Duahia Taudia Edia Henanadai

Dahaka dainai aposetolo Paulo ia gwau, kongrigeisen lalonai hahine ese “hereva do idia gwauraia lasi”?

Paulo be Korinto dekenai ia noho Keristani kongrigeisen ia tore henia neganai, ia gwau: “Ekalesia ena hebou lalonai hahine taudia ese hereva do idia gwauraia lasi. Ekalesia hebou ibounai lalonai Dirava ena taudia ese inai bamona idia karaia.” (1 Korinto 14:​33, 34) Paulo ena sisiba ita lalopararalaia totona, namona be 1 Korinto karoa 14 ena hereva ita tahua.

Unai karoa lalonai Paulo ese Keristani kongrigeisen ena hebou haheaua dalana ia herevalaia. Ia be hebou negadiai dahaka do idia gwauraia bona hebou idia hakaua daladia ia herevalaia. (1 Korinto 14:​1-6, 26-34) Ma danu, ia hahedinaraia Keristani heboudia ita karaia ena badina badana be kongrigeisen “taudia do idia hagoadaia.”​—⁠1 Korinto 14:​4, 5, 12, 26.

Korinto Ginigunana karoa 14 lalonai, Paulo ena sisiba, “hereva do idia gwauraia lasi,” be nega toi ia hedinarai. Unai sisiba be kongrigeisen lalonai orea toi dekenai ia gwauraia, to unai sisiba ia henia ena badina tamona be​—⁠‘gaukara ibounai do idia karaia namonamo, dala maorona ai.’​—⁠1 Korinto 14:⁠40.

Paulo ese ia gwauraia gau ginigunana be: “Bema haida be idau momokani gadodia idia ura gwauraia neganai, rua o toi sibona do idia karaia, toi hanaia lasi. Edia nega, edia nega dekenai do idia hereva, nega tamona lasi. Bona tau ta ese ta ta edia hereva ena anina do ia hedinaraia. To bema idau momokani gadodia hereva anina hanaia tauna be lasi neganai, unai idau momokani gadodia hereva tauna be hebou lalonai do ia hereva lasi. Ia be iena lalona dekenai sibona do ia hereva, bona Dirava dekenai danu sibona do ia hereva henia, regena lasi.” (1 Korinto 14:​27, 28) Ia gwau lasi hebou ibounai dekenai do ia hereva lasi, to ena anina be nega ibounai ia sibona ese hereva do ia gwauraia lasi, to namona be ena nega korikori ai ia hereva. Paulo ena hereva ena anina korikorina be ta ta do idia hagoadaia heheni, to unai bamona do ia vara lasi bema ia herevalaia gado be ta ia lalopararalaia lasi.

Paulo ese ia herevalaia gau iharuana be: “Dirava ena hereva gwauraia taudia rua o toi do idia hereva. Vadaeni hebou taudia oredia ese edia hereva do idia laloa karaia. To bema helai tauna ta dekenai Dirava ese hereva ta ia hedinarai henia neganai, ia hereva noho tauna ese iena hereva do ia hadokoa.” Unai ena anina be peroveta tauna ginigunana do ia hereva diba, to nega ibounai ia sibona do ia hereva lasi. Ta ta ena nega ena nega ai do idia hereva. Ia matahanai tauna ese hebou taudia vairanai Dirava ena hereva do ia gwauraia hedinarai bona idia ibounai ese “goada do idia davaria”​—⁠hebou ena badina be unai.​—⁠1 Korinto 14:​26, 29-31.

Paulo ese ia herevalaia gau ihatoina be Keristani hahine sibona dekenai ia gwauraia: “Ekalesia ena hebou lalonai hahine taudia ese hereva do idia gwauraia lasi. Ekalesia hebou ibounai lalonai Dirava ena taudia ese inai bamona idia karaia.” (1 Korinto 14:34) Dahaka dainai Keristani hahinedia be Paulo ese unai bamona ia sisiba henidia? Kongrigeisen lalonai gaukara do ia heau namonamo totona. Ia gwau: “Bema gau ta idia ura diba neganai, edia ruma dekenai hahine ese edia adavana idia nanadaia be namo. Badina be hahine bema hebou lalonai ia hereva, inai be maoro lasi.”​—⁠1 Korinto 14:⁠35.

Reana kongrigeisen lalonai idia gwauraia herevadia be taihu haida ese idia hepapahuahulaia. Unai dainai, Paulo ena sisiba ese taihu taudia ia durua heiriheiri karana idia dadaraia bona mai manau ida Iehova ese tau dekenai ia henia kwara dagina idia matauraia. (1 Korinto 11:⁠3) Hebou dekenai taihu idia hereva lasi karana ese ia hahedinaraia idia ura lasi kongrigeisen lalonai hadibaia gaukarana ena dagi idia abia. Paulo ese Timoteo ia tore henia neganai, ia hahedinaraia kongrigeisen lalonai hahine ese hadibaia gaukarana ena dagi idia abia be maoro lasi, ia gwau: “Hahine lau taravatua inai, idia ese tatau do idia hadibaia lasi, o gunalaia lasi. Hereva momo lasi danu do idia noho.”​—⁠1 Timoteo 2:⁠12.

Unai ena anina be kongrigeisen hebou lalonai Keristani hahine be do idia hereva lasi, a? Lasi. Paulo ena negai, Keristani hahine haida be Iehova ena lauma helaga ese ia horodia dainai, kongrigeisen dekenai idia guriguri eiava peroveta herevadia idia gwauraia hedinarai. Unai bamona negadiai, edia hemataurai toana idia hahedinaraia totona, edia kwarana idia koua.a (1 Korinto 11:⁠5) Paulo ena negai bona hari, Baibel ese Keristani hahine bona tatau ia hagoadaia edia abidadama be haroro gaukara negadiai idia gwauraia hedinarai totona. (Heberu 10:​23-25) Haroro gaukara dekenai sibona lasi, to kongrigeisen hebou ai edia haere karana amo edia abidadama idia hahedinaraia bona haida idia hagoadaia, bona Hesiai Hebou ena kahana haida dekenai haheitalai idia karaia eiava Haroro Sikuli lalonai tok idia henia karana amo unai idia karaia danu.

To, Keristani hahine ese tadikaka edia maduna idia abia lasi bona kongrigeisen dekenai hadibaia gaukarana idia gunalaia lasi. Kongrigeisen lalonai hadibaia gaukara idia karaia tadikaka edia hereva idia hepapahuahulaia lasi. Keristani hahine be mai hemataurai ida edia maduna idia huaia neganai, kongrigeisen heboudia lalonai maino ia noho bona gau ibounai idia karaia ‘hebou taudia idia hagoadaia bona durua totona.’​​—⁠1 Korinto 14:​26, 33.

[Footnote]