Tomadiho Koikoi Dadaraia!
“Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri.”—2 KORINTO 6:17.
1. Kudou-maoro taudia momo be dahaka idia diba be namo?
KUDOU-MAORO taudia momo be Dirava ena sivarai momokani bona vaira negai taunimanima dekenai dahaka do ia vara, idia diba lasi. Unai dainai idia daradara bada. Taunimanima milioni momo be Dirava idia habadua karadia, hegeregere lalohadai koikoidia, sene karadia, bona moale karadia idauidau ese edia mauri ia biagua. Oibe, reana emu dekena taudia eiava varavara be hel lahina, toi tamona Diravana, ia mase diba lasi soulina bona hahediba hereva koikoi ma haida idia abia dae.
2. Tomadiho gunalaia taudia ese dahaka idia karaia, bona unai dainai dahaka ia vara?
2 Dahaka dainai taunimanima momo be Dirava idia diba lasi? Badina tomadiho idauidau bona edia gunalaia taudia ese Dirava ena lalohadai idia hadibaia lasi. (Mareko 7:7, 8) Unai dainai taunimanima momo idia koia bona idia laloa Dirava momokani idia tomadiho henia, to ia hedinarai goevagoeva idia ese Dirava idia habadua. Madi, unai kara dainai tomadiho koikoi be mai ena kerere badana.
3. Tomadiho koikoi ia durua tauna badana be daika, bona Baibel ese ia be edena bamona ia gwauraia?
3 Ita itaia diba lasi lauma tauna ta ese tomadiho koikoi ia durua. Paulo ese unai tauna ia herevalaia neganai, ia gwau: “Inai tanobada ena dirava ese edia lalona ia koua, dibura dekena amo. Vadaeni Keriso ena hairaina bona iena Sivarai Namona ena diari idia itaia diba lasi. Keriso be Dirava ena toana momokani Tauna.” (2 Korinto 4:4) “Inai tanobada ena dirava” be Satani Diabolo. Ia be tomadiho koikoi gunalaia tauna badana. Paulo ia gwau: “Satani sibona ese iena kara ia senisia diba, bona ia ese diari aneruna ena kopina ia atoa diba. Unai dainai Satani ena hesiai taudia, bema edia kara idia senisia, bona taunimanima edia vairanai idia be kara maoromaoro taudia bamona, inai be hoa gauna, a?” (2 Korinto 11:14, 15) Satani ese gau dikadia edia toana ia hahairaia bona koikoi herevadia amo taunimanima ia koidia.
4. Peroveta koikoi taudia dekenai Mose ena Taravatu be dahaka?
4 Unai dainai Baibel ese tomadiho koikoi ia gwauraia dika! Hegeregere, Mose ena Taravatu ese Dirava ena abia hidi besena ia hadibaia, peroveta koikoi taudia dainai do idia naria namonamo. Bema tau ta ese koikoi herevadia ia hadibaia eiava kaivakuku ia tomadiho henia, ‘Dirava ia kamonai henia lasi’ dainai, ia do idia “alaia mase.” Dirava ese Israela taudia ia oda henia ‘kara dika be edia huanai amo do idia kokia.’ (Deuteronomi 13:1-5) Oibe, Iehova dekenai tomadiho koikoi be gau dikana.—Esekiela 13:3.
5. Hari inai negai, dahaka hadibaia hereva ita badinaia be gau badana?
5 Iesu Keriso bona ena aposetolo taudia ese Iehova ena lalohadai tomadiho koikoi taudia dekenai idia hahedinaraia. Iesu ese ena hahediba taudia ia hamaorodia: “Umui naria namonamo, peroveta koikoi taudia garina. Idia mai noho, edia toana be mamoe bamona, to edia lalona be uda sisia dagedage bamona.” (Mataio 7:15; Mareko 13:22, 23) Paulo ia gwau, “Dirava ena badu guba dekena amo ia diho mai noho, taunimanima edia kara dikadia bona edia kerere ibounai dainai. Edia kara dika dekena amo, idia ese Dirava ena hereva momokani taunimanima do idia diba dalana idia koua noho.” (Roma 1:18) Keristani taudia momokanidia ese unai hadibaia hereva idia badinaia be gau badana, bona Baibel ena hereva momokani ia hadibaia lasi tauna, eiava hahediba koikoi ia hadibaia tauna amo idia gini siri!—1 Ioane 4:1.
“Babulonia Badana” Heautania
6. Baibel ese “Babulonia badana” be edena bamona ia gwauraia?
6 Baibel bukana Apokalupo ese tomadiho koikoi ia gwauraia dalana mani ita laloa. Laulau dalanai, ia kekero ariara hahinena ta ia gwauraia, ia ese basileia momo bona taunimanima ia biagua. Unai hahine be king momo ida matabodaga karadia ia karaia bona Dirava idia tomadiho henia taudia edia rara bada ia inua dainai ia kekero. (Apokalupo 17:1, 2, 6, 18) Iena baguna latanai ladana ta idia torea bona unai ladana ia abia be maoro, badina unai ese ena kara bodagana ia hahedinaraia. Unai ladana be, “Babulonia badana, ariara hahine ibounai bona tanobada ena kara mirodia ibounai edia sinana.”—Apokalupo 17:5.
7, 8. Tomadiho koikoi be edena dala ai matabodaga ia karaia, bona unai dainai dahaka ia vara?
7 Baibel ese Babulonia Badana ia gwauraia dalana amo ia hedinarai, ia be tanobada ena tomadiho koikoi ibounai ia laulaulaia. Ena be tomadiho tausen momo be tanobada hegegemadai orea tamona bamona idia noho lasi, to edia ura bona kara be tamona. Apokalupo bukana ese ia gwauraia ariara hahinena hegeregerena, tomadiho koikoi ese gavamani ia biagua. Ia be ena headava gwauhamatana ia badinaia lasi hahinena ta bamona, ia matabodaga, anina be politikol orea idauidau danu ia gaukara hebou. Hahediba tauna Iamesi ia gwau: “Umui be headava kara ena taravatu umui makohia noho taudia bamona. Umui diba lasi, a, bema umui ura tanobada danu umui turana karaia neganai, inai be umui ese Dirava umui tuari henia noho?”—Iamesi 4:4.
8 Tomadiho koikoi bona gavamani idia gaukara hebou karana dainai, taunimanima ese hisihisi bada idia davaria. Africa ena politikol tauna ta ia gwau, “histori lalonai, tomadiho bona gavamani idia gaukara hebou dainai, taunimanima milioni momo idia mase.” Vanegai ena niuspepa ta ia gwau: “Hari taunimanima momo herea idia mase bona tuari badadia idia vara, . . . ena badina be tomadiho dainai.” Tomadiho ese ia durua tuari momo lalonai, taunimanima momo ese edia mauri idia haboioa. Babulonia Badana ese Dirava ena hesiai taudia ia hamasedia, laulau dalanai ia be edia rara amo ia kekero.—Apokalupo 18:24.
9. Iehova ese tomadiho koikoi ia inai henia karana, be Apokalupo bukana ese edena bamona ia gwauraia?
9 Vaira negai Babulonia Badana dekenai do ia vara gauna amo ita itaia diba, Iehova ese tomadiho koikoi ia inai henia momokani. Apokalupo 17:16 ia gwau: “Dagedage gauna mai ena doana 10, oi itaia vadaeni gaudia, ese ariara hahine do idia badu henia. Do idia hadikaia momokani, iena dabua do idia kokia, kopina kavakava do idia rakatania. Vadaeni iena tauanina do idia ania, bona lahi dekenai do idia gabua.” Gau ginigunana be, dagedage gauna ese ia do ia hamasea bona ena tauanina do ia ania. Unai murinai, dagedage gauna ese idia ania lasi gaudia be lahi dekenai do idia gabua. Unai hegeregerena, kahirakahira Dirava ese tanobada ena gavamani do ia gaukaralaia tomadiho koikoi do ia hadikaia ore totona. (Apokalupo 17:17) Babulonia Badana, tanobada ena tomadiho koikoi ibounai be do idia hadikaia ore bona ‘taunimanima ese ia do idia itaia lou lasi.’—Apokalupo 18:21.
10. Tomadiho koikoi be edena bamona ita laloa be namo?
10 Tomadiho momokani taudia ese Babulonia Badana be edena bamona idia laloa be namo? Baibel ese ia hahedinaraia goevagoeva, ia gwau: “Lauegu orea taudia e, ia dekena amo do umui raka siri, ia danu do umui kara dika hebou garina, bona ia danu panisi do umui abia hebou garina!” (Apokalupo 18:4) Namona be mauri idia ura abia taudia be nega ia do noho lalonai, tomadiho koikoi idia rakatania be gau badana. Iesu Keriso be tanobada dekenai ia noho neganai, ia gwau nega dokonai momo be edia uduna sibona amo do idia gwau ia idia badinaia. (Mataio 24:3-5) Unai bamona taudia dekenai do ia gwau: “Umui be lau diba lasi momokani. Idau gabuna dekenai umui lao, umui dika karaia taudia.” (Mataio 7:23) Hari ia lohia noho tauna, Iesu Keriso, be tomadiho koikoi ia dadaraia momokani.
Edena Dala ai Tomadiho Koikoi Ita Dadaraia Diba?
11. Tomadiho koikoi ita dadaraia totona, dahaka ita karaia be namo?
11 Keristani taudia momokanidia ese tomadiho koikoi bona ena hahediba hereva koikoidia idia dadaraia. Anina be Dirava bona ena Hereva idia hadibaia kerere taudia edia tomadiho program idauidau, reidio amo ita kamonai lasi, eiava televisen dekenai ita itaia lasi, bona edia buka danu ita duahia lasi. (Salamo 119:37) Danu, tomadiho koikoi ida idia gaukara hebou orea ta, ese ia hegaegaelaia moale hebouna ta dekenai ita lao lasi. Ita ura lasi dala ta ai tomadiho koikoi ita durua. (1 Korinto 10:21) Badina unai ese ita do ia gimaia, bena ‘tau ta ese taunimanima edia aonega hereva kava amo ita do ia koia lasi. Inai bamona hereva be sene taudia edia kara, bona tanobada idia gunalaia lauma dikadia dekena amo idia mai, Keriso dekena amo lasi.’—Kolose 2:8.
12. Tau ta be edena bamona ia hahedinaraia ia be tomadiho koikoi ia rakatania?
12 Bema ta ia ura Iehova ena Witnes tauna ai ia lao, to ena ladana be tomadiho koikoi lalonai ia do noho, be edena bamona? Nega momo, ta ese dubu amo ia doko revarevana do ia siaia, unai amo ia hamomokania ia be unai dubu tauna lasi. Gau badana be unai tauna ese tomadiho koikoi edia hahediba hereva koikoi ibounai ia dadaraia momokani. Namona be dubu taudia bona taunimanima dekenai ia hahedinaraia, hari ia be unai dubu tauna ta lasi.
13. Tomadiho koikoi dadaraia karana dekenai, Baibel ese dahaka sisiba ia henia?
13 Aposetolo Paulo ia gwau: “Dirava idia abidadama henia lasi taudia danu do umui hakapua tamona lasi. Badina be edena bamona kara maoromaoro bona kara kerere idia turana diba? Edena bamona diari bona dibura idia noho hebou diba? Keriso bona Satani be edena bamona idia laloa tamona diba? Abidadama tauna bona abidadama lasi tauna ruaosi be idia hegeregere diba, a? Dirava ena dubu helaga bona kaivakuku be edena bamona idia hakapua tamona diba? . . . Unai dainai Lohiabada ma ia hereva, ia gwau: ‘Umui ese idia do umui rakatania, bona idia dekena amo do umui parara. Miro gaudia ibounai dekena amo do umui raka siri, vadaeni umui do lau abia dae.’ ” (2 Korinto 6:14-17) Unai hereva ita badinaia neganai, tomadiho koikoi amo ita gini siri. Paulo ena sisiba herevana dainai tomadiho koikoi taudia ita dadaraia danu, a?
‘Mai Aonega Danu Do Umui Raka’
14. Tomadiho koikoi taudia ita dadaraia momokani be namo, a? Gwauraia hedinarai.
14 Tomadiho momokani taudia ese tomadiho koikoi taudia idia dadaraia momokani be namo, a? Ita inai henidia badina idia be iseda abidadama tamona lasi taudia, a? Haere be lasi. Taravatu badana iharuana be: “Oiemu badibadinai tauna dekenai oi lalokau henia, oi sibona oi lalokau henia bamona.” (Mataio 22:39) Iseda dekena taudia dekenai Basileia ena sivarai namona ita harorolaia neganai, ita hahedinaraia idia ita lalokau henia. Unai sibona lasi, to idia ida Baibel ita stadilaia bona ita hadibaia tomadiho koikoi idia dadaraia neganai, lalokau ita hahedinaraia danu.
15. Ita be “tanobada ena lasi” ena anina be dahaka?
15 Ena be iseda dekena taudia dekenai sivarai namona ita harorolaia, to ita be Iesu ena murinai ita raka taudia dainai, ita be “tanobada ena lasi.” (Ioane 15:19) Inai hereva “tanobada,” ese Dirava amo ia daudau tanobada besena ia herevalaia. (Efeso 4:17-19; 1 Ioane 5:19) Ita be tanobada amo ita idau, anina be inai tanobada ena lalohadai, hereva bona kara, Iehova idia habadua karadia unai, ita dadaraia. (1 Ioane 2:15-17) Danu Baibel ena hakaua hereva ia gwau: “Kara dika taudia danu umui turana karaia neganai, idia ese emui kara namona do idia hadikaia.” Unai dainai, Keristani taravatudia idia badinaia lasi taudia ita tura henidia lasi. (1 Korinto 15:33) Ita be tanobada ena lasi anina be, ‘tanobada ena kara mirodia dekena amo do ita raka siri.’ (Iamesi 1:27) Unai dainai, ena be ita be tanobada amo ita idau, to unai ese ia hahedinaraia lasi taunimanima ita dadaraia bona ita hereva henidia lasi.—Ioane 17:15, 16; 1 Korinto 5:9, 10.
16, 17. Keristani taudia ese Baibel ena hereva momokani idia diba lasi taudia be edena bamona idia kara henia be namo?
16 Vadaeni, Baibel ena hereva momokani idia diba lasi taudia be edena bamona ita kara henidia be namo? Paulo ese Kolose kongrigeisen ia tore henia, ia gwau: “Keriso idia do abidadama henia lasi taudia edia vairana dekenai, kara namodia mai aonega danu do umui karaia. Bona umui dekenai nega ia noho gauna do umui gaukaralaia namonamo. Nega ibounai mai laloa namona bona mai gado namo do umui hereva. Bona taunimanima ta ta dekenai do umui haere henia mai maoromaoro danu.” (Kolose 4:5, 6) Aposetolo Petero ia gwau: “Emui kudouna dekenai Keriso do umui abia dae, do umui matauraia, bona ia tamona emui Lohiabada do umui halaoa. Bema haida ese emui abidadama bona lalona namo totona umui idia nanadaia neganai, nega ibounai do umui naria hegaegae noho, idia do umui haere henia totona. To mai mataurai bona manau danu do umui haere.” (1 Petero 3:15) Paulo ese Keristani taudia ia sisiba henia, “idia ese tau ta do idia gwauraia dika lasi, bona do idia heai lasi, to do idia manau. Nega ibounai taunimanima ibounai dekenai manada kara do idia karaia.”—Tito 3:2.
17 Ita be Iehova ena Witnes taudia dainai, ita ura lasi ma haida ita badu henia eiava ita hekokoroku. Bona namo lasi tomadiho ma haida dekenai idia lao taudia ita gwauraia dika. Ena be ita haroro henia tauna, dekena tauna, eiava gaukara turana ia badu eiava hereva dikadia ia gwauraia, to namona be dala namona ai ia ita hereva henia.—Kolose 4:6; 2 Timoteo 2:24.
“Hereva Momokani Do Oi Badinaia Noho”
18. Tomadiho koikoi dekenai idia giroa lou taudia edia lauma dalana be edena bamona?
18 Bema ta be Baibel ena hereva momokani ia diba murinai, tomadiho koikoi dekenai ia giroa lou, unai be dika momokani! Baibel ese unai ena dika ia herevalaia neganai, ia gwau: “Momokani, taunimanima momo ese iseda Lohiabada bona Hamauria Tauna Iesu Keriso idia diba dainai, tanobada ena miro dekena amo idia roho mauri vadaeni. To unai taudia bema unai miro karadia dekenai ma idia giroa lou neganai, idia be edena bamona? Madi, edia dika gunana be maragi, to edia dika, gabeai gauna, be bada. . . . Inai kara idia karaia, ena anina be aonega hereva momokani rua bamona, idia gwau: ‘Sisia be iena mumuta dekenai ma ia giroa lao noho, bona Boroma be idia huria, to kopukopu dekenai ma ia giroa lou.’ ”—2 Petero 2:20-22.
19. Dahaka dainai lauma dalanai ita idia hadikaia gaudia dekenai ita naria namonamo be gau badana?
19 Lauma dalanai ita idia hadikaia diba gaudia be momo, unai dainai namona be ita naria namonamo. Aposetolo Paulo ia gwau: “Lauma Helaga ese ia gwauraia hedinarai vadaeni, nega gabeai tau haida ese Iesu badinaia kara do idia rakatania, lauma koikoidia do idia kamonai henia, bona lauma dikadia edia hadibaia hereva do idia abia dae.” (1 Timoteo 4:1) Ita be ‘nega gabedia’ lalonai ita noho. Tomadiho momokani idia dadaraia lasi taudia “be vanagi bamona, bona unai koikoi hereva be lai bamona, idia ia doria lao, doria mai, vadaeni idia hure kava davara dekenai bamona.”—Efeso 4:13, 14.
20. Edena dala ai ita sibona ita gimaia, bena tomadiho koikoi ese ita do ia hakaua kerere lasi?
20 Edena dala ai ita sibona ita gimaia, bena tomadiho koikoi ese ita do ia hakaua kerere lasi? Mani Iehova ese ita dekenai ia henia gaudia ibounai ita laloa. Ita dekenai Dirava ena Hereva, Baibel ia noho. (2 Timoteo 3:16, 17) Iehova ese “hesiai tauna mai ena kamonai, bona mai ena kara maoromaoro” amo lauma aniani bada ia henia danu. (Mataio 24:45) Hereva momokani dekenai iseda diba ita habadaia neganai, do ita ura taunimanima badadia idia ania “aniani korikori” ita ania, bona do ita ura hebou dekenai ita lao, unai amo hereva momokani ita dibaia. (Heberu 5:13, 14; Salamo 26:8) Namona be Iehova ese ita dekenai ia henia gaudia ibounai ita gaukaralaia, unai amo ‘hereva momokani do ita badinaia noho.’ (2 Timoteo 1:13) Bona tomadiho koikoi amo ita gini siri diba.
Dahaka Oi Dibaia?
• “Babulonia badana” be dahaka?
• Dahaka ita karaia be namo tomadiho koikoi amo ita gini siri totona?
• Dahaka gaudia ese lauma dalanai ita idia hadikaia diba bona unai gaudia ita dadaraia be namo?
[Picture on page 10]
Baibel ese laulau dalanai “Babulonia badana” be ariara hahinena ia gwauraia ena badina oi diba, a?
[Picture on page 11]
“Babulonia badana” do idia hadikaia ore
[Picture on page 13]
Witnes lasi taudia dekenai iseda abidadama ita herevalaia neganai, “mai mataurai bona manau” ida ita hereva be namo