara dekenai idia bisi momo dainai, nega haida idia ura moale karadia idia karaia. Momokani, Hadibaia Tauna 3:4 ia gwau, ‘kiri be mai ena nega bona mavaru danu be mai ena nega.’ Unai ese ia hahedinaraia Baibel be moale karadia ia gwauraia dika lasi. Moale karadia ese iseda tauanina idia hagoadaia diba, to namo lasi iseda lauma dalana eiava hesiai gaukara idia hadikaia. Lo Keristani taudia idia diba ma haida dekenai gau ta henia karana ese moale bada ia mailaia. Edia mauri lalonai, Iehova ena ura idia atoa guna bona Iesu ena huaia auna idia abia dae dainai, ‘edia laumana be idia laga-ani.’—Mataio 11:29, 30; Kara 20:35.
Moale Kara Maorodia Abia Hidi
6, 7. Dahaka ese oi do ia durua bena oi diba edena moale karana be namo bona edena be dika?
6 Vadaeni, edena bamona do ita diba edena moale karadia be Keristani taudia ese idia karaia diba? Tama sina ese natudia totona moale karadia idia abia hidi bona elda taudia edia heduru idia noia diba. To momokani, namo lasi ma ta ese ita ia hamaoroa edena buka, muvini piksa, gadara, mavaru eiava ane be namo eiava dika. Paulo ia gwau, lo taudia be “idia sibona ese edia lalona idia hadibaia lou, hadibaia lou, ela bona idia manada vadaeni. Unai neganai idia be maoro bona kerere edia toana idia diba namonamo.” (Heberu 5:14; 1 Korinto 14:20) Baibel lalonai hakaua herevadia idia noho bona oiemu lalomamina be Dirava ena Hereva amo oi hadibaia bona oi kamonai henia neganai, unai ese oi do ia durua.—1 Timoteo 1:19.
7 Iesu ia gwau au “huahua dekena amo au do umui diba.” (Mataio 12:33) Bema moale karana ta ese dagedage, matabodaga, eiava meamea karadia karaia urana ia habadaia, ita dadaraia be namo. Bema moale karana ta ese ta ia hamasea diba eiava ta ia haberoa, eiava ta ena moni ia haorea eiava lalohisihisi ia havaraia, eiava ta ia hahekwakwanaia, unai moale karana be dika. Aposetolo Paulo ese ita ia sisiba henia ia gwau, bema iseda tadikaka ena lalomamina ita hadikaia, ita be kara dika ita karaia unai. Ia gwau: “Oiemu Keristani varavara tauna dekenai oi kara dika, bona iena lalona manoka oi habadaia neganai, oi be Keriso danu oi hadikaia. Momokani lau gwau, bema aniani ese lauegu varavara ia hakaua kara dika lalonai, lau be vamu do lau ania lasi ela bona hanaihanai, lauegu varavara tauna do lau hadikaia garina.”—1 Korinto 8:12, 13.
8. Vidio bona kompiuta gadara edia dika be dahaka?
8 Sitoa lalodiai vidio eiava kompiuta gadara be momo herea. Haida be namo bona oi moalelaia diba, to unai bamona gadara momo lalodiai Baibel ese ia taravatua gaudia idia karaia. Bema vidio eiava kompiuta gadara lalonai tau ta ese ma haida ia haberoa bona hamasea eiava matabodaga karana ta ia karaia—unai be gadara dikana! Iehova be “dagedage taudia” ia inai henia. (Aonega Herevadia 3:31; Salamo 11:5; Kolose 3:5, 6) Bema unai gadara ta ese mataganigani bona heai ia havaraia, emu hemami ia hadikaia bona nega bada ia haorea, namona be oi diba emu lauma dalana ia hadikaia diba. Unai ia vara lasi totona, karaharaga kara ta oi karaia be namo.—Mataio 18:8, 9.
Dala Maorona ai Moale Karadia Karaia
9, 10. Aonega taudia ese edena moale karadia idia karaia diba?
9 Nega haida Keristani taudia idia henanadai: “Edena moale karadia be Keristani taudia ese idia karaia diba? Tanobada ena moale karadia momo be Baibel ena taravatu idia utua.” Ita moalelaia diba moale karadia namodia idia noho, to do ita laloa namonamo bona palani ita karaia be namo. Tama sina ese unai do idia karaia be namo. Momo be edia ruma bese bona kongrigeisen turadia ida idia moale hebou. Idia aniani bona dina ai idia karaia gaudia eiava Baibel ena sivarai ta idia kikilaia hebou karana ese idia ia hagoadaia bona hamoalea. Davara dekenai digudigu, kone dekenai gadara bona aniani, eiava ororo gabudia dekenai loaloa karadia umui hegaegaelaia diba. Unai bamona karadia do umui moalelaia bada.
10 Elda tauna, mai ena adavana bona natudia toi, ia gwau: “Emai natudia be do maragi neganai, edena gabu do ai lao loaloa idia abia hidi danu. Nega haida natudia ta ta be edia turana namona ta idia boiria mai diba, unai idia karaia neganai, edia loaloa idia moalelaia bada. Bona, emai natudia edia mauri lalonai idia vara mai anina bada gaudia ai laloatao danu. Nega haida emai varavara bona kongrigeisen turadia be emai ruma dekenai ai boiridia mai. Lahi dekenai aniani ai nadua bona gadara haida ai karaia. Motuka amo gabu haida dekenai ai lao bona ororo dekenai ai loaloa, unai bamona negadia ai Iehova ese ia havaraia gaudia idauidau ai dibaia.”
11, 12. (a) Moale karadia oi karaia neganai, daika oi boiria diba? (b) Momo ese edena moale karadia idia laloaboio lasi?
11 Oi sibona eiava emu ruma bese be moale karana ta umui karaia neganai, ma haida umui boiria diba, a? Dala namona be ma haida hegeregere vabu, headava lasi taudia, eiava tama eiava sina sibona ruma bese taudia umui hagoadaia totona. (Luka 14:12-14) Reana, orea lalonai idia vareai matamata taudia haida umui boiria diba, to umui naria namonamo ma haida idia veria kerere garina. (2 Timoteo 2:20, 21) Bema idia gorere taudia be idia raka diba lasi, reana aniani umui nadua bona edia ruma dekenai umui aniani hebou diba.—Heberu 13:1, 2.
12 Momo be turadia ida idia aniani hebou bona edena bamona Iehova ena orea lalonai idia vareai bona dahaka ese ia durudia Dirava idia badinaia goada noho sivarai idia kikilaia karana idia moalelaia. Idia lao taudia ibounai, natudia danu, be Baibel sivaraidia umui kikilaia diba, ta be do ia hemarai lasi, to ta ta do umui hagoadaia diba.
13. Edena dala ai Iesu bona Paulo ese heabidae karana idia hahedinaraia bona abia dae?
13 Heabidae karana hahedinaraia bona ma haida edia heabidae karana abia dae dalana be Iesu ese ia haheitalaia namo herea. Unai bamona negadia ai lauma gaudia ia herevalaia. (Luka 5:27-39; 10:42; 19:1-10; 24:28-32) Iena hahediba taudia ginigunadia ese iena haheitalai idia tohotohoa. (Kara 2:46, 47) Aposetolo Paulo ia gwau: “Lau ura bada umui lau itaia gwauraia, bona umui dekenai Lauma Helaga ena hanamoa do lau henia, vadaeni Lauma ena goada do umui abia. Anina be inai bamona: Lau ura umui emui abidadama ese ia durua lau, bona lauegu abidadama ese ia durua umui. Inai bamona be goada ita abia nega tamona.” (Roma 1:11, 12) Unai hegeregerena, iseda moale heboudia ai lauma dalanai ta ta ita durua bona hagoadaia be namo.—Roma 12:13; 15:1, 2.
Sisiba Bona Hadibaia Herevadia
14. Dahaka dainai moale karadia ita karaia neganai, hutuma idia mai be namo lasi?
14 Moale karadia ita karaia neganai, namo lasi taunimanima momo ita boiria, badina idia ibounai ita naria be hegeregere lasi. Hebou lasi negadiai, ruma bese haida idia gadara eiava piknik idia karaia hebou. Moale heboudia ai elda, hesiai taudia eiava lo taudia idia noho neganai, idia ese haida idia hagoadaia bona ibounai ese namo idia davaria diba.
15. Dahaka dainai emu ruma ai haida oi boiria neganai, oi naridia namonamo be gau badana?
15 Moale karadia ita karaia neganai, unai hebou idia hegaegaelaia taudia ese ibounai do idia naria be namo. Bema emu ruma dekenai haida oi boiria mai, to gau ta oi naria namonamo lasi dainai, hekwakwanai ta ia vara, do oi lalohisihisi, ani? Deuteronomi 22:8 ena hakaua herevana mani ita laloa. Israela tauna be ruma matamatana ia haginia neganai, ena guhi dekenai magu maragina do ia karaia danu, badina ma haida ia boiria neganai, unuseniai do idia helai. Dahaka dainai unai bamona ia karaia? “Emui ruma guhi dekena amo tau ta do ia moru garina, bona iena mase be emui kerere garina.” Unai hegeregerena, ena be taravatu aukadia oi atoa lasi, to vadivadi taudia edia namo—tauanina bona lauma dalanai—oi laloa dainai, taravatu haida umui badinaia be namo.
16. Kekero muramura idia atoa neganai, edena dala ai aonega karana idia hahedinaraia diba?
16 Bema moale hebouna ta dekenai kekero muramura idia atoa, aonega dalanai idia naria be namo. Keristani taudia momo be kekero muramura idia atoa bema idia sibona ese idia naria bona edia vadivadi taudia dekenai idia henia. Namo lasi umui atoa kekero muramura ese haida ia hahekwakwanaia eiava haida ia veria idia kekero totona. (Efeso 5:18, 19) Badina haida dainai vadivadi turadia haida be kekero muramura do idia dadaraia. Gabu momo dekenai gavamani ena taravatu be edia mauri lagani ia bada taudia sibona idia inuinu diba. Reana haida idia laloa ia be taravatu aukana, to Keristani taudia ese unai taravatu idia badinaia be maoro.—Roma 13:5.
17. (a) Dahaka dainai heabidae tauna ese miusiki ia abia hidi namonamo be gau badana? (b) Bema idia mavaru, edena dala ai hemataurai idia hahedinaraia be namo?
17 Bema miusiki, mavaru, eiava moale karana do idia karaia, heabidae tauna do ia itaia unai gaudia be Keristani hakaua herevadia ida idia hegeregere be namo. Hari inai negai, miusiki be momo herea, bona taunimanima ese miusiki idauidau idia ura henia. To, inai nega ena miusiki momo be kamonai lasi, dagedage bona matabodaga karadia idia anelaia. Miusiki ita abia hidi namonamo be gau badana. Ai gwau lasi metairametaira idia ane miusiki sibona ita gadaralaia. Lasi, miusiki ma haida ita gadaralaia diba. To, ita ura lasi mavaru dikadia eiava hereva dikadia idia gwauraia ane ita gadaralaia bona ena regena ita habadaia. Namo lasi miusiki ena regena ia habadaia momokani tauna ese miusiki ia naria. Hemataurai lasi dalanai edia koekoena idia davea eiava edia ratana idia hamarerea mavaru dalana be maoro lasi Keristani taudia totona.—1 Timoteo 2:8-10.
18. Tama sina ese edena dala ai edia natudia edia moale karadia idia naria diba?
18 Keristani tama sina be edia natudia ese idia lao henia pati dekenai do idia karaia gaudia idia diba be namo. Bona aonega dalana be idia ese natudia idia bamoa. Madi, tama sina haida be ta ese ia naria lasi pati dekenai edia natudia idia siaia bona haida be matabodaga eiava kara dika haida lalonai idia moru. (Efeso 6:1-4) Edia mauri lagani be 13 ia 19 natudia haida be kara maoromaoro idia badinaia, to vaia, do ita durudia noho “uhau edia lebulebu karadia” idia dadaraia totona.—2 Timoteo 2:22.
19. Iseda mauri lalonai dahaka ita “tahua guna” be mai anina bada bona dahaka dainai?
19 Nega ta ta ai moale karadia ita karaia ese ita ia hagoadaia bona hamoalea diba. Iehova be ita amo unai kara ia koua lasi, to ita diba moale karadia ese ita idia durua lasi guba dekenai lauma kohu ita haboua totona. (Mataio 6:19-21) Iesu ese iena hahediba taudia ia hadibaia mai anina bada gauna edia mauri lalonai be ‘Dirava ena Basileia bona iena kara maoromaoro do idia tahua guna.’ Namo lasi ita ese aniani, inuinu gaudia eiava dabua ita tahua guna badina, “bese idauidau taudia ese unai gau ibounai idia tahua noho.”—Mataio 6:31-34.
20. Iehova idia abidadama henia hesiai taudia ese dahaka gau namodia idia naria noho?
20 Oibe, herevana ‘ita aniani o ita inuinu, o dahaka dahaka ita karaia, inai gau ibounai do ita karaia Dirava ita hanamoa’ bona ita tanikiu henia totona, badina Ia ese ita moalelaia gau namodia ibounai ia henia. (1 Korinto 10:31) Kahirakahira do ia vara Paradaisona lalonai, Iehova ena hariharibada karana dainai, iena kara maoromaoro idia badinaia tadikaka bona taihu namodia ida do ita moale hebou.—Salamo 145:16; Isaia 25:6; 2 Korinto 7:1.
Oi Laloatao, A?
• Dahaka dainai hari Keristani taudia ese moale karadia namodia idia karaia be auka?
• Keristani ruma bese haida ese edena moale karadia idia moalelaia hebou?
• Moale heboudia umui karaia neganai, edena sisiba bona hadibaia herevadia umui laloatao be namo?
[Picture on page 24]
Namo ia havaraia moale karadia abia hidi
[Pictures on page 25]
Keristani taudia ese edena bamona moale karadia idia dadaraia?